(1)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe a bhfuil nasc feidhmiúil acu leis na deiseanna iascaireachta sin, de réir mar is iomchuí. I gcomhréir le hAirteagal 16(4) de Rialachán (AE) Uimh. 1380/2013 ó Pharlaimint na hEorpa agus ón gComhairle (1), tá deiseanna iascaireachta le socrú i gcomhréir le cuspóirí agus rialacha an Chomhbheartais Iascaigh (CBI), mar a leagtar amach in Airteagal 2(2) den Rialachán sin. Tá deiseanna iascaireachta le socrú freisin i gcomhréir le ceanglais Rialacháin (AE) 2018/973 (2) agus (AE) 2019/472 (3) ó Pharlaimint na hEorpa agus ón gComhairle lena mbunaítear pleananna ilbhliantúla do stoic áirithe a ndéantar iascaireacht orthu sa Mhuir Thuaidh agus in Uiscí an Iarthair, agus d’iascaigh a shaothraíonn na stoic sin. De bhun Airteagal 16(1) de Rialachán (AE) Uimh. 1380/2013, tá deiseanna iascaireachta a chionroinntear i measc na mBallstát le cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic éisc nó gach iascaigh a áirithiú.

(2)

Ba cheart na gabhálacha iomlána incheadaithe (TACanna) a bhunú, i gcomhréir le hAirteagal 3 de Rialachán (AE) Uimh. 1380/2013 i gcomhréir leis an gcomhairle eolaíoch is fearr atá ar fáil, ar bhonn dearcadh fadtéarmach, agus sainiúlachtaí réigiúnacha á gcur san áireamh agus i bhfianaise na dtuairimí a cuireadh in iúl le linn an chomhairliúcháin leis na páirtithe leasmhara.

(3)

De bhun Airteagal 15 de Rialachán (AE) Uimh. 1380/2013, tá na stoic uile a bhfuil teorainneacha gabhálacha ag gabháil leo faoi réir na hoibleagáide gabhálacha a thabhairt i dtír ón 1 Eanáir 2019, ach tá feidhm ag díolúintí áirithe. Ar bhonn moltaí comhpháirteacha ó na Ballstáit agus i gcomhréir le hAirteagal 15(3) de Rialachán (AE) Uimh. 1380/2013, ghlac an Coimisiún Rialacháin Tharmligthe (AE) 2023/2459 (4) agus (AE) 2023/2623 (5) lena leagtar síos mionsonraí le haghaidh iascaigh áirithe maidir le cur chun feidhme na hoibleagáide gabhálacha a thabhairt i dtír.

(4)

Ba cheart a chur san áireamh sna deiseanna iascaireachta le haghaidh stoic speicis a chumhdaítear leis an oibleagáid gabhálacha a thabhairt i dtír, nach gceadaítear a thuilleadh i bprionsabal ábhar muirí a aischur. Dá bhrí sin, ba cheart deiseanna iascaireachta a bheith bunaithe ar fhigiúr na comhairle eolaíche le haghaidh gabhálacha iomlána arna chur ar fáil ag an gComhairle Idirnáisiúnta um Thaiscéalaíocht na Mara (ICES), is gcás ina bhfuil sí ar fáil. Na cainníochtaí a bhféadfar, mar eisceacht ón oibleagáid gabhálacha a thabhairt i dtír, leanúint dá n-aischur, ba cheart iad a asbhaint ón bhfigiúr sin a mholtar le haghaidh gabhálacha iomlána. Ina theannta sin, i gcás deiseanna iascaireachta le haghaidh stoic ar ina leith nach dtugann ICES ach comhairle maidir le gabhálacha a thabhairt i dtír, ba cheart iad a shocrú ar bhonn na comhairle sin.

(5)

Sna Pleananna Ilbhliantúla a bunaíodh le Rialacháin (AE) 2018/973 agus (AE) 2019/472 leagtar amach spriocanna agus bearta chun bainistiú fadtéarmach a dhéanamh ar na stoic a chumhdaítear leis na Pleananna Ilbhliantúla sin. Ba cheart deiseanna iascaireachta le haghaidh na stoc a liostaítear in Airteagal 1(1) de Rialachán (AE) 2018/973 agus in Airteagal 1(1) de Rialachán (AE) 2019/472 (‘spriocstoic’) a shocrú i gcomhréir le raon luachanna na básmhaireachta iascaireachta as a n-eascraíonn an uastáirgeacht inbhuanaithe (‘raonta FMSY’), nó ba cheart iad a shocrú ar leibhéal níos ísle, agus, i gcás inarb ábhartha, i gcomhréir leis na coimircí bithmhaise dá bhforáiltear sna Rialacháin sin. Leagtar amach na raonta FMSY sa chomhairle ábhartha ó ICES. Maidir le deiseanna iascaireachta do na spriocstoic nach féidir raonta FMSY a chinneadh ina leith, agus do na stoic dá dtagraítear in Airteagal 1(4) de Rialachán (AE) 2018/973 agus in Airteagal 1(4) de Rialachán (AE) 2019/472 (‘stoic foghabhála’), ba cheart iad a shocrú i gcomhréir leis na cuspóirí a leagtar amach in Airteagal 2(2) de Rialachán (AE) Uimh. 1380/2013 nó, i gcás nach bhfuil faisnéis eolaíoch leormhaith ar fáil, i gcomhréir leis an gcur chuige réamhchúraim i leith bainistiú iascaigh, mar a shainmhínítear in Airteagal 4(1), pointe (8), de Rialachán (AE) Uimh. 1380/2013.

(6)

De bhun Airteagal 4(6) de Rialachán (AE) 2018/973 agus Airteagal 4(7) de Rialachán (AE) 2019/472, ba cheart deiseanna iascaireachta le haghaidh spriocstoc a shocrú chun a áirithiú gur lú ná 5 % an dóchúlacht go dtitfidh an bhithmhais faoi bhun an phointe tagartha teorann i dtaca le bithmhais (Blim) (6).

(7)

I gcomhréir le hAirteagal 7 de Rialachán (AE) 2018/973 agus le hAirteagal 8 de Rialachán (AE) 2019/472, i gcás ina léirítear leis an gcomhairle eolaíoch go bhfuil bithmhais stoic sceite aon cheann de na spriocstoic faoi bhun an MSY Btrigger (7), tá bearta ceartaitheacha le déanamh. Go háirithe, ba cheart na deiseanna iascaireachta a shocrú ar leibhéal a chomhfhreagróidh don bhásmhaireacht iascaireachta a laghdaítear go comhréireach chun an laghdú ar an mbithmhais a chur san áireamh. I gcás ina léirítear leis an gcomhairle eolaíoch go bhfuil bithmhais stoic sceite d’aon cheann de na spriocstoic faoi bhun Blim, tá bearta ceartaitheacha breise le déanamh chun a áirithiú go ndéanfar an stoc a athbhunú go tapa chuig leibhéil os cionn na leibhéal sin a bhfuiltear in ann an uastáirgeacht inbhuanaithe a tháirgeadh os a gcionn. Féadfar a áireamh ar na bearta ceartaitheacha sin go háirithe iascach spriocdhírithe ar an stoc atá i gceist a chur ar fionraí agus laghdú leordhóthanach deiseanna iascaireachta le haghaidh na stoc sin nó na stoc eile san iascach.

