(1)

Tá tionchar diúltach ar shlándáil an Aontais agus na mBallstát ag an gcogaíocht ard-déine a d’eascair as cogadh foghach gan chúis gan údar na Rúise ar an Úcráin agus ní mór méadú suntasach a dhéanamh ar acmhainneacht na mBallstát a gcumais chosanta a threisiú. Mar gheall ar shlándáil réigiúnach agus dhomhanda a bheith ag éirí níos measa le fada, tá gá le hathrú ó bhonn ar an scála agus ar an luas lenar féidir le Bonn Tionsclaíoch agus Teicneolaíoch na Cosanta Eorpaí (BTTCE) speictream iomlán cumas míleata a fhorbairt agus a tháirgeadh.

(2)

Gheall Cinn Stáit nó Rialtais an Aontais, ag teacht le chéile dóibh in Versailles an 11 Márta 2022, cumais chosanta Eorpacha a neartú. Chomhaontaigh siad a gcaiteachais chosanta a mhéadú, dlús a chur leis an gcomhar trí thionscadail chomhpháirteacha, agus trí sholáthar comhpháirteach na gcumas cosanta, easnaimh a dhúnadh, borradh a chur faoin nuálaíocht agus tionscal cosanta Eorpach a neartú agus a fhorbairt.

(3)

Chuir an Coimisiún agus Ardionadaí an Aontais do Ghnóthaí Eachtracha agus don Bheartas Slándála (‘an tArdionadaí’) Teachtaireacht Chomhpháirteach i láthair maidir leis an Anailís ar Bhearnaí Infheistíochta i Réimse na Cosanta agus an Bealach Chun Tosaigh an 18 Bealtaine 2022, inar léiríodh gurbh ann do bhearnaí airgeadais, tionsclaíocha agus cumais sa tionscal cosanta san Aontas.

(4)

Sna conclúidí uaithi an 14 agus 15 Nollaig 2023, chuir an Chomhairle Eorpach i dtábhacht, tar éis di an obair a bhreithniú a rinneadh chun dearbhú Versailles an 11 Márta 2022 agus an Compás Straitéiseach um Shlándáil agus Cosaint a d’fhormheas an Chomhairle an 21 Márta 2022, a chur chun feidhme, gur gá níos mó a dhéanamh chun cuspóirí an Aontais maidir le hullmhacht cosanta a mhéadú. Chun an ullmhacht sin a bhaint amach agus chun an tAontas a chosaint, is réamhriachtanas é tionscal cosanta Eorpach láidir, athléimneach, nuálach agus iomaíoch.

(5)

An 20 Iúil 2023, ghlac Parlaimint na hEorpa agus an Chomhairle Rialachán (AE) 2023/1525 (5), darb