(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide arb é atá inti 6-fíotáis arna táirgeadh le Aspergillus oryzae DSM 33737. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide arb é atá inti 6-fíotáis arna táirgeadh le Aspergillus oryzae DSM 33737 mar bhreiseán beathaithe le haghaidh gach éanlaith clóis, gach Suidae agus gach éisc eite, agus iarrtar ann go n-aicmeofaí an breiseán i gcatagóir na mbreiseán ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 1 Feabhra 2024 (2) go bhfuil an ullmhóid arb é atá inti 6-fíotáis arna táirgeadh le Aspergillus oryzae DSM 33737 sábháilte do gach éanlaith chlóis, gach Suidae agus gach iasc eite ar an leibhéal úsáide is airde atá beartaithe 4 000 FYT/kg d’ábhar beatha iomlán, agus do thomhaltóirí agus don chomhshaol freisin. Tháinig an tÚdarás ar an gconclúid freisin nach greannaitheoir craicinn í an ullmhóid arb é atá inti 6-fíotáis arna táirgeadh le Aspergillus oryzae DSM 33737, i bhfoirmlithe deiridh an bhreiseáin. Ní greannaitheoirí súl iad an dá fhoirmliú leachtacha den bhreiseán, agus meastar gur greannaitheoirí súl iad an dá fhoirmliú sholadacha. Ní raibh an tÚdarás in ann teacht ar chonclúid maidir leis an íogrú craicinn a d’fhéadfadh na foirmlithe deiridh den bhreiseán a dhéanamh. Mar gheall ar chineál próitéineach na substainte gníomhaí (6-fíotáis), meastar gur íogróir riospráide é an breiseán. Mar sin féin, ní dócha go dtarlaíonn nochtadh trí ionanálú. Ina theannta sin, tháinig an tÚdarás ar an gconclúid go bhféadfadh an ullmhóid arb é atá inti 6-fíotáis arna táirgeadh le Aspergillus oryzae DSM 33737 a bheith éifeachtúil i ngach speiceas éanlaithe clóis lena ramhrú agus a thógtar le bheith ina bhéaróg nó a thógtar le haghaidh pórúcháin agus i ngach speiceas Suidae atáirgthe ag an íosleibhéal úsáide atá beartaithe, is é sin 200 FYT/kg den bheatha iomlán, agus i ngach iasc eite ag an íosleibhéal úsáide atá beartaithe, is é sin 1 000 FYT/kg den bheatha iomlán agus le Rialachán Cur Chun Feidhme (AE) 2024/2177 ón gCoimisiún (3) deonaíodh údarú lena húsáid i mbeatha le haghaidh na speiceas sin. Mar gheall ar an easpa sonraí leordhóthanacha, ní raibh an tÚdarás in ann teacht ar chonclúid maidir leis an éifeachtúlacht i ndáil le héanlaith chlóis atá ag breith agus éanlaith chlóis atáirgthe agus speicis Suidae lena ramhrú nó a thógtar le haghaidh atáirgthe. Tar éis don Údarás measúnú a dhéanamh ar shonraí a chuir an t-iarratasóir isteach le déanaí, tháinig sé ar an gconclúid sa tuairim uaidh an 18 Meán Fómhair 2025 (4) go bhféadfadh an breiseán a bheith éifeachtúil i ngach speiceas éanlaithe clóis agus mucúil ag an íosleibhéal úsáide atá beartaithe, is é sin 200 FYT/kg de bheatha iomlán. Níor mheas an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann an ullmhóid arb é atá inti 6-fíotáis arna táirgeadh le Aspergillus oryzae DSM 33737 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh éanlaith chlóis le bheith ina béaróg nó le haghaidh atáirgthe, banbh de speicis mhucúla agus speicis mhucúla lena ramhrú nó a thógtar le haghaidh atáirgthe. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,