(1)

Le Treoir (AE) 2019/904 leagtar síos spriocanna maidir leis an íosmhéid ábhair phlaistigh athchúrsáilte i mbuidéil deochanna phlaisteacha aon úsáide a liostaítear i gCuid F den Iarscríbhinn a ghabhann leis an Treoir sin, lena n-áirítear buidéil TPE. Tá na Ballstáit chun sonraí a thuairisciú maidir le hábhar plaisteach athchúrsáilte i mbuidéil TPE le haghaidh gach bliana féilire.

(2)

Le Cinneadh Cur Chun Feidhme (AE) 2023/2683 ón gCoimisiún (2), leagadh síos an mhodheolaíocht chun na spriocanna i ndáil le hábhar plaisteach athchúrsáilte a ríomh agus a fhíorú agus an fhormáid chun sonraí a thuairisciú maidir le hábhar plaisteach athchúrsáilte i mbuidéil deochanna. Tá an mhodheolaíocht sin bunaithe ar shonraí arna nginiúint i gcomhréir le Rialachán (AE) 2022/1616 ón gCoimisiún (3).

(3)

Is iad an athchúrsáil mheicniúil iarthomhaltais TPE agus an athchúrsáil ó lúba táirge i slabhraí iata rialaithe, agus iad sin amháin, na teicneolaíochtaí athchúrsála oiriúnacha dá dtagraítear i Rialachán (AE) 2022/1616. Chun gur féidir le modheolaíochtaí athchúrsála breise nach gcumhdaítear leis an Rialachán sin rannchuidiú leis na spriocanna a bhaint amach i ndáil le hábhar athchúrsáilte a leagtar síos i dTreoir (AE) 2019/904, is gá rialacha breise a bhunú maidir le hábhar plaisteach athchúrsáilte a dhíorthaítear ó na modheolaíochtaí athchúrsála breise sin a ríomh, a fhíorú agus a thuairisciú. Go sonrach, is gá cuntasaíocht mhaischothromaíochta, mar a thugtar uirthi, a thabhairt isteach, ar cuntasaíocht í a bhfuil breiseanna móra leis an modheolaíocht atá ann cheana ag teastáil ina leith. Ar mhaithe le soiléireacht agus deimhneacht dhlíthiúil, agus an líon rialacha nua agus athruithe ar na rialacha atá ann cheana a bhfuil gá leo á gcur san áireamh, ba cheart Cinneadh Cur Chun Feidhme (AE) 2023/2683 a aisghairm.

(4)

De réir mar a chuirtear leis na hiarrachtaí domhanda chun srian a chur leis an mborradh faoin truailliú plaisteach, meastar go dtiocfaidh forbairt ar fud an domhain ar mhargadh le haghaidh plaistigh athchúrsáilte, bíodh sin ó athchúrsáil mheicniúil nó athchúrsáil cheimiceach, agus ó na slabhraí soláthair gaolmhara. Tá gá le rialacha soiléire chun a áirithiú gur féidir ábhar athchúrsáilte a thuairisciú ar bhealach trédhearcach, infhíoraithe agus inchomparáide, sna modheolaíochtaí agus sna próisis athchúrsála uile atá ann cheana. Le rialacha an Aontais, ba cheart creat a chur ar fáil don chur chuige idirnáisiúnta a bheidh ann amach anseo, d’fhonn cothrom iomaíochta ar fud an domhain a áirithiú.

(5)

Is féidir le hathchúrsáil cheimiceach dramhaíl phlaisteach atá deacair nó dodhéanta a athchúrsáil go meicniúil a chóireáil agus is féidir feidhmíocht cháilíochta agus feidhmíocht theicniúil níos fearr a bhaint amach maidir le haschuir athchúrsáilte. Chun acmhainneacht iomlán an gheilleagair chiorclaigh a bhaint amach, ba cheart athchúrsáil cheimiceach a bheith ina comhlánú ar athchúrsáil mheicniúil, rud is fearr i gcoitinne ó thaobh an chomhshaoil de, i gcás ina mbaintear feidhmíocht leordhóthanach cháilíochta agus theicniúil amach léi maidir le haschuir athchúrsáilte.

(6)

Agus é mar chuspóir creat simplí intuartha a bhunú lena gcumasófar na modheolaíochtaí agus na próisis athchúrsála uile lenar féidir sochair chomhshaoil a ghiniúint don gheilleagar ciorclach maidir le plaistigh chun inmharthanacht eacnamaíoch a bhaint amach freisin, ba cheart na modheolaíochtaí agus na próisis athchúrsála uile a chumhdach le rialacha tuairiscithe an Aontais maidir le hábhar athchúrsáilte. Leis na rialacha sin, ba cheart aistriú thionscal ceimiceach an Aontais chuig ciorclaíocht a éascú freisin trí úsáid bunábhar malartach a spreagadh agus spleáchais ar ógh-acmhainní iontaise a laghdú.

