1.   Áiritheoidh soláthraithe rátálacha Comhshaoil, Sóisialta agus Rialachais (ESG) go gcuirfear i láthair an fhaisnéis atá le nochtadh de bhun phointe 1 d’Iarscríbhinn III a ghabhann le Rialachán (AE) 2024/3005 i gcomhréir leis an ord a leagtar amach san Iarscríbhinn a ghabhann leis an Rialachán Tarmligthe seo.

2.   Agus an ceanglas dá dtagraítear i mír 1 á chomhlíonadh ag soláthraithe rátálacha ESG, féadfaidh siad crostagairt a dhéanamh don fhaisnéis ábhartha a chuirtear ar fáil ar a suíomh gréasáin, lena n-áirítear trí hipearnaisc nó trí mhodhanna teicneolaíocha iomchuí eile.

1.   Mar chuid den fhaisnéis dá dtagraítear i bpointe 1, pointe (f), d’Iarscríbhinn III a ghabhann le Rialachán (AE) 2024/3005, nochtfaidh soláthraithe rátálacha ESG an méid seo a leanas ar leibhéal gach táirge rátála ESG:

(a)	tuairisc ar na rioscaí a chumhdaítear, i gcás ina bhfuil measúnú á dhéanamh ag an rátáil ESG ar rioscaí;

(b)	tuairisc ar na tionchair a chumhdaítear, i gcás ina bhfuil measúnú á dhéanamh ag an rátáil ESG ar thionchair;

(c)	faisnéis faoin gcaoi a gcuirtear an ábharthacht riosca agus tionchair san áireamh de réir phrionsabal na hábharthachta dúbailte, i gcás inarb infheidhme;

(d)	i gcás ina bhfuil an rátáil ESG bunaithe ar ghnéithe ábharthachta eile, tuairisc ar na gnéithe sin.

2.   Mar chuid den fhaisnéis dá dtagraítear i bpointe 1, pointe (g), d’Iarscríbhinn III a ghabhann le Rialachán (AE) 2024/3005, nochtfaidh soláthraithe rátálacha ESG an méid seo a leanas ar leibhéal gach táirge rátála ESG:

(a)	tuairisc ar a bhfuil cumhdaithe faoi na fachtóirí comhshaoil, sóisialta nó rialachais agus ar na fachtóirí comhiomlánaithe, i gcás inarb infheidhme;

(b)	tuairisc ar na saincheisteanna sonracha a chumhdaítear leis an rátáil ESG.

3.   Mar chuid den fhaisnéis dá dtagraítear i bpointe 1, pointí (o) agus (p), d’Iarscríbhinn III a ghabhann le Rialachán (AE) 2024/3005, déanfaidh soláthraithe rátálacha ESG an méid seo a leanas ar leibhéal gach táirge rátála ESG, i gcás inarb infheidhme:

(a)

nochtfaidh siad léiriú ar cé acu a chuirtear nó nach gcuirtear san áireamh sa rátáil ESG spriocanna agus cuspóirí Chomhaontú Pháras agus cé na comhaontuithe idirnáisiúnta eile a bhreithnítear, agus tagairt á déanamh do bhunfhaisnéis aitheantais maidir leis na comhaontuithe idirnáisiúnta, mar aon le míniú ar a ábhartha atá sí don rátáil ESG;

(b)	sonróidh siad cé acu atá nó nach bhfuil measúnú á dhéanamh ag an rátáil ESG ar ailíniú gealltanas le cuspóirí na gcomhaontuithe idirnáisiúnta dá dtagraítear i bpointe (a).