(8)

Tá stoic áirithe ann a molann ICES gabhálacha nialasacha nó gabhálacha ísle ina leith, nó tuarann ICES, maidir le dóchúlacht níos lú ná 5 % a bheith ann go dtitfidh an bhithmhais faoi bhun Blim nach bhféadfaí í a bhaint amach ach amháin le gabhálacha ísle; nach bhféadfaí í a bhaint amach ach amháin le gabhálacha nialasacha; nó nach mbainfí é sin amach fiú le gabhálacha nialasacha. Mar sin féin, i gcás ina mbunófaí na TACanna le haghaidh na stoc sin ar na leibhéil sin, d’fhéadfadh an oibleagáid gach gabháil a thabhairt i dtír, lena n-áirítear foghabhálacha ó na stoic sin in iascaigh mheasctha, a chur faoi deara do shoitheach iascaireachta amháin nó níos mó stop a chur leis an iascaireacht fiú má tá cuóta fós acu le haghaidh speicis eile, rud a d’fhéadfadh a bheith ina chúis le hiascaigh áirithe a dhúnadh roimh am. De bhun Airteagal 5(3) de Rialachán (AE) 2018/973, Airteagal 5(3) de Rialachán (AE) 2019/472 agus Airteagal 16(4) de Rialachán (AE) Uimh. 1380/2013, i gcomhar le hAirteagal 2(1) agus Airteagal 2(5), pointí (c) agus (f), de Rialachán (AE) Uimh. 1380/2013agus chun cothromaíocht a bhaint amach idir iascach measctha a choinneáil ar bun, i bhfianaise na dtionchar tromchúiseach socheacnamaíoch a d’fhéadfadh a bheith ann mura ndéanfar amhlaidh, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar na stoic uile in iascach measctha ag an uastáirgeacht inbhuanaithe, is iomchuí TACanna sonracha a bhunú le haghaidh fhoghabhálacha na stoc sin. Ba cheart na TACanna foghabhála sin a shocrú ar leibhéil lena seachnaítear an baol go ndúnfaí iascaigh a bhfuil cuóta fós acu le haghaidh spriocspeicis roimh am mar gheall ar easpa cuótaí a bheith ag soithí iascaireachta le haghaidh stoic arna ngabháil mar fhoghabháil, i gcás ina bhféadfadh diantionchair shocheacnamaíocha a bheith ag gabháil le dúnadh roimh am mar sin sa ghearrthéarma. An tráth céanna, leis na TACanna foghabhála, ba cheart caomhnú na stoc lena mbaineann a áirithiú freisin, i gcás ina bhféadfadh tionchair thromchúiseacha fhadtéarmacha chomhshaoil agus shocheacnamaíocha a bheith ann má mhainnítear stoic a chaomhnú, chomh maith le tionchair shocheacnamaíocha ghearrthéarmacha ghaolmhara. Ba cheart na TACanna foghabhála sin a shocrú freisin ar leibhéil atá bunaithe ar fhianaise shonrach, iontaofa agus infhíoraithe maidir le tréimhsí coiscthe roimh am a d’fhéadfadh a bheith ann agus tionchair shocheacnamaíocha ghearrthéarmacha a d’fhéadfadh a bheith ann chomh maith le tionchair fhadtéarmacha ar an gcomhshaol. Chun laghdú a dhéanamh ar ghabhálacha na stoc ar ina leith atá TACanna foghabhála socraithe, ba cheart na deiseanna iascaireachta le haghaidh na n-iascach ina ngabhtar na stoic sin a shocrú ar leibhéil a chuideoidh le bithmhais na stoc leochaileach a athbhunú go leibhéil inbhuanaithe.

(9)

Chun úsáid deiseanna iascaireachta in iascaigh mheasctha i gcomhréir le hAirteagal 16(2) de Rialachán (AE) Uimh. 1380/2013, a ráthú a mhéid is féidir, is iomchuí linn a bhunú le haghaidh malartuithe cuótaí le haghaidh na mBallstát. Chuirfeadh linn den sórt sin le haghaidh malartuithe cuótaí cuótaí nár úsáideadh le haghaidh foghabhálacha áirithe do na Ballstáit chun foghabhálacha dosheachanta a chumhdach i limistéir áirithe in imthosca nach mbeadh aon chuóta ag na Ballstáit sin murach sin.

(10)

I gcomhréir le hAirteagal 2(2) agus Airteagal 16(4) de Rialachán (AE) Uimh. 1380/2013, maidir le stoic nach gcumhdaítear le Rialacháin (AE) 2018/973 agus (AE) 2019/472, i gcás ina bhfuil faisnéis eolaíoch leordhóthanach ar fáil, ba cheart deiseanna iascaireachta a shocrú i gcomhréir le luach an phointe FMSY (8) agus, i gcás inarb ábhartha, iad a shocrú ar leibhéil lena n-athbhunaítear stoic go dtí leibhéil ar os a gcionn atáthar in ann an uastáirgeacht inbhuanaithe a tháirgeadh. I gcás nach bhfuil an fhaisnéis eolaíoch sin ar fáil, ba cheart deiseanna iascaireachta a shocrú i gcomhréir leis an gcur chuige réamhchúraim i leith bainistiú iascaigh.

(11)

I gcás stoic áirithe, tá comhairle ó ICES fós bailí ar feadh roinnt blianta agus is í an chomhairle sin an chomhairle eolaíoch is fearr dá bhfuil ar fáil le haghaidh tréimhse iomlán na comhairle. Sna cásanna sin, ba cheart TACanna bliantúla a shocrú i bprionsabal lena gcumhdófar tréimhse iomlán na comhairle (‘TACanna ilbhliantúla’). Má bhíonn comhairle nua ó ICES ar fáil le linn na tréimhse sin, ba cheart a áirithiú go leanfaidh na TACanna ilbhliantúla de bheith comhsheasmhach leis an gcomhairle nua, a luaithe is féidir tar éis comhairle nua mar sin ó ICES a fhoilsiú. Thairis sin, ba cheart a áirithiú go mbeidh na hasbhaintí bliantúla ón bhfigiúr comhairle i gcás gabhálacha iomlána, chun díolúintí ón oibleagáid gabhálacha a thabhairt i dtír a chur san áireamh, comhsheasmhach leis na sonraí atá ar fáil. Mar sin féin, i gcás stoic áirithe, agus go háirithe i gcás stoic a léiríonn éagsúlachtaí suntasacha le déanaí i mbithmhais nó i mbásmhaireacht iascaireachta, d’fhéadfadh sé a bheith iomchuí leanúint de TACanna bliantúla a shocrú.

(12)

I gcomhréir le hAirteagal 4(3) de Rialachán (AE) 2019/472, ba cheart don Spáinn agus don Fhrainc a áirithiú go comhpháirteach, agus a gcuótaí le haghaidh iascach tráchtála le haghaidh doingin mhara Eorpacha (Dicentrarchus labrax) i ranna 8a agus 8b ICES á gcinneadh acu, nach mó é suim na gcuótaí sin, an ábhair mhuirí aischurtha tráchtála, na ngabhálacha áineasa agus an ábhair mhuirí aischurtha mhairbh áineasa ná an luach is ísle laistigh den raon FMSY (‘MSY Flower’) le haghaidh na n-aistrithe iomlána i gcomhair an limistéir sin, i.e. 3 883 thona. Chun go mbeidh an Coimisiún in ann faireachán a dhéanamh ar chur i bhfeidhm ceart na gcuspóirí agus na rialacha a leagtar amach i Rialachán (AE) Uimh. 1380/2013 agus i Rialachán (AE) 2019/472, ba cheart don Spáinn agus don Fhrainc faisnéis maidir lena gcuótaí faoi seach in iascaigh thráchtála le haghaidh doingin mhara Eorpacha a chur faoi bhráid an Choimisiúin.

