(1)

Le Rialachán (AE) 2018/1139, tugtar de chumhacht do Ghníomhaireacht Sábháilteachta Eitlíochta an Aontais Eorpaigh (‘an Ghníomhaireacht’) deimhnithe a eisiúint, dearbhuithe a chlárú, imscrúdú a dhéanamh ar ghnóthais, agus íocaíocht na dtáillí agus na muirear is infheidhme a thobhach. Bunaítear leis freisin Bord Achomhairc atá freagrach as cinneadh a dhéanamh maidir le hachomhairc in aghaidh cinntí arna ndéanamh ag an nGníomhaireacht maidir leis na hábhair sin.

(2)

Tá an Bord Achomhairc freagrach freisin as cinneadh a dhéanamh maidir le hachomhairc in aghaidh chinntí aonair na Gníomhaireachta dá dtagraítear in Airteagal 14(6) agus (7) de Rialachán (AE) 2023/2405 ó Pharlaimint na hEorpa agus ón gComhairle (2).

(3)

Ba cheart don Bhord Achomhairc scrúdú a dhéanamh ar ábhair a bhfuil ardleibhéal taithí teicniúla ginearálta ag teastáil ina leith go príomha i réimsí deimhniúcháin, maoirseachta, forfheidhmithe agus feidhmíochta comhshaoil eitiltí. Dá bhrí sin, ba cheart do chomhaltaí an Bhoird a bheith cáilithe go hiomchuí. Ní mór comhalta atá cáilithe de réir dlí agus a bhfuil taithí aitheanta aige i ndlí an Aontais agus sa dlí idirnáisiúnta poiblí a bheith ina chathaoirleach ar an mBord Achomhairc, ionas go n-áiritheofar cáilíocht agus comhsheasmhacht chinntí an Bhoird Achomhairc.

(4)

Chun a áirithiú gur féidir leis feidhmiú go rianúil agus go héifeachtúil, ba cheart Cathaoirleach agus beirt chomhaltaí eile a bheith ar an mBord Achomhairc. I gcás ina measfaidh an Bord Achomhairc go bhfuil gá leis de bharr chineál an achomhairc (e.g., cás achomhairc atá thar a bheith casta), ba cheart cead a bheith aige suas le beirt chomhaltaí eile a ghairm ó na comhaltaí malartacha.

(5)

Ba cheart don Chathaoirleach a áirithiú go n-áiritheofar saineolas teicniúil, dlíthiúil agus nós imeachta agus/nó taithí i gcás gach imeachta achomhairc. Ba cheart don Chathaoirleach, i gcás ina n-éilíonn cineál na n-imeachtaí achomhairc é, a bheith in ann comhalta malartach a chur in ionad comhalta má tá bonn cirt leis an ionadú sin mar gheall ar an ngá atá le brath le linn na n-imeachtaí achomhairc ar shaineolas sonrach dlíthiúil, nós imeachta nó teicniúil an chomhalta mhalartaigh sin.

(6)

Chun láimhseáil agus diúscairt achomharc a éascú, ba cheart rapóirtéir a ainmniú do gach cás. Ba cheart donn rapóirtéir a bheith freagrach ar a laghad as teachtaireachtaí a ullmhú leis na páirtithe agus as cinntí a dhréachtú.

(7)

Chun oibriú rianúil agus éifeachtúil a áirithiú, ba cheart do rúnaíocht, dá ngairtear an chlárlann, cúnamh a thabhairt don Bhord Achomhairc i bhfeidhmiú a dhualgas.

(8)

Le Rialachán (CE) Uimh. 104/2004 ón gCoimisiún (3), leagtar síos na rialacha maidir le heagrú agus comhdhéanamh Bhord Achomhairc na Gníomhaireachta. Ba cheart forálacha sa Rialachán sin a choigeartú, áfach, chun sainordú leathnaithe na Gníomhaireachta faoi Rialachán (AE) 2018/1139 agus Rialachán (AE) 2023/2405 araon a léiriú. Go háirithe, ba cheart liosta na ndisciplíní san Iarscríbhinn a ghabhann le Rialachán (CE) Uimh. 104/2004 a oiriúnú chun na disciplíní nó na réimsí faoi raon feidhme na Gníomhaireachta a chumhdach i gcás inar féidir achomhairc a dhéanamh. I bhfianaise an líon athruithe is gá agus an bhunúis dlí nua, ba cheart gníomh nua a ghlacadh in ionad Rialachán (CE) Uimh. 104/2004 a leasú.

(9)

Ba cheart, dá bhrí sin, Rialachán (CE) Uimh. 104/2004 a aisghairm,