1.   Mar chuid den fhaisnéis dá dtagraítear i bpointe 1, pointe (a), d’Iarscríbhinn III a ghabhann le Rialachán (AE) 2024/3005, déanfaidh soláthraithe rátálacha ESG an méid seo a leanas:

(a)	nochtfaidh siad teideal na modheolaíochta rátála a úsáideadh;

(b)	tabharfaidh siad tuairisc ar na cineálacha míre rátáilte a bhfuil feidhm ag an modheolaíocht dá dtagraítear i bpointe (a) maidir leo;

(c)	nochtfaidh siad an tréimhse ama a meastar an rátáil ESG a bheith bailí lena linn, i gcás inarb infheidhme;

(d)	nochtfaidh siad liosta de na samhlacha tacaíochta ábhartha agus de na príomhthoimhdí rátála agus forbhreathnú orthu, i gcás inarb infheidhme;

(e)	soláthróidh siad faisnéis maidir le bearta agus nósanna imeachta chun cáilíocht agus iontaofacht na sonraí a úsáidtear a áirithiú;

(f)

tabharfaidh siad tuairisc ar chóras rangaithe na gcatagóirí rátála a úsáidtear, agus tagairt á déanamh don mhéid seo a leanas: (i) an bhrí atá le gach catagóir rátála le haghaidh dearbhluachanna agus luachanna coibhneasta agus conas a dhéanfar an córas rangaithe a léirmhíniú; (ii) i gcás luachanna coibhneasta, míniú maidir le cé acu atá nó nach bhfuil siad i gcoibhneas le tionscal sonrach, limistéar geografach sonrach, piarghrúpaí sonracha nó tagairtí comparáideacha eile agus an tuairisc faoi seach ar na luachanna coibhneasta sin;

(g)	dáta an nuashonraithe is déanaí ar an modheolaíocht agus tuairisc ar na hathruithe a tugadh isteach sa leagan roimhe seo a nochtadh.

2.   Mar chuid den fhaisnéis dá dtagraítear i bpointe 1, pointe (b), d’Iarscríbhinn III a ghabhann le Rialachán (AE) 2024/3005, soláthróidh soláthraithe rátálacha ESG an méid seo a leanas:

(a)	ainm chomhlacht eisiúna an aicmithe tionscail a úsáideadh;

(b)	ainm agus leagan an aicmithe tionscail a úsáideadh;

(c)	aon nasc atá ar fáil go poiblí chuig doiciméadacht oifigiúil an chórais aicmithe tionscail.

3.   Mar chuid den fhaisnéis dá dtagraítear i bpointe 1, pointe (c), d’Iarscríbhinn III a ghabhann le Rialachán (AE) 2024/3005, tabharfaidh soláthraithe rátálacha ESG tuairisc ar an bpróiseas rannpháirtíochta le míreanna rátáilte nó le heisitheoirí míreanna rátáilte, lena n-áirítear an chaoi a gcuirtear an t-ionchur ón bpróiseas sin san áireamh.

4.   Mar chuid den fhaisnéis dá dtagraítear i bpointe 1, pointe (e), d’Iarscríbhinn III a ghabhann le Rialachán (AE) 2024/3005, tabharfaidh soláthraithe rátálacha ESG, i gcás inarb infheidhme, tuairisc ar an bpróiseas chun an fhianaise eolaíoch ábhartha a shainaithint.

1.   Mar chuid den fhaisnéis dá dtagraítear i bpointe 1, pointe (d), d’Iarscríbhinn III a ghabhann le Rialachán (AE) 2024/3005, nochtfaidh soláthraithe rátálacha ESG cairt ina léireofar a naisc úinéireachta le haon mháthairghnóthas agus le haon fhochuideachta. Léireofar sa chairt sin, i gcás inarb infheidhme, cé acu a dhéanann nó nach ndéanann aon cheann de na heintitis sin aon cheann de na gníomhaíochtaí a liostaítear in Airteagal 16(1) nó seirbhísí eile dá dtagraítear in Airteagal 16(6) de Rialachán (AE) 2024/3005.

