(1)

An 29 Aibreán 2021, chuir an Bheilg in iúl don Choimisiún go raibh sé ar intinn aici maolú ar cheanglais theicniúla áirithe atá in Iarscríbhinní II agus V a ghabhann le Treoir (AE) 2016/1629 le haghaidh an tuga ‘HAVENSLEEPBOOT 21’. Níor éirigh an tuga inoibrithe ach le déanaí agus is é sin an fáth a bhfuil sé iomchuí an cinneadh cur chun feidhme a ghlacadh lena gceadaítear deimhniú de chuid an Aontais a eisiúint don árthach sin.

(2)

Baineann an maolú atá beartaithe le hinnill dócháin inmheánaigh dhébhreosla a úsáid le haghaidh an tuga ‘HAVENSLEEPBOOT 21’. Feidhmíonn na hinnill sin mar thiomáint an tsoithigh agus dónn siad meatánól agus gás-ola mhuirí mar bhreosla, suas le cóimheas 70 % de mheatánól agus 30 % de ghás-ola mhuirí.

(3)

Teicneolaíocht a bhfuil gealladh fúithi is ea innill mheatánóil/ghás-ola muirí dhébhreosla a úsáid chun an soitheach a thiomáint i gcomhthéacs fuinneamh glan agus breoslaí malartacha a chur in úsáid le haghaidh soithí, rud a laghdóidh gáis ceaptha teasa agus truailleáin a d’fhéadfadh a bheith ann.

(4)

Leis an maolú atá beartaithe, spreagtar nuálaíocht agus cumasaítear úsáid teicneolaíochta nua trí chur chun feidhme píolótach inneall meatánóil/gás-ola muirí débhreosla sa loingseoireacht intíre. Innill mheatánóil/gás-ola muirí dhébhreosla a chur chun feidhme ar bhonn píolótach ar an gcaoi sin, is cuid den chur in úsáid teicneolaíochta é agus is é an t-aon bhealach le tús a chur leis an gcéim táirgthe shrathaigh fhéideartha.

(5)

Leagtar síos na ceanglais theicniúla le haghaidh soithí loingseoireachta intíre sa chaighdeán Eorpach arna bhunú ag an gCoiste Eorpach um ullmhú caighdeán i réimse na loingseoireachta Intíre (‘CESNI’). Tugtar ES-TRIN ar an gcaighdeán sin. Nuair a ceapadh agus a tógadh an tuga, níor áiríodh leis an ES-TRIN is infheidhme, mar a leagtar amach in Iarscríbhinn II a ghabhann le Treoir (AE) 2016/1629, forálacha sonracha maidir le húsáid mheatánóil/ghás-ola muirí dhébhreosla in innill tiomána an tsoithigh. Ar bhonn na léargas a fuarthas trí fhorbairt an tsoithigh phíolótaigh atá i gceist, áiríodh rialacha tiomnaithe maidir le húsáid meatánóil ar bord árthaí in ES-TRIN 2025/1 (3) nach raibh infheidhme go dtí gur tháinig sé faoi threoir Iarscríbhinn II a ghabhann le Treoir (AE) 2016/1629 an 1 Eanáir 2026.

(6)

In éagmais forálacha rialála maidir le húsáid chomhcheangailte meatánóil agus gás-ola muirí le haghaidh innill tiomána an tsoithigh, go háirithe tráth a cheaptar agus a thógtar an soitheach, is gá leibhéal leordhóthanach sábháilteachta a áirithiú maidir leis an úsáid atá beartaithe do chóras tiomána.

(7)

Is é Lloyd’s Register a d’ullmhaigh an doiciméadacht theicniúil a cuireadh isteach in éineacht leis an iarraidh ar mhaolú (‘an doiciméadacht theicniúil’), ar cumann aicmiúcháin aitheanta é le haghaidh soithí uiscebhealaí intíre faoi Airteagal 21 de Threoir (AE) 2016/1629. Forbraíodh na sonraíochtaí teicniúla sin agus forálacha ábhartha Chaibidil 30 de ES-TRIN 2023/1 (Forálacha speisialta is infheidhme maidir le hárthaí atá feistithe le córais tiomána nó chúntacha a oibríonn ar bhreoslaí a bhfuil splancphointe acu atá cothrom le 55oC nó níos lú ná sin) agus Iarscríbhinn 8 a ghabhann le ES-TRIN 2023/1 (Forálacha forlíontacha is infheidhme maidir le hárthaí atá feistithe le córais tiomána nó chúntacha a oibríonn ar bhreoslaí a bhfuil splancphointe acu atá cothrom le 55oC nó níos lú ná sin) á gcur san áireamh.

(8)

Bunaithe ar an doiciméadacht theicniúil, scrúdaigh an Mheitheal um cheanglais theicniúla CESNI (‘an Mheitheal’) úsáid chomhcheangailte meatánóil agus gás-ola muirí mar bhreoslaí d’innill tiomána an tsoithigh agus na bearta sábháilteachta sa mhaolú atá beartaithe. Leagtar amach torthaí an scrúdaithe theicniúil sin sna sonraíochtaí teicniúla atá i gceangal leis an gCinneadh seo, atá bunaithe ar dhoiciméad CESNI/PT (20) 21 rev. 3.

(9)

Is é conclúid scrúdú teicniúil na Meithle gur féidir oibriú, buncaeireacht agus cothabháil an chórais a dhéanamh go sábháilte, ag féachaint do na bearta agus do na nósanna imeachta atá beartaithe agus atá leagtha amach sa doiciméadacht theicniúil. Dá bhrí sin, is féidir a lua go n-áirithítear leibhéal leordhóthanach sábháilteachta dá dtagraítear in Airteagal 25(1), pointe (b), de Threoir (AE) 2016/1629, ar choinníoll go gcomhlíontar na coinníollacha a leagtar amach san Iarscríbhinn. Dá bhrí sin, is féidir an maolú atá beartaithe a dheonú.

(10)

Mar sin féin, chun tacú le forbairt forálacha a d’fhéadfadh a bheith ann amach anseo maidir le cineálcheadú inneall dócháin inmheánaigh a oibrítear ar mheatánól, i gcomhréir le Rialachán (AE) 2016/1628 ó Pharlaimint na hEorpa agus ón gComhairle (4), agus sa bhreis ar na ceanglais tuairiscithe a leagtar síos i bpointe 8 de dhoiciméad CESNI/PT (20) 21 rev. 3, ba cheart tuarascálacha ar astaíochtaí formaildéid a sholáthar freisin. Ós rud é go bhfuil easpa taithí phraiticiúil ar astaíochtaí formaildéid ó innill den chineál sin, ba cheart don Bheilg, sa chomhthéacs sin, na hoibleagáidí atá uirthi a eascraíonn as Treoracha 89/391/CEE (5) agus 98/24/CE ón gComhairle (6) agus Treoir 2004/37/CE ó Pharlaimint na hEorpa agus ón gComhairle (7) a chur san áireamh.

(11)

Baineann an maolú atá beartaithe le heisiúint deimhnithe de chuid an Aontais um loingseoireacht intíre chun críoch trialach, deimhniú ina bhfuil sonraíochtaí teicniúla nua atá ina maolú ar Iarscríbhinní II agus V a ghabhann le Treoir (AE) 2016/1629. Ní dheonófar maoluithe den sórt sin ach ar feadh tréimhse theoranta, ar tréimhse 5 bliana ó ghlacadh an Chinnidh seo ba cheart a bheith inti sa chás seo,