(13)

Ba cheart bearta breise maidir le hiascach áineasa doingean mara Eorpach i ranna 8a agus 8b ICES a choinneáil ar bun, i bhfianaise an tionchair shuntasaigh a bhíonn ag iascach áineasa ar an ráta básmhaireachta iascaireachta le haghaidh an stoic sin.

(14)

Tá stoic áirithe ann a molann ICES gabhálacha os cionn leibhéal íseal ina leith. Mar sin féin, i gcás ina mbunófaí na TACanna le haghaidh na stoc sin ar na leibhéil sin, d’fhéadfadh an oibleagáid gach gabháil a thabhairt i dtír, lena n-áirítear foghabhálacha ó na stoic sin in iascaigh mheasctha, a chur faoi deara do shoitheach iascaireachta amháin nó níos mó stop a chur leis an iascaireacht fiú má tá cuóta fós acu le haghaidh speicis eile, rud a d’fhéadfadh a bheith ina chúis le hiascaigh áirithe a dhúnadh roimh am. De bhun Airteagal 5(3) Rialachán (AE) 2018/973, Airteagal 5(3) de Rialachán (AE) 2019/472 agus Airteagal 16(4) de Rialachán (AE) Uimh. 1380/2013, i gcomhar le hAirteagal 2(1) agus Airteagal 2(5), pointí (c) agus (f), den Rialachán sin agus chun cothromaíocht a bhaint amach idir iascach measctha a choinneáil ar bun, i bhfianaise na dtionchar tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar na stoic uile in iascach measctha ag an uastáirgeacht inbhuanaithe, is iomchuí TACanna sonracha a bhunú le haghaidh fhoghabhálacha na stoc sin. Ba cheart na TACanna foghabhála sin a shocrú ar leibhéil lena seachnaítear an baol go ndúnfaí iascaigh roimh am mar gheall ar easpa cuótaí a bheith ag soithí iascaireachta le haghaidh stoic arna ngabháil mar fhoghabháil, i gcás ina bhféadfadh diantionchair shocheacnamaíocha a bheith ag gabháil le dúnadh roimh am mar sin sa ghearrthéarma agus an tráth céanna lena n-áirithítear caomhnú na stoc lena mbaineann, i gcás ina bhféadfadh tionchair thromchúiseacha fhadtéarmacha chomhshaoil agus shocheacnamaíocha a bheith ann má mhainnítear stoic a chaomhnú, chomh maith le tionchair shocheacnamaíocha ghearrthéarmacha ghaolmhara. Ba cheart na TACanna foghabhála sin a shocrú freisin bunaithe ar fhianaise shonrach, iontaofa agus infhíoraithe maidir le tréimhsí coiscthe roimh am a d’fhéadfadh a bheith ann agus tionchair shocheacnamaíocha ghearrthéarmacha a d’fhéadfadh a bheith ann chomh maith le tionchair fhadtéarmacha ar an gcomhshaol. Chun laghdú a dhéanamh ar ghabhálacha na stoc ar ina leith atá TACanna foghabhála socraithe, ba cheart na deiseanna iascaireachta le haghaidh na n-iascach ina ngabhtar na stoic sin a shocrú ar leibhéil a chuideoidh le bithmhais na stoc leochaileach a athbhunú go leibhéil inbhuanaithe.

(15)

De réir na comhairle ábhartha ó ICES, tá gabhálacha áineasa mangach (Pollachius pollachius) i bhfolimistéar 8 agus roinn 9a ICES neamhdhiomaibhseach. Is iomchuí, dá bhrí sin, teorainneacha a bhunú le haghaidh gabhálacha áineasa mangach sa limistéar sin agus i limistéir chóngaracha, eadhon i bhfolimistéir 8, 9 agus 10 ICES agus in uiscí an Aontais i limistéar 34.1.1 den Choiste Iascaigh um an Atlantach Thoir Láir (CECAF).

(16)

I mí na Bealtaine 2022 chuir ICES in iúl nach ndearnadh aon dul chun cinn foriomlán, d’ainneoin iarrachtaí na mBallstát maidir le hathbhunú stoc na heascainne Eorpaí (Anguilla anguilla), maidir le baint amach an chuspóra ligean do 40 % de bhithmhais na n-eascann geal éalú ar fud an Aontais ina iomláine, mar a cheanglaítear le hAirteagal 2(4) de Rialachán (CE) Uimh. 1100/2007 ón gComhairle (9), agus nár breathnaíodh aon phatrún soiléir maidir le básmhaireacht. I mí na Samhna 2025 mhol ICES arís gur cheart gan aon ghabháil eascann Eorpach a bheith ann i ngach gnáthóg agus ag gach céim den saol, ar fud a raoin nádúrtha, lena gcuimsítear an tAtlantach Thoir Thuaidh agus an Mheánmhuir, nuair a chuirtear an cur chuige réamhchúraim i bhfeidhm. Baineann sé sin le gabhálacha áineasa agus tráchtála araon agus áiríodh leis gabhálacha eascann gloine le haghaidh athstocála agus dobharshaothrú.

(17)

Le Rialachán (AE) 2023/194 ón gComhairle (10) cuireadh síneadh 6 mhí leis an tréimhse choiscthe le haghaidh aon ghníomhaíocht iascaireachta eascann tráchtála in uiscí muirí agus uiscí goirte an Aontais san Atlantach Thoir Thuaidh. Cuireadh toirmeasc leis freisin ar gach iascach eascann áineasa sna huiscí sin. Measadh gurbh fhearr a chosnódh tréimhse choiscthe 6 mhí an stoc ná mar a chosnódh bearta an Aontais agus na bearta náisiúnta a cuireadh chun feidhme go dtí 2022. Measadh freisin leis an tréimhse choiscthe shínithe go gcuirfí le baint amach an chuspóra ligean do 40 % ar a laghad d’eascanna geala éalú. Le Rialacháin (AE) 2024/257 (11) agus (AE) 2025/202 (12) ón gComhairle, coinníodh na bearta sin ar bun agus na critéir á soiléiriú maidir leis an tréimhse choiscthe agus an maolú a d’fhéadfadh a bheith ann a shocrú i gcás iascach eascann teoranta leanúnach le linn thréimhse imirce na n-eascann. I bhfianaise stádas criticiúil leanúnach na heascainne Eorpaí, is iomchuí na bearta sin a choinneáil ar bun in 2026.

(18)

De bhun Rialachán (CE) Uimh. 1100/2007, is beart caomhnúcháin é eascanna gloine a athstocáil arna roghnú ag Ballstáit áirithe ina bpleananna bainistíochta eascann. Chun é a chur ar a gcumas do na Ballstáit sin leanúint den bheart sin a chur chun feidhme, d’fhéadfadh sé go mbeadh gá le gabhálacha eascann gloine in uiscí muirí agus uiscí goirte an Aontais san Atlantach Thoir Thuaidh ag an am iomchuí den bhliain agus b’fhéidir le linn a bpríomhthréimhse imirce. Dá bhrí sin, féadfaidh na Ballstáit tuilleadh iascaireachta eascann gloine a cheadú go heisiach le haghaidh athstocála ar feadh 50 lá breise le linn phríomhthréimhse imirce nó na n-eascann gloine.