(7)

Plaisteach athchúrsáilte i mbuidéil deochanna a fhaightear trí athchúrsáil mheicniúil ar teicneolaíocht athchúrsála oiriúnach í de réir bhrí Rialachán (AE) 2022/1616 nó trí theicneolaíochtaí athchúrsála eile ar teicneolaíochtaí athchúrsála oiriúnacha nó teicneolaíochtaí núíosacha iad de réir bhrí an Rialacháin sin, arb eol an cion den ábhar a eascraíonn as dramhaíl phlaisteach iarthomhaltais san aschur ina leith agus nach n-úsáidtear aon dramhaíl phlaisteach eile seachas dramhaíl phlaisteach iarthomhaltais mar ionchur ina leith, ba cheart é a chur san áireamh i gcomhréir le Rialachán (AE) 2022/1616 chun sonraí maidir le hábhar plaisteach athchúrsáilte i mbuidéil deochanna a ríomh, a thuairiscí agus a fhíorú.

(8)

Plaisteach athchúrsáilte ó dhramhaíl phlaisteach iarthomhaltais a fhaightear trí aon mhodh athchúrsála eile, lena n-áirítear athchúrsáil cheimiceach a n-athraítear struchtúr ceimiceach an ábhair lena linn, nó a tháirgtear ó mheascán de dhramhaíl phlaisteach réamhthomhaltais agus iarthomhaltais, ba cheart é a chur san áireamh freisin maidir le ríomh, fíorú agus tuairisciú sonraí maidir le hábhar plaisteach athchúrsáilte i mbuidéil deochanna atá le déanamh chun críocha Threoir (AE) 2019/904. I gcás ina dtéann dramhaíl phlaisteach trí phróiseas athchúrsála ina ndéantar na polaiméirí a dhianscaoileadh agus ina n-úsáidtear na substaintí a eascraíonn as sin, ar minic iad a bheith comhcheangailte d’amhábhair phríomhúla, chun polaiméirí nua agus, b’fhéidir, táirgí eile a tháirgeadh, is gá cuntasaíocht mhaischothromaíochta a chur i bhfeidhm toisc nach eol cion an ábhair incháilithe sna haschuir de ghnáth. Áirithítear le cuntasaíocht mhaischothromaíochta go mbíonn meáchan an ábhair a eascraíonn as dramhaíl phlaisteach iarthomhaltais ag an ionchur cothrom le meáchan an ábhair a eascraíonn as dramhaíl phlaisteach iarthomhaltais de réir na n-aschur agus na gcaillteanas uile.

(9)

Le linn athchúrsáil cheimiceach, bristear struchtúr ceimiceach an ionchuir dramhaíola plaistí iarthomhaltais, agus ní polaiméir fós an t-ábhar a eascraíonn as sin de ghnáth go dtí go n-athpholaiméirítear é. Dá bhrí sin, ba cheart ‘ábhar incháilithe’ a thabhairt ar ábhar a eascraíonn as dramhaíl phlaisteach iarthomhaltais. Ag brath ar an gcéim laistigh den phróiseas athchúrsála, d’fhéadfadh stádas dramhaíola nó neamhdhramhaíola a bheith ag ‘ábhar incháilithe’.

(10)

I gcás ina gcuirtear cuntasaíocht mhaischothromaíochta i bhfeidhm ag céim ar leith sa slabhra soláthair, ba cheart í a chur i bhfeidhm ag na céimeanna uile ina dhiaidh sin freisin toisc go dtugtar le tuiscint lena húsáid ag céim níos luaithe nach eol cion an ábhair incháilithe sna hionchuir aonair uile agus, dá bhrí sin, nárbh eol é san aschur.

(11)

Ag céimeanna sa slabhra soláthair ina bhfuil idir ábhair ionchuir agus ábhair aschuir araon comhdhéanta de pholaiméirí, amhail tar éis athpholaiméiriú i gcás athchúrsáil cheimiceach, bheadh aschuir arb eol a gcion mar thoradh ar mheascadh ábhar arb eol a gcion. Ag na céimeanna sin, dá bhrí sin, ní bhíonn gá le hath-leithdháileadh breise méideanna sannta ábhair incháilithe agus níor cheart é a cheadú.

