European flag

Iris Oifigiúil
an Aontais Eorpaigh

GA

Sraith L


2026/71

13.1.2026

RIALACHÁN CUR CHUN FEIDHME (AE) 2026/71 ÓN gCOIMISIÚN

an 12 Eanáir 2026

lena bhforchuirtear dleacht frithdhumpála chinntitheach ar allmhairí carbónáite bairiam de thionscnamh Dhaon-Phoblacht na Síne agus na hIndia agus lena mbailítear go cinntitheach an dleacht shealadach arna forchur ar na hallmhairí sin

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1), agus go háirithe Airteagal 9(4) de,

De bharr an mhéid seo a leanas:

1.   NÓS IMEACHTA

1.1.   Tionscnamh

(1)

An 20 Nollaig 2024, thionscain an Coimisiún Eorpach (‘an Coimisiún’) imscrúdú frithdhumpála i ndáil le hallmhairí carbónáite bairiam de thionscnamh Dhaon-Phoblacht na Síne agus na hIndia (‘na tíortha lena mbaineann’) ar bhonn Airteagal 5 de Rialachán (AE) 2016/1036 den bhun-Rialachán. D’fhoilsigh sé fógra tionscnaimh in Iris Oifigiúil an Aontais Eorpaigh (2) (‘an fógra tionscnaimh’).

(2)

Thionscain an Coimisiún an t-imscrúdú tar éis gearán a chuir Kandelium Group GmbH (‘an gearánach’ nó ‘Kandelium’) isteach an 5 Samhain 2024. Ba é tionscal carbónáite bairiam an Aontais de réir bhrí Airteagal 5(4) den bhun-Rialachán a rinne an gearán. Ba leor an fhianaise sa ghearán maidir le dumpáil agus díobháil ábhartha dá thoradh sin chun údar a thabhairt le tionscnamh an imscrúdaithe.

1.2.   Clárú

(3)

Le Rialachán Cur Chun Feidhme (AE) 2025/482 ón gCoimisiún (3) (‘an Rialachán maidir le clárú’), chuir an Coimisiún allmhairí an táirge lena mbaineann faoi réir a gcláraithe.

1.3.   Bearta sealadacha

(4)

I gcomhréir le hAirteagal 19a den bhun-Rialachán, an 14 Iúil 2025, thug an Coimisiún achoimre ar na dleachtanna beartaithe do na páirtithe, agus thug sé sonraí dóibh faoi ríomh na gcorrlach dumpála agus na gcorrlach ar leor iad chun deireadh a chur leis an díobháil do thionscal an Aontais. Iarradh ar na páirtithe leasmhara barúlacha a thabhairt maidir le cruinneas na ríomhanna laistigh de 3 lá oibre. Ní bhfuarthas aon bharúil.

(5)

An 11 Lúnasa 2025, d’fhorchuir an Coimisiún dleachtanna frithdhumpála sealadacha ar allmhairí carbonáite bairiam de thionscnamh Dhaon-Phoblacht na Síne agus na hIndia le Rialachán Cur Chun Feidhme (AE) 2025/1724 (4) ón gCoimisiún (‘an Rialachán sealadach’).

1.4.   An nós imeachta ina dhiaidh sin

(6)

Tar éis nochtadh na mbunfhíoras agus na mbunbhreithnithe arb ar a mbonn a forchuireadh dleacht frithdhumpála shealadach (‘nochtadh sealadach’), chuir dhá tháirgeoir onmhairiúcháin (Guizhou Redstar Developing Co., Ltd. (‘Redstar’) agus Hubei Jingshan Chutian Barium Salt Corp. Ltd (‘Chutian’)), chomh maith leis an ngearánach aighneachtaí i scríbhinn isteach inar chuir siad a dtuairimí in iúl maidir leis na torthaí sealadacha laistigh den sprioc-am dá bhforáiltear in Airteagal 2(1) den Rialachán sealadach.

(7)

Tugadh deis do na páirtithe éisteacht a fháil. Níor cuireadh aon iarraidh ar éisteacht isteach.

(8)

Lean an Coimisiún air ag lorg agus ag fíorú na faisnéise uile a mheas sé a bheith riachtanach dá gcinntí críochnaitheacha. Agus an Coimisiún ag teacht ar a thorthaí cinntitheacha, mheas sé na barúlacha a chuir na páirtithe leasmhara isteach agus rinne sé athbhreithniú ar a chonclúidí sealadacha i gcás inarbh iomchuí.

(9)

Chuir an Coimisiún na páirtithe leasmhara uile ar an eolas maidir leis na bunfhíorais agus na bunbhreithnithe ar ar a mbonn a raibh sé beartaithe aige dleacht frithdhumpála chinntitheach a fhorchur ar allmhairí carbónáite bairiam de thionscnamh Dhaon-Phoblacht na Síne agus na hIndia (‘an nochtadh deiridh’). Tugadh tréimhse do na páirtithe leasmhara uile ina raibh siad in ann a barúlacha a thabhairt maidir leis an nochtadh.

(10)

Tugadh deis do na páirtithe éisteacht a fháil freisin. Níor cuireadh aon iarraidh ar éisteacht isteach.

1.5.   Maímh maidir leis an tionscnamh

(11)

Ní bhfuarthas aon mhaíomh maidir le tionscnamh. Dá bhrí sin, deimhníodh an chonclúid in aithris (6) den Rialachán sealadach.

1.6.   Sampláil

(12)

Ní bhfuarthas aon bharúil maidir le sampláil. Dá bhrí sin, deimhníodh na conclúidí in aithrisí (7) go (14) den Rialachán sealadach.

1.7.   Freagraí ar an gceistneoir agus cuairteanna fíorúcháin

(13)

Ní bhfuarthas aon bharúil maidir le freagraí ceistneora agus cuairteanna fíorúcháin. Dá bhrí sin, deimhníodh na conclúidí in aithrisí (15) go (18) den Rialachán sealadach.

1.8.   An tréimhse imscrúdúcháin agus an tréimhse faoi bhreathnú

(14)

Ní bhfuarthas aon bharúil maidir leis an tréimhse imscrúdúcháin ná maidir leis an tréimhse faoi bhreathnú. Dá bhrí sin, deimhníodh na conclúidí in aithris (19) den Rialachán sealadach.

2.   AN TÁIRGE LENA mBAINEANN AGUS AN TÁIRGE COMHCHOSÚIL

(15)

Ní bhfuarthas aon bharúil maidir leis an táirge lena mbaineann ná maidir leis an táirge comhchosúil. Dá bhrí sin, deimhníodh na conclúidí in aithrisí (20) go (25) den Rialachán sealadach.

3.   DUMPÁIL

3.1.   An tSín

(16)

Tar éis an nochta shealadaigh, thug na táirgeoirí onnmhairiúcháin sampláilte chomh maith leis an ngearánach barúlacha de na torthaí sealadacha dumpála.

3.1.1.   Saobhadh nach beag a bheith ann agus tír ionadaíoch

(17)

In éagmais aon mhaíomh maidir le saobhadh nach beag a bheith ann agus maidir le tír ionadaíoch a roghnú, deimhníodh leis seo roinn 3.1.2 agus roinn 3.1.3 den Rialachán sealadach.

3.1.2.   An Gnáthluach

(18)

Leagadh amach na mionsonraí maidir le ríomh an ghnáthluacha in aithrisí (26) go (130) den Rialachán sealadach.

(19)

Tar éis an nochta deiridh, d’áitigh Redstar go bhfuil neamhréireacht mhór idir corrlaigh dhumpála tháirgeoirí na Síne agus na hIndia, d’ainneoin corrlaigh dhíobhála chomhchosúla. De réir Redstar, thug sé sin le fios nach léiríonn na gnáthluachanna ríofa a chuirtear i bhfeidhm ar tháirgeoirí Síneacha dálaí cruinne an mhargaidh.

(20)

Ar an gcéad dul síos, mar a mhínítear in aithrisí (82) go (84) den Rialachán sealadach, shuigh an Coimisiún i gcomhthéacs an imscrúdaithe seo fianaise iarbhír gur ann do shaobhadh mór a dhéanann difear don tionscal carbónáite bairiam sa tSín. Dá bhrí sin, tháinig an Coimisiún ar an gconclúid nach iomchuí praghsanna agus costais intíre sa tSín a úsáid chun gnáthluach a shuí do tháirgeoirí onnmhairiúcháin ón tSín. Dá bhrí sin, ríomh an Coimisiún gnáthluach tháirgeoirí onnmhairiúcháin na Síne ar bhonn costais táirgthe agus díola a léiríonn praghsanna nó tagarmharcanna neamhshaofa i gcomhréir le hAirteagal 2(6a)(a) den bhun-Rialachán. I gcás na hIndia ar an taobh eile, ní raibh aon mhaíomh ná toradh ann maidir le saobhadh suntasach. Dá bhrí sin, suíodh an gnáthluach le haghaidh an táirgeora onnmhairiúcháin Indiaigh i gcomhréir le hAirteagal 2(2) go (6) den bhun-Rialachán. Ar an dara dul síos, níor chuir Redstar aon fhianaise i láthair nár comhlíonadh na coinníollacha maidir le hAirteagal 2(6a)(a) den bhun-Rialachán a chur i bhfeidhm chun gnáthluach tháirgeoirí onnmhairiúcháin na Síne a shuí sa chás seo. Diúltaíodh do mhaíomh Redstar ina leith sin sa Rialachán sealadach agus níor tugadh bunús breise leis tar éis an nochta shealadaigh ná mar fhreagairt ar an nochtadh deiridh. Ní fhágann an neamhréireacht sna corrlaigh dhumpála amháin go bhfuil an mhodheolaíocht a chuirtear i bhfeidhm maidir le táirgeoirí Síneacha neamhbhailí. Dá bhrí sin, b’éigean diúltú d’argóint Redstar.

