(1)

An 19 Márta 2014 ghlac an Coimisiún Rialachán Cur Chun Feidhme (AE) Uimh. 277/2014 ón gCoimisiún (2) lena mbunaítear den chéad uair maolú ar Airteagal 13(1), an chéad fhomhír de Rialachán (CE) Uimh. 1967/2006 a mhéid a bhaineann leis an bhfad íosta ón gcósta agus an doimhneacht le haghaidh na dtrálaer ‘volantina’ a bhíonn ag iascaireacht in uiscí teorann na Slóivéine, a chuaigh in éag an 23 Márta 2017. Deonaíodh síntí breise leis an maolú sin le Rialacháin Cur Chun Feidhme (AE) 2017/2383 (3) agus (AE) 2022/511 (4) ón gCoimisiún. An síneadh is déanaí a cuireadh leis an maolú, bunaíodh é le Rialachán Cur Chun Feidhme (AE) 2023/974 ón gCoimisiún (5).

(2)

An 29 Deireadh Fómhair 2025 fuair an Coimisiún iarraidh ón tSlóivéin síneadh a chur leis an maolú a deonaíodh le Rialachán Cur Chun Feidhme (AE) 2023/974. Rinne an tSlóivéin plean bainistíochta athbhreithnithe, a glacadh an 26 Márta 2026 (6), agus tuarascáil ar fhaireachán agus ar chur chun feidhme an phlean bainistíochta a chur ar fáil, i gcomhréir le Rialachán Cur Chun Feidhme (AE) 2023/974, lenar tugadh údar cuí le síneadh a chur leis an maolú, i gcomhréir le ceanglais Rialacháin (CE) Uimh. 1967/2006 agus (AE) 2019/1241 ó Pharlaimint na hEorpa agus ón gComhairle (7).

(3)

Le linn an 80ú seisiún iomlánach den Choiste Eolaíoch, Teicniúil agus Eacnamaíoch um Iascach (CETEI) (8) a tionóladh i mí na Samhna 2025, rinne CETEI measúnú ar an iarraidh síneadh breise a chur leis an maolú agus ar an tuarascáil cur chun feidhme. Tháinig CETEI ar an gconclúid maidir leis an bplean bainistíochta a tugadh cothrom le dáta gur plean cuimsitheach é lena dtugtar aghaidh ar fhormhór na mbarúlacha a thug CETEI cheana. I bhfianaise na faisnéise nua a chuir an tSlóivéin ar fáil, tháinig CETEI ar an gconclúid go bhfuil coinníollacha an mhaolaithe fós á gcomhlíonadh.

(4)

Comhlíonann an maolú a d’iarr an tSlóivéin na coinníollacha a leagtar síos in Airteagal 13(5) agus (9) de Rialachán (CE) Uimh. 1967/2006.

(5)

Go háirithe, tá srianta sonracha geografacha ann, ós rud é nach mbaineann uiscí teorann na Slóivéine doimhneacht 50 méadar amach in áit ar bith. In éagmais maolú, dá bhrí sin, ní bheadh trálaeir ‘volantina’ in ann oibriú ach níos mó ná 3 mhuirmhíle amach ón gcósta, áit a bhfuil teorann suntasach ar mheánna iascaireachta óir is le haghaidh bealaí loingseoireachta tráchtála an limistéar sin.

(6)

Thairis sin, ráthaítear i bplean bainistíochta na Slóivéine nach dtiocfaidh aon mhéadú ar an iarracht iascaireachta amach anseo.

(7)

Baineann an iarraidh le gníomhaíochtaí iascaireachta atá údaraithe cheana féin ag an tSlóivéin agus 11 soitheach atá údaraithe cheana féin ag an tSlóivéin le hiascaireacht a dhéanamh, a chuimsítear i liosta a cuireadh in iúl don Choimisiún.

(8)

Tá cuntas teiste san iascach ag na soithí sin ar feadh tréimhse is faide ná 5 bliana.

(9)

Comhlíonann na gníomhaíochtaí iascaireachta lena mbaineann ceanglais Airteagal 4(1) de Rialachán (CE) Uimh. 1967/2006, ós rud é nach n-oibríonn an t-iascach os cionn grinnill féar farraige, agus Posidonia oceanica go háirithe, ná os cionn fanaragaim farraige eile.