(19)

De réir ICES, meastar go mbeidh bithmhais an tsóil (Solea solea) i bhforanna 20 go 24 ICES faoi bhun Blim in 2026. I gcomhréir le hAirteagal 7(2) de Rialachán (AE) 2018/973, ba cheart bearta feabhais a bhunú le haghaidh an stoic sin le haghaidh 2026, chun a áirithiú go bhfillfidh sé go tapa ar an leibhéal bithmhaise os cionn an leibhéil atá in ann an uastáirgeacht inbhuanaithe a tháirgeadh. Ba cheart bearta ceartaitheacha den sórt sin a bhunú le haghaidh na n-iascach a dhéanann foghabhálacha substaintiúla sól, i.e. le haghaidh na n-iascach eangacha geolbhaigh measctha a dhíríonn ar an leathóg (Pleuronectes platessa) agus le haghaidh na n-iascach tráil mheasctha a dhíríonn ar ghliomach na hIorua (Nephrops norvegicus). Ós rud é nach bhfuil ach foghabháil íosta sól coiteann in iascaigh eangaí geolbhaigh i bhForoinn 24 agus in iascaigh chósta ar mhionscála i bhForoinn 22 laisteas de dhomhanleithead 55°T, ba cheart na limistéir sin a dhíolmhú ó na bearta sin.

(20)

Sa chomhairle ó ICES le haghaidh 2026 maidir le stoic áirithe ealásmabrainciach (eadhon sciataí, siorcanna agus roic), molann sé gabhálacha nialasacha, mar gheall ar dhrochstádas caomhantais ealásmabrainciach agus ós rud é go bhféadfadh fiú gníomhaíocht theoranta iascaireachta a bheith ina siocair le riosca tromchúiseach caomhnaithe. Dá bhrí sin, ba cheart toirmeasc a chur ar iascaireacht a dhéanamh ar na speicis sin. Ina theannta sin, de bhun Airteagal 15(4), pointe (a), de Rialachán (AE) Uimh. 1380/2013, níl feidhm ag an oibleagáid gabhálacha a thabhairt i dtír maidir leis na speicis a bhfuil toirmeasc ar iascaireacht a dhéanamh orthu. Nuair a ghabhtar de thaisme iad, níor cheart dochar a dhéanamh do na speicis sin agus ba cheart iad a scaoileadh saor go pras. Nuair a aischuirtear na healásmabrainciaigh sin ní mheastar go n-ardaítear a ráta básmhaireachta iascaireachta go suntasach agus tacaíonn sé le caomhnú na stoc sin toisc go mbíonn rátaí arda marthanais acu nuair a aischuirtear iad.

(21)

Chun an úsáid a bhaintear as deiseanna iascaireachta a uasmhéadú, is iomchuí foráil a dhéanamh maidir le socrú solúbtha a chur chun feidhme idir limistéir áirithe TAC inarb é an stoc bitheolaíoch céanna atá i gceist.

(22)

Déantar foráil le hAirteagail 3 agus 4 de Rialachán (CE) Uimh. 847/96 ón gComhairle (13) maidir le solúbthacht ó bhliain go bliain i dtaca le cuótaí le haghaidh stoic atá faoi réir ‘TACanna réamhchúraim’ agus ‘TACanna anailíseacha’ araon. De bhun Airteagal 2 den Rialachán sin, bíonn sé le cinneadh ag an gComhairle, agus TACanna á socrú aici, cé na stoic nach mbeidh feidhm ag Airteagail 3 ná 4 den Rialachán sin maidir leo, ar bhonn stádas bitheolaíoch na stoc agus ar bhonn na ngealltanas a comhaontaíodh le tríú tíortha. Thairis sin, déantar foráil le hAirteagal 15(9) de Rialachán (AE) Uimh. 1380/2013 maidir le solúbthacht bhreise ó bhliain go bliain le haghaidh na stoc uile atá faoi réir na hoibleagáide gabhálacha a thabhairt i dtír. Chun solúbthacht iomarcach a sheachaint a bhainfeadh an bonn de bhaint amach chuspóirí CBI, níor cheart feidhm charnach a bheith ag solúbthacht ó bhliain go bliain le haghaidh cuótaí de bhun Airteagail 3 agus 4 de Rialachán (CE) Uimh. 847/96 agus Airteagal 15(9) de Rialachán (AE) 1380/2013. Ba cheart solúbthacht ó bhliain go bliain faoi Airteagal 15(9) de Rialachán (AE) Uimh. 1380/2013 a eisiamh, i gcás inarb ábhartha, ar bhonn stádas bitheolaíoch an stoic agus ar bhonn na ngealltanas a tugadh i gcrích le tríú tíortha.

(23)

I gcás nach ndéanann ach aon Bhallstát amháin iascaireacht ar stoc, is iomchuí an Ballstát sin a chumhachtú le TAC a shocrú don stoc sin, i gcomhréir le hAirteagal 2(1) den Chonradh ar Fheidhmiú an Aontais Eorpaigh (CFAE). Is iomchuí an cumhachtú sin, ar choinníoll, agus leibhéal an TAC á chinneadh, go gcomhlíonfaidh an Ballstát na cuspóirí agus na rialacha a leagtar amach i Rialachán (AE) Uimh. 1380/2013 agus i Rialacháin (AE) 2018/973 agus (AE) 2019/472. Chun go mbeidh an Coimisiún in ann faireachán a dhéanamh ar chur i bhfeidhm ceart na gcuspóirí agus na rialacha sin, ba cheart do na Ballstáit faisnéis maidir leis na TACanna a chur faoi bhráid an Choimisiúin. Ina theannta sin, féadfaidh an Coimisiún a iarraidh ar an gCoiste Eolaíoch, Teicniúil agus Eacnamaíoch um Iascach (CETEI) measúnú a dhéanamh ar na TACanna sin, agus i gcás ina measfaidh CETEI nach gcomhlíonann na TACanna sin na cuspóirí agus na rialacha a leagtar amach i Rialachán (AE) Uimh. 1380/2013 agus i Rialacháin (AE) 2018/973 agus (AE) 2019/472, ba cheart do na Ballstáit na TACanna a leasú ar bhonn na comhairle ó CETEI.

(24)

Is gá teorainneacha na hiarrachta iascaireachta le haghaidh sól i Muir nIocht Thiar (roinn 7e ICES) a bhunú i gcomhréir le hAirteagal 12 de Rialachán (AE) 2019/472.

(25)

Is gá na huasteorainneacha iarrachta iascaireachta le haghaidh tuinníní gorma (Thunnus thynnus) a bhunú i gcuid de limistéar Choinbhinsiún an Choimisiúin Idirnáisiúnta um Chaomhnú na dTuinníní Atlantacha (CICTA), go sonrach san Aigéan Atlantach, lastoir de 45°I, i gcomhréir le hAirteagail 6, 11, 13 agus 16 de Rialachán (AE) 2023/2053 ó Pharlaimint na hEorpa agus ón gComhairle (14).

(26)

Tá úsáid na ndeiseanna iascaireachta atá ar fáil do shoithí iascaireachta de chuid an Aontais a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (15), agus go háirithe Airteagail 33 agus 34 den Rialachán sin, maidir le gabhálacha agus iarracht iascaireachta a thaifeadadh agus fógra a thabhairt faoi shonraí i ndáil le hídiú deiseanna iascaireachta. Is gá, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún maidir le gabhálacha agus iarracht iascaireachta le haghaidh stoic atá faoi réir an Rialacháin seo.

(27)

Ag an gcruinniú bliantúil a bhí aige in 2025, níor ghlac an Coimisiún um Iascach an Atlantaigh Thoir Thuaidh (NEAFC) moladh lena socraítear an TAC le haghaidh péirsí domhainmhara (Sebastes mentella) in uiscí idirnáisiúnta d’fholimistéir 1 agus 2 ICES le haghaidh 2026. Go dtí glacadh féideartha an mholta ó NEAFC le haghaidh péirsí domhainmhara, ba cheart an TAC le haghaidh an stoic sin i bhfolimistéir 1 agus 2 ICES a shocrú go sealadach ag nialas.