3.1.2.1.   Foinsí arna n-úsáid chun costais agus tagarmharcanna a shuí

(21)

Tar éis an nochta shealadaigh, d’athdhearbhaigh ceann de na táirgeoirí onnmhairiúcháin sampláilte, Chutian, an t-áiteamh ar a ndearnadh achoimre in aithris (110) den Rialachán sealadach, is é sin gur cheart praghsanna onnmhairiúcháin na hIndia a chur in ionad na bpraghsanna a úsáidtear mar luachanna tagarmhairc le haghaidh na méine bairíte bunaithe ar phraghsanna allmhairiúcháin na Tuirce. Mar a leagtar amach in aithris (111) den Rialachán sealadach, níl difríocht ábhartha idir meascán táirgí mhian bairíte na hIndia agus an mhian bhairíte a allmhairítear isteach sa Tuirc, rud a fhágann go bhfuil praghsanna agus cineálacha méine bairíte na hIndia níos ionadaíche ar an mian bairíte a úsáideann táirgeoirí na Síne ná an mhian a allmhairítear isteach sa Tuirc. Thairis sin, níor chuir Chutian aon fhianaise shubstainteach ar fáil chun tacú lena mhaímh agus in aon chás, tá praghsanna allmhairiúcháin méine bairíte na Tuirce aontreorach le praghsanna na hIndia. Dá bhrí sin, diúltaíodh d’argóint Chutian.

(22)

Thairis sin, de réir Chutian, ba cheart don Choimisiún a áirithiú go léiríonn na praghsanna méine bairíte a úsáidtear luach na méine bairíte aimhe, seachas luach an phúdair bairíte. Thug Chutian le fios freisin go bhfuil an grád bairíte a úsáidtear sa tionscal peitriliam níos airde ná an grád a úsáidtear i dtionscal na gceimiceán agus gur cheart praghas na bairíte a úsáidtear i gcinneadh na dtosca táirgeachta a bheith bunaithe ar chion sulfáite bairiam. Ar an gcéad dul síos, murab ionann agus maíomh Chutian, chun an luach tagarmhairc do mhian bhairíte a shuí, d’úsáid an Coimisiún costas athsholáthair bairíte aimhe amháin, arb é an t-amhábhar a úsáideann táirgeoirí onnmhairiúcháin sampláilte na Síne, agus d’eisiaigh sé bairít ina foirm phúdrach. Thairis sin, ní raibh bunús le maíomh Chutian maidir leis an nasc idir grád an chion méine bairíte/sulfáite bairiam agus praghas na méine. Thairis sin, níor léirigh Chutian an grád ná an cion sulfáite bairiam leis na praghsanna méine bairíte a gabhadh le staitisticí Global Trade Atlas. Dá bhrí sin, diúltaíodh d’argóintí Chutian.

(23)

Thairis sin, d’áitigh Chutian go raibh allmhairí méine bairíte na Tuirce (os cionn 102 kt) ina bhfoinse ionadaíoch i bhfad níos lú do thagarmharc na dtosca táirgeachta ná onnmhairí méine bairíte na hIndia (os cionn 1 500 kt). Thug an Coimisiún dá aire nach raibh staidreamh na Tuirce chomh hionadaíoch céanna leis an bhfíoras go ndearnadh onnmhairí ón India i gcainníochtaí níos airde ná allmhairí isteach sa Tuirc, go háirithe i bhfianaise na ndearbhchainníochtaí a d’allmhairigh an Tuirc. Níor cuireadh aon fhianaise eile chun cinn a léiríonn nach raibh praghsanna na n-allmhairí isteach sa Tuirc ionadaíoch. Tá sé sin níos bailí fós sna himthosca inar sainaithníodh an Tuirc mar an tír ionadaíoch iomchuí chun críocha Airteagal 2(6a)a) den bhun-Rialachán, ar an bhforas go bhfuil leibhéal forbartha eacnamaíche na tíre sin inchurtha le forbairt eacnamaíoch na Síne, i measc forais eile.

(24)

Ina theannta sin, d’iarr Chutian ina fhreagairt ar an nochtadh sealadach go n-eisiafadh an Coimisiún allmhairí neamhrialta ó ríomh an tagarmhairc méine bairíte mar gheall go raibh sé saobhach. Go sonrach, d’iarr Chutian go n-eisiafaí allmhairí méine bairíte aimhe ó Mharacó, a raibh praghas níos airde orthu ná mar a bhí ar bhairít mheilte allmhairithe. D’áitigh Chutian freisin go measfaí iontráil allmhairiúcháin Global Trade Atlas eile ag a bhfuil cainníocht an-bheag agus praghas aonaid i bhfad níos airde a bheith neamhrialta agus go eisiafaí iad freisin.

(25)

Ar an gcéad dul síos, tá na sonraí maidir le praghsanna allmhairiúcháin méine bairíte sa Tuirc ar fáil go héasca sa Global Trade Atlas, ar an leibhéal gráinneachta a chuir ar chumas an Choimisiúin na staitisticí maidir le mian bhairíte a aonrú agus a idirdhealú i bhfoirm amh, neamhphróiseáilte, a úsáideann táirgeoirí onnmhairiúcháin na Síne. D’fhíoraigh an Coimisiún freisin go raibh cainníochtaí ionadaíocha agus neamhshaofa leordhóthanacha de na hallmhairí sin ionas gur laghdaigh an meán deiridh mar thoradh air sin tionchar na bpraghsanna neamhghnácha a d’fhéadfadh a bheith ann go huathoibríoch ag an gceann is ísle agus ag an gceann is airde den raon. Dá bhrí sin, níl aon chúis bhailí ann chun allmhairí méine bairíte aimhe ó Mharacó a eisiamh. Ar an gcaoi chéanna, ní fhágann tagarmharcáil praghsanna in aghaidh foirmeacha eile den amhábhar atá i gceist (foirm amh in aghaidh foirm púdair) ná aon difríocht a thagann as sin nach bhfuil an tagarmharc a úsáidtear mí-oiriúnach. Thairis sin, maidir le hallmhairiú mionchainníochta ag a bhfuil praghas aonaid atá ard go follasach, aon eisiamh a d’fhéadfadh a bheith ann i ndáil leis an iontráil sin, ní dhéanfadh sé difear do thagarmharc na dtosca táirgeachta a d’eascair as sin agus dá bhrí sin measadh nach raibh a leithéid d’eisiamh ábhartha sa chás seo.

(26)

Tar éis an nochta shealadaigh agus mar fhreagairt ar an nochtadh deiridh, d’áitigh onnmhaireoir sampláilte eile, Redstar, ag tagairt d’Airteagal 2(10) den bhun-Rialachán, nach raibh na sonraí foinseacha le haghaidh luachanna neamhshaofa méine bairíte (chomh maith le CO2) ar an leibhéal céanna le staid Redstar. An úsáid a bhain an Coimisiún as sonraí allmhairiúcháin a bhí bunaithe ar chostas, árachas agus last-táille (CAL), d’áitigh RedStar gur fhág sí go ndearnadh na luachanna neamhshaofa a bhoilsciú go saorga, ós ó mhianach in aice láimhe a d’fhoinsigh Redstar mian bhairíte. Dá bhrí sin, de réir Redstar, bhí comparáid níos cothroime i gceist de bhun Airteagal 2(10) den bhun-Rialachán ach gan an costas lasta farraige, árachais agus dleachta ar allmhairí a áireamh, agus comparáid a dhéanamh bunaithe ar leibhéal praghsanna saor ar bord.

(27)

Ar an gcéad dul síos, níl aon bhunús le tagairt Redstar d’Airteagal 2(10) den bhun-Rialachán. Tagraíonn Airteagal 2(10) don chomparáid chothrom idir praghsanna onnmhairiúcháin agus an gnáthluach, seachas ríomh an ghnáthluacha. Ar an dara dul síos, thug an Coimisiún dá aire go bhfuil na praghsanna allmhairiúcháin CAL atá ar fáil sa staidreamh trádála (coigeartaithe le haghaidh cánacha ar allmhairí) in iomaíocht dhíreach leis na praghsanna intíre sa tír ionadaíoch agus dá bhrí sin gur úsáideadh iad mar thagarmharc iomchuí sa chás seo. Dá bhrí sin, diúltaíodh d’argóint Redstar.

