(1)

Is é an tuairisc a thugtar ar chomhfhoirmligh i bpointe (c) d’Airteagal 2(3) de Rialachán (CE) Uimh. 1107/2009 gurb é atá iontu substaintí nó ullmhóidí a úsáidtear nó a bheartaítear lena n-úsáid i dtáirge cosanta plandaí nó in aidiúvach, ach nach substaintí gníomhacha ná teorantóirí ná sineirgígh iad.

(2)

I gcomhréir le hAirteagal 27(1) de Rialachán (CE) Uimh. 1107/2009, tá comhfhoirmligh neamh-inghlactha i dtáirgí cosanta plandaí má tá éifeacht dhíobhálach ag a n-iarmhair, de dhroim leathadh na gcomhfhoirmleach i gcomhréir le dea-chleachtas cosanta plandaí, agus ag féachaint do choinníollacha réalaíocha úsáide, ar shláinte an duine nó ar shláinte ainmhithe nó ar screamhuisce nó má tá éifeacht neamh-inghlactha acu ar an gcomhshaol, nó má tá éifeacht dhíobhálach ag úsáid na gcomhfhoirmleach, de dhroim a leathadh i gcomhréir le dea-chleachtas cosanta plandaí, agus ag féachaint do choinníollacha réalaíocha úsáide, ar shláinte an duine nó ar shláinte ainmhithe nó má tá éifeacht neamh-inghlactha ag a n-úsáid ar phlandaí, ar tháirgí plandaí nó ar an gcomhshaol. Liostaítear na comhfhoirmligh neamh-inghlactha sin in Iarscríbhinn III a ghabhann le Rialachán (CE) Uimh. 1107/2009.

(3)

I gcomhréir le hAirteagal 27(3) de Rialachán (CE) Uimh. 1107/2009, féadfaidh an Coimisiún athbhreithniú a dhéanamh ar chomhfhoirmligh tráth ar bith agus féadfaidh sé faisnéis ábhartha arna soláthar ag na Ballstáit a chur san áireamh. Go háirithe, fógraí a thug na Ballstáit i gcomhréir leis na rialacha maidir le sainaithint comhfhoirmleach neamh-inghlactha a leagtar amach i Rialachán Cur Chun Feidhme (AE) 2023/574 (2), féadfaidh an Coimisiún iad a chur san áireamh.

(4)

I gcomhréir le hAirteagail 3 agus 4 de Rialachán Cur Chun Feidhme (AE) 2023/574, tá 12 shubstaint nua sainaitheanta ag na Ballstáit ar substaintí iad a fuarthas amach go bhfuil siad neamh-inghlactha i ndáil lena n-úsáid mar chomhfhoirmligh i dtáirgí cosanta plandaí a údaraítear faoi Rialachán (CE) Uimh. 1107/2009, toisc go gcomhlíonann siad ar a laghad ceann amháin de na critéir a leagtar amach san Iarscríbhinn a ghabhann le Rialachán Cur Chun Feidhme (AE) 2023/574.

(5)

I measc na gcomhfhoirmleach sin, tá substaintí ann a aicmítear de réir córas comhchuibhithe mar charcanaiginí, de chatagóir 1A nó 1B, mar shó-ghineacha, de chatagóir 1A nó 1B, nó mar shubstaintí atá tocsaineach don atáirgeadh, de chatagóir 1A nó 1B, i gcomhréir le hIarscríbhinn VI a ghabhann le Rialachán (CE) Uimh. 1272/2008 ó Pharlaimint na hEorpa agus ón gComhairle (3), substaintí a shainaithnítear mar shubstaintí atá marthanach, bithcharnach agus tocsaineach nó an-mharthanach agus an-bhithcharnach i gcomhréir le hAirteagal 57, pointí (d) agus (e), de Rialachán (CE) Uimh. 1907/2006 ó Pharlaimint na hEorpa agus ón gComhairle (4), substaintí a liostaítear mar thruailleáin orgánacha mharthanacha (POPanna) faoi Rialachán (AE) 2019/1021 ó Pharlaimint na hEorpa agus ón gComhairle (5) agus substaintí nach bhformheastar lena n-úsáid i dtáirgí bithicídeacha de chineál táirge 6 (leasaithigh do tháirgí le linn dóibh a bheith á stóráil) faoi Rialachán (AE) Uimh. 528/2012 ó Pharlaimint na hEorpa agus ón gComhairle (6).

