(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú agus a athnuachan.

(2)

Le Rialachán Cur Chun Feidhme (AE) 2015/1103 ón gCoimisiún (2), údaraíodh béite-caraitéin ar feadh 10 mbliana mar bhreiseán beathaithe le haghaidh gach speicis ainmhíoch. Le téarmaí an údaraithe ceadaítear béite-caraitéin a úsáid mar bhreiseán a bhfuil ullmhóid ann.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun údarú béite-caraitéine agus údarú ullmhóide arb é atá inti béite-caraitéin a athnuachan mar bhreiseáin bheathaithe le haghaidh gach speicis ainmhíoch, iarratas inar iarradh go n-aicmeofaí na breiseáin i gcatagóir na mbreiseán ‘breiseáin chothaitheacha’ agus san fheidhmghrúpa ‘vitimíní, próivitimíní agus substaintí atá dea-shainithe ó thaobh ceimiceán de, a bhfuil éifeacht chomhchosúil acu’. Bhí na sonraí agus na doiciméid a cheanglaítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas sin.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 25 Meitheamh 2025 (3) gur sholáthair an t-iarratasóir fianaise go bhfuil úsáid béite-caraitéine agus na hullmhóide arb é atá inti béite-caraitéin arna táirgeadh trí shintéis cheimiceach fós sábháilte do gach speiceas ainmhíoch agus do thomhaltóirí agus don chomhshaol faoi na coinníollacha a údaraítear faoi láthair. Ina theannta sin, luaigh an tÚdarás, i measc bia-ainmhithe, go bhféadfadh nochtadh breise a bheith mar thoradh ar ae ó laonna laofheola a ithe, mar sin d’fhéadfadh úsáid neamhtheoranta béite-caraitéine mar bhreiseán i mbainne púdrach a bheith ina hábhar imní maidir le sábháilteacht tomhaltóirí. Tháinig an tÚdarás ar an gconclúid freisin nach greannaitheoir craicinn agus súl ná íogróir craicinn é béite-caraitéin. Léiríodh nach íogróir craicinn é ceann de na hullmhóidí a ndearnadh meastóireacht orthu agus ina raibh 10 % béite-caraitéin. Mar sin féin, níorbh fhéidir teacht ar chonclúidí maidir le sábháilteacht úsáideoirí i gcás ullmhóidí eile. Luaigh an tÚdarás nach n-áirítear san iarratas ar athnuachan an údaraithe togra maidir le coinníollacha an údaraithe bunaidh a leasú ná a fhorlíonadh, ar togra é a mbeadh tionchar aige ar éifeachtúlacht na mbreiseán. Dá bhrí sin, tháinig sé ar an gconclúid nach gá measúnú a dhéanamh ar éifeachtúlacht na mbreiseán i gcomhthéacs na hathnuachana ar an údarú. Mheas an tÚdarás nach bhfuil gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas le linn an mheasúnaithe a rinneadh i ndáil leis an modh a úsáidtear chun anailís a dhéanamh ar bhéite-caraitéin mar bhreiseán beathaithe i gcomhthéacs an údaraithe roimhe seo, ba é meas na Saotharlainne Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (c), de Rialachán (CE) Uimh. 378/2005 ón gCoimisiún (4), níl gá le tuarascáil mheastóireachta ón tSaotharlann Tagartha dá bhrí sin.

(6)

I bhfianaise an mhéid thuas, measann an Coimisiún go gcomhlíonann béite-caraitéin agus an ullmhóid arb é atá inti béite-caraitéin na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú na mbreiseán sin a athnuachan. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí na mbreiseán a chosc. Measann an Coimisiún freisin, mar gheall ar an riosca do shábháilteacht tomhaltóirí ó ae ó laonna laofheola a ithe, gur cheart uasleibhéal a shocrú le haghaidh laonna. Ba cheart na bearta cosanta sin a bheith gan dochar do cheanglais eile sábháilteachta oibrithe faoi dhlí an Aontais.

(7)

Mar thoradh ar athnuachan an údaraithe maidir le béite-caraitéin agus an ullmhóid arb é atá inti béite-caraitéin, ba cheart Rialachán Cur Chun Feidhme (AE) 2015/1103 a aisghairm.

(8)

Ós rud é gur modhnaíodh uimhir aitheantais na mbreiseán agus gur údaraíodh uasleibhéal ciona le haghaidh laonna (bainne púdrach), is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,