(28)

D’athdhearbhaigh Chutian ina fhreagra ar an nochtadh sealadach an iarraidh ar phraghsanna CO2 a choigeartú chun deireadh a chur le saobhadh arb iad CO2 de ghrád bia agus CO2 a iompraítear i sorcóirí is cúis leo. Ar an gcaoi chéanna, d’áitigh Redstar ina fhreagra ar an nochtadh sealadach nach raibh an úsáid a bhain an Coimisiún as praghsanna CO2 leachtaigh pacáilte i sorcóirí ionadaíoch ar na praghsanna iarbhír a d’íoc táirgeoirí de chuid na Síne, a úsáideann iompar umar nó trucailí. Dá bhrí sin, d’iarr Redstar ar an gCoimisiún na sonraí maidir le hallmhairiú an CO2 leachtaigh atá pacáilte i sorcóirí a eisiamh agus gan ach praghas an CO2 a phacáiltear in umair a mheas.

(29)

Rinneadh argóintí na dtáirgeoirí onnmhairiúcháin a phlé agus a dhiúltú in aithris (114) den Rialachán sealadach. Thairis sin, níor léirigh Chutian ná Redstar gur áiríodh sa tagarmharc a bunaíodh le haghaidh CO2 (agus a mhéid a bhaineann leis) gráid agus modhanna éagsúla iompair (sorcóirí nó trucailí) agus a mhéid a bheadh na praghsanna éagsúil. Measadh nach raibh bunús le hargóintí Chutian ná Redstar agus, dá bhrí sin, diúltaíodh dóibh.

(30)

Mar fhreagairt ar an nochtadh sealadach, d’athdhearbhaigh an gearánach (Kandelium) a mhaímh gur cheart bunú na gcostas athsholáthair le haghaidh gual biotúmanach agus CO2 a choigeartú chun na costais arna dtabhú ag táirgeoirí sa Tuirc a léiriú. Diúltaíodh do mhaímh Kandelium agus tagairt á déanamh d’aithrisí (104) agus (115) den Rialachán sealadach. Meabhraíodh go háirithe, i gcás nach bhfuil tagarmharc ionadaíoch le haghaidh ionchur ar leith ar fáil i staidreamh náisiúnta ná allmhairiúcháin na tíre ionadaíche agus ina n-úsáidtear tagarmharcanna malartacha, nach bhfuil praghas an ionchuir sin á chinneadh a thuilleadh ag an gCoimisiún mar a thabhaigh táirgeoirí intíre é sa tír ionadaíoch (an Tuirc sa chás seo).

3.1.2.2.   Foinsí a úsáidtear chun na méideanna réasúnta agus neamhshaofa a shuí le haghaidh costais díola, ghinearálta agus riaracháin (costais SGA) agus brabúis

(31)

Mar fhreagairt ar an nochtadh sealadach, d’áitigh Chutian gur cheart figiúirí costais SGA Sisecam a úsáidtear chun an gnáthluach á chomhdhéanamh a choigeartú chun costais iompair, costais árachais, táillí coimisiúin agus speansais phacáistithe a eisiamh, toisc gur tuairiscíodh iad sin cheana féin sna táblaí idirbheart ar idirbheart le haghaidh na ndíolachán san Aontas. Ar an gcéad dul síos, agus go háirithe, rinneadh na costais iompair (i bhfad níos ábhartha ná aon mhuirear árachais, costas pacáistithe nó táillí coimisiúin) a eisiamh go cuí ón SGA Sisecam mar a leagtar amach sa Dara Nóta agus in Iarscríbhinní Vib agus Vic a ghabhann leis. Ar an dara dul síos, thug an Coimisiún dá aire nár measadh gur lamháltais iad na costais phacáistithe a baineadh ón bpraghas onnmhairiúcháin sa chás seo, rud a fhágann nach raibh bunús le hargóint Chutian maidir leis an bpointe sin. Ar an tríú dul síos agus maidir leis na muirir árachais agus taillí coimisiúin, níor ceadaíodh leis na sonraí a bhí ar fáil go poiblí maidir le costais SGA Sisecam cuspóir na n-ítimí costais sin a bhunú ná a mhéid (más ann dóibh) a bhainfeadh siad leis an deighleog sulfáite cróimiam, atá ábhartha sa chás seo. Dá bhrí sin, ní dhearnadh aon choigeartú ar chostais SGA mar gheall ar na míreanna costais sin. Mar chonclúid, measadh costais SGA le haghaidh Sisecam, mar a chinn an Coimisiún iad, a bheith réasúnta i gcomhréir le hAirteagal 2(6a)(a) den bhun-Rialachán. Dá bhrí sin, b’éigean argóintí Chutian a dhiúltú.

(32)

Ina theannta sin, d’iarr Chutian ar an gCoimisiún roinnt speansas a eisiamh ó na costais SGA a bhaineann le táirgeadh sulfáite cróimiam, toisc nach bhfuil siad ina léiriú ceart ar na costais SGA a d’fhabhraigh na táirgeoirí carbónáite bairiam (na Síne). Mheabhraigh an Coimisiún, áfach, nach é is aidhm d’Airteagal 2(6a) den bhun-Rialachán costais SGA na dtáirgeoirí onnmhairiúcháin carbónáite bairiam (a mheastar a bheith saofa) a léiriú. Ina ionad sin, is é an cuspóir atá ann méideanna réasúnta neamhshaofa a shainaithint le haghaidh costais SGA. Sa chás sin, sainaithníodh Sisecam agus Alkim, táirgeoirí sulfáite cróimiam de chuid na Tuirce (a fhaightear mar tháirge ionadaíoch oiriúnach sa chatagóir ghinearálta chéanna le carbónáit bhairiam) go cuí mar tháirgeoirí ionadaíocha agus úsáideadh a sonraí SGA mar athróg réasúnta dá réir sin, rud a d’fhág gur úsáideadh méideanna réasúnta maidir le costais SGA agus le brabúis. Dá bhrí sin, diúltaíodh d’argóint Chutian.

3.1.3.   An praghas onnmhairiúcháin

(33)

Leagadh amach na mionsonraí maidir le ríomh an phraghais onnmhairiúcháin in aithris (131) den Rialachán sealadach. In éagmais aon bharúil maidir leis an bpraghas onnmhairiúcháin, deimhníodh an chonclúid in aithris (131).

3.1.4.   Comparáid

(34)

In éagmais aon mhaíomh maidir leis an gcomparáid chothrom faoi Airteagal 2(10) den bhun-Rialachán, deimhníodh leis seo aithrisí (132) go (135) den Rialachán sealadach.

3.1.5.   Corrlaigh dhumpála

(35)

In éagmais aon mhaíomh maidir le ríomh an chorrlaigh dumpála, deimhníodh leis seo aithris (142) den Rialachán sealadach.

(36)

Seo a leanas na corrlaigh dhumpála chinntitheacha arna sloinneadh ina gcéatadáin den chostas, árachais agus last-táille (CAL) ag teorainn an Aontais, roimh dhleacht a íoc:

Cuideachta

Corrlach dumpála cinntitheach

Guizhou Redstar Developing CO., LTD.

83,9  %

Hubei Jingshan Chutian Barium Salts Co., Ltd.

72,6  %

Cuideachtaí comhoibríocha eile

78,2  %

Gach allmhaire eile de thionscnamh na Síne

83,9  %

3.2.   An India

(37)

Ní bhfuair an Coimisiún aon bharúil maidir leis na ríomhanna corrlaigh dumpála a bhaineann leis an India tar éis an nochta shealadaigh.

(38)

Dá bhrí sin, deimhníodh torthaí sealadacha an Choimisiúin a leagtar amach in aithrisí (143) go (159) den Rialachán sealadach.

(39)

Seo a leanas na corrlaigh dhumpála chinntitheacha arna sloinneadh ina gcéatadáin den chostas, árachais agus last-táille (CAL) ag teorainn an Aontais, roimh dhleacht a íoc:

Cuideachta

Corrlach dumpála cinntitheach

Vishnu Barium Private Limited

4,6  %

Na hallmhairí uile eile de thionscnamh na hIndia

4,6  %

4.   DÍOBHÁIL

4.1.   Sainiú ar thionscal an Aontais agus ar tháirgeacht an Aontais

(40)

In éagmais aon bharúil maidir le sainmhíniú ar thionscal an Aontais agus táirgeacht an Aontais, deimhníodh na conclúidí a leagtar amach in aithrisí (160) go (162) den Rialachán sealadach.

4.2.   Tomhaltas an Aontais

(41)

In éagmais aon bharúil maidir le tomhaltas an Aontais, deimhníodh na conclúidí a leagtar amach in aithrisí (163) go (165) den Rialachán sealadach.

4.3.   Allmhairí ó na tíortha lena mbaineann

(42)

Tar éis an nochta shealadaigh, thug Chutian dá aire gur tháinig laghdú ar allmhairí ón tSín le linn na tréimhse faoi bhreathnú, d’ainneoin allmhairí na hIndia a lean de bheith ag méadú, ar phraghsanna a bhí níos ísle go comhsheasmhach ná praghsanna allmhairiúcháin na Síne. Dá bhrí sin, d’áitigh Chutian go léiríonn sé sin iompraíochtaí margaidh atá éagsúil go bunúsach agus nár cheart allmhairí ón tSín a charnadh le hallmhairí ón India agus d’iarr sé ar an gCoimisiún measúnú a dhéanamh ar an díobháil a líomhnaítear gurb iad onnmhairí na Síne ba chúis léi ar leithligh ón díobháil arb iad onnmhairí na hIndia ba chúis léi.

