(1)

Chun a áirithiú go gcuirfear cliaint ar an eolas ar bhealach soiléir sothuigthe maidir leis an gcaoi a bhforghníomhófar a n-orduithe, ba cheart do ghnólachtaí infheistíochta faisnéis áirithe a sholáthar dóibh maidir le beartas forghníomhaithe orduithe inmheánach na ngnólachtaí a d’ullmhaigh na gnólachtaí i gcomhréir leis na ceanglais a leagtar amach i Rialachán Tarmligthe (AE) 2017/565 ón gCoimisiún (2). Ba cheart a áirithiú leis an mbeartas forghníomhaithe orduithe go gcuirfear ar a gcumas do ghnólachtaí infheistíochta go comhsheasmhach an toradh is fearr is féidir a bhaint amach agus orduithe cliant á bhforghníomhú acu trí ionaid forghníomhúcháin a roghnú. Ba cheart do ghnólachtaí infheistíochta a nósanna imeachta rialachais inmheánaigh a chur i bhfeidhm maidir le hionaid forghníomhúcháin a roghnú agus liosta atá cothrom le dáta a choimeád de na hionaid forghníomhúcháin atá roghnaithe acu.

(2)

Ar mhaithe le trédhearcacht maidir le socruithe na ngnólachtaí infheistíochta arb é is aidhm dóibh cothroime an phraghais a ráthú i gcás orduithe a fhorghníomhaítear thar ceann cliant, ba cheart a áireamh i mbeartas forghníomhaithe orduithe na ngnólachtaí faisnéis maidir leis na socruithe agus na córais luachála, lena n-áirítear liosta soláthraithe sonraí a úsáidtear le haghaidh na luachála sin, a úsáidfidh gnólachtaí chun an toradh is fearr is féidir a bhaint amach agus a n-orduithe cliant á bhforghníomhú acu.

(3)

Chun aon choinbhleacht leasa a sheachaint maidir le horduithe dá gcuid féin agus orduithe a gcliant a fhorghníomhú, ba cheart do ghnólachtaí infheistíochta a thairgeann na seirbhísí infheistíochta chun orduithe a fhorghníomhú thar ceann cliant agus orduithe a fháil agus a tharchur i ndáil le hionstraim airgeadais amháin nó níos mó araon, ba cheart dóibh a shonrú ina mbeartas forghníomhaithe orduithe conas a chomhlíonann siad a n-oibleagáid gníomhú ar mhaithe le leas a gcliant agus cinneadh á dhéanamh acu cé acu a dhéanfaidh nó nach ndéanfaidh siad an t-ordú a fhorghníomhú.

(4)

Agus na hionaid forghníomhúcháin á roghnú chun an forghníomhú is fearr maidir le horduithe a gcliant a áirithiú, ba cheart do ghnólachtaí infheistíochta measúnú a dhéanamh ar na costais a mhuirearaíonn na hionaid forghníomhúcháin orthu. Níor cheart do ghnólachtaí infheistíochta costais a bhaineann leis na hionaid forghníomhúcháin a roghnaíodh a chur san áireamh ach amháin a mhéid a chuirfí na costais sin ar aghaidh chuig cliaint go díreach nó go hindíreach, agus a n-orduithe á bhforghníomhú ag na gnólachtaí infheistíochta.

(5)

Ba cheart go dtabharfadh sonraí tagartha ardcháilíochta, lena n-áirítear sonraí arna soláthar ag soláthraithe teilitéipe comhdhlúite, i gcás ina mbeidh siad ar fáil, léiriú iontaofa cruinn ar phraghsanna forghníomhaithe sa mhargadh. Ba cheart do ghnólachtaí infheistíochta na sonraí sin a úsáid agus ionaid forghníomhúcháin á roghnú acu agus faireachán á dhéanamh acu, go tráthrialta, ar éifeachtacht a mbeartais forghníomhaithe orduithe. Ba cheart cead a bheith ag gnólachtaí infheistíochta foinsí sonraí seachtracha malartacha a úsáid i gcás ina bhfuil sonraí ó na foinsí sin iontaofa agus cruinn. Ba cheart do ghnólachtaí infheistíochta a áirithiú go bhfuil na sonraí ó na hionaid forghníomhúcháin is leachtaí sna sonraí tagartha a úsáideann siad, lena n-áirítear sonraí ó na hionaid forghníomhúcháin arb iad na margaí is ábhartha iad i dtéarmaí leachtachta le haghaidh na n-ionstraimí a thrádáiltear laistigh de gach aicme ionstraimí airgeadais.