(12)

De bhun Threoir (AE) 2019/904, ní mór do na Ballstáit faisnéis maidir le hábhar plaisteach athchúrsáilte i mbuidéil TPE a thuairisciú don Choimisiún chun a léiriú gur baineadh amach an sprioc maidir leis an ábhar sin (an ‘sprioc’). Cé go dtagraíonn ábhar athchúrsáilte don mhéid ábhair athchúrsáilte, sloinntear an sprioc mar chéatadán, is é sin, mar chion an phlaistigh athchúrsáilte i mbuidéil TPE. Chun a léiriú gur bhain siad an sprioc amach, ba cheart do na Ballstáit ní hamháin suim mheáchan an ábhair phlaistigh athchúrsáilte i mbuidéil TPE a thuairisciú, ach suim mheáchan chodanna plaisteacha uile na mbuidéal féin a thuairisciú freisin ionas gur féidir cion an ábhair phlaistigh athchúrsáilte a ríomh.

(13)

Ós rud é gurb é cuspóir na spriocanna glacadh an phlaistigh athchúrsáilte sa mhargadh a chur chun cinn, arb é is aidhm dóibh úsáid chiorclach plaisteach a áirithiú, is iomchuí gan ach codanna plaisteacha a chur san áireamh agus meáchan na mbuidéal deochanna á ríomh. Ós rud é go meastar gurb é 5 % ar a mhéad dá mheáchan a bhíonn sna codanna neamhphlaisteacha de ghnáth-bhuidéal deochanna, mar shampla i bhfoirm lipéad páipéir, meastar nach mbíonn aon tionchar ar an measúnú mór ag eisiamh na gcodanna neamhphlaisteacha de bhuidéil TPE ón ríomh i dtaobh bhaint amach na sprice.

(14)

Sonraítear le Treoir (AE) 2019/904 go bhfuil caipíní agus cláir ina gcuid de bhuidéil TPE. Mar sin féin, chun an sprioc i ndáil le hábhar plaisteach athchúrsáilte a ríomh agus a fhíorú, ba cheart lipéid agus clúdaigh a mheas mar chodanna de bhuidéil TPE freisin. Ar an gcéad dul síos, is éard atá i mbuidéal TPE, san fhormáid ina ndíoltar é go coitianta le tomhaltóirí, a chorp, a chaipín, a chlár, agus lipéad nó clúdach. Úsáidtear lipéid agus clúdaigh chun faisnéis a chur in iúl do thomhaltóirí, lena n-áirítear é sin a dhéanamh chun críoch brandála agus fógraíochta. Cé gur minic a théann clúdaigh 360 céim timpeall an bhuidéil, is minic nach gcumhdaíonn lipéid eile ach cuid níos lú den bhuidéal. Ar an dara dul síos, is minic a cheanglaítear lipéid agus clúdaigh den bhuidéal ag an gcéim táirgthe chéanna le caipíní agus cláir. Dá bhrí sin, ba cheart meáchan na lipéad agus na gclúdach a chuimsiú i meáchan na mbuidéal TPE, agus ba cheart aon phlaisteach athchúrsáilte atá sna lipéid agus sna clúdaigh a chuimsiú i meáchan an phlaistigh athchúrsáilte i mbuidéil TPE.

(15)

Chun an t-ábhar plaisteach athchúrsáilte i mbuidéil TPE a ríomh agus a fhíorú, ba cheart an téarma ‘plaisteach athchúrsáilte’ a shainmhíniú sa chaoi nach gcuimseofar ach ábhar a dhíorthaítear ó dhramhaíl phlaisteach iarthomhaltais. Tá an t-idirdhealú sin tábhachtach toisc go bhfuil dreasachtaí margaidh leordhóthanacha ann cheana féin chun dramhaíl phlaisteach réamhthomhaltais a athchúrsáil. Maidir le dramhaíl phlaisteach a eascraíonn as pacáistíocht táirgí a chuirtear ar an margadh ach a bhfuil a ndáta éaga caite sula ndíoltar le tomhaltóirí iad, ba cheart í a mheas mar dhramhaíl phlaisteach iarthomhaltais. Os a choinne sin, níor cheart ábhair phlaisteacha agus dramhaíl phlaisteach a ghintear le linn próisis mhonaraíochta, lena n-áirítear an phróiseáil thánaisteach, an tástáil, an stóráil agus na haistrithe uile sula gcuirtear an táirge ar an margadh, a mheas mar dhramhaíl iarthomhaltais.

(16)

Maidir leis an bplaisteach athchúrsáilte a úsáidtear chun baint amach na sprice a ríomh agus a fhíorú, ba cheart é a fháil ó dhramhaíl phlaisteach iarthomhaltais a athchúrsáladh (lena n-áirítear dramhaíl shórtáilte) ar bhealach atá neamhdhíobhálach don chomhshaol. Tá sé fíor-riachtanach ardchaighdeáin chomhshaoil a chaomhnú le haghaidh athchúrsála chun an breisluach comhshaoil a bhaineann le hábhar athchúrsáilte a chur chun cinn a chaomhnú agus chun cásanna a sheachaint ina mbaineann cleachtais neamhleora bailithe agus bainistithe dramhaíola chomh maith le hastaíochtaí truailleán an bonn de na tairbhí inbhuanaitheachta a bhaineann le hábhair athchúrsáilte a chur in ionad ógh-ábhar.