(43)

Níor chomhaontaigh an Coimisiún leis an mbarúil sin. Cé gur mhéadaigh an India a sciar den mhargadh ó [10 %-25 %] in 2021 go [20 %-25 %] le linn na tréimhse imscrúdúcháin, d’éirigh leis an tSín a sciar nach beag den mhargadh a choinneáil ar bun fós [40 %-55 %]. Thairis sin, rinne praghsanna onnmhairiúcháin ón dá thír sladghearradh nach beag ar phraghsanna thionscal an Aontais le linn na tréimhse faoi bhreathnú. Ar na cúiseanna sin, mheas an Coimisiún go raibh carnadh allmhairí na hIndia agus na Síne ceart agus measúnú á dhéanamh ar an díobháil do thionscal an Aontais.

(44)

Dheimhnigh an Coimisiún go ndearnadh anailís ar na coinníollacha maidir leis an measúnú carnach ar allmhairí faoi Airteagal 3(4) den bhun-Rialachán agus go bhfuarthas gur comhlíonadh iad in aithrisí (166) go (169) den Rialachán sealadach. Níor chuir na páirtithe leasmhara, Chutian san áireamh, aon argóint nua isteach tar éis bearta sealadacha a fhorchur a d’fhéadfadh an measúnú sin a athrú, nó a bheadh ábhartha faoi Airteagal 3(4) den bhun-Rialachán.

(45)

Dá bhrí sin, diúltaíodh don mhaíomh.

4.4.   Staid eacnamaíoch thionscal an Aontais

(46)

Tar éis an nochta shealadaigh, d’áitigh Chutian go raibh sreabhadh airgid diúltach thionscal an Aontais mar thoradh go páirteach ar choigeartuithe i gcuntais iniúchta an táirgeoir de chuid an Aontais de bharr athluacháil stoic agus ath-leithdháileadh costais tar éis athrú ar an gcóras tuairiscithe. Mhaígh Chutian freisin nár shoiléirigh an Coimisiún ar eisiadh na héifeachtaí sin ón measúnú ar dhíobháil. D’iarr Chutian ar an gCoimisiún a nochtadh cé acu a eisiadh nó nár eisiadh na coigeartuithe sin agus conas a eisiadh iad, agus murarbh eisiadh, iad a eisiamh agus athmheasúnú a dhéanamh ar dhíobháil agus ar chúisíocht dá réir sin.

(47)

Shoiléirigh an Coimisiún in aithris (206) den Rialachán sealadach gurbh é an príomhfhachtóir a spreag treocht an tsreafa airgid le linn na tréimhse faoi bhreathnú an laghdú nach beag ar bhrabúsacht thionscal an Aontais. Bhí tionchar aige sin den chuid is mó ag neamhábaltacht thionscal an Aontais praghsanna a choigeartú mar fhreagairt ar bhrú nach beag ó allmhairí dumpáilte ón tSín agus ón India, rud a chuir cosc air costais atá ag dul i méid a chumhdach. Dheimhnigh an Coimisiún go ndearna sé tionchar choigeartuithe cuntasaíochta an táirgeora de chuid an Aontais a chur san áireamh go cuí sna figiúirí a úsáideadh le haghaidh an mheasúnaithe. Dá mbainfí éifeacht an athraithe sa chóras tuairiscithe ar shreabhadh airgid ón táscaire díobhála, bheadh an laghdú ar shreabhadh airgid le linn na tréimhse faoi bhreathnú níos mó fós. Ní féidir tionchar na gcoigeartuithe cuntasaíochta a nochtadh ar bhealach níos mionsonraithe mar gheall ar chineál rúnda gnó na faisnéise. Dá bhrí sin, diúltaíodh do mhaíomh Chutian.

(48)

Mhaígh Chutian freisin gur infheistíocht aonuaire mhoillithe a bhain le bearta Sláinte, Sábháilteachta agus Comhshaoil ba chúis leis an méadú infheistíochta le linn na tréimhse faoi bhreathnú. D’áitigh Chutian gur cuireadh an infheistíocht sin siar go dtí tar éis na deighilte idir Kandelium agus Solvay, agus gur leithdháileadh na costais ghaolmhara ar na blianta inar tharla an infheistíocht sin. D’áitigh Chutian go bhféadfadh an tuairisciú sin an measúnú díobhála a shaobhadh, ós rud é gur cheart tionchar na n-infheistíochtaí atá thar téarma a scaipeadh thar an tréimhse ina raibh siad ceaptha a bheith déanta, ní hamháin an tréimhse faoi bhreathnú. D’iarr Chutian ar an gCoimisiún an anailís díobhála a choigeartú trí chostais infheistíochta Sláinte, Sábháilteachta agus Comhshaoil a scaipeadh thar an tréimhse ama iomchuí.

(49)

Mheas an Coimisiún go mbeadh leithdháileadh chostas na hinfheistíochta ar an tréimhse sular tharla sí ag teacht salach ar chaighdeáin idirnáisiúnta chuntasaíochta agus go mbeadh sé de chineál amhantrach agus dá bhrí sin diúltaíodh don bharúil.

4.5.   Conclúid maidir le díobháil

(50)

Diúltaíodh do gach maíomh páirtithe leasmhara tar éis an Rialacháin shealadaigh. Dá bhrí sin, dheimhnigh an Coimisiún na conclúidí ar dhíobháil a leagtar amach in aithrisí (209) go (212) den Rialachán sealadach.

5.   CÚISÍOCHT

5.1.   Éifeachtaí na n-allmhairí dumpáilte

(51)

Tar éis an nochta shealadaigh, mhaígh Redstar agus Chutian gur tharla an méadú ar chostais táirgthe thionscal an Aontais le linn na tréimhse faoi bhreathnú mar gheall ar imthosca eisceachtúla amhail an méadú ar phraghsanna amhábhar agus ar chostais fuinnimh agus nár cheart é a chur i leith na n-allmhairí dumpáilte ón tSín. Thairis sin, chuir Redstar in aghaidh na hargóinte a chuir an Coimisiún i láthair gur chuir allmhairí dumpáilte bac ar Kandelium a gcostais a aisghabháil. D’athdhearbhaigh Redstar na barúlacha sin freisin mar fhreagairt ar an nochtadh deiridh.

(52)

Go háirithe, mhaígh Chutian nárbh fhéidir an díobháil arbh é an méadú ar chostais saothair ba chúis léi a chur i leith allmhairí dumpáilte na Síne. D’athdhearbhaigh Chutian gur tháinig méadú ar chostais saothair Kandelium mar éifeacht ar a scaradh ó ghrúpa Solvay in 2021. Go deimhin, roimh scaradh, bhí costais chothrománacha áirithe ar Solvay, lena n-áirítear costais riaracháin. D’iarr Chutian ar an gCoimisiún a nochtadh cé acu a rinne nó nach ndearna sé éifeachtaí na méaduithe sin ar chostais saothair de bharr athstruchtúrú na gcuideachtaí sin a eisiamh ó na táscairí díobhála, agus conas a rinne sé amhlaidh, agus d’iarr sé ar an gCoimisiún na héifeachtaí sin a eisiamh ó na corrlaigh sladghearrtha agus ó na corrlaigh ghearrdhíola agus athmhachnamh a dhéanamh ar a mheasúnú cúisíochta dá réir sin.

(53)

Chinn an Coimisiún go ndeachaigh boilsciú agus scaradh na cuideachta i bhfeidhm ar chostais saothair níos airde Kandelium, mar a leagtar amach in aithris (200) den Rialachán sealadach. Mar sin féin, shuigh an Coimisiún chomhfhreagair allmhairí dumpáilte na Síne do sciar nach beag den mhargadh le linn na tréimhse lena mbaineann (40 %-55 %), ar tháinig laghdú 4 % ar a phraghsanna le linn na tréimhse céanna. Chuir sé sin cosc ar thionscal an Aontais, a bhí neamhbhrabhúsach cheana féin, a chostais mhéadaithe a chur ar aghaidh chuig na custaiméirí deiridh. Dá bhrí sin, chuir allmhairí dumpáilte na Síne ar phraghsanna a bhí ag laghdú go díreach le creimeadh bhrabúsacht thionscal an Aontais le linn na tréimhse faoi bhreathnú.

(54)

Thairis sin, chinn an Coimisiún, gur thosaigh Kandelium ag feidhmiú mar chuideachta aonair a raibh a cuid seirbhísí cothrománacha agus riaracháin féin aici, tar éis na deighilte ó Solvay. Mar nár measadh go raibh na costais sin urghnách, níor asbhain an Coimisiún aon cheann de na costais ó na ríomhanna gearrdhíola ná ón anailís chúisíochta.

