(1)

Leis ‘an Rialachán Cinntitheach’, d’fhorchuir an Coimisiún Eorpach (‘an Coimisiún’) beart coimirce cinntitheach ar tháirgí cruach áirithe, arb é atá ann taraif-chuótaí (‘TRQanna’) i leith táirgí cruach áirithe (‘an táirge lena mbaineann’) lena gcuimsítear 26 chatagóir táirgí, atá socraithe ar leibhéil lena gcaomhnófar na sreafaí trádála traidisiúnta ar bhonn catagóire de réir an táirge. Bíonn feidhm ag dleacht taraife 25 % má sháraítear tairseacha cainníochtúla na TRQanna sin. Rachaidh an beart coimirce in éag tar éis an 30 Meitheamh 2026.

(2)

Cumhdaítear 2 chód AC i gcatagóir táirgí 13 mar a leagtar amach sa Rialachán Cinntitheach: 7214 20 00 agus 7214 99 10 . Bhí TRQ chatagóir táirge 13 beartaithe le haghaidh barraí treisiúcháin coincréite is féidir a aithint go fisiceach trí eanguithe, easnacha, eitrí nó dífhoirmiúcháin eile (‘barraí treisiúcháin’). Tá an taraif-chuóta bunaithe ar shreafaí trádála stairiúla agus tá sé léirscaoilte ó bhí 2019 ann.

(3)

Cuireadh in iúl don Choimisiún go bhfuil barraí treisiúcháin ag teacht isteach san Aontas, ní hamháin faoin gcuóta barraí treisiúcháin (catagóir táirgí 13), ach ó 2025 i leith freisin i gcainníochtaí suntasacha faoi chuóta barraí trádála (catagóir táirgí 12), go sonrach faoi AC 7228 30 69 .

(4)

Dheimhnigh an Coimisiún patrún neamhghnách de shreafaí allmhairiúcháin faoi AC 7228 30 69 ó bhí 2025 ann. Tá difríocht shuntasach idir na sreafaí allmhairiúcháin agus na sreafaí trádála traidisiúnta ó thaobh méideanna agus tionscnamh de agus cruthaíonn siad míchothromaíochtaí suntasacha ar mhargadh an Aontais (4).

(5)

Cuireadh fianaise faoi bhráid an Choimisiúin gur féidir barraí treisiúcháin a allmhairiú faoi chatagóir 12, toisc gur athraíodh comhdhéanamh ceimiceach na mbarraí sin beagán chun a n-aicmiú a aistriú ó cheannteideal taraife 7214 (barraí cruach neamh-chóimhiotail) go 7228 (barraí cruach cóimhiotail). Bíonn costas an-íseal i gceist leis an athrú ar an gcomhdhéanamh ceimiceach agus ní cosúil go bhfuil aon bhonn cirt eacnamaíoch ná gnó leis an athrú breise sin a dhéanamh ar chomhdhéanamh ceimiceach an táirge, seachas úsáid cuóta eile a cheadú ina bhfuil i bhfad níos mó méideanna saor ó dhleacht ar fáil.

(6)

Measann an Coimisiún go mbaineann sé sin an bonn go mór d’éifeachtacht an bhirt coimirce sna catagóirí sin. In 2025, thart ar 35 % den taraif-chuóta bliantúil iomlán atá ar fáil le haghaidh barraí i gcatagóir 13 a bhí i gceist leis an méadú ar allmhairí faoi AC 7228 30 69 . Is léir go bhfuil sé sin ag teacht salach ar chuspóir an Choimisiúin sreafaí trádála traidisiúnta a áirithiú chun leasa an Aontais, ós rud é ní hamháin go bhfágann sé sin go mbíonn barraíocht allmhairí barraí treisiúcháin san Aontas, ach nach bhfuil úsáideoirí chomh maith le táirgeoirí fíorbharraí trádála i dtríú tíortha in ann rochtain a fháil ar na méideanna saor ó dhleacht is gá a bhí beartaithe le haghaidh barraí trádála.

(7)

Chun aghaidh a thabhairt ar an éagothroime shuntasach ar mhargadh an Aontais arb é an cleachtas sin is cúis léi, measann an Coimisiún gur cheart an dá chód TARIC a liostaítear in Iarscríbhinn I a ghabhann leis an Rialachán seo a chruthú agus a chur le catagóirí táirgí 12 agus 13, faoi seach.

(8)

Áirithítear le cruthú na gcód TARIC go n-allmharófar barraí treisiúcháin agus barraí trádála faoi na catagóirí cearta lena léirítear sreafaí trádála traidisiúnta, rud atá riachtanach chun brú allmhairiúcháin ar thionscal an Aontais a mhaolú. Níl leathnú ar raon feidhme an bhirt coimirce i gceist leis, agus ní dhéanann sé difear do na méideanna saor ó dhleacht atá ar fáil faoi chatagóirí táirgí 12 agus 13.

(9)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Choimircí a bunaíodh faoi Airteagal 3(3) de Rialachán (AE) 2015/478 agus faoi Airteagal 22(3) de Rialachán (AE) 2015/755 faoi seach,