(17)

Déantar idirdhealú i Rialachán (AE) 2024/1157 ó Pharlaimint na hEorpa agus ón gComhairle (4) idir na tíortha a bhfuil feidhm ag an gCinneadh ón gComhairle um Rialú Gluaiseachtaí Trasteorann Dramhaíolacha atá Beartaithe le haghaidh Oibríochtaí Aisghabhála maidir leis an Eagraíocht um Chomhar agus Forbairt Eacnamaíochta (‘Cinneadh ECFE’) (5) maidir leo agus na tíortha nach bhfuil feidhm aige maidir leo. Ón 21 Samhain 2026 ar aghaidh, beidh toirmeasc ar dhramhaíl phlaisteach a onnmhairiú chuig tíortha nach tíortha ECFE iad go dtí an 21 Bealtaine 2029 faoin Rialachán sin agus beidh an deis ag tíortha nach tíortha ECFE iad iarratas a dhéanamh ar mhaoluithe tar éis an dáta sin.

(18)

I bhfianaise na leibhéal éagsúil caighdeán agus acmhainneachtaí bonneagair maidir le bainistiú dramhaíola plaistí i dtíortha a bhfuil feidhm ag Cinneadh ECFE maidir leo, agus i bhfianaise éiginnteacht thionchar an toirmisc ar shreafaí trádála dramhaíola plaistí, ba cheart tús a chur le plaisteach athchúrsáilte ó thíortha a bhfuil feidhm ag Cinneadh ECFE maidir leo a áireamh sa sprioc shainordaitheach maidir le hábhar athchúrsáilte le haghaidh buidéil TPE ón 21 Samhain 2027 agus ón dáta sin amháin. Faoin dáta sin, ba cheart don Choimisiún a mheasúnú a sholáthar agus a chinneadh a ghlacadh de bhun Airteagal 45(5) agus (6) de Rialachán (AE) 2024/1157, tar éis dó measúnú a dhéanamh ar argóintí na dtríú tíortha dá ndéantar difear. Leis an tráthchlár sin, beidh na Ballstáit in ann a mbailiú agus a dtuairisciú sonraí a choigeartú freisin.

(19)

Maidir le dramhaíl phlaisteach iarthomhaltais a athchúrsáladh (lena n-áirítear dramhaíl shórtáilte) i dtíortha nach bhfuil feidhm ag cinneadh ECFE maidir leo, níor cheart cead a thabhairt í a áireamh i dtreo na sprice ach amháin má thugtar comhaontuithe nó socruithe leis an Aontas i gcrích lena n-áirithítear bainistiú dramhaíola plaistí atá neamhdhíobhálach don chomhshaol. Tá an ceanglas sin sa bhreis ar cheanglais dhlíthiúla eile is infheidhme de chuid an Aontais, amhail na ceanglais sin a bhunaítear faoi Rialachán (AE) 2022/1616, agus tá sé gan dochar dóibh.

(20)

D’ainneoin na rialacha a leagtar síos maidir le ríomh na spriocanna i dtaca le hábhar athchúrsáilte, is féidir plaisteach athchúrsáilte a allmhairiú chun buidéil deochanna phlaisteacha a mhonarú i gcomhréir leis na rialacha is infheidhme de chuid an Aontais.

(21)

Le Rialachán (AE) 2022/1616, bunaítear slabhra tuairiscithe ar feadh céimeanna monaraíochta comhleanúnacha lena n-áirítear tuairisciú ar chéatadán an phlaistigh athchúrsáilte i ngach baisc ábhair ina bhfuil plaisteach athchúrsáilte agus atá beartaithe lena theacht i dteagmháil le bianna. Chun an t-ualach riaracháin ar oibreoirí eacnamaíocha a choinneáil beag, ba cheart an fhaisnéis sin a úsáid freisin chun an t-ábhar athchúrsáilte i mbuidéil TPE a ríomh, fiú má tá éagsúlacht bheag idir na sainmhínithe ar ‘phlaisteach’ agus ar ‘phlaisteach athchúrsáilte’ is infheidhme maidir le Rialachán (AE) 2022/1616 agus na sainmhínithe sin is infheidhme maidir leis an gCinneadh seo. Tá an fhaisnéis a sholáthraítear faoi Rialachán (AE) 2022/1616 le comhlánú le faisnéis faoi thionscnamh an ábhair chun raon feidhme geografach an Chinnidh seo a léiriú. Ba cheart do na hoibreoirí eacnamaíocha a chuireann buidéil TPE ar an margadh meáchan an phlaistigh athchúrsáilte sna buidéil sin a ríomh bunaithe ar an gcéatadán den ábhar plaisteach athchúrsáilte a léirítear mar aon leis na dearbhuithe comhlíontachta faoi Rialachán (AE) 2022/1616.