(28)

Ag an gcruinniú bliantúil a bhí aige in 2025, níor ghlac NEAFC moladh maidir le haileabó Graonlannach (Reinhardtius hippoglossoides) i bhfolimistéir 1 agus 2 ICES le haghaidh 2026. Dá bhrí sin, ba cheart cuóta an Aontais le haghaidh haileabónna Graonlannacha in uiscí idirnáisiúnta fholimistéir 1 agus 2 ICES le haghaidh 2026 a shocrú ag 1 711 tona. Comhfhreagraíonn an leibhéal sin do 9,25 % den leibhéal a mhol ICES ina chomhairle le haghaidh 2023 (18 494 thona), arb é an chomhairle eolaíoch is fearr dá bhfuil ar fáil é maidir leis an stoc sin.

(29)

Ronnaigh (Scomber scombrus), faoitíní gorma (Micromesistius poutassou) agus scadán an Atlantaigh-Chríoch Lochlann (Clupea harengus) san Atlantach Thoir Thuaidh faoi réir dálaí cósta Comhairliúcháin na Stát maidir le bainistiú iascaigh do na stoic sin, agus ar stoic iad atá á mbainistiú ag NEAFC freisin. Glacann an tAontas páirt i gcomhairliúcháin na Stát cósta le haghaidh 2026 ar bhonn na seasamh a d’fhormhuinigh an Chomhairle an 13 Deireadh Fómhair 2025. Maidir le scadáin an Atlantaigh-Chríoch Lochlann agus faoitíní gorma, rinneadh toradh na gcomhairliúchán a dhoiciméadú i dtaifid chomhaontaithe a síníodh an 21 agus an 23 Deireadh Fómhair 2025 faoi seach. Ag an gcruinniú bliantúil a bhí aige in 2025, ghlac NEAFC moladh maidir le bearta caomhnaithe agus bainistíochta le haghaidh 2026 maidir le scadáin an Atlantaigh-Chríoch Lochlann ach ní maidir le faoitíní gorma. Is iomchuí, dá bhrí sin, an TAC le haghaidh scadáin an Atlantaigh-Chríoch Lochlann a shocrú bunaithe ar mholadh ábhartha NEAFC agus an TAC le haghaidh faoitíní gorma san Atlantach Thoir Thuaidh le haghaidh 2026 ar leibhéal na ndeiseanna iascaireachta a comhaontaíodh i dTaifead Comhaontaithe ábhartha na Stát cósta. Maidir leis an ronnach, tá comhairliúcháin na Stát cósta fós ar siúl agus, ag an gcruinniú bliantúil a bhí aige le haghaidh 2025, níor ghlac NEAFC aon mholadh. Is iomchuí, dá bhrí sin, TAC sealadach le haghaidh ronnach a shocrú don chéad leath de 2026. I bhfianaise shéasúracht an iascaigh ronnach, is iomchuí an TAC sealadach a shocrú ag 156 921 tona, arb ionann é agus 90 % den TAC a mhol ICES.

(30)

Tá an faoitín gorm (Micromesistius poutassou) agus scadán an Atlantaigh-Chríoch Lochlann (Clupea harengus) san Atlantach Thoir Thuaidh faoi réir chomhairliúcháin na Stát cósta maidir le bainistiú iascaigh i gcás an stoic sin, agus is stoic é a bhainistíonn NEAFC freisin. Ghlac an tAontas páirt i gcomhairliúcháin na Stát cósta ar bhonn an tseasaimh a d’fhormhuinigh an Chomhairle an 7 Deireadh Fómhair 2025. Rinneadh toradh chomhairliúcháin na Stát cósta a dhoiciméadú i dtaifead comhaontaithe a síníodh an 23 Deireadh Fómhair 2025. Ag an gcruinniú bliantúil a bhí ag NEAFC in 2025, níor ghlac sé moladh maidir le bearta caomhnúcháin agus bainistíochta le haghaidh an fhaoitín ghoirm le haghaidh 2026. Ba cheart, dá bhrí sin, leibhéal an TAC le haghaidh an fhaoitín ghoirm le haghaidh 2026 a bhunú ar an leibhéal a leagtar amach sa taifead comhaontaithe sin an 23 Deireadh Fómhair 2025.

(31)

Ag an gcruinniú bliantúil a bhí aige in 2025, choinnigh an Coimisiún Idirnáisiúnta um Chaomhnú na dTuinníní Atlantacha (CICTA) na bearta reatha ar bun le haghaidh stoic áirithe i limistéar Choinbhinsiún CICTA le haghaidh 2026. Ina theannta sin, mhéadaigh CICTA an leibhéal TAC le haghaidh tuinníní gorma san Atlantach Thoir agus laghdaigh sé an liúntas coinneála le haghaidh mácónna biorshrónacha (Isurus oxyrinchus) san Atlantach Theas le haghaidh 2026 i gcomparáid le 2025. Ba cheart na bearta sin a chur chun feidhme i ndlí an Aontais.

(32)

Rinneadh cuótaí an Aontais le haghaidh na stoc i limistéar Choinbhinsiún CICTA le haghaidh 2026 a choigeartú le linn chruinniú bliantúil CICTA in 2025 i gcomhréir le roinnt moltaí ó CICTA faoina bhféadfaidh an tAontas, arna iarraidh sin, céatadán socraithe dá chuóta deiseanna iascaireachta nár úsáideadh a thabhairt ar aghaidh ó 2024 go dtí 2025 nó ó 2025 go dtí 2026. Go dtí go ndéanfar coigeartuithe féideartha mar sin ar chuótaí an Aontais, ba cheart cuótaí do Bhallstáit aonair a bhunú ar bhonn chuóta iomlán an Aontais le haghaidh 2026 mar a chomhaontaigh CICTA sula ndéanfar coigeartuithe mar sin.

(33)

Ag an gcruinniú bliantúil a bhí aige in 2025, ghlac an Coimisiún um Chaomhnú Beo-Acmhainní Muirí Antartacha (CCAMLR) teorainneacha gabhála le haghaidh na stoc i limistéar Choinbhinsiún CCAMLR le haghaidh na tréimhse ón 1 Nollaig 2025 go dtí an 30 Samhain 2026. Ba cheart na bearta sin a chur chun feidhme i ndlí an Aontais.

(34)

Ag an gcruinniú bliantúil a bhí aige in 2025, bhunaigh an Coimisiún um Thuinníní an Aigéin Indiaigh (IOTC) na bearta seo a leanas ina Limistéar Inniúlachta le haghaidh 2026: choinnigh sé ar bun na bearta atá ann faoi láthair agus a glacadh le haghaidh tuinníní buí (Thunnus albacares), rinne sé athbhreithniú ar na teorainneacha gabhála le haghaidh tuinníní mórshúileacha (Thunnus obesus), agus ghlac sé teorainneacha gabhála le haghaidh tuinníní aigéanacha (Katsuwonus pelamis) den chéad uair. Ba cheart na bearta sin a chur chun feidhme i ndlí an Aontais. Ba cheart cuóta an Aontais le haghaidh tuinníní aigéanacha i Limistéar Inniúlachta IOTC le haghaidh 2026 a chionnroinnt ar na Ballstáit lena mbaineann bunaithe ar mheánleibhéal coibhneasta ghníomhaíochtaí iascaireachta na mBallstát sin le linn dhá thréimhse thagartha: na 5 bliana is fearr i ngach Ballstát sa tréimhse ó 2015 go 2024, agus sa tréimhse ó 2022 go 2024.

