(1)

I gcomhthéacs na timpeallachta Eorpaí Ionaid Ilfhreastail Mhuirí arna bhunú le Rialachán (AE) 2019/1239, féadfaidh dearbhóirí agus soláthraithe seirbhíse sonraí (seoltóirí) a n-oibleagáidí tuairiscithe a chomhlíonadh trí nasc idirchórasach leis an modúl comhéadain maidir le tuairisciú de na hIonaid Ilfhreastail Mhuirí Náisiúnta.

(2)

I dtaobh an mhodúil comhéadain maidir le tuairisciú, arna forbairt i gcomhréir le Rialachán Cur Chun Feidhme (AE) 2023/2790 ón gCoimisiún (2), cinntíonn sé idir-inoibritheacht theicniúil agus úsáid tacair chomhchuibhithe teachtaireachtaí le haghaidh malartú sonraí leis na hIonaid Ilfhreastail Mhuirí Náisiúnta. Sula malartaíonn seoltóirí sonraí le hIonad Ilfhreastail Muirí Náisiúnta tríd an modúl comhéadain maidir le tuairisciú, ní mór na mionsonraí nasctha a chumrú de láimh. Is gá é sin a dhéanamh freisin i gcás go n-athraíonn na mionsonraí nasctha. Ba cheart go sárófaí an tsaincheist sin leis an tseirbhís chomhchoiteann seolacháin trí chumraíocht uathoibríoch an naisc dhírigh idirchórasaigh a éascú.

(3)

Ba cheart don tseirbhís chomhchoiteann seolacháin aimsiú dinimiciúil a áirithíonn solúbthacht agus inscálaitheacht líonra na n-Ionad Ilfhreastail Mhuirí Náisiúnta a úsáid. Ba cheart do sheoltóirí a bheith in ann an tseirbhís chomhchoiteann seolacháin a úsáid chun nasc sonraí díreach idirchórasach a thionscnamh idir a bpointe rochtana AS4 agus modúl comhéadain maidir le tuairisciú trí na mionsonraí nasctha is déanaí ó mhodúl comhéadain maidir le tuairisciú a aisghabháil go huathoibríoch.

(4)

Ba cheart go n-íoslaghdódh an tseirbhís chomhchoiteann seolacháin an gá le hidirghabhálacha daonna agus, dá bhrí sin, ba cheart go laghdódh sí costais agus rioscaí earráide go comhréireach, agus an líonra a dhéanamh solúbtha nuair atá athrú i mionsonraí nasctha a rannpháirtithe, amhail faisnéis chríochphointe agus deimhniú poiblí.

(5)

Chun idir-inoibritheacht agus laghdú costas chur chun feidhme a áirithiú, ba cheart don tseirbhís chomhchoiteann seolacháin a bheith bunaithe ar na teicneolaíochtaí agus caighdeáin chéanna a úsáidtear le haghaidh an mhodúil comhéadain maidir le tuairisciú.

(6)

Ba cheart aitheantóirí na rannpháirtithe agus suíomh na nód foilsitheora a bheith sa nód aimsitheora lárnaigh, agus ba cheart é a óstáil go lárnach chun a áirithiú go gcoinnítear na sonraí sin cothrom le dáta sa Chóras Ainmneacha Fearainn (DNS) poiblí.

(7)

Chun athléimneacht na seirbhíse a fheabhsú agus chun riosca pointe aonair teipe a mhaolú, ba cheart do gach Ballstát a nód foilsitheora féin a óstáil ar cheart na mionsonraí nasctha uile is gá maidir leis an modúl comhéadain maidir le tuairisciú comhfhreagrach a bheith ann.

(8)

Chun inscálaitheacht agus solúbthacht údarás na mBallstát atá ag bainistiú na nIonad Ilfhreastail Muirí Náisiúnta a áirithiú freisin, ba cheart do na Ballstáit a bheith in ann mionsonraí nasctha pointe rochtana AS4 na seoltóirí a stóráil ina nóid foilsitheora, mar rogha ar na mionsonraí nasctha a réamhchumrú ina modúl comhéadain maidir le tuairisciú.

(9)

Chun go mbeidh a nód foilsitheora inaimsithe d’úsáideoirí na seirbhíse comhchoitinn seolacháin, chun cruinneas agus infhaighteacht sheoladh an nóid foilsitheora sa DNS poiblí a áirithiú, agus chun cosc a chur ar úsáideoirí na seirbhíse comhchoitinn seolacháin nóid foilsitheora dhíchoimisiúnaithe nó nóid foilsitheora nach ann dóibh a aimsiú, ba cheart do na Ballstáit a bheith in ann a mionsonraí nóid foilsitheora a chlárú, a thabhairt cothrom le dáta agus a scriosadh tríd an nód aimsitheora lárnaigh.

(10)

Is seirbhís phoiblí dhigiteach trasteorann iad na hIonaid Ilfhreastail Mhuirí Náisiúnta de réir brí Rialachán (AE) 2024/903 ó Pharlaimint na hEorpa agus ón gComhairle (3) (‘an Gníomh um Eoraip Idir-inoibritheach’). Leis an Rialachán seo, tugtar isteach ceanglais cheangailteacha nua a dhéanann difear don tseirbhís phoiblí dhigiteach/na seirbhísí poiblí digiteacha thuasluaite, agus, dá réir sin, tá sé faoi réir na hoibleagáide measúnaithe idir-inoibritheachta faoi Airteagal 3 den Ghníomh um Eoraip Idir-inoibritheach. Dá réir sin, rinneadh measúnú idir-inoibritheachta, agus tá an tuarascáil a thiocfaidh as sin le foilsiú ar an Tairseach um Eoraip Idir-inoibritheach,

(1)

ciallaíonn ‘aimsiú dinimiciúil’ sásra lena chuirtear ar a gcumas do phointí rochtana AS4 seoltóirí agus do mhodúil chomhéadain maidir le tuairisciú mionsonraí nasctha a fháil faoina chéile go huathoibríoch chun nasc díreach a thionscnamh.

(2)

ciallaíonn ‘r-Sheachadadh’ tacar sonraíochtaí teicniúla agus caighdeáin le haghaidh malartú teachtaireachtaí leictreonacha arna bhforbairt ag an gCoimisiún.

(3)

ciallaíonn ‘nód aimsitheora lárnaigh’ aimsitheoir meiteashonraí seirbhíse a chomhlíonann sonraíochtaí próifíle an r-Sheachadta (4) a éascaíonn aimsiú dinimiciúil tríd an gCóras Ainmneacha Fearainn poiblí (DNS).

(4)

ciallaíonn ‘nód foilsitheora’ foilsitheoir Meiteashonraí Seirbhíse a chomhlíonann sonraíochtaí próifíle an r-Sheachadta (5) a choinníonn mionsonraí nasctha na modúl comhéadain maidir le tuairisciú agus pointí rochtana AS4 na seoltóirí.

(5)

ciallaíonn ‘seirbhís chomhchoiteann seolacháin’ an tseirbhís dá dtagraítear in Airteagal 2(10) de Rialachán (AE) 2019/1239.