(22)

Chun críocha Airteagal 13(1), pointe (e) de Threoir (AE) 2019/904, tá an cion an phlaistigh athchúrsáilte i mbuidéal TPE le ríomh nuair a chuirtear ar an margadh i mBallstát é (‘an pointe ríomha deiridh’). Faoi láthair, ní féidir an t-ábhar plaisteach athchúrsáilte a thomhas go hanailíseach ar bhealach iontaofa ag an bpointe ríomha deiridh. Dá bhrí sin, is gá an t-ábhar plaisteach athchúrsáilte a chinneadh ag céimeanna níos luaithe sa slabhra soláthair, trí phointí ríomha breise, chun go bhféadfar ríomh cruinn a dhéanamh ag an bpointe ríomha deiridh. Bíonn gá le pointe ríomha nuair a athraíonn ábhar a fuarthas go páirteach ar a laghad ó ábhar incháilithe a chomhdhéanamh ceimiceach nó fisiceach, go háirithe nuair a mheasctar an t-ábhar sin le hábhar eile, amhail ógh-pholaiméirí, ógh-bhreiseáin nó ábhar a eascraíonn as dramhaíl phlaisteach nach dramhaíl phlaisteach iarthomhaltais í. Ag pointí ríofa éagsúla feadh conaire athchúrsála, d’fhéadfadh feidhm a bheith ag modhanna éagsúla chun meáchan an ábhair incháilithe nó méideanna sannta sna haschuir a ríomh ag brath ar chéim an phróisis agus ar an modh athchúrsála a chuirtear i bhfeidhm.

(23)

Níor cheart cead a thabhairt d’oibreoirí eacnamaíocha sa slabhra soláthair plaisteach athchúrsáilte a chuireann cuntasaíocht mhaischothromaíochta i bhfeidhm a gcuntas ar mhéideanna sannta ábhair incháilithe a rótharraingt aon tráth, rud a chiallaíonn nár cheart iarmhéid diúltach a bheith sa chuntas. Thabharfadh iarmhéid diúltach méideanna sannta le tuiscint go bhfuil níos mó ábhar incháilithe díolta ag na hoibreoirí eacnamaíocha ná mar atá táirgthe nó ceannaithe acu.

(24)

Chun cuntasaíocht mhaischothromaíochta a chur i bhfeidhm, is gá rialacha a bhunú maidir leis an gcaoi ar féidir an t-ábhar ionchuir incháilithe a leithdháileadh ar na haschuir i gcás próisis il-aschuir. Léiríonn na rialacha a leagtar síos sa Chinneadh seo an cur chuige ar a dtugtar ‘úsáid breosla eisiata’, rud a chiallaíonn gur cheart d’oibreoirí eacnamaíocha ag gach pointe ríomha ábhar incháilithe a phróiseáiltear go breoslaí nó caillteanais ó ríomh an ábhair athchúrsáilte a asbhaint, chun Airteagal 3(17) de Threoir 2008/98/CE ó Pharlaimint na hEorpa agus ón gComhairle (6) a chomhlíonadh. Tá feidhm aige sin freisin maidir le haschuir dhé-úsáide, i.e. aschuir idirmheánacha is féidir a phróiseáil a thuilleadh go táirgí breosla agus táirgí neamhbhreosla araon, atá i bhfoirm ghásach nó leachtach. Níor cheart sciar coibhneasta an ábhair incháilithe in aschuir dhé-úsáide a bheidh ina bhreosla a áireamh mar ábhar athchúrsáilte. Ba cheart aschuir dhé-úsáide i bhfoirm sholadach, amhail gualán, a chur as an áireamh go hiomlán i dtaobh ríomh an ábhair athchúrsáilte toisc go meastar nach bpróiseálfar iad go táirgí ardluacha neamhbhreosla sa chleachtas ar scála ábhartha amach anseo.

(25)

Chun cur le trédhearcacht an phróisis, cuirtear inrianaitheacht cheimiceach i bhfeidhm, rud a chiallaíonn gur cheart an riail maidir le leithdháileadh i dtaca le ‘húsáid breosla eisiata’ a chomhlánú le forálacha breise chun a áirithiú nach mó an méid sannta d’ábhar incháilithe ná an méid d’ábhar incháilithe is féidir a bheith i dtáirge go teoiriciúil.