(35)

Beidh cruinniú bliantúil na hEagraíochta Réigiúnaí um Bainistíocht Iascaigh san AigéanCiúin Theas (SPRFMO) ar siúl ón 2 go dtí an 6 Márta 2026. Ba cheart, dá réir sin, na bearta atá ann faoi láthair i limistéar Choinbhinsiún SPRFMO atá nasctha go feidhmiúil leis na TACanna a choinneáil ar bun go sealadach go dtí go mbeidh an cruinniú bliantúil ar siúl agus go dtí go mbunófar na TACanna le haghaidh 2026.

(36)

Ag an gcruinniú bliantúil a bhí aige in 2025, d’athraigh an Coimisiún Idir-Mheiriceánach um Thuinníní Teochreasacha (IATTC) roinnt de na bearta a bhí ann cheana is infheidhme i limistéar Choinbhinsiún IATTC agus líon na sruthfheistí comhthiomsaithe éisc atá ann cheana le haghaidh 2026 á gcoinneáil ar bun. Ba cheart na bearta sin a chur chun feidhme i ndlí an Aontais.

(37)

Ag an gcruinniú bliantúil a bhí ag an gCoimisiún um Chaomhnú an Tuinnín Ghoirm Dheisceartaigh in 2023, ghlac sé an TAC don tuinnín gorm Deisceartach (Thunnus maccoyii) ar feadh tréimhse 3 bliana ó 2024 go 2026. Ba cheart an beart sin a chur chun feidhme i ndlí an Aontais le haghaidh 2026.

(38)

Ag an gcruinniú bliantúil a bhí ag Eagraíocht Iascaigh an Atlantaigh Thoir Theas (SEAFO) in 2025, choinnigh sí ar bun le haghaidh 2026 na TACanna atá ann cheana i limistéar Choinbhinsiún SEAFO. Ba cheart na bearta sin a chur chun feidhme i ndlí an Aontais.

(39)

Ag an gcruinniú bliantúil a bhí aige in 2025, choinnigh an Coimisiún Iascaigh don Aigéan Ciúin Iartharach agus don Aigéan Ciúin Láir (WCPFC) na bearta a glacadh le haghaidh 2025 ar bun le haghaidh 2026. Ina theannta sin, ghlac WCPFC teorainn foghabhála le haghaidh tuinníní gorma an Aigéin Chiúin (Thunnus orientalis) le haghaidh limistéar Choinbhinsiún WCPFC. Ba cheart na bearta sin a chur chun feidhme i ndlí an Aontais.

(40)

Ag an 47ú cruinniú bliantúil a bhí ag Eagraíocht Iascaigh an Atlantaigh Thiar Thuaidh (NAFO) in 2025, ghlac sí deiseanna iascaireachta i gcás stoic áirithe i limistéar Choinbhinsiún NAFO le haghaidh 2026. Choinnigh sí le haghaidh 2026 freisin na bearta atá ann cheana a bhfuil nasc feidhmiúil acu leis na deiseanna iascaireachta le haghaidh scuideanna gearreiteacha (Illex illecebrosus) i bhfolimistéir 3 agus 4 NAFO agus leitheanna earrbhuí (Limanda ferruginea) i ranna 3LNO NAFO, arb é is aidhm dóibh leibhéil fhoghabhálacha na speiceas sin nach spriocspeicis iad a íoslaghdú mar go gcaithfí, gan na bearta sin, na deiseanna iascaireachta le haghaidh na stoc sin a laghdú chun na speicis nach spriocspeicis iad a chosaint. Ba cheart na bearta sin a chur chun feidhme i ndlí an Aontais.

(41)

Ag an gcruinniú bliantúil in 2025, rinne Comhaontú Iascaigh an Aigéin Indiaigh Theas (SIOFA) athbhreithniú ar na bearta atá ann cheana maidir le siorcanna domhainfharraige, lena n-áirítear an dúnadh atá ann faoi láthair i limistéir iascaireachta agus liosta na speiceas siorcanna a bhfuil toirmeasc ar iascaireacht spriocdhírithe a dhéanamh orthu i limistéar Chomhaontú SIOFA. Ina theannta sin, le SIOFA glacadh beart nua maidir le hiascach beantach, lena n-áirítear limistéir áirithe a dhúnadh le haghaidh gach gníomhaíochta iascaireachta grinnill agus i limistéir áirithe gan ach iascaireacht spiléir ghrinnill a cheadú. Ba cheart na bearta sin a chur chun feidhme i ndlí an Aontais.

(42)

Faoi Airteagal 498(2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (16) (‘an Comhaontú Trádála agus Comhair’), déanfaidh an tAontas agus an Ríocht Aontaithe comhairliúcháin a reáchtáil go bliantúil, faoin 10 Nollaig gach bliain, chun na TACanna don bhliain dár gcionn a chomhaontú le haghaidh na stoc a liostaítear in Iarscríbhinn 35 a ghabhann leis an gComhaontú sin.

(43)

In 2025 reáchtáil an tAontas agus an Ríocht Aontaithe comhairliúcháin dhéthaobhacha maidir le líon mór TACanna a shocrú le haghaidh 2026 le haghaidh na stoc a liostaítear in Iarscríbhinn 35 a ghabhann leis an gComhaontú Trádála agus Comhair. Rinneadh na comhairliúcháin sin de bhun Airteagal 498(2), (4) agus (6) den Chomhaontú Trádála agus Comhair, agus ghlac an tAontas páirt sna comhairliúcháin sin ar bhonn an tseasaimh ón Aontais arna fhormhuiniú ag an gComhairle an 21 Deireadh Fómhair 2025, agus i gcomhréir leis na páipéir neamhoifigiúla ón gCoimisiún arna bhformhuiniú ag an gComhairle an 21, an 23 agus an 31 Deireadh Fómhair agus an 11 agus an 25 Samhain 2025. Rinneadh toradh na gcomhairliúchán a dhoiciméadú i dtaifead i scríbhinn a shínigh Cinn na dToscaireachta an 10 Nollaig 2025. Ba cheart na deiseanna iascaireachta ábhartha a shocrú, dá bhrí sin, ar na leibhéil a leagtar amach sa taifead i scríbhinn sin, agus ba cheart na bearta eile atá nasctha go feidhmiúil leis na deiseanna iascaireachta a leagtar amach sa taifead i scríbhinn sin freisin a chur chun feidhme i ndlí an Aontais.

(44)

Tháinig an tAontas agus an Ríocht Aontaithe ar chomhaontú maidir le rochtain chómhalartach ón 1 Eanáir 2026 go dtí an 31 Nollaig 2030, chun díriú ar 560 tona de thuinníní colgacha an Tuaiscirt (Thunnus alalunga) i limistéir eacnamaíocha eisiacha na mBallstát agus na Ríochta Aontaithe. Ní áirítear leis an gcomhaontú sin rochtain ar limistéir dá dtagraítear in Airteagal 5(3) de Rialachán (AE) Uimh. 1380/2013.

(45)

Tháinig an tAontas agus an Ríocht Aontaithe ar chomhaontú maidir le bearta ceartaitheacha don trosc (Gadus morhua), don chadóg (Melanogrammus aeglefinus), don fhaoitín (Merlangius merlangus), don sól agus don leathóg trasna na Mara Ceiltí, Mhuir Éireann agus Mhuir nIocht. Tá nasc feidhmiúil idir na bearta sin agus TAC na stoc lena mbaineann, ós rud é, in éagmais na mbeart sin, nach n-áiritheodh leibhéil TAC téarnamh leordhóthanach stoc. Chun cothrom iomaíochta a áirithiú d’oibreoirí an Aontais vis-à-vis oibreoirí na Ríochta Aontaithe, ba cheart feidhm a bheith ag na bearta sin ón 1 Meitheamh 2026.