(6)

Chun trédhearcacht agus cáilíocht na dtorthaí a áirithiú dá gcliaint, ba cheart do ghnólachtaí infheistíochta nach roghnaíonn ach ionad forghníomhúcháin amháin chun orduithe cliant a fhorghníomhú le haghaidh aicme áirithe ionstraimí airgeadais, nó le haghaidh gach ordaithe cliaint, ba cheart dóibh a mhíniú ina mbeartais forghníomhaithe orduithe conas a chuirtear ar a gcumas dóibh an toradh is fearr is féidir a fháil dá gcliaint trí ionad forghníomhúcháin aonair amháin a roghnú.

(7)

Chun aon drochthionchar ar cháilíocht fhorghníomhú an ordaithe a sheachaint, ba cheart do ghnólachtaí infheistíochta a léiriú ina mbeartas forghníomhaithe orduithe na tosca a ndéanann siad breithniú orthu sula gcinnfidh siad cé acu a úsáidfidh nó nach n-úsáidfidh siad córais ródaithe orduithe uathoibríocha.

(8)

Chun an t-ionad forghníomhúcháin lena n-áiritheofaí an toradh is fearr is féidir le haghaidh gach ordaithe dá gcliaint a roghnú as measc na n-ionad forghníomhúcháin éagsúil a liostaítear i mbeartas forghníomhaithe orduithe gnólachtaí infheistíochta, ba cheart do na gnólachtaí infheistíochta sin na nithe seo a leanas a chur san áireamh: aicmiú na gcliant, aicme agus fo-aicme na n-ionstraimí airgeadais, méid agus cineál na n-orduithe, na costais a mhuirearaíonn ionaid forghníomhúcháin agus gnólachtaí a mbíonn tionchar acu ar an toradh do na cliaint, agus aon sonraí margaidh atá ábhartha don mheasúnú sin.

(9)

Chun a áirithiú gur féidir le gnólachtaí infheistíochta córais ródaithe orduithe uathoibríocha a úsáid ar bhealach lena ráthaítear an toradh is fearr is féidir dá gcliaint, ba cheart do ghnólachtaí infheistíochta a lua go sainráite ina mbeartais forghníomhaithe orduithe an fhéidearthacht atá ann dóibh córais ródaithe orduithe uathoibríocha a úsáid agus an oibleagáid atá orthu na critéir shonracha a chur san áireamh lena n-áirithítear an toradh is fearr is féidir dá gcliaint. Go háirithe, le haon chóras ródaithe orduithe uathoibríoch, ba cheart breithniú a dhéanamh ar na critéir uile a chuireann gnólachtaí infheistíochta i bhfeidhm chun a n-ionad le haghaidh an fhorghníomhaithe is fearr a roghnú.

(10)

D’fhéadfadh iarmhairtí móra maidir le cosaint infheisteoirí a bheith ag treoracha sonracha ó chliant i dtaca lena ordú a fhorghníomhú. Chuige sin, ba cheart a léiriú i mbeartas forghníomhaithe orduithe gnólachtaí infheistíochta an tionchar diúltach a d’fhéadfadh a bheith ag na treoracha sonracha sin ar an gcliant, go háirithe nuair a d’fhéadfadh sé nach mbeadh an gnólacht in ann na critéir uile is gá a chur i bhfeidhm chun an forghníomhú is fearr is féidir ar an ordú sin a bhaint amach. Ar an gcúis chéanna, ba cheart a shonrú leis an mbeartas forghníomhaithe orduithe cad é atá i gceist le treoir shonrach ó chliant.

(11)

Chun teorainn a chur leis an tionchar diúltach a d’fhéadfadh a bheith ag treoir shonrach ó chliant ar cháilíocht an fhorghníomhaithe, mar thoradh ar neamhábaltacht gnólachta infheistíochta eilimintí uile a bheartais forghníomhaithe orduithe a chur i bhfeidhm go hiomlán, níor cheart do ghnólachtaí infheistíochta treoir ó chliant a leanúint ach amháin i leith na coda sin nó na gné sin den ordú ar thug an cliant treoir shonrach ina leith. Ba cheart caitheamh le gach cuid agus gach gné eile den ordú nach cuid den treoir shonrach iad mar ghnáthordú cliaint agus ba cheart iad a bheith faoi réir na rialacha maidir leis an bhforghníomhú is fearr.