(26)

Níor cheart méideanna sannta ábhair incháilithe a aistriú ar fud saoráidí éagsúla cuideachta ná ar fud cuideachtaí éagsúla toisc go gcuirfeadh sé sin castacht le ríomh agus fíorú na méideanna sannta. Níor cheart, áfach, é sin a bheith ina chosc ar ábhar lena mhéideanna sannta a bhogadh go fisiceach idir saoráidí éagsúla cuideachta nó idir cuideachtaí éagsúla gan a méideanna sannta a ath-leithdháileadh, ar choinníoll go bhfuil an doiciméadacht is gá ag gabháil leis an ábhar chun comhlíontacht an Chinnidh seo a áirithiú, agus go háirithe chun inrianaitheacht a áirithiú agus an bonn leis an ríomh a thabhairt i gcás meascadh ina dhiaidh sin le hábhair eile.

(27)

Chun a áirithiú go mbainfear amach na sochair chomhshaoil a bhaineann le spriocanna íosta maidir le hábhar plaisteach athchúrsáilte a chomhlíonadh agus chun cosc a chur le imchéimniú a d’fhéadfadh an bonn a bhaint de na sochair sin, ba cheart do na Ballstáit forálacha a thabhairt isteach chun na sonraí agus an fhaisnéis a bhailíonn siad ó na hoibreoirí eacnamaíocha a chuireann buidéil TPE ar an margadh a fhíorú. Ba cheart d’oibreoirí eacnamaíocha, le haghaidh gach baisce ábhair ina bhfuil méideanna sannta ábhair incháilithe, dearbhú a tháirgeadh agus a sholáthar dá gcustaiméirí ina n-áirítear faisnéis ábhartha maidir leis na méideanna sannta. Níor cheart d’oibreoirí eacnamaíocha nach dtugann aon athrú ábhartha isteach ach an dearbhú a fhaigheann siad óna soláthróirí a tharchur. Ina theannta sin, ba cheart oibreoirí a phróiseálann ábhar nach bhfuil comhdhéanta de pholaiméirí, ag céim an ionchuir agus ag céim an aschuir araon, a bheith faoi réir fíorú tríú páirtí. Ba cheart leis an bhfíorú sin an fhaisnéis uile is ábhartha maidir le leithdháileadh ábhair incháilithe faoi chuntasaíocht mhaischothromaíochta a chumhdach, amhail méideanna a bhaineann go sonrach le próiseas agus catagóiriú ionchur agus aschur, cuair fiuchphointe, agus fianaise go bhfuil ábhar incháilithe fós ar an gconair athchúrsála. Ba cheart na deimhnithe arna n-eisiúint ag fíoraitheoirí ag an gcéim dheireanach i bpróiseas athchúrsála ceimicí a thabhairt ar aghaidh feadh an tslabhra soláthair, suas go dtí na líontóirí de ghnáth, chun é a chur ar a gcumas do na Ballstáit iad a bhailiú ó na hoibreoirí eacnamaíocha a chuireann buidéil deochanna ar an margadh.

(28)

I gcás ina dtarlaíonn próiseáil ábhar ina bhfuil méideanna sannta i dtríú tír agus ina n-allmhairítear an t-ábhar a eascraíonn as sin, ba cheart do na Ballstáit cruinneas na faisnéise a ghabhann leis an ábhar a fhíorú chun a áirithiú gur comhlíonadh rialacha an Chinnidh seo.

(29)

Tá dlúthnasc idir na rialacha maidir le ríomh agus fíorú na sprice agus an fhormáid chun sonraí agus faisnéis faoi ábhar plaisteach athchúrsáilte a thuairisciú toisc go dtagraítear leo don phlaisteach athchúrsáilte céanna sna buidéil chéanna. Chun comhleanúnachas a áirithiú, ba cheart na rialacha maidir leis an sprioc a ríomh agus a fhíorú agus an fhormáid chun sonraí agus faisnéis a thuairisciú a leagan síos in aon ghníomh dlí amháin.

(30)

San fhormáid chun sonraí agus faisnéis a thuairisciú cuirtear san áireamh na modhanna tomhais agus na formáidí tuairiscithe le haghaidh pacáistíochta agus dramhaíl ó phacáistíocht a leagtar amach i gCinneadh 2005/270/CE ón gCoimisiún (7), atá bunaithe ar mheáchan agus ar ábhar freisin.

