(1)

Síníodh an Comhaontú Idirnáisiúnta maidir le hOla Olóige agus Ológa Boird, 2015 (1) (‘an Comhaontú’) an 18 Samhain 2016 thar ceann an Aontais i gcomhréir le Cinneadh (AE) 2016/1892 ón gComhairle (2) agus tugadh i gcrích é ag an Aontas trí bhíthin Chinneadh (AE) 2019/848 ón gComhairle (3).

(2)

De bhun Airteagal 7(1) den Chomhaontú, is féidir leis an gComhairle Comhaltaí Chomhairle Idirnáisiúnta na nOlóg (CIO) (‘Comhairle na gComhaltaí’) cinntí a dhéanamh agus moltaí a ghlacadh chun forálacha an Chomhaontaithe a chur i bhfeidhm.

(3)

Tá Comhairle na gComhaltaí le cinneadh a ghlacadh lena leasaítear an caighdeán trádála le haghaidh olaí olóige agus olaí prabhaite olóige agus cinneadh maidir le modh nua anailíse chun an t-innéacs sárocsaíde sna holaí sin a chinneadh, trí chomhfhreagras a mhalartú roimh an 123ú seisiún dá cuid a bheidh ar siúl i mí an Mheithimh 2026 nó le linn an tseisiúin sin.

(4)

Tá na cinntí atá le glacadh pléite go mion ag saineolaithe eolaíocha agus teicniúla maidir le hola olóige, ar saineolaithe iad ón gCoimisiún agus ó na Ballstáit. Leis na cinntí sin, rannchuideofar le comhchuibhiú idirnáisiúnta na gcaighdeán olaí olóige agus bunófar creat lena n-áiritheofar iomaíocht chóir sa trádáil i dtáirgí ó earnáil na hola olóige.

(5)

Dá bhrí sin, ba cheart don Aontas tacú le glacadh an chinnidh maidir le modh anailíse nua chun an t-innéacs sárocsaíde in olaí olóige agus olaí prabhaite olóige a chinneadh, trí chomhfhreagras a mhalartú.

(6)

Maidir leis na leasuithe ar chaighdeán trádála CIO (Caighdeán trádála COI/T.15/NC Uimh. 4 a bhfuil feidhm aige maidir le holaí olóige agus olaí prabhaite olóige), ba cheart don Aontas tacú le cineál Coratina a chur le cineálacha Koroneiki agus Nocellara del Belice, gan cur i bhfeidhm an fhonóta maidir leis an gcion iomlán stéaróil i gcineálacha Coratina, Koroneiki agus Nocellara del Belice a theorannú go dtí deireadh na bliana bairr 2026/27.

(7)

Is iomchuí an seasamh atá le glacadh thar ceann an Aontais i gComhairle na gComhaltaí a bhunú, ós rud é go mbeidh éifeachtaí dlíthiúla ar an Aontas ag na cinntí atá le glacadh a mhéid a bhaineann le trádáil idirnáisiúnta leis na comhaltaí eile de CIO agus beidh siad in ann tionchar cinntitheach a imirt ar ábhar dhlí an Aontais, is é sin maidir leis na caighdeáin mhargaíochta agus na seiceálacha comhréireachta le haghaidh ola olóige arna nglacadh ag an gCoimisiún de bhun Airteagal 75 de Rialachán (AE) Uimh. 1308/2013 ó Pharlaimint na hEorpa agus ón gComhairle (4).

(8)

Má chuirtear glacadh na gcinntí ar atráth go dtí an 123ú seisiún a bheidh ag Comhairle na gComhaltaí, toisc nach bhfuil cuid de na comhaltaí de chuid CIO in ann a bhformheas a thabhairt maidir le glacadh na gcinntí roimh ré, ba cheart an seasamh a leagtar amach san Iarscríbhinn a ghabhann leis an gCinneadh seo a ghlacadh thar ceann an Aontais le linn an 123ú seisiún a bheidh ag Comhairle na gComhaltaí.

(9)

Mar sin féin, ba cheart ionadaithe an Aontais i gComhairle na gComhaltaí a bheith in ann teacht ar chomhaontú maidir le hoiriúnuithe teicniúla ar mhodhanna nó doiciméid eile de chuid CIO gan cinneadh eile ón gComhairle más toradh iad na hoiriúnuithe teicniúla sin ar leasuithe a bhaineann leis an athbhreithniú ar an gcaighdeán trádála nó leis an athbhreithniú ar an modh nua.

(10)

Chun leas an Aontais a chaomhnú, ba cheart cead a bheith ag ionadaithe an Aontais i gComhairle na gComhaltaí, áfach, a iarraidh go gcuirfí ar atráth glacadh an chinnidh lena leasaítear an caighdeán trádála agus glacadh an chinnidh maidir le modh nua chun an t-innéacs sárocsaíde in olaí olóige a chinneadh, dá mba dhócha go ndéanfadh faisnéis eolaíoch nó theicniúil nua a chuirfí i láthair sula dtionscnaítear an malartú comhfhreagrais roimh an 123ú seisiún de chuid Chomhairle na gComhaltaí difear don seasamh atá le glacadh thar ceann an Aontais,