2.   Mar chuid den fhaisnéis dá dtagraítear i bpointe 1, pointe (l), d’Iarscríbhinn III a ghabhann le Rialachán (AE) 2024/3005, nochtfaidh soláthraithe rátálacha ESG an méid seo a leanas:

(a)	an chaoi a n-áirithítear leis na critéir a chuireann siad i bhfeidhm chun táillí a shuí go bhfuil na táillí sin cothrom, réasúnta, trédhearcach agus neamh-idirdhealaitheach, mar a cheanglaítear le hAirteagal 27 de Rialachán (AE) 2024/3005;

(b)	cé acu a oibríonn nó nach n-oibríonn an soláthraí rátálacha ESG samhail lena ngabhann síntiús, samhail ‘íocann an t-eisitheoir’, meascán de na samhlacha sin, nó samhail eile;

(c)	tuairisc ar an tsamhail ghnó ábhartha, agus ar an gcion den ioncam bliantúil iomlán a dhíorthaítear ó gach samhail;

(d)	i gcás inarb infheidhme, tionchar na dtáillí a mhuirearaítear ar sheirbhísí seachas gníomhaíochtaí rátála ESG ar chinneadh na dtáillí le haghaidh rátálacha ESG, mar aon le tuairisc ar na seirbhísí eile sin.

3.   Mar chuid den fhaisnéis dá dtagraítear i bpointe 1, pointe (n), d’Iarscríbhinn III a ghabhann le Rialachán (AE) 2024/3005, léireoidh soláthraithe rátálacha ESG réimsí ghníomhaíochtaí, sheirbhísí nó struchtúr eagraíochtúil an tsoláthraí rátálacha ESG as a bhféadfadh na príomhrioscaí coinbhleachtaí leasa teacht chun cinn.

1.   Mar chuid den fhaisnéis dá dtagraítear i bpointe 2, pointe (b)(i), d’Iarscríbhinn III a ghabhann le Rialachán (AE) 2024/3005, sonróidh soláthraithe rátálacha ESG na modhanna a úsáidtear chun aon sonraí neamhphoiblí a bhailiú.

2.   Mar chuid den fhaisnéis dá dtagraítear i bpointe 2, pointe (a)(iv), d’Iarscríbhinn III a ghabhann le Rialachán (AE) 2024/3005, tabharfaidh soláthraithe rátálacha ESG tuairisc ar aon easnamh a d’fhéadfadh a bheith ann a bhaineann le húsáid córas nó samhlacha staidrimh nó algartamacha réamhbhunaithe i mbearta ESG.

1.   Mar chuid den fhaisnéis dá dtagraítear i bpointe 2, pointe (a)(v), d’Iarscríbhinn III a ghabhann le Rialachán (AE) 2024/3005, míneoidh soláthraithe rátálacha ESG na míreanna seo a leanas:

(a)	an próiseas agus an mhinicíocht chun modheolaíochtaí a athbhreithniú;

(b)	na coinníollacha chun an gá athbhreithniú a dhéanamh ar mhodheolaíocht a chinneadh;

(c)	i gcás inarb infheidhme, an nós imeachta maidir le comhairliúchán le páirtithe leasmhara le linn an phróisis athbhreithniúcháin;

(d)	an próiseas chun measúnú a dhéanamh ar an tionchar a d’fhéadfadh a bheith ag an athbhreithniú ar mhodheolaíochtaí maidir le rátálacha ESG arna dtáirgeadh de bhun na modheolaíochta ábhartha;

(e)	na critéir chun a chinneadh cad is athrú ábhartha ar mhodheolaíocht ann.

2.   Mar chuid den fhaisnéis dá dtagraítear i bpointe 2, pointe (a)(vii), d’Iarscríbhinn III a ghabhann le Rialachán (AE) 2024/3005, sonróidh soláthraithe rátálacha ESG uimhir leagain na modheolaíochta.

3.   Mar chuid den fhaisnéis dá dtagraítear i bpointe 2, pointe (b)(iii), d’Iarscríbhinn III a ghabhann le Rialachán (AE) 2024/3005, míneoidh soláthraithe rátálacha ESG na bearta a rinneadh chun cruinneas agus comhsheasmhacht an phróisis athbhreithnithe sonraí a áirithiú.