(31)

Is seirbhís phoiblí dhigiteach trasteorann é an faireachán ar ábhar plaisteach athchúrsáilte i mbuidéil TPE de réir bhrí Rialachán (AE) 2024/903 ó Pharlaimint na hEorpa agus ón gComhairle (8). Leis an gCinneadh seo, tugtar isteach ceanglais cheangailteacha nua a dhéanann difear don tseirbhís phoiblí dhigiteach thuasluaite sin, agus, dá bhrí sin, tá sé faoi réir na hoibleagáide maidir le measúnú idir-inoibritheachta a leagtar amach in Airteagal 3 de Rialachán (AE) 2024/903. Dá réir sin, rinneadh measúnú idir-inoibritheachta, agus tá an tuarascáil a thiocfaidh as sin le foilsiú ar an Tairseach um Eoraip Idir-inoibritheach.

(32)

Ba cheart dramhaíl phlaisteach a phróiseáil tríd an modh athchúrsála is mó lena laghdaítear an tionchar diúltach ar an gcomhshaol, agus cáilíocht riachtanach an ábhair athchúrsáilte agus inmharthanacht eacnamaíoch na dteicneolaíochtaí éagsúla á gcur san áireamh. Agus an méid sin á chur san áireamh, is fearr modheolaíochtaí athchúrsála meicniúla ná modheolaíochtaí athchúrsála ceimicí i gcoitinne ó thaobh an chomhshaoil de, agus níor cheart, i bprionsabal, dramhaíl is féidir a athchúrsáil go meicniúil a dhul isteach in athchúrsáil cheimiceach más féidir leis an athchúrsáil mheicniúil ábhair athchúrsáilte ina bhfuil saintréithe cáilíochta nó feidhmíochta comhchosúla a tháirgeadh. Déanann an Coimisiún faireachán ar fhorbairt na dteicneolaíochtaí athchúrsála atá ar fáil, agus a bhfeidhmíocht eacnamaíoch agus chomhshaoil á cur san áireamh. Chun forbairtí teicneolaíocha ábhartha san earnáil athchúrsála a chur san áireamh, lena n-áirítear rolladh amach modheolaíochtaí athchúrsála ceimicí ar scála iomlán tráchtála ach gan bheith teoranta dó sin, ba cheart don Choimisiún athbhreithniú a dhéanamh dá réir sin ar an modheolaíocht, lena n-áirítear na rialacha maidir le leithdháileadh méideanna sannta, a bhunaítear sa Chinneadh seo, agus ba cheart dó breithniú a dhéanamh ar í a ailíniú leis na forálacha a leagtar amach in Airteagal 7(8) de Rialachán (AE) 2025/40 ó Pharlaimint na hEorpa agus ón gComhairle (9), i gcás inarb iomchuí.

(33)

Chun a áirithiú go mbainfear amach go héifeachtach cuspóirí an Aontais maidir le geilleagar ciorclach iomaíoch, agus a bheartais bainistithe dramhaíola, agus chun infheistíochtaí i ndí-iontaisiú thionscal na gceimiceán a chur chun cinn, mar a léirítear sa Phlean Gníomhaíochta maidir le Tionscal na gCeimiceán, leis an modheolaíocht chun ábhar plaisteach athchúrsáilte arna forbairt de bhun dhlíthe an Aontais amhail Airteagal 7(8) de Rialachán (AE) 2025/40 a ríomh, a fhíorú agus a thuairisciú, ba cheart an bunús dlí sonrach agus na cuspóirí sonracha a chur san áireamh, agus saintréithe na n-ábhar ábhartha agus na dteicneolaíochtaí athchúrsála a léiriú. Dá bhrí sin, an mhodheolaíocht a bhunaítear sa Chinneadh seo chun ábhar athchúrsáilte i mbuidéil TPE a chinneadh, ba cheart feidhm a bheith aici maidir leis an gcatagóir táirgí sin, agus maidir leis an gcatagóir sin amháin. Tá na bearta dá bhforáiltear leis an gCinneadh seo i gcomhréir leis an tuairim ón gCoiste a leagtar síos le hAirteagal 39 de Threoir 2008/98/CE,

(1)

ciallaíonn ‘plaisteach athchúrsáilte’ plaisteach ar dhramhaíl phlaisteach iarthomhaltais é sula ndearnadh athchúrsáil air, agus a táirgeadh trí athchúrsáil (lena n-áirítear sórtáil), mar a shainmhínítear in Airteagal 3, pointe (17), de Threoir 2008/98/CE, san Aontas. Ón 21 Samhain 2027 ar aghaidh, cumhdófar leis freisin dramhaíl phlaisteach iarthomhaltais a athchúrsáladh (lena n-áirítear dramhaíl shórtáilte):

(2)

ciallaíonn ‘dramhaíl phlaisteach iarthomhaltais’ dramhaíl a gineadh ó tháirgí plaisteacha:

