(1)

Tá feidhm ag Cinneadh 2002/994/CE ón gCoimisiún (2) maidir le gach táirge de bhunadh ainmhíoch ón tSín a bheartaítear lena chaitheamh ag an duine nó lena úsáid mar bheatha ainmhithe.

(2)

De bhun Airteagal 2(1) den Chinneadh sin, tá na Ballstáit le toirmeasc a chur ar theacht isteach na dtáirgí sin, agus foráiltear le hAirteagal 2(2) de maidir le dhá mhaolú ar an toirmeasc ginearálta sin.

(3)

Faoin gcéad mhaolú, tá na Ballstáit le hallmhairiú táirgí a liostaítear i gCuid I den Iarscríbhinn a ghabhann le Cinneadh 2002/994/CE a údarú i gcomhréir leis na coinníollacha sonracha sláinte ainmhithe agus sláinte poiblí is infheidhme maidir leis na táirgí lena mbaineann.

(4)

Faoin dara maolú, tá na Ballstáit le hallmhairí táirgí a liostaítear i gCuid II den Iarscríbhinn a ghabhann le Cinneadh 2002/994/CE a údarú, ar táirgí iad a bhfuil dearbhú ag gabháil leo ó údarás inniúil na Síne, dá dtagraítear in Airteagal 3 den Chinneadh sin, ina luaitear go bhfuil tástáil cheimiceach déanta ar gach coinsíneacht, chun a áirithiú nach gcuireann na táirgí lena mbaineann sláinte ainmhithe nó sláinte an duine i mbaol.

(5)

Ar an gcaoi chéanna le glúcósaimín, faightear ciotósán go príomha trí chitin a hidrealú ó bhlaoscanna feithidí agus crústach. Tá ciotósán ina pholaisiúicríd atá comhdhéanta d’aonaid ghlúcósaimín. Tá an dá tháirge beartaithe lena n-úsáid mar bheatha ainmhithe, mar is léir ó iontráil 13.2.8 i gCuid C den Iarscríbhinn a ghabhann le Rialachán (AE) Uimh. 68/2013 ón gCoimisiún (3). Ina theannta sin, liostaítear an dá tháirge mar tháirgí an-mhínphróiseáilte i bpointí 1(d) agus (e) de Roinn XVI d’Iarscríbhinn III a ghabhann le Rialachán (CE) Uimh. 853/2004 ó Pharlaimint na hEorpa agus ón gComhairle (4) agus, dá bhrí sin, tá siad faoi réir an cheanglais chéanna go gcuirfeadh cóireáil na n-amhábhar de bhunadh ainmhíoch a úsáidtear chun na táirgí sin a mhonarú deireadh le haon riosca sláinte ainmhithe nó poiblí. Mar sin féin, cé go liostaítear glúcósaimín i gCuid I den Iarscríbhinn a ghabhann le Cinneadh 2002/994/CE, agus dá bhrí sin go n-údaraítear é lena theacht isteach san Aontas ón tSín gan an dearbhú dá dtagraítear in Airteagal 3 den Chinneadh sin, ní liostaítear ciotósán ar an mbealach céanna faoi láthair.

(6)

Dá bhrí sin, is iomchuí an chéad mhaolú ar an toirmeasc ar allmhairiú táirgí áirithe isteach san Aontas ón tSín, dá bhforáiltear in Airteagal 2(2) de Chinneadh 2002/994/CE, a chur i bhfeidhm maidir le ciotósán freisin trína chur leis an liosta de tháirgí a bheartaítear lena gcaitheamh ag an duine nó lena n-úsáid mar bheatha ainmhithe ón tSín a údaraítear lena dteacht isteach gan an dearbhú dá dtagraítear in Airteagal 3 den Chinneadh sin.

(7)

Dá bhrí sin, ba cheart Cuid I den Iarscríbhinn a ghabhann le Cinneadh 2002/994/CE a leasú dá réir.

(8)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,