(46)

De réir na comhairle ábhartha ó ICES le haghaidh 2026, is sciar suntasach de ghabhálacha iomlána iad gabhálacha áineasa mangach i bhfolimistéir 6 agus 7 ICES. Is iomchuí, dá bhrí sin, teorainneacha a bhunú le haghaidh gabhálacha áineasa mangach sna limistéir sin.

(47)

Ba cheart leanúint de thréimhsí coiscthe séasúracha le haghaidh iascaigh corr gainimh le trealamh tarraingthe áirithe i ranna 2a, 3a agus folimistéar 4 ICES ionas go mbeifear in ann láithreacha sceite a chosaint agus gabhálacha iasc óg a theorannú.

(48)

In 2025, reáchtáil an tAontas, an Ríocht Aontaithe agus an Iorua comhairliúcháin thríthaobhacha maidir le sé stoc a chomhroinntear agus a bhainistítear go comhpháirteach a tharlaíonn laistigh de na limistéir atá faoina ndlínse faoi seach. Rinneadh na comhairliúcháin sin idir an 27 Deireadh Fómhair agus an 4 Nollaig 2025, ar bhonn sheasamh an Aontais a d’fhormhuinigh an Chomhairle an 21 Deireadh Fómhair 2025, agus i gcomhréir leis na páipéir leathoifigiúla ó sheirbhísí an Choimisiúin a d’fhormhuinigh an Chomhairle an 23 agus an 27 Deireadh Fómhair 2025. Rinneadh toradh na gcomhairliúchán a dhoiciméadú i dtaifead comhaontaithe a shínigh Cinn na dToscaireachta an 5 Nollaig 2025. Ba cheart na deiseanna ábhartha iascaireachta a shocrú ag an leibhéal arna chomhaontú leis an Ríocht Aontaithe agus leis an Iorua, mar aon leis na forálacha eile sa taifead comhaontaithe sin.

(49)

Ba cheart bearta tionlacain atá ann cheana le haghaidh throsc na Scairbhe Thuaidh a choinneáil ar bun. Ina theannta sin, ba cheart bearta ceartaitheacha a thabhairt isteach chun básmhaireacht iascaireachta a laghdú, agus chun cosaint trosc óg a mhéadú. Áirítear orthu sin dhá dhúnadh nua le haghaidh trosc in uiscí an Aontais i roinn 4b ICES, dhá dhúnadh shínte in uiscí an Aontais i roinn 3a agus 2), nuashonruithe ar na córais dúnta fíor-ama (RTC) ón 1 Eanáir go dtí an 31 Márta 2026 i Muir nIocht Thoir (roinn 7d ICES), i nDeisceart na Mara Thuaidh (roinn 4c ICES) agus i lár na Mara Thuaidh (roinn 4b agus 3 ICES), agus srianta ar dhíriú ar throsc i nDeisceart agus i lár na Mara Thuaidh (ranna 4c agus 4b ICES), trí theorainn a chur ar ghabháil iomlán trosc sa dá roinn sin.

(50)

Reáchtáil an tAontas comhairliúcháin dhéthaobhacha leis an Iorua maidir le seacht stoc a chomhroinntear agus a bhainistítear go comhpháirteach i limistéar Skagerrak: an trosc (Gadus morhua), an chadóg (Melanogrammus aeglefinus), an scadán (Clupea harengus), an séacla Artach (Pandalus borealis), an leathóg (Pleuronectes platessa), an salán (Sprattus sprattus) agus an faoitín (Merlangius merlangus). Reachtáladh na comhairliúcháin sin d’fhonn teacht ar chomhaontú maidir le bainistiú na stoc sin agus na ndeiseanna iascaireachta le haghaidh 2026, mar aon le malartú cuótaí agus socruithe rochtana i dtaobh na sé stoc a ndéantar comhbhainistiú orthu sa Mhuir Thuaidh. Tugadh na comhairliúcháin sin i gcrích an 16 agus an 18 Nollaig 2025 agus rinneadh an toradh a dhoiciméadú i dtrí cinn de thaifid chomhaontaithe. Shínigh na Cinn Toscaireachta an 16 Nollaig 2025 an comhaontú déthaobhach maidir le socruithe iascaigh in Skagerrak agus in Kattegat le haghaidh 2026 agus prótacal na gcomhairliúchán iascaigh idir an Iorua agus an tAontas Eorpach thar ceann na Sualainne le haghaidh 2026. Shínigh Cinn Toscaireachta an comhaontú maidir le malartuithe cuótaí agus rochtain ar uiscí don Mhuir Thuaidh maidir le stoic a ndéantar comhbhainistiú orthu an 18 Nollaig 2025. Ba cheart na deiseanna ábhartha iascaireachta a shocrú ar an leibhéal arna chomhaontú leis an Iorua, agus ba cheart na forálacha eile sna taifid chomhaontaithe sin a chur chun feidhme i ndlí an Aontais.

(51)

Tá comhairliúcháin fós ar siúl idir an tAontas agus an Iorua maidir le rochtain ar a n-uiscí faoi seach do scadán an Atlantaigh-Chríoch Lochlann (Clupea harengus) agus don fhaoitín gorm (Micromesistius poutassou). Go dtí go dtabharfar na comhairliúcháin sin i gcrích, ba cheart na leibhéil rochtana sin a mharcáil ‘le bunú’.

(52)

Maidir leis an bhfaoitín gorm (Micromesistius poutassou), aistrithe cuótaí ó WHB/8C3411 go WHB/1X14 le haghaidh 2025, ba cheart iad a cheadú chun gur féidir cuóta le haghaidh faoitíní gorma a aistriú ón Aontas go dtí an Iorua le haghaidh 2026. Ba cheart é sin a bheith gan dochar do phrionsabal chobhsaíocht choibhneasta na ngníomhaíochtaí iascaireachta. Ba cheart Rialachán (AE) 2025/202 a leasú dá réir sin.

(53)

I gcomhréir leis an nós imeachta dá bhforáiltear sa Chomhaontú Comhpháirtíochta Iascaigh idir an Comhphobal Eorpach, de pháirt, agus Rialtas Dúchais na Graonlainne agus Rialtas na Danmhairge, den pháirt eile (17), agus an Prótacal Chur Chun Feidhme a ghabhann leis (18), tháinig na páirtithe ar chomhaontú ag an gcruinniú den Chomhchoiste a reáchtáladh an 19 agus an 20 Samhain 2025 maidir le leibhéal na ndeiseanna iascaireachta atá ar fáil le haghaidh an Aontais in uiscí na Graonlainne in 2026 bunaithe ag an gComhchoiste. Ba cheart, dá bhrí sin, na deiseanna iascaireachta ábhartha a shocrú ar an leibhéal a leagtar amach sna miontuairiscí sínithe ó chruinniú an Chomhchoiste, agus na haistrithe ón Aontas chuig an Iorua sna taifid chomhaontaithe a shínigh na Cinn Toscaireachta an 16 Nollaig 2025 á gcur san áireamh.