(3)

ciallaíonn ‘buidéal deochanna’ buidéal deochanna plaisteach aon úsáide ina bhfuil toilleadh nach mó ná trí lítear, lena n-áirítear a chaipín, a chlár, a lipéad agus a chlúdach, más ann dóibh, ach gan na buidéil seo a leanas a áireamh:

(4)

Ciallaíonn ‘buidéal TPE’ buidéal deochanna a mhonaraítear as teireataláit phoileitiléine agus arb í an phríomh-chomhpháirt de í;

(5)

ciallaíonn ‘oibreoir eacnamaíoch’ aon cheann de na hoibreoirí seo a leanas, ar cuid den slabhra soláthair iad a fhágann go gcuirtear buidéil deochanna ar an margadh nó oibreoirí a chuireann buidéil deochanna ar an margadh:

(6)

ciallaíonn ‘teicneolaíocht athchúrsála’ teicneolaíocht athchúrsála mar a shainmhínítear in Airteagal 2(3), pointe (1), de Rialachán (AE) 2022/1616;

(7)

ciallaíonn ‘ábhar incháilithe’ dramhaíl phlaisteach iarthomhaltais agus ábhar a eascraíonn as dramhaíl phlaisteach iarthomhaltais;

(8)

ciallaíonn ‘slabhra soláthair’ an tsraith próiseas nó gníomhaíochtaí a bhaineann le táirgeadh agus dáileadh buidéal deochanna;

(9)

ciallaíonn ‘pointe ríomha’ pointe sa slabhra soláthair ag a gcinntear ábhar an ábhair incháilithe i gcás ábhar ar leith;

(10)

ciallaíonn ‘baisc’ baisc mar a shainmhínítear in Airteagal 2(3), pointe (20), de Rialachán (AE) 2022/1616;

(11)

ciallaíonn ‘cuntasaíocht mhaischothromaíochta’ tacar rialacha ríomha a úsáidtear chun an méid sannta a chinneadh ar fud slabhra soláthair agus sna haschuir, i gcás ina n-úsáidtear an t-ábhar incháilithe in éineacht le hábhar eile mar ionchur sa phróiseas;

(12)

ciallaíonn ‘méid sannta’ meáchan an ábhair incháilithe a théann isteach i bpróiseas agus a leithdháiltear ar aschuir an phróisis ar feadh tréimhse ar leith;

(13)

ciallaíonn ‘catagóir aschuir’ grúpáil aschur in aon cheann de na catagóirí seo a leanas:

(14)

ciallaíonn ‘saoráid’ monarcha mhonaraíochta amháin nó níos mó ag an láithreán céanna, faoi rialú bainistíochta an oibreora eacnamaíoch chéanna, ina mbainistítear gníomhaíochtaí, táirgí agus seirbhísí, lena n-áirítear an bonneagar, an trealamh agus na hábhair ghaolmhara uile;

(15)

ciallaíonn ‘fíorú’ an próiseas trína bhfianaíonn fíoraitheoir go gcomhlíonann oibreoir eacnamaíoch na ceanglais maidir le ríomh na sonraí i dtaca le hábhar athchúrsáilte buidéal deochanna;

(16)

ciallaíonn ‘fíoraitheoir’ comhlacht um measúnú comhréireachta mar a shainmhínítear in Airteagal 2, pointe (13), de Rialachán (CE) Uimh. 765/2008 ó Pharlaimint na hEorpa agus ón gComhairle (12), agus atá creidiúnaithe i gcomhréir leis an Rialachán sin;

(17)

ciallaíonn ‘conair athchúrsála’ próiseas, lena n-áirítear a chéimeanna éagsúla, lena gcaomhnaítear an acmhainneacht ábhar incháilithe a phróiseáil go neamhbhreosla;

(18)

ciallaíonn ‘athchúrsáil mheicniúil’ teicneolaíocht athchúrsála lena n-aisghabhtar dramhaíl phlaisteach a bhailítear trí phróisis mheicniúla agus fhisiceacha, lena n-áirítear sórtáil, meilt, níochán, ábhair a dheighilt, triomú, easbhrú agus athchriostalú chun plaisteach a tháirgeadh gan struchtúr ceimiceach ionchur na dramhaíola plaistí a athrú;

(19)

ciallaíonn ‘fiuchphointe uasta inghlactha’, i gcás ina gcuirfear an t-ábhar incháilithe nó codanna de isteach in aon scoilteoir gaile amháin, fiuchphointe uasta inghlactha an scoilteora gaile sin nó, i gcás ina bpróiseálfaidh scoilteoirí gaile éagsúla an t-ábhar incháilithe nó codanna de, meán ualaithe na bhfiuchphointí uasta inghlactha de chuid na scoilteoirí gaile aonair uile.