(55)

Faoi dheireadh, glactar leis gur tháinig ardú tobann ar chostais fuinnimh agus ina dhiaidh sin ar an gcostas a bhaineann le carbonáit bhairiam a tháirgeadh san Aontas mar thoradh ar an ngéarchéim fuinnimh, mar a leagtar amach in aithris (196) den Rialachán sealadach. Mar sin féin, le linn na tréimhse 2021-2022, d’ainneoin gur tháinig méadú ar na costais táirgthe agus gur shroich na praghsanna fuinnimh na leibhéil ab airde riamh, bhí táirgeoirí an Aontais in ann a bpraghsanna díola a mhéadú chun na costais sin a ionsú agus a méideanna díolachán a choinneáil cobhsaí an tráth céanna, ós rud é go raibh praghsanna allmhairí ón tSín agus ón India an-ard in 2022 freisin. Mar sin féin, in 2023 agus le linn na tréimhse imscrúdúcháin, nuair a d’aisiompaigh an treocht in airde maidir le praghsanna fuinnimh, tháinig laghdú géar ar bhrabúsacht thionscal an Aontais go dtí leibhéil a bhí chomh híseal sin nach raibh siad inbhuanaithe. Sna blianta sin, i margadh a bhí ag laghdú, b’éigean do thionscal an Aontais a phraghsanna díola a ísliú mar gheall ar an mbrú praghsanna a chuir na hallmhairí dumpáilte ón tSín agus ón India i bhfeidhm agus méid díolachán agus sciar den mhargadh araon á gcailleadh an tráth céanna. Dá bhrí sin, diúltaíonn an Coimisiún don bharúil sin.

(56)

Tar éis an nochta deiridh, d’áitigh Redstar gur chuir an Coimisiún i leith allmhairí dumpáilte go mícheart díobháil arbh iad tosca eile nach mbaineann le hallmhairí ba chúis léi i ndáiríre. Mhaígh Redstar nach raibh sé réalaíoch coinne a bheith leis go gcuirfí ar aghaidh go hiomlán chuig custaiméirí méadú eisceachtúil ar chostais arb iad an ghéarchéim fuinnimh, boilsciú, agus athstruchtúrú corparáideach is cúis leo.

(57)

Thug Redstar dá aire gur éirigh le táirgeoir an Aontais cheana féin sciar mór dá mhéaduithe costais roimhe sin a chur ar aghaidh chuig a chustaiméirí, de réir mar a tháinig méadú comhréireach ar phraghsanna díola an Aontais in 2022. Mhaígh Redstar, áfach, ós rud é gur lean na costais táirgthe de bheith ag méadú 45 % breise idir 2022 agus an tréimhse imscrúdúcháin, go raibh amhras ann an raibh tionscal an Aontais in ann an méadú costais breise sin a chur ar aghaidh chuig custaiméirí toisc gur mhéadaigh siad a bpraghsanna go suntasach cheana féin an bhliain roimhe sin. Ar deireadh, mhaígh Redstar gur tosca a bhaineann go sonrach leis an Aontas iad an ghéarchéim fuinnimh, an boilsciú agus an t-athstruchtúrú corparáideach agus nach ndearna siad difear d’onnmhaireoirí na Síne ná na hIndia, rud a fhágann go bhfuil sé míréasúnta coinne a bheith leis go n-ardódh na honnmhaireoirí sin a bpraghsanna ar an mbealach céanna le tionscal an Aontais.

(58)

In aithrisí (227) go (237) den Rialachán sealadach, rinne an Coimisiún anailís ar na cúiseanna leis an méadú ar chostas táirgthe thionscal an Aontais agus tháinig sé ar an gconclúid, cé gurbh iad costais amhábhar níos airde, praghsanna fuinnimh méadaithe agus infheistíochtaí áirithe atá thar téarma ba chúis leis na costais táirgthe atá ag dul i méid, nár mhaolaigh ná nár bhris na costais táirgthe mhéadaithe an nasc cúisíoch idir allmhairí dumpáilte agus an díobháil ábhartha. Go deimhin, chinn an Coimisiún gur chuir allmhairí dumpáilte brú mór ar phraghsanna a chuir cosc ar an tionscal cuid dá chostais táirgthe mhéadaithe ar a laghad a chur ar aghaidh chuig an tionscal iartheachtach chun bheith brabúsach go fóill. Mar a leagtar amach in aithris (229) agus (230) den Rialachán sealadach, in 2022, nuair a bhí praghsanna na Síne agus na hIndia ar an leibhéal is airde le linn na tréimhse faoi bhreathnú, bhí tionscal an Aontais in ann a phraghsanna díola a mhéadú chun a chostais táirgthe a bhí ag dul i méid a ionsú, rud a léiríonn go raibh an margadh iartheachtach in ann praghsanna níos airde a ghlacadh in 2022. Mar sin féin, idir 2022 agus an tréimhse imscrúdúcháin, tháinig laghdú thart ar 50 % ar phraghas díola allmhairí na Síne agus na hIndia. An tráth céanna, bhí ar thionscal an Aontais, d’ainneoin méadú breise ar a chostais táirgthe, a phraghsanna díola le linn na tréimhse imscrúdúcháin a laghdú fiú go leibhéal a bhí thart ar 16 % faoi bhun a chostais táirgthe. Léiríonn sé sin gur cuireadh iallach ar thionscal an Aontais a phraghsanna a laghdú mar gheall ar shochtadh praghsanna ag allmhairí dumpáilte. Níor chuir Redstar aon fhianaise nua ar fáil a chaithfeadh amhras ar an gcinneadh thuas.

(59)

Ar na cúiseanna thuas, díbheann an Coimisiún barúlacha Redstar agus deimhníonn sé a chonclúidí maidir le cúisíocht.

5.2.   Conclúid maidir le cúisíocht

(60)

Diúltaíodh do mhaímh uile na bpáirtithe tar éis an Rialacháin shealadaigh. Dá bhrí sin, tháinig an Coimisiún ar an gconclúid, ar bhonn na dtorthaí a nochtar sa Rialachán sealadach, go ndearnadh díobháil ábhartha do thionscal an Aontais mar gheall ar na hallmhairí dumpáilte ón tSín agus ón India agus maidir leis na tosca eile, a breithníodh leo féin nó le chéile, nach ndearnadh maolú ar an nasc cúisíoch idir na hallmhairí dumpáilte agus an díobháil ábhartha mar gheall orthu, ná nár briseadh é. Deimhníodh na conclúidí ar thángthas orthu in aithrisí (233) go (237) den Rialachán sealadach.

6.   LEIBHÉAL NA mBEART

6.1.   Corrlach díobhála

(61)

Tar éis nochtadh sealadach, chuir Chutian in iúl gur tháirg tionscal an Aontais carbónáit bhairiam tríd an bpróiseas cailcínithe atá níos costasaí, ach d’úsáid Chutian an próiseas brúite nach raibh chomh costasach céanna. D’iarr Chutian ar an gCoimisiún a nochtadh conas a cuireadh an difríocht sin sa phróiseas táirgthe san áireamh sna ríomhanna maidir leis an gcorrlach dumpála agus díobhála.

(62)

Cuireadh san áireamh i ríomhanna an Choimisiúin ar an gcorrlach dumpála agus díobhála na próisis táirgthe éagsúla toisc go raibh na ríomhanna sin bunaithe ar chomparáidí idir cineálacha táirgí inchomparáide bunaithe ar an Uimhir Rialaithe Táirge a bunaíodh i gcomhthéacs an imscrúdaithe. Mar shampla, cuireadh an cineál táirge púdair i gcomparáid leis an gcineál táirge púdair, cuireadh an cineál táirge gráinneach brúite i gcomparáid leis an gcineál táirge gráinneach brúite agus cuireadh an cineál táirge gráinneach cailcínithe i gcomparáid leis an gcineál táirge gráinneach cailcínithe. Dá bhrí sin, cuireadh san áireamh go cuí sna ríomhanna aon difríocht i gcineálacha táirgí agus ina gcostas táirgthe comhfhreagrach (agus dá bhrí sin sna próisis táirgthe). Rinne an Coimisiún nochtadh iomlán maidir leis na corrlaigh dumpála agus díobhála bunaithe ar na cineálacha táirgí do na páirtithe leasmhara ábhartha, lena n-áirítear do Chutian tráth an nochta shealadaigh.

(63)

Tar éis an nochta shealadaigh, dúirt Redstar nach mór na costais amach anseo ó ghealltanais chomhshaoil agus saothair atá sa spriocphraghas EUR [20–100] tona agus corrlaigh dhíobhála á ríomh a bheith cinnte agus nach mór coinne a bheith leo le linn thréimhse na mbeart frithdhumpála, de réir Airteagal 7(2d) den bhun-Rialachán. Is é sin le rá, líomhnaítear nach féidir leis an gCoimisiún brath ar thuairmíocht ná ar thoimhdí agus coigeartuithe réamhbhreathnaitheacha á ndéanamh aige ar phraghsanna.

(64)

Thairis sin, mheas Redstar nár nocht an Coimisiún go leordhóthanach an fhaisnéis ábhartha a úsáideadh chun costais EUR [20-100]/tona amach anseo a ríomh. Go háirithe, an próiseas maidir le comhdhéanamh agus ríomh na gcostas sin, agus cé acu a cinneadh nó nár cinneadh an raon EUR [20-100]/tona bunaithe ar uimhir rialaithe táirge éagsúil agus, más amhlaidh an cás, cé mhéad costais a shanntar d’uimhir rialaithe táirge agus cén fáth a bhfuil difríocht ollmhór den sórt sin ann.