(6)

I gcomhréir le hAirteagal 5 de Rialachán Cur Chun Feidhme (AE) 2023/574, liostaigh an Coimisiún na comhfhoirmligh neamh-inghlactha sin ar a shuíomh gréasáin.

(7)

Dá bhrí sin, is iomchuí Iarscríbhinn III a ghabhann le Rialachán (CE). 1107/2009 a leasú chun na substaintí breise a chuimsiú ar substaintí iad atá sainaitheanta ag na Ballstáit mar shubstaintí neamh-inghlactha i ndáil lena n-úsáid mar chomhfhoirmligh i dtáirgí cosanta plandaí nó mar aidiúvaigh.

(8)

Na comhfhoirmligh a liostaítear in Iarscríbhinn III a ghabhann le Rialachán (CE) Uimh. 1107/2009, d’fhéadfaidís a bheith in aidiúvaigh a chuirtear ar an margadh freisin. Ós rud é nár leagadh síos rialacha mionsonraithe maidir le húdarú aidiúvach go fóill, féadfaidh na Ballstáit leanúint d’fhorálacha náisiúnta a chur i bhfeidhm a mhéid a bhaineann le haidiúvaigh i gcomhréir le hAirteagal 81(3) den Rialachán sin. Ós rud é go bhfuil sé d’aidhm ag an Rialachán sin cosc a chur ar aidiúvaigh ina bhfuil comhfhoirmligh thoirmiscthe a chur ar an margadh nó a úsáid, is gá a áirithiú freisin nach bhfuil aon cheann de na comhfhoirmligh neamh-inghlactha sin in aidiúvaigh a bhfuiltear lena meascadh le táirgí cosanta plandaí.

(9)

Ba cheart am a thabhairt do na Ballstáit chun athbhreithniú a dhéanamh ar chomhdhéanamh na dtáirgí cosanta plandaí agus na n-aidiúvach atá údaraithe faoi láthair laistigh dá gcríoch, chun a mheas an bhfuil aon cheann de na comhfhoirmligh iontu a liostaítear in Iarscríbhinn III a ghabhann le Rialachán (CE) Uimh. 1107/2009 arna leasú leis an Rialachán seo, agus chun údaruithe le haghaidh táirgí cosanta plandaí agus aidiúvaigh ina bhfuil na comhfhoirmligh sin a tharraingt siar nó a leasú.

(10)

Chun gur féidir deireadh a chur le húsáid táirgí de réir a chéile ar bhealach ordúil, agus chun aon suaitheadh a d’fhéadfaí a dhéanamh i leith úsáideoirí nó slabhraí soláthair a íoslaghdú, i gcás táirgí cosanta plandaí nó aidiúvach ina bhfuil comhfhoirmleach a liostaítear in Iarscríbhinn III a ghabhann le Rialachán (CE) Uimh. 1107/2009, féadfar na Ballstáit tréimhse chairde a dheonú, i gcás inarb iomchuí agus i gcomhréir le hAirteagal 46, an chéad fhomhír de, den Rialachán sin nó, i gcás inarb infheidhme, faoi forálacha náisiúnta maidir le húdarú aidiúvach.

(11)

Comhfhoirmligh a liostaítear in Iarscríbhinn III a ghabhann le Rialachán (CE) Uimh. 1107/2009 arna leasú leis an Rialachán seo, d’fhéadfadh sé go mbeidís i láthair mar eisíontais neamhbheartaithe i gcomhfhoirmligh eile atá inghlactha astu féin lena n-úsáid i dtáirgí cosanta plandaí nó in aidiúvaigh. Dá bhrí sin, maidir le tiúchan na gcomhfhoirmleach neamh-inghlactha ar leith sa táirge cosanta plandaí críochnaithe nó san aidiúvach, ba cheart an tiúchan sin a bheith níos lú ná 0,1 % meáchan ar mheáchan nó ba cheart é a bheith níos lú ná teorainn tiúchana shonrach a bhaineann le hairíonna CMR (carcanaigineach, só-ghineach agus tocsaineach don atáirgeadh), i gcás ina leagtar a leithéid síos in Iarscríbhinn VI a ghabhann le Rialachán (CE) Uimh. 1272/2008 maidir leis an gcomhfhoirmleach neamh-inghlactha ag leibhéal níos ísle ná 0,1 % meáchan ar mheáchan, chun go measfaí gurb é atá ann eisíontas neamhbheartaithe inghlactha, mura bhforáiltear teorainn eile de dheasca teorannuithe teicniúla a bhaineann leis na modhanna anailíseacha ábhartha.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,