(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le hullmhóid arb é atá inti ion-1,4-béite-xiolanáise arna táirgeadh le Bacillus subtilis LMG S-15136 a údarú. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le hullmhóid arb é atá inti ion–1,4-béite-xiolanáis arna táirgeadh le Bacillus subtilis LMG S-15136 a údarú mar bhreiseán beathaithe le haghaidh cránacha ionbhainbhe, agus iarrtar ann an breiseán sin a aicmiú sa chatagóir breiseán ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 25 Meitheamh 2025 (2) maidir leis an ullmhóid ion-1,4-béite-xiolanáise arna táirgeadh le Bacillus subtilis LMG S-15136, go bhfuil sí sábháilte do chránacha ionbhainbh, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin go meastar gur greannaitheoir craicinn agus súl í agus gur íogróir riospráide í an ullmhóid ion-1,4-béite-xiolanáise arna táirgeadh le Bacillus subtilis LMG S-15136 sa dá fhoirmliú, is é sin soladach agus leachtach, agus go meastar gur riosca é aon nochtadh don ullmhóid sin. Tháinig an tÚdarás ar an gconclúid freisin go bhféadfadh an ullmhóid ion-1,4-béite-xiolanáise arna táirgeadh le Bacillus subtilis LMG S-15136 a bheith éifeachtúil mar bhreiseán zóiteicniúil i gcránacha le linn na tréimhse iompair ag 10 AI/kg d’ábhar beatha iomlán. Níor mheas an tÚdarás go raibh gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas i measúnú roimhe seo i ndáil le hiarratas eile ar údarú an bhreiseáin chéanna, conclúidí agus moltaí a d’fhíoraigh an tÚdarás sa tuairim uaidh an 13 Iúil 2016 (3), mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (4), ní raibh gá le tuarascáil mheastóireachta ón tSaotharlann Tagartha dá bhrí sin.

(6)

I bhfianaise an mhéid thuas, measann an Coimisiún go gcomhlíonann an ullmhóid ion-1,4-béite-xiolanáise, arna táirgeadh le Bacillus subtilis LMG S-15136, na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh cránacha ionbhainbh. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,