(65)

Deimhníonn an Coimisiún go ndearnadh na costais sin agus na toimhdí bunúsacha (go háirithe, na réamh-mheastacháin ar thomhaltas fuinnimh, praghsanna fuinnimh agus praghsanna astaíochtaí truailleán) a fhíorú go cuí ag áitreabh thionscal an Aontais. Rinne an táirgeoir de chuid an Aontais meastachán ar phraghas na n-astaíochtaí sna blianta amach romhainn ar bhealach líneach (ag glacadh leis go dtiocfaidh méadú EUR [10-20] in aghaidh na bliana, in aghaidh an deimhnithe). Mar sin féin, mar a shonraítear in aithris (162) den Rialachán sealadach, ós rud é nach bhfuil ach táirgeoir amháin san Aontas, níl an Coimisiún in ann faisnéis níos mionsonraithe a nochtadh toisc gur faisnéis chorparáideach íogair í an fhaisnéis sin, chun rúndacht a chaomhnú de bhun Airteagal 19 den bhun-Rialachán.

(66)

Tar éis an nochta chinntithigh, d’áitigh Redstar go raibh an mhodheolaíocht as a n-eascraíonn costas measta EUR [20–100]/tona fós doiléir. Go háirithe, d’iarr Redstar soiléiriú maidir le tréimhse ama na gcostas comhlíontachta amach anseo, brí an mhéadaithe ‘línigh’ EUR [10-20] in aghaidh an deimhnithe astaíochtaí in aghaidh na bliana, agus cé acu a úsáideadh nó nár úsáideadh cur chuige meán ualaithe ar fud PCNanna. Mhaígh Redstar freisin go raibh táirgeoirí onnmhairiúcháin na Síne faoi réir ceanglais maidir le comhlíonadh comhshaoil agus saothair freisin agus, dá bhrí sin, chuir siad spriocphraghas do thionscal an Aontais arna choigeartú le costais chomhlíontachta amach anseo i gcomparáid le praghas onnmhairiúcháin neamhchoigeartaithe bunaithe ar shonraí iarbhír ábhair imní in iúl maidir le cé acu a d’fhéadfaí nó nach bhféadfaí an chomparáid a mheas mar chomparáid ‘chothrom’.

(67)

Faoi Airteagal 7(2d) den bhun-Rialachán, costais amach anseo a eascróidh as comhaontuithe comhshaoil iltaobhacha agus as prótacail fúthu ar páirtí iontu an tAontas nó as Coinbhinsiúin na hEagraíochta Idirnáisiúnta Saothair (EIS), agus a thabhóidh tionscal an Aontais le linn chur i bhfeidhm an bhirt, cuirfear san áireamh iad. I gcomhréir leis an mbun-Rialachán agus le cleachtas comhsheasmhach an Choimisiúin, iarradh ar thionscal an Aontais a chostais chomhlíontachta amach anseo a thuairisciú sa fhreagra ar an gceistneoir le haghaidh na mblianta de chur i bhfeidhm an bhirt agus d’fhíoraigh an Coimisiún na sonraí sin ar an láthair. Ar bhonn na sonraí fíoraithe, ríomh an Coimisiún na costais chomhlíontachta a bheidh ann amach anseo arna sloinneadh in EUR in aghaidh an tona le haghaidh na mblianta 2025 go 2028 trí ghlanchostas measta astaíochtaí CO2 a ghlacadh le haghaidh an táirge faoi imscrúdú. Tá praghas an deimhnithe astaíochtaí bunaithe ar shonraí margaidh atá ar fáil go héasca. Ansin cuireadh an costas ríofa céanna in aghaidh an tona leis an spriocphraghas le haghaidh na PCNanna uile.

(68)

Os a choinne sin, i gcomhréir le hAirteagal 2(8) den bhun-Rialachán, léiríonn an praghas onnmhairiúcháin na praghsanna iarbhír a íocadh nó atá iníoctha le haghaidh an táirge nuair a dhíoltar lena onnmhairiú ón tír is onnmhaireoir chuig an Aontas é. Faoin mbun-Rialachán, ní féidir an praghas onnmhairiúcháin a choigeartú chun costais chomhlíontachta amach anseo a chur san áireamh. Ar an mbonn sin, diúltaíonn an Coimisiún do mhaíomh Redstar nach mbeadh an chomparáid as ar eascair ríomh an chorrlaigh díobhála a thuairiscítear in aithris (245) den Rialachán sealadach ‘cothrom’.

(69)

Dá bhrí sin, níor choigeartaigh an Coimisiún leibhéal an díothaithe díobhála i ndáil leis sin.

(70)

In éagmais aon bharúil lena dtabharfaí údar maith leis an athbhreithniú ar na corrlaigh dhíobhála, is iad seo a leanas na leibhéil díothaithe díobhála chríochnaitheacha maidir leis na táirgeoirí onnmhairiúcháin comhoibríocha agus gach cuideachta eile:

Tír

Cuideachta

Corrlach díobhála (%)

Daon-Phoblacht na Síne

Guizhou Redstar Developing Co., Ltd.

133,5  %

Hubei Jingshan Chutian Barium Salt Corp. Ltd

130,8  %

Cuideachtaí comhoibríocha eile

132,2  %

Gach allmhaire eile de thionscnamh na tíre lena mbaineann

133,5  %

An India

Vishnu Barium Private Limited

114,7  %

Gach allmhaire eile de thionscnamh na tíre lena mbaineann

114,7  %

6.2.   Scrúdú ar an gcorrlach a bheadh leordhóthanach chun deireadh a chur leis an díobháil a bhain do thionscal an Aontais i gcás na Síne

(71)

Mar a mhínítear in aithrisí (247) agus (248) den Rialachán sealadach, chuir an gearánach fianaise leordhóthanach ar fáil don Choimisiún go bhfuil saobhadh amhábhar i gceist sa tSín maidir leis an táirge faoi imscrúdú. Dá bhrí sin, i gcomhréir le hAirteagal 7(2a) den bhun-Rialachán, san imscrúdú seo scrúdaíodh an saobhadh líomhainte chun a mheas, más ábhartha, ar leor dleacht is lú ná an corrlach dumpála chun deireadh a chur leis an díobháil.

(72)

Mar sin féin, ós rud é go bhfuil na corrlaigh a bheadh leordhóthanach chun deireadh a chur leis an díobháil níos airde ná na corrlaigh dhumpála, níor chinn an Coimisiún, go raibh sé riachtanach aghaidh a thabhairt ar an ngné sin.

6.3.   Conclúid maidir le leibhéal na mbeart

(73)

De réir an mheasúnaithe thuas, is mar a leanas ba cheart dleachtanna frithdhumpála cinntitheacha a shocrú i gcomhréir le hAirteagal 7(2) den bhun-Rialachán:

Tír

Cuideachta

Dleacht frithdhumpála chinntitheach

Daon-Phoblacht na Síne

Guizhou Redstar Developing Co., Ltd.

83,9  %

Daon-Phoblacht na Síne

Hubei Jingshan Chutian Barium Salt Corp. Ltd

72,6  %

Daon-Phoblacht na Síne

Cuideachtaí comhoibríocha eile

78,2  %

Daon-Phoblacht na Síne

Gach allmhaire eile de thionscnamh na tíre lena mbaineann

83,9  %

An India

Vishnu Barium Private Limited

4,6  %

An India

Gach allmhaire eile de thionscnamh na tíre lena mbaineann

4,6  %

7.   LEAS AN AONTAIS

(74)

Tar éis an nochta deiridh, d’athdhearbhaigh comhlachas náisiúnta na Spáinne de mhonaróirí friot, glónra agus dathanna ceirmeacha (Association Nacional de Fabricantes de Firtas, Esmaltes y Colores cerámicos ‘ANFFECC’) roinnt maíomh maidir le leas an Aontais a chuir siad isteach cheana féin le linn chéim shealadach an imscrúdaithe gan aon fhianaise nua a sholáthar, áfach, chun tacú leis na maímh sin. Rinneadh achoimre ar na maímh sin agus tugadh aghaidh orthu in aithrisí (273) go (280) den Rialachán sealadach. Ar na cúiseanna sin agus toisc gur tháinig na barúlacha sin isteach tar éis an sprioc-ama le haghaidh barúlacha maidir leis an nochtadh deiridh a leag an Coimisiún síos i gcomhréir le hAirteagal 20(5) den bhun-Rialachán agus toisc nár iarr ANFFECC síneadh a chur leis an sprioc-am sin, dhiúltaigh an Coimisiún do na barúlacha i gceist.

(75)

Na conclúidí a leagtar amach in aithrisí (250) go (282) den Rialachán sealadach, rinneadh iad a dhearbhú.

8.   BEARTA FRITHDHUMPÁLA CINNTITHEACHA

8.1.   Bearta cinntitheacha

(76)

Ar bhonn na gconclúidí ar thángthas orthu maidir le dumpáil, díobháil, cúisíocht, leibhéal na mbeart agus leas an Aontais, agus i gcomhréir le hAirteagal 9(4) den bhun-Rialachán, ba cheart bearta frithdhumpála cinntitheacha a fhorchur chun cosc a chur le tuilleadh díobhála do thionscal an Aontais de dheasca allmhairí dumpáilte an táirge lena mbaineann.

