(4)

Is é atá sa táirge faoi réir a chláraithe (‘an táirge lena mbaineann’), lisín agus a eistir, agus salainn díobh sin, agus breiseáin bheathaithe, ina bhfuil, ar bhonn meáchan tirim, cion 68 % nó níos mó ach nach mó ná 80 % de shulfáit L-lisín, agus cion nach mó ná 32 % de chomhpháirteanna eile amhail carbaihiodráití agus aimíonaigéid eile ar de thionscnamh Dhaon-Phoblacht na Síne iad. Is é 657-27-2 uimhir chláraithe Sheirbhís na gCoimrithe Ceimiceacha (CAS) le haghaidh hidreaclóiríd L-lísín, is é 56-87-1 an uimhir CAS le haghaidh an tuaslagáin uiscí de lísín, agus is iad 60343-69-3 agus 94195-18-3 na huimhreacha CAS le haghaidh sulfáit lísín

(5)

Faoi Airteagal 14(5) de Rialachán (AE) 2016/1036 (‘an bun-Rialachán’), i dtaca le hAirteagal 12(5) den bhun-Rialachán, féadfar allmhairí an táirge lena mbaineann a chur faoi réir a gcláraithe, i gcás ina mbeidh athscrúdú ar ghnáthluachanna i gceist le hath-imscrúdú ionsúcháin. Chuir ceann de na táirgeoirí onnmhairiúcháin a sampláladh san imscrúdú thuasluaite iarraidh isteach, an 15 Meitheamh 2026, ar athríomh an ghnáthluacha agus é cuí-réasúnaithe le fianaise.

(6)

Is é is cuspóir don chlárú a áirithiú gur féidir dleachtanna frithdhumpála, más ann dóibh, a thobhach go cúlghabhálach ar na hallmhairí atá faoi réir a gcláraithe i gcomhréir leis na forálacha dlí is infheidhme, má chomhlíontar na coinníollacha is gá.

(7)

Chinn an Coimisiún, ar a thionscnamh féin, allmhairí an táirge lena mbaineann a chur faoi réir a gcláraithe faoi Airteagal 14(5) den bhun-Rialachán. Na coinníollacha le haghaidh bhailiú cúlghabhálach na ndleachtanna, déanfar measúnú orthu sa Rialachán lena dtugtar i gcrích an imscrúdaithe ionsúcháin.

(8)

Aon dliteanas a bheadh ann amach anseo, is as torthaí an imscrúdaithe ionsúcháin a thiocfadh sé.

(9)

De réir na ríomhanna a sholáthraítear san iarraidh ar an imscrúdú frithdhumpála a athoscailt, meastar gur tháinig méadú ar na corrlaigh dhumpála ó 53,1 % sa tréimhse imscrúdúcháin bhunaidh (an 1 Eanáir 2023 go dtí an 31 Nollaig 2023) go 88,4 % sa tréimhse lena mbaineann an t-imscrúdú ionsúcháin ón 1 Aibreán 2025 go dtí an 31 Márta 2026. I gcomhréir le hAirteagal 12(3) den bhun-Rialachán, ní bheidh méid na dleachta frithdhumpála a fhorchuirfear mar thoradh ar an imscrúdú ionsúcháin níos mó ná dhá oiread na dleachta a forchuireadh ar dtús.

(10)

Mar sin féin, ag an gcéim seo ní féidir leis an gCoimisiún an méid dliteanais a d’fhéadfadh a bheith ann amach anseo a mheas. Dá bhrí sin, is ar mhaithe le faisnéis amháin atá na méideanna a luaitear san iarraidh agus ní féidir aon choinne a bheith ann, bunaithe ar na méideanna sin, leis an leibhéal iarbhír dliteanais a shuífear mar thoradh ar an imscrúdú.

(11)

Aon sonraí pearsanta a bhailítear i gcomhthéacs an chlárúcháin seo, déanfar iad a láimhseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin (4),