(12)

Chun claontacht i roghnú an ionaid forghníomhúcháin a sheachaint, i gcás ina dtairgtear an rogha do chliaint, ba cheart do ghnólachtaí infheistíochta nósanna imeachta a bheith i bhfeidhm acu lena gcuirtear cosc ar a gcliaint a spreagadh chun ionad forghníomhúcháin sonrach a roghnú. Go háirithe, níor cheart do ghnólachtaí infheistíochta a gcoimisiúin a struchtúrú ar bhealach lena gcaitear go míchothrom le hionaid forghníomhúcháin áirithe. Ba cheart do ghnólachtaí faisnéis chothrom, shoiléir agus neamh-mhíthreorach a sholáthar dá gcliaint maidir le gach ionad forghníomhúcháin ionas nach roghnóidh a gcliaint ionad forghníomhúcháin ar bhonn bheartas praghsála an ghnólachta infheistíochta amháin. Chun a áirithiú gur ar ghnólachtaí infheistíochta a bheidh an fhreagracht deiridh toradh an fhorghníomhaithe is fearr a bhaint amach, ba cheart a shonrú go soiléir freisin leis an mbeartas forghníomhaithe orduithe go bhfuil sé de shaoirse ag cliaint gan ionad forghníomhúcháin sonrach a roghnú agus, sna cásanna sin, gur féidir leo brath ar fhreagracht an ghnólachta infheistíochta an t-ionad forghníomhúcháin a roghnú chun an toradh is fearr a bhaint amach do na cliaint sin.

(13)

I bhfianaise Airteagal 27(1) de Threoir 2014/65/AE ba cheart go gcuirfeadh an beartas forghníomhaithe orduithe ar a gcumas do ghnólachtaí infheistíochta an toradh is fearr is féidir a fháil dá gcliaint agus orduithe cliant á bhforghníomhú acu agus iad ag déileáil ar a gcuntas féin, lena n-áirítear nuair a bhíonn siad ag gabháil do thrádáil bhunairgid mheaitseáilte (trádáil péire idirbheart as a chéile) nó ag déileáil in aghaidh chaipiteal dílsithe an ghnólachta infheistíochta. Dá bhrí sin, ba cheart a shonrú le beartas forghníomhaithe orduithe an ghnólachta infheistíochta conas atá sé d’aidhm aige an toradh is fearr is féidir a fháil dá chliaint agus orduithe cliant á bhforghníomhú aige trí dhéileáil ar a chuntas féin agus ba cheart míniú a thabhairt ann ar na nósanna imeachta atá i bhfeidhm chun rioscaí díobhálacha do chliaint a mheasúnú agus a sheachaint sna cásanna sin. Ar an gcúis chéanna, ba cheart an méid seo a leanas a bheith i gceist le beartas forghníomhaithe orduithe gnólachta infheistíochta (i) ba cheart bearta a bheith ann atá iomchuí chun coinbhleachtaí leasa idir an gnólacht infheistíochta agus a chliaint a shainaithint, a bhainistiú agus a chosc, mar a cheanglaítear le hAirteagal 23 de Threoir 2014/65/AE agus le hAirteagail 33 agus 34 de Rialachán Tarmligthe (AE) 2017/565, (ii) ba cheart míniú a thabhairt ann ar na nósanna imeachta atá i bhfeidhm chun forghníomhú pras, cothrom agus gasta ar orduithe cliant a áirithiú i gcás nach féidir orduithe teorann cliant a fhorghníomhú láithreach faoi dhálaí an mhargaidh atá i réim, agus (iii) ba cheart a shonrú ann, nuair a fhorghníomhaítear orduithe cliant thar an gcuntar, conas a áirithíonn an gnólacht cothroime an phraghais i gcomhréir le dlí an Aontais is infheidhme.

(14)

Chun cothroime an phraghais a mholtar don chliant a áirithiú i gcás ina bhforghníomhaíonn an gnólacht atá ag déileáil ar a chuntas féin a ordú nó a hordú agus chun an toradh is fearr is féidir a áirithiú don chliant, ba cheart do ghnólachtaí infheistíochta breithniú a dhéanamh ar phraghas reatha na hionstraime airgeadais sa mhargadh, i gcás ina bhfuil sé ar fáil, nó, i gcás nach bhfuil sé ar fáil, ar phraghas ionstraimí comhchosúla nó inchomparáide. Chun mí-úsáid a sheachaint, níor cheart do ghnólacht infheistíochta samhlacha praghsála inmheánacha a úsáid ach amháin i gcás nach bhfuil aon sonraí iontaofa ann faoi phraghas margaidh reatha na hionstraime airgeadais nó faoi phraghas margaidh ionstraime comhchosúla nó inchomparáide.