(77)

Ar bhonn a bhfuil thuas, ba cheart na dleachtrátaí frithdhumpála cinntitheacha, arna sloinneadh ar phraghas CAL ag teorainn an Aontais, roimh an dleacht chustaim a íoc, a bheith mar a leanas:

Tír

Cuideachta

Corrlach dumpála (%)

Corrlach díobhála (%)

Dleacht frithdhumpála chinntitheach (%)

Daon-Phoblacht na Síne

Guizhou Redstar Developing Co., Ltd.

83,9  %

133,5  %

83,9  %

Daon-Phoblacht na Síne

Hubei Jingshan Chutian Barium Salt Corp. Ltd

72,6  %

130,8  %

72,6  %

Daon-Phoblacht na Síne

Cuideachtaí comhoibríocha eile

78,2  %

132,2  %

78,2  %

Daon-Phoblacht na Síne

Gach allmhaire eile de thionscnamh na tíre lena mbaineann

83,9  %

133,5  %

83,9  %

An India

Vishnu Barium Private Limited

4,6  %

114,7  %

4,6  %

An India

Gach allmhaire eile de thionscnamh na tíre lena mbaineann

4,6  %

114,7  %

4,6  %

(78)

Na dleachtrátaí frithdhumpála le haghaidh cuideachtaí aonair a shonraítear sa Rialachán seo, bunaíodh iad ar bhonn thorthaí an imscrúdaithe seo. Dá bhrí sin, is léiriú iad ar an staid mar a suíodh le linn an imscrúdaithe seo maidir leis na cuideachtaí sin. Dá bhrí sin, tá na dleachtrátaí sin infheidhme go heisiach maidir le hallmhairí an táirge faoi imscrúdú de thionscnamh na tíre lena mbaineann agus arna tháirgeadh ag na heintitis dhlíthiúla ainmnithe. Maidir le hallmhairí an táirge lena mbaineann arna monarú ag aon chuideachta eile nach luaitear go sonrach i gcuid oibríochtúil an Rialacháin seo, lena n-áirítear eintitis atá comhlachaithe leo sin a luaitear go sonrach, ní féidir leo tairbhe a bhaint as na rátaí sin agus ba cheart dóibh a bheith faoi réir an dleachtráta is infheidhme maidir le ‘gach allmhaire eile de thionscnamh na dtíortha lena mbaineann’.

(79)

Féadfaidh cuideachta a iarraidh go gcuirfear na dleachtrátaí frithdhumpála aonair i bhfeidhm má athraíonn sí ainm a heintitis ina dhiaidh sin. Ní mór an t-iarratas a chur chuig an gCoimisiún (5). Ní mór an fhaisnéis ábhartha uile a bheith san iarraidh ionas gur féidir a léiriú nach ndéantar difear leis an athrú do cheart na cuideachta tairbhiú den dleachtaráta is infheidhme maidir léi. Más amhlaidh nach ndéantar difear leis an athrú ar ainm na cuideachta do cheart na cuideachta tairbhiú den ráta dleachta is infheidhme maidir léi, foilseofar rialachán maidir leis an athrú ainm in Iris Oifigiúil an Aontais Eorpaigh.

(80)

Chun na rioscaí maidir le himchéimniú a íoslaghdú de bharr na difríochta i ndleachtrátaí, teastaíonn bearta speisialta chun cur i bhfeidhm ceart na ndleachtanna frithdhumpála aonair a áirithiú. Níl cur i bhfeidhm dleachtanna frithdhumpála aonair infheidhme ach amháin nuair a chuirtear sonrasc tráchtála bailí i láthair údaráis chustaim na mBallstát. Ní mór an sonrasc a bheith i gcomhréir leis na ceanglais a leagtar amach in Airteagal 1(3) den Rialachán seo. Go dtí go gcuirfear an sonrasc sin i láthair, ba cheart allmhairí a bheith faoi réir na dleachta frithdhumpála is infheidhme maidir le ‘gach allmhaire eile de thionscnamh na dtíortha lena mbaineann’.

(81)

Cé go bhfuil sé riachtanach an sonrasc sin a chur i láthair údaráis chustaim na mBallstát chun na dleachtrátaí frithdhumpála aonair a chur i bhfeidhm maidir le hallmhairí, ní hé an t-aon ghné é a chuirfidh na húdaráis chustaim san áireamh. Go deimhin, fiú má thugtar sonrasc d’údaráis chustaim na mBallstát a chomhlíonann na ceanglais uile a leagtar amach in Airteagal 1(3) den Rialachán seo, ba cheart dóibh a ngnáthsheiceálacha a dhéanamh agus féadfaidh siad, mar atá i ngach cás eile, doiciméid bhreise a éileamh (doiciméid loingseoireachta, etc.) chun cruinneas na sonraí atá sa dearbhú a fhíorú agus chun a áirithiú go mbeidh údar le cur i bhfeidhm an ráta dleachta ina dhiaidh sin, i gcomhréir leis an dlí custaim.

(82)

Má thagann méadú suntasach ar an méid onnmhairí a dhéanann ceann de na cuideachtaí a thairbhíonn de na dleachtrátaí aonair is ísle, go háirithe tar éis fhorchur na mbeart lena mbaineann, d’fhéadfaí a mheas gurb éard atá i méadú den sórt sin ann féin athrú ar an bpatrún trádála de bharr fhorchur na mbeart de réir bhrí Airteagal 13(1) den bhun-Rialachán. Sna himthosca sin, d’fhéadfadh sé go ndéanfaí imscrúdú frith-imchéimniúcháin a thionscnamh, ar an gcoinníoll go gcomhlíontar na coinníollacha lena dhéanamh. Féadfar scrúdú a dhéanamh san imscrúdú sin, inter alia, ar an ngá atá le deireadh a chur le dleachtráta(í) aonair agus ar an ngá le dleacht ar an leibhéal náisiúnta a fhorchur dá bharr sin.

(83)

Chun a áirithiú go ndéanfar na dleachtanna frithdhumpála a fhorfheidhmiú mar is ceart, ba cheart feidhm a bheith leis an dleacht frithdhumpála le haghaidh gach allmhaire eile de thionscnamh na dtíortha lena mbaineann ní hamháin maidir leis na táirgeoirí onnmhairiúcháin neamh-chomhoibríocha san imscrúdú seo, ach ina dteannta sin, maidir leis na táirgeoirí nach ndearna táirgí a onnmhairiú chuig an Aontas le linn na tréimhse imscrúdúcháin.

(84)

Táirgeoirí onnmhairiúcháin i nDaon-Phoblacht na Síne nach ndearna an táirge lena mbaineann a onnmhairiú chuig an Aontas le linn na tréimhse imscrúdúcháin, ba cheart dóibh a bheith in ann a iarraidh ar an gCoimisiún go gcuirfí faoi réir an dleachtráta frithdhumpála iad le haghaidh cuideachtaí comhoibríocha nach bhfuil san áireamh sa sampla. Ba cheart don Choimisiún iarraidh den sórt sin a cheadú, ar choinníoll go gcomhlíontar trí choinníoll. Bheadh ar an táirgeoir onnmhairiúcháin nua an méid seo a leanas a léiriú: (i) nár onnmhairigh sé an táirge lena mbaineann chuig an Aontas le linn na tréimhse imscrúdúcháin; (ii) nach bhfuil gaol aige le táirgeoir onnmhairiúcháin a rinne amhlaidh; agus (iii) d’onnmhairigh sé an táirge lena mbaineann ina dhiaidh sin nó chuaigh sé faoi oibleagáid chonarthach neamh-inchúlghairthe déanamh amhlaidh i gcainníochtaí substaintiúla.

8.2.   Bailiúchán cinntitheach na ndleachtanna sealadacha

(85)

I bhfianaise na gcorrlach dumpála a cinneadh agus an leibhéil díobhála a rinneadh do thionscal an Aontais, ba cheart na méideanna arna n-urrú trí bhíthin na ndleachtanna frithdhumpála sealadacha arna bhforchur leis an Rialachán sealadach a bhailiú go cinntitheach suas go dtí na leibhéil a bhunaítear faoin Rialachán seo.

8.3.   Bailiú cúlghabhálach

(86)

Mar a luaitear i roinn 1.2 thuas, chuir an Coimisiún allmhairí an táirge faoi imscrúdú faoi réir a gcláraithe.

(87)

Le linn chéim chinntitheach an imscrúdaithe, rinneadh na sonraí a bailíodh i gcomhthéacs an chláraithe a mheasúnú. Rinne an Coimisiún anailís lena fháil amach ar comhlíonadh na critéir faoi Airteagal 10(4) den bhun-Rialachán maidir le bailiú cúlghabhálach na ndleachtanna cinntitheacha.

