(1)

I gcomhréir le hAirteagal 14 de Rialachán (AE) 2026/467, tá an Úcráin le sceideal a tharraingt suas le haghaidh gach gníomhaíochta, gach caiteachais nó gach birt a bhaineann le táirge cosanta nó le táirge eile chun críoch cosanta a bhfuil sé beartaithe aici cúnamh a fháil ina leith, chun tacú lena hacmhainneacht thionsclaíoch i dtaca leis an gcosaint, de bhun Airteagal 8(2), pointe (a)(iii) de Rialachán (AE) 2026/467.

(2)

Leagfar amach sa sceideal sin tuairisc ar an táirge cosanta nó ar tháirge eile chun críoch cosanta agus faisnéis maidir le comhlíonadh na gcoinníollacha incháilitheachta a leagtar amach in Airteagal 13 de Rialachán (AE) 2026/467.

(3)

Le hAirteagal 13(5) de Rialachán (AE) 2026/467 bunaítear maoluithe ar choinníollacha incháilitheachta táirgí cosanta le haghaidh cúnamh airgeadais don Úcráin. Tá an Coimisiún leis na maoluithe sin a fhormheas trí bhíthin gníomhartha cur chun feidhme, agus comhairle, saineolas agus tacaíocht an Ghrúpa Saineolaithe um Acmhainneacht Thionsclaíoch na hÚcráine i dtaca leis an gCosaint á gcur san áireamh, má fhaightear tuairim dhearfach ón gCoiste dá dtagraítear in Airteagal 27 den Rialachán sin.

(4)

An 12 Márta 2026, chuir an Úcráin an chéad sceideal faoi bhráid an Choimisiúin (a aicmítear ar leibhéal atá coibhéiseach le RESTREINT UE/EU RESTRICTED (2)) le haghaidh gníomhaíochtaí, caiteachais nó bearta a bhaineann le táirgí cosanta nó le táirgí eile chun críoch cosanta a bhfuil sé beartaithe ag an Úcráin cúnamh a iarraidh ina leith, i gcomhréir le hAirteagal 14 de Rialachán (AE) 2026/467 (‘sceideal táirgí’).

(5)

Sa sceideal táirgí, d’iarr an Úcráin tairbhe a bhaint as an maolú a leagtar síos in Airteagal 13(5), pointe (a) de Rialachán (AE) 2026/467, i ndáil le costas comhpháirteanna táirgí a bhfuil géarghá ag an Úcráin leo chun freagairt do chogadh foghach na Rúise, nach de thionscnamh an Aontais, Stáit CSTE LEE ná na hÚcráine iad, a leagtar amach in Airteagal 13(4), pointe (g) den Rialachán sin.

(6)

Chun tacú lena hiarraidh, chuir an Úcráin faisnéis ar fáil chun a léiriú nach bhfuil aon táirge coibhéiseach ann a fhreagraíonn dá riachtanas práinneach a chomhlíonann na coinníollacha a leagtar amach in Airteagal 13(4), pointe (g), nó a bheadh ar fáil ar an scála is gá agus a mbeadh an t-aga seachadta i gcomhréir le práinn an cháis agus le riachtanais oibríochtúla láithreacha na hÚcráine.

(7)

An 16 Márta 2026, chuaigh an Coimisiún i gcomhairle leis an nGrúpa Saineolaithe um Acmhainneacht Thionsclaíoch na hÚcráine, arna bhunú ar bhonn Airteagal 15 de Rialachán (AE) 2026/467, maidir leis an maolú don Úcráin agus fuair sé a chomhairle an dáta céanna.

(8)

Ós rud é gur léiríodh san anailís ar an iarraidh agus sa chomhairle ón nGrúpa Saineolaithe go gcomhlíontar na coinníollacha maidir leis an maolú a leagtar síos in Airteagal 13(5) de Rialachán (AE) 2026/467, ba cheart an maolú a d’iarr an Úcráin an 12 Márta 2026 a fhormheas.

(9)

Tá na bearta dá bhforáiltear sa Chinneadh seo i gcomhréir leis an tuairim ón gcoiste a bunaíodh le hAirteagal 27(1) de Rialachán (AE) 2026/467,