(1)

Le Rialachán (AE) 2025/327 bunaítear an Bord maidir leis spás Eorpach sonraí sláinte (‘Bord EHDS’) mar chomhlacht atá freagrach as cur chun feidhme comhsheasmhach an Rialacháin sin a chur chun cinn. Beidh Bord EHDS ina fhóram comhair agus malartaithe faisnéise idir na Ballstáit agus idir na Ballstáit agus an Coimisiún araon.

(2)

Is príomhchuid de na sásraí rialachais faoin Rialachán maidir leis an spás Eorpach sonraí sláinte é Bord EHDS. Cuireann sé leis an taithí a fuarthas leis an Líonra ríomhShláinte arna bhunú faoi Chinneadh Cur Chun Feidhme (AE) 2019/1765 ón gCoimisiún (2) maidir le líonra na n-údarás náisiúnta atá freagrach as an ríomhShláinte. Tiocfaidh deireadh leis an Líonra ríomhShláinte an 26 Márta 2031 (3). Go dtí sin, ba cheart do Bhord EHDS oibriú i gcomhar leis an Líonra ríomhShláinte, agus le Grúpa Saineolaithe na mBallstát maidir leis an ríomhShláinte, chun aistriú ordúil chuig creat rialachais nua a áirithiú, lena n-áirítear ar leibhéal fhoghrúpa. De réir mar a thosóidh codanna difriúla den Rialachán maidir leis an spás Eorpach sonraí sláinte d’fheidhm a bheith acu, mar shampla codanna maidir le malartú an chéad ghrúpa de chatagóirí tosaíochta, cuirfidh an Bord tús lena ghníomhaíochtaí a bhaineann leis na hábhair sin, agus gníomhaíochtaí á nglacadh ar láimh aige ón Líonra ríomhShláinte de réir a chéile.

(3)

Leagtar cúraimí ginearálta Bhord EHDS amach in Airteagal 94(1) agus (2) de Rialachán (AE) 2025/327. Cé go rialaítear bunábhar chúraimí Bhord EHDS sna forálacha sin, is iomchuí na cineálacha gníomhaíochtaí a d’fhéadfadh Bord EHDS a ghlacadh agus a chúraimí ginearálta á ndéanamh aige a shonrú chun cur i bhfeidhm comhsheasmhach Rialachán (AE) 2025/327 a áirithiú. Trí aighneachtaí i scríbhinn, lena n-áirítear aighneachtaí i bhfoirm treoirlínte neamhcheangailteacha arna n-eisiúint ag Bord EHDS, is féidir treoraíocht úsáideach a sholáthar d’údaráis náisiúnta agus do pháirtithe leasmhara eile a bhfuil baint acu i gcur chun feidhme an spáis Eorpaigh sonraí sláinte.

(4)

Féadfaidh Bord EHDS aighneachtaí i scríbhinn i ndáil le sonraíochtaí teicniúla a sholáthar i gcomhréir leis an Rialachán maidir leis an spás Eorpach sonraí sláinte, aighneachtaí a thacaíonn leis an rochtain ar ríomhshonraí sláinte nó le malartú na sonraí sin i bhfoirm treoracha maidir le cur chun feidhme teicniúil agus doiciméadacht eile. Féadfaidh Bord EHDS aighneachtaí i scríbhinn a sholáthar freisin chun aghaidh a thabhairt ar dhúshláin chur chun feidhme chomhchoiteanna, ina moltar freagraí comhordaithe nó treochláir chomhpháirteacha le haghaidh straitéisí cumarsáide na mBallstát agus an spáis Eorpaigh sonraí sláinte. Trí aighneachtaí eile i scríbhinn is féidir faisnéis úsáideach faoi chur chun feidhme an spáis Eorpaigh sonraí sláinte a sholáthar, lena n-áirítear aon saincheist a d’fhéadfadh teacht chun cinn le linn chur chun feidhme an Rialacháin maidir leis an spás Eorpach sonraí sláinte. Meastar go gcothóidh malartuithe dea-chleachtas foghlaim fhrithpháirteach agus glacadh dea-chleachtas i measc údaráis náisiúnta, chomh maith le comhar Bhord EHDS le comhlachtaí, údaráis agus gníomhaireachtaí ábhartha éagsúla dá dtugtar cuireadh freastal ar chruinnithe Bhord EHDS i gcomhréir le hAirteagal 92(3) de Rialachán (AE) 2025/327.