(88)

Léiríodh in anailís an Choimisiúin ná tháinig aon mhéadú suntasach ar allmhairí sa bhreis ar leibhéal na n-allmhairí ba chúis le díobháil le linn na tréimhse imscrúdúcháin, mar a leagtar síos in Airteagal 10(4)(d) den bhun-Rialachán. I gcás na hanailíse sin, rinne an Coimisiún comparáid idir an meánmhéid míosúil agus na meánphraghsanna míosúla le linn na tréimhse imscrúdúcháin agus meán míosúil na tréimhse idir deireadh na tréimhse imscrúdúcháin agus an mhí roimh chlárú. Léirigh an chomparáid sin laghdú 9 % ar mhéideanna agus méadú 11 % ar phraghsanna. Rinne an Coimisiún comparáid freisin idir an meánmhéid míosúil agus na meánphraghsanna míosúla le linn na tréimhse imscrúdúcháin agus meán míosúil na tréimhse idir deireadh na tréimhse imscrúdúcháin agus an mhí inar forchuireadh bearta sealadacha. Léirigh an chomparáid sin méadú 9 % ar mhéideanna, agus laghdú 7 % ar phraghsanna. An tráth céanna, ní raibh aon fhianaise sa chomhad go mbaineann séasúracht le tomhaltas an táirge lena mbaineann.

(89)

Dá bhrí sin, tháinig an Coimisiún ar an gconclúid nach gcomhlíontar na coinníollacha maidir le bailiú cúlghabhálach.

9.   FORÁIL CHRÍOCHNAITHEACH

(90)

I bhfianaise Airteagal 109 de Rialachán (AE, Euratom) 2024/2509 ó Pharlaimint na hEorpa agus ón gComhairle (6), nuair a bheidh méid le haisíoc tar éis breithiúnas ó Chúirt Bhreithiúnais an Aontais Eorpaigh, is é an t-ús is ceart a íoc an ráta a chuireann an Banc Ceannais Eorpach i bhfeidhm maidir lena phríomhoibríochtaí athmhaoinithe, arna bhfoilsiú i sraith C d’Iris Oifigiúil an Aontais Eorpaigh ar an gcéad lá féilire de gach mí.

(91)

Na bearta dá bhforáiltear sa rialachán seo, tá siad i gcomhréir le tuairim an Choiste a bunaíodh le hAirteagal 15(1) de Rialachán (AE) 2016/1036,

TAR ÉIS AN RIALACHÁN SEO A GHLACADH:

Airteagal 1

1.   Forchuirtear dleacht frithdhumpála chinntitheach ar allmhairí carbónáite bairiam ina bhfuil cion strointiam is mó ná 0,07 % de réir meáchain agus cion sulfair is mó ná 0,0015 % de réir meáchain, bíodh sí i bhfoirm phúdrach, ghráinneach bhrúite nó ghráinneach chailcínithe, atá faoi láthair faoi chód AC ex 2836 60 00 (cód TARIC 2836 60 00 10), de thionscnamh Dhaon-Phoblacht na Síne agus na hIndia.

2.   Is mar a leanas a bheidh an dleachtráta frithdhumpála cinntitheach is infheidhme maidir leis an bpraghas glan, saor ag teorainn an Aontais, roimh dhleacht, atá ar na táirgí a bhfuil tuairisc orthu i mír 1 agus arna dtáirgeadh ag na cuideachtaí a liostaítear thíos:

Tír thionscnaimh

Cuideachta

Dleacht frithdhumpála chinntitheach

Cód breise TARIC

Daon-Phoblacht na Síne

Guizhou Redstar Developing CO., LTD.

83,9  %

89SE

Daon-Phoblacht na Síne

Hubei Jingshan Chutian Barium Salts Co., Ltd.

72,6  %.

89SF

Daon-Phoblacht na Síne

Cuideachtaí comhoibríocha eile a liostaítear san Iarscríbhinn

78,2  %

Féach Iarscríbhinn

Daon-Phoblacht na Síne

Gach allmhaire eile de thionscnamh na tíre lena mbaineann

83,9  %

8999

An India

Vishnu Barium Private Limited

4,6  %

89SH

An India

Gach allmhaire eile de thionscnamh na tíre lena mbaineann

4,6  %

8999

3.   Beidh cur i bhfeidhm na ndleachtrátaí aonair a sonraíodh le haghaidh na gcuideachtaí a luaitear i mír 2 coinníollach ar shonrasc tráchtála bailí a chur faoi bhráid údaráis chustaim na mBallstát, ar a mbeidh dearbhú arna dhátú agus arna shíniú ag oifigeach de chuid an eintitis ag a mbeidh an sonrasc sin á eisiúint, a shainaithneofar lena ainm agus lena fheidhm, arna dhréachtú mar a leanas: ‘Déanaimse, mise a bhfuil mo shíniú leis seo, a dheimhniú maidir le (méid san aonad atá á úsáid againn) den (táirge lena mbaineann) a díoladh lena onnmhairiú chuig an Aontas Eorpach agus a chumhdaítear leis an sonrasc seo, gurbh é (ainm agus seoladh na cuideachta) (cód breise TARIC) a mhonaraigh é sa tír lena mbaineann. Dearbhaím gur iomlán agus gur ceart an fhaisnéis sa sonrasc seo.’ Go dtí go dtabharfar an sonrasc sin ar aird, beidh feidhm ag an dleacht is infheidhme maidir le gach allmhaire eile de thionscnamh na tíre lena mbaineann.

4.   Mura sonraítear a mhalairt, beidh feidhm leis na forálacha atá i bhfeidhm maidir le dleachtanna custaim.

Airteagal 2

Na méideanna arna n-urrú trí bhíthin na dleachta frithdhumpála sealadaí faoi Rialachán Cur Chun Feidhme (AE) 2025/1724 lena bhforchuirtear dleacht frithdhumpála shealadach ar allmhairí carbónáite bairiam de thionscnamh Dhaon-Phoblacht na Síne agus na hIndia, déanfar iad a bhailiú go cinntitheach. Na méideanna arna n-urrú de bhreis ar an dleacht frithdhumpála, déanfar iad a scaoileadh.

Airteagal 3

Féadfar Airteagal 1(2) a leasú chun táirgeoirí onnmhairiúcháin nua ó Dhaon-Phoblacht na Síne a chur leis agus iad a chur faoi réir mheánráta ualaithe iomchuí na dleachta frithdhumpála le haghaidh cuideachtaí comhoibríocha nár áiríodh sa sampla. Tabharfaidh táirgeoir onnmhairiúcháin nua fianaise maidir leis an méid seo a leanas:

(a)

nach ndearna sé na hearraí a shonraítear in Airteagal 1(1) a onnmhairiú le linn na tréimhse imscrúdúcháin (an 1 Deireadh Fómhair 2023 go dtí an 30 Meán Fómhair 2024);

(b)

nach bhfuil sé comhlachaithe le honnmhaireoir ná le táirgeoir atá faoi réir na mbeart arna bhforchur ag an Rialachán seo, agus a d’fhéadfadh comhoibriú san imscrúdú bunaidh; agus

(c)

gur onnmhairigh sé iarbhír an táirge lena mbaineann, sin nó go bhfuil oibleagáid chonarthach neamh-inchúlghairthe air méid suntasach a onnmhairiú chuig an Aontas tar éis dheireadh na tréimhse imscrúdúcháin.

Airteagal 4

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Eanáir 2026.

Thar ceann an Choimisiúin

An tUachtarán

Ursula VON DER LEYEN


(1)   IO L 176, 30.6.2016, lch. 21, ELI: http://data.europa.eu/eli/reg/2016/1036/oj.

(2)   IO C, C/2024/7461, 20.12.2024, ELI: http://data.europa.eu/eli/C/2024/7461/oj.

(3)  Rialachán Cur Chun Feidhme (AE) 2025/482 ón gCoimisiún an 14 Márta 2025 lena gcuirtear allmhairí carbónáite bairiam de thionscnamh Dhaon-Phoblacht na Síne agus na hIndia faoi réir a gcláraithe (IO L, 2025/482, 17.3.2025, ELI: http://data.europa.eu/eli/reg_impl/2025/482/oj).

(4)  Rialachán Cur Chun Feidhme (AE) 2025/1724 ón gCoimisiún an 8 Lúnasa 2025 lena bhforchuirtear dleacht frithdhumpála shealadach ar allmhairí carbónáite bairiam de thionscnamh Dhaon-Phoblacht na Síne agus na hIndia (IO L, 2025/1724, 11.8.2025, ELI: http://data.europa.eu/eli/reg_impl/2025/1724/oj).

(5)  Ríomhphost: TRADE-TDI-NAME-CHANGE-REQUESTS@ec.europa.eu; An Coimisiún Eorpach, Ard-Stiúrthóireacht na Trádála, Stiúrthóireacht G, Wetstraat 170 Rue de la Loi, 1040 an Bhruiséil, an Bheilg.

(6)  Rialachán (AE, Euratom) 2024/2509 ó Pharlaimint na hEorpa agus ón gComhairle an 23 Meán Fómhair 2024 maidir leis na rialacha airgeadais is infheidhme maidir le buiséad ginearálta an Aontais (athmhúnlú) (IO L, 2024/2509, 26.9.2024, ELI: http://data.europa.eu/eli/reg/2024/2509/oj).


IARSCRÍBHINN

Táirgeoirí onnmhairiúcháin comhoibríocha neamhshampláilte de chuid Dhaon-Phoblacht na Síne:

Tír

Ainm

Cód breise TARIC

Daon-Phoblacht na Síne

Guizhou Hongtai Barium Industry Co., Ltd

89SG


ELI: http://data.europa.eu/eli/reg_impl/2026/71/oj

ISSN 1977-0839 (electronic edition)