(10)

A mhéid a bhaineann leis an gceanglas mogallmhéideanna íosta a chomhlíonadh, comhlíonann an maolú a iarradh le hAirteagal 8(1)(h) de Rialachán (CE) Uimh. 1967/2006, ar cuireadh Airteagal 8(1) de Rialachán (AE) 2019/1241 agus roinn 1 de Chuid B d’Iarscríbhinn IX a ghabhann leis ina ionad, ós rud é nach n-úsáidtear mogall cearnógach is lú ná 40 mm i rigín lín ‘volantina’.

(11)

Ní cheadaítear an t-iascach tráil ‘volantina’, arb iascach de chineál measctha é, a dhéanamh le haon trealamh eile ach amháin an ‘tartana’ atá níos troime, ach d’fhéadfaí teagmháil bhreise a bheith ann, áfach, le grinneall na farraige dá thoradh sin, rud a d’fhágfadh go mbeadh gabhálacha breise speiceas grinnill ann, agus ní chuireann sé isteach ar threalaimh eile ach amháin tráil, saighní nó líonta tarraingthe dá samhail.

(12)

Cé go rialaítear trálaeir ‘volantina’ lena áirithiú gur fíorbheag iad gabhálacha na speiceas i gCuid A d’Iarscríbhinn IX a ghabhann le Rialachán (AE) 2019/1241, thug CETEI dá aire go bhfuil líon ghabhálacha tuairiscithe na speiceas sin fós substaintiúil. Mar sin féin, ós rud é gur méid teoranta atá san iascach ‘volantina’, tháinig sé ar an gconclúid gurb éard atá i méid iomlán na ngabhálacha sin cothrom le roinnt deicheanna tonaí, ar méid an-bheag é de ghabhálacha iomlána na speiceas sin i Muir Aidriad Thuaidh,.

(13)

Ní dhíríonn trálaeir ‘volantina’ ar cheifileapóid. Cé go bhfuil cion na ngabhálacha ceifileapód san iascach sin sách ard, tháinig CETEI ar an gconclúid, bunaithe ar an tuarascáil cur chun feidhme is déanaí de chuid an phlean, nach bhfuil ann ach codán beag de ghabhálacha iomlána na speiceas sin i Muir Aidriad Thuaidh, agus gur foinse ábhartha ioncaim é do chabhlach iascaireachta na Slóivéine an tráth céanna.

(14)

Le plean bainistíochta na Slóivéine, áirítear bearta maidir le faireachán a dhéanamh ar ghníomhaíochtaí iascaireachta, dá bhforáiltear sa tríú fomhír d’Airteagal 13(9) de Rialachán (CE) Uimh. 1967/2006 agus in Airteagail 14 agus 15 de Rialachán (CE) Uimh. 1224/2009 ón gComhairle (9).

(15)

Dá bhrí sin, ba cheart an síneadh leis an maolú a iarradh a dheonú.

(16)

Ba cheart teorannú a bhunú maidir le fad tréimhse an mhaolaithe chun gur féidir bearta bainistíochta ceartaithí tapa a chur i bhfeidhm i gcás go léirítear sa tuarascáil chuig an gCoimisiún go bhfuil drochstádas caomhantais ag na stoic a shaothraítear, agus raon á sholáthar chun feabhas a chur ar an mbunús eolaíoch le plean bainistíochta feabhsaithe.

(17)

Ós rud é go ndeachaigh an maolú a deonaíodh le Rialachán Cur Chun Feidhme (AE) 2023/974 in éag an 27 Márta 2026, d’fhonn leanúnachas dlíthiúil a áirithiú, ba cheart feidhm a bheith ag an Rialachán seo le héifeacht ón 28 Márta 2026. Ar chúiseanna deimhneachta dlíthiúla ba cheart an Rialachán seo a theacht i bhfeidhm mar ábhar práinne.

(18)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Iascach agus Dobharshaothrú,

(a)

go bhfuil an chláruimhir acu a luaitear i bplean bainistíochta na Slóivéine arna ghlacadh ag an tSlóivéin i gcomhréir le hAirteagal 19(2) de Rialachán (CE) Uimh. 1967/2006;

(b)

go bhfuil cuntas teiste san iascach acu ar feadh tréimhse níos faide ná 5 bliana agus nach mbeidh aon mhéadú amach anseo ar an iarracht iascaireachta a dhéantar;

(c)

go bhfuil údarú iascaireachta acu agus go bhfeidhmíonn siad faoin bplean bainistíochta a ghlac an tSlóivéin i gcomhréir le hAirteagal 19(2) de Rialachán (CE) Uimh. 1967/2006.