(54)

Deonaítear faoi Chonradh an 9 Feabhra 1920 a bhaineann le Spitsbergen (Svalbard) (‘Conradh Pháras 1920’) rochtain chomhionann agus neamh-idirdhealaitheach ar acmhainní do gach Páirtí sa Chonradh sin, lena n-áirítear i ndáil le hiascaireacht. Leagadh amach an seasamh ón Aontas maidir leis an rochtain sin i roinnt notes verbales chuig an Iorua, arbh iad cinn an 26 Feabhra 2021, an 28 Meitheamh 2021, an 1 Lúnasa 2022 agus an 26 Deireadh Fómhair 2023 na cinn is déanaí. A mhéid a bhaineann leis na deiseanna iascaireachta le haghaidh portáin sneachta (Chionoecetes spp.) timpeall ar Svalbard, is iomchuí teorainn a chur leis an líon soithí iascaireachta atá údaraithe leis na gníomhaíochtaí iascaireachta sin a dhéanamh rud a áiritheoidh go mbeidh saothrú portán sneachta timpeall ar Svalbard comhsheasmhach le rialacha bainistíochta neamh-idirdhealaitheacha a leag an Iorua amach, a bhfuil ceannasacht agus dlínse aici sa limistéar i gcomhréir le forálacha ábhartha Choinbhinsiún na Náisiún Aontaithe maidir le Dlí na Farraige agus Chonradh Pháras 1920. Tá cionroinnt na ndeiseanna iascaireachta sin i measc na mBallstát teoranta do 2026. San Aontas, is ar na Ballstáit bhrataí atá an phríomhfhreagracht comhlíonadh an dlí is infheidhme a áirithiú.

(55)

A mhéid a bhaineann leis na deiseanna iascaireachta le haghaidh trosc san Artach Thoir Thuaidh, agus i bhfianaise nach ann do TAC tagartha le haghaidh 2026, is iomchuí cuóta sealadach de chuid an Aontais a bhunú le haghaidh trosc in uiscí Svalbard agus in uiscí idirnáisiúnta fholimistéar 1 agus roinn 2b ICES, chun a áirithiú go leanfar de ghníomhaíochtaí iascaireachta chabhlach an Aontais le haghaidh 2026. Ba cheart cuóta sealadach an Aontais a bheith comhfhreagrach do leath de chuóta an Aontais arna bhunú le haghaidh 2025 agus ba cheart é a bheith teoranta don tréimhse ón 1 Eanáir go dtí an 30 Meitheamh 2026. Ba cheart cuóta sealadach sin an Aontais a chionroinnt ar na Ballstáit i gcomhréir le Cinneadh 87/277/CEE ón gComhairle (19), faoi réir na n-oiriúnuithe is gá de bharr tharraingt siar na Ríochta Aontaithe as an Aontas a bheith déanta mar a leagtar amach in Iarscríbhinn 36, tábla E, a ghabhann leis an gComhaontú Trádála agus Comhair.

(56)

I gcomhréir le Dearbhú an Aontais chuig Poblacht Bholavarach Veiniséala maidir le deiseanna iascaireachta in uiscí an Aontais a dheonú do shoithí iascaireachta a mbeidh bratach Veiniséala ar foluain acu sa limistéar eacnamaíoch eisiach amach ó chósta Ghuáin na Fraince, arna fhormheas thar ceann an Aontais le Cinneadh (AE) 2015/1565 ón gComhairle (20), ní mór an líon uasta údaruithe iascaireachta le haghaidh sclamhairí a bheidh ar fáil do Veiniséala in uiscí an Aontais le haghaidh 2026 a shocrú.

(57)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun Ballstáit aonair a údarú le cionrannta iarrachta iascaireachta a bhainistiú i gcomhréir le córas cileavata-lae; chun laethanta breise ar muir a dheonú le haghaidh scor buan gníomhaíochtaí iascaireachta agus le haghaidh cumhdach feabhsaithe breathnóra eolaíoch; agus chun formáidí scarbhileoige a bhunú chun faisnéis a bhailiú agus a tharchur maidir le haistrithe laethanta ar muir idir soithí iascaireachta a bhfuil bratach Bhallstáit ar foluain acu. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (21).

(58)

Chun cur i bhfeidhm leanúnach a áirithiú agus éiginnteacht dhlíthiúil a sheachaint le linn na tréimhse idir deireadh na bliana agus dáta theacht i bhfeidhm an Rialacháin lena socraítear na deiseanna iascaireachta le haghaidh na bliana ina dhiaidh sin, ba cheart forálacha an Rialacháin seo maidir le toirmisc agus tréimhsí coiscthe a bheith fós infheidhme ag tús 2027, go dtí go dtiocfaidh an Rialachán lena socraítear na deiseanna iascaireachta le haghaidh 2027 i bhfeidhm.

(59)

Ar chúiseanna práinne agus chun deimhneacht dhlíthiúil a sholáthar a luaithe is féidir, ba cheart an Rialachán seo a theacht i bhfeidhm lá a fhoilsithe.

(60)

Ionas nach gcuirfí isteach ar ghníomhaíochtaí iascaireachta agus chun slí bheatha na n-iascairí a chosaint, ba cheart feidhm a bheith ag an Rialachán seo go cúlghabhálach le héifeacht ón 1 Eanáir 2026 ar aghaidh.

(61)

Thairis sin, ag deireadh 2025 ghlac na heagraíochtaí réigiúnacha bainistithe iascaigh ábhartha (ERBInna) bearta idirnáisiúnta áirithe lena gcruthófar nó lena gcuirfear srian le deiseanna iascaireachta le haghaidh an Aontais agus bhí feidhm ag na bearta sin sular tháinig an Rialachán seo i bhfeidhm. Chun an méid sin a léiriú, ba cheart, dá bhrí sin, feidhm chúlghabhálach a bheith ag na forálacha den Rialacháin seo lena gcuirtear na bearta sin chun feidhme i ndlí an Aontais, le héifeacht ón 1 Nollaig 2025. Go sonrach, ós rud é go maireann an séasúr iascaireachta i limistéar Choinbhinsiún CCAMLR ón 1 Nollaig go dtí an 30 Samhain agus go leagtar síos deiseanna nó toirmisc áirithe iascaireachta i limistéar Choinbhinsiún CCAMLR le haghaidh tréimhse dar tús an 1 Nollaig 2025, ba cheart feidhm a bheith ag forálacha ábhartha an Rialacháin seo ón dáta sin. Ina theannta sin, maireann an séasúr iascaireachta le haghaidh déadiasc i limistéar Chomhaontú SIOFA ón 1 Nollaig go dtí an 30 Samhain, agus ós rud é go mbunaítear na TACanna don ghrúpa speiceas sin ar feadh tréimhse dar tús an 1 Nollaig 2025, ba cheart feidhm a bheith ag na TACanna ón dáta sin. Ní dhéanann cur i bhfeidhm cúlghabhálach mar sin dochar do phrionsabal an ionchais dhlisteanaigh toisc go bhfuil cosc ar shoithí iascaireachta a bhfuil bratach an Pháirtí Chonarthaigh ar foluain acu iascaireacht a dhéanamh i limistéar Choinbhinsiún CCAMLR agus i limistéar Chomhaontú SIOFA gan údarú.

(62)

Thairis sin, ba cheart feidhm chúlghabhálach a bheith ag na forálacha lena leasaítear Rialachán (AE) 2025/202 chun aistriú an chuóta le haghaidh faoitíní gorma ó WHB/8C3411 go WHB/1X14 le haghaidh 2025 a cheadú. Ní dhéanann an cur i bhfeidhm cúlghabhálach sin difear do phrionsabal na n-ionchas dlisteanach, ós rud é nach bhfuil na cuótaí faoi na TACanna sin ídithe go fóill,