(15)

Ar mhaithe le héifeachtacht bheartas forghníomhaithe na ngnólachtaí infheistíochta agus chun a áirithiú go gcomhlíonfaidh gnólachtaí infheistíochta go comhsheasmhach an oibleagáid atá orthu maidir leis an toradh is fearr is féidir a bhaint amach dá gcliaint, is iomchuí an oibleagáid ghinearálta a leagtar amach in Airteagal 27(7) de Threoir 2014/65/AE a shonrú a thuilleadh maidir le conas ba cheart do ghnólachtaí infheistíochta faireachán a dhéanamh ar chomhlíonadh leanúnach a mbeartais forghníomhaithe orduithe.

(16)

Chun é a chur ar a gcumas do ghnólachtaí infheistíochta measúnú leanúnach a dhéanamh ar cé acu a fhaigheann nó nach bhfaigheann siad an toradh is fearr is féidir dá gcliaint ar bhonn comhsheasmhach, agus ar an gcaoi sin an ceanglas maidir leis an bhforghníomhú is fearr a chomhlíonadh, ba cheart do ghnólachtaí infheistíochta measúnú a dhéanamh ar ábharthacht na dtairseach a chinn siad chun an toradh is fearr is féidir a áirithiú, lena n-áirítear spriocanna íosta agus diallais inghlactha, in aghaidh na haicme ionstraime airgeadais. Chun measúnú iomlánaíoch a dhéanamh ar dhiallais, ba cheart do ghnólachtaí infheistíochta cuntas a thabhairt freisin ar aon difríocht ábhartha i gcostais forghníomhaithe idir an t-ionad ina bhforghníomhaítear an t-ordú agus na hionaid a áirítear sna sonraí tagartha.

(17)

Chun a áirithiú go mbeidh beartas forghníomhaithe orduithe na ngnólachtaí infheistíochta fós éifeachtach le himeacht ama agus go mbeidh sé ag teacht go leormhaith le forbairtí sa mhargadh, ba cheart do ghnólachtaí infheistíochta measúnú a dhéanamh ar éifeachtacht a mbeartais forghníomhaithe orduithe uair sa bhliain ar a laghad. Ba cheart do ghnólachtaí infheistíochta déanamh amhlaidh freisin aon uair a léirítear leis an bhfaireachán ar an mbeartas forghníomhaithe orduithe go bhfuil neamhchomhlíonadh ann leis an mbeartas forghníomhaithe orduithe nó leis na ceanglais a leagtar síos in Airteagal 27(1) de Threoir 2014/65/AE, nó aon uair a dhéanann aon athrú ábhartha ar chostas, praghas, luas nó dóchúlacht an fhorghníomhaithe agus na socraíochta, nó ar mhéid nó ar chineál an ordaithe, nó ar aon pharaiméadar eile atá ábhartha maidir le forghníomhú an ordaithe difear do chumas an ghnólachta infheistíochta leanúint den toradh is fearr is féidir a fháil dá chliaint dá dtagraítear in Airteagal 65(7) de Rialachán Tarmligthe (AE) 2017/565.

(18)

Chun éifeachtacht an bheartais forghníomhaithe orduithe a áirithiú freisin i gcás nach roghnaíonn gnólachtaí infheistíochta ach ionad forghníomhúcháin amháin chun orduithe cliant a fhorghníomhú, ba cheart do ghnólachtaí infheistíochta comparáid thréimhsiúil a dhéanamh idir an toradh a fhaightear ar an ionad forghníomhúcháin sin a roghnaíodh agus na torthaí a d’fhéadfaidís a fháil ar ionaid forghníomhúcháin mhalartacha atá ar fáil, agus measúnú a dhéanamh ar cé acu atá nó nach bhfuil an gnólacht infheistíochta lena mbaineann fós ag comhlíonadh na hoibleagáide atá air an toradh is fearr is féidir a fháil dá chliaint trí leanúint d’fhorghníomhú ar an ionad forghníomhúcháin aonair sin.

(19)

Chun a áirithiú go bhfuil gnólachtaí infheistíochta fós ag comhlíonadh na hoibleagáide atá orthu an toradh is fearr is féidir a fháil dá gcliaint, i gcás gnólachtaí infheistíochta a thagann ar an gconclúid, bunaithe ar a measúnú, go bhfuil easnaimh ina mbeartas forghníomhaithe orduithe, ba cheart do na gnólachtaí sin na heasnaimh sin a cheartú a luaithe is féidir tar éis an mheasúnaithe sin.

(20)

Dá ndéanfaí ionstraimí airgeadais ilchineálacha a ghrúpáil in aon aicme amháin, d’fhéadfadh sé sin deacrachtaí a chruthú ó thaobh cáilíocht forghníomhaithe a bhrath a d’fhéadfadh gan bheith inchurtha leis an gcáilíocht is gá i gcás ionstraimí airgeadais áirithe laistigh den aicme sin. Mar gheall air sin, agus chun a áirithiú gur féidir measúnú éifeachtach a dhéanamh ar cháilíocht an fhorghníomhaithe i gcás grúpaí aonchineálacha ionstraimí airgeadais, ba cheart do ghnólachtaí infheistíochta aicmí ionstraimí airgeadais a shainaithint ar leibhéal gráinneach, agus in imthosca áirithe, fo-aicmí ionstraimí airgeadais ar leithligh a shainaithint.

(21)

Le Treoir (AE) 2024/790 ó Pharlaimint na hEorpa agus ón gComhairle (3) leasaíodh Treoir 2014/65/AE trí (i) na hoibleagáidí atá ar ionaid forghníomhúcháin sonraí a bhaineann le cáilíocht forghníomhaithe na n-idirbheart agus le háit forghníomhaithe an idirbhirt a chur ar fáil don phobal a scriosadh agus (ii) ábhar agus formáid na faisnéise atá le foilsiú ag gnólachtaí infheistíochta a fhorghníomhaíonn orduithe cliant a athrú. Dá bhrí sin, ba cheart Rialachán Tarmligthe (AE) 2017/575 ón gCoimisiún (4), lenar leagadh síos na ceanglais a bhaineann leis na sonraí atá le foilsiú ag ionaid forghníomhúcháin maidir le cáilíocht fhorghníomhú na n-idirbheart, agus Rialachán Tarmligthe (AE) 2017/576 ón gCoimisiún (5), lena leagtar amach oibleagáidí ar ghnólachtaí infheistíochta faisnéis a fhoilsiú maidir le céannacht na n-ionad forghníomhúcháin agus cáilíocht an fhorghníomhaithe a fhaightear, a aisghairm.

(22)

Ós rud é gur gá do ghnólachtaí infheistíochta a mbeartas forghníomhaithe orduithe, a nósanna imeachta forghníomhaithe orduithe agus a mbonneagar TF gaolmhar a choigeartú chun go mbeidh siad i gcomhréir leis na ceanglais nua, ba cheart feidhm a bheith ag an Rialachán seo 18 mí tar éis dháta a theacht i bhfeidhm.

(23)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ESMA) faoi bhráid an Choimisiúin.

(24)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara féideartha agus d’iarr sé tuairim ar an nGrúpa Geallsealbhóirí um Urrúis agus Margaí arna bhunú le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (6),

(a)

cé acu a fhorghníomhaítear nó nach bhforghníomhaítear orduithe cliant i gcomhréir leis an mbeartas forghníomhaithe orduithe;

(b)

an cháilíocht a fhaightear trí orduithe cliant a fhorghníomhú i gcomhréir leis an mbeartas forghníomhaithe orduithe;

(c)

praghas an fhorghníomhaithe, agus na sonraí tagartha á gcur san áireamh, lena n-áirítear, i gcás ina mbeidh fáil orthu, sonraí tagartha ón teilitéip chomhdhlúite a d’fhéadfadh sé a bhí á húsáid ag an ngnólacht san am sin;

(d)

i gcás gach aicme ionstraimí airgeadais a shainaithnítear i gcomhréir le hAirteagal 9, bunaithe ar shampla ionadaíoch le haghaidh gach aicme, cé acu a bhaintear amach nó nach mbaintear amach cáilíocht an fhorghníomhaithe ar bhonn comhsheasmhach, bunaithe ar thairseacha arna réamhchinneadh ag an ngnólacht infheistíochta le haghaidh na dtáscairí seo a leanas:

(e)

gach toisc eile atá ábhartha maidir le horduithe cliant a fhorghníomhú mar a leagtar amach in Airteagal 27(1) de Threoir 2014/65/AE.