(5)

Ar an gcaoi chéanna, ba cheart do Bhord EHDS oibriú i gcomhar le fóraim eile a bunaíodh chun tacú le cur chun feidhme an spáis Eorpaigh sonraí sláinte, amhail Pobal Cleachtais na gComhlachtaí Rochtana Sonraí Sláinte, chun tacú le hidir-inoibritheacht trasteorann seirbhísí poiblí go ginearálta, an Bord um Eoraip Idir-inoibritheach a bunaíodh trí Rialachán (AE) 2024/903 ó Pharlaimint na hEorpa agus ón gComhairle (4), agus an Bord Eorpach um an Intleacht Shaorga a bunaíodh trí Rialachán (AE) 2024/1689 ó Pharlaimint na hEorpa agus ón gComhairle (5).

(6)

Ba cheart do Bhord EHDS plean oibre a ghlacadh gach 2 bhliain chun na gníomhaíochtaí a dhéanfaidh sé chun a chúraimí ginearálta a dhéanamh a shonrú. Féadfar an plean 2 bhliain sin a oiriúnú do dhálaí athraitheacha. Ba cheart don Choimisiún, mar rúnaíocht Bhord EHDS, tacaíocht a thabhairt do ghníomhaíochtaí Bhord EHDS, lena n-áirítear trí uirlisí slána comhair a sholáthar.

(7)

Ós rud é go bhforáiltear le Rialachán (AE) 2025/327 go mbeidh ionadaí ó na Ballstáit agus ionadaí ón gCoimisiún ina gcomhchathaoirligh ar Bhord EHDS, ba cheart rialacha maidir le hainmniú an chomhchathaoirligh ó na Ballstáit a leagan síos. Agus rúnaíocht Bhord EHDS á soláthar ag an gCoimisiún, níor cheart don ionadaí ón gCoimisiún ar Bhord EHDS a bheith i dteideal vótáil.

(8)

Níor cheart don Choimisiún comhaltaí de Bhord EHDS a íoc as a rannpháirtíocht i ngníomhaíochtaí Bhord EHDS. Mar sin féin, ba cheart don Choimisiún costais taistil agus chothaithe na gcomhaltaí de Bhord EHDS a aisíoc a tabhaíodh agus iad rannpháirteach i ngníomhaíochtaí Bhord EHDS, de réir an chur chuige maidir le comhlachtaí cosúla eile.

(9)

Ós rud é go bhféadfadh comhaltaí de Bhord EHDS, saineolaithe agus breathnóirí dá dtugtar cuireadh rochtain a fháil ar fhaisnéis íogair le linn a gcuid oibre, ba cheart iad a bheith faoi réir oibleagáid na rúndachta gairmiúla.

(10)

Ós rud é go soláthraíonn an Coimisiún rúnaíocht Bhord EHDS, ba cheart doiciméid atá i seilbh rúnaíocht Bhord EHDS a bheith faoi réir Rialacháin (CE) Uimh. 1049/2001 ó Pharlaimint na hEorpa agus ón gComhairle (6).

(11)

Ba cheart obair Bhord EHDS a bheith trédhearcach. Ar an gcúis sin, ba cheart faisnéis faoina chomhaltas a bheith ar fáil go poiblí, agus ba cheart na príomhdhoiciméid a fhoilsiú ar shuíomh gréasáin tiomnaithe.

(12)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (7) agus thug an Maoirseoir tuairim an 23 Eanáir 2026 (8).

(13)

Tá na bearta dá bhforáiltear sa Rialachán seo i gcomhréir leis an tuairim ón gcoiste arna mbunú le hAirteagal 98(1) de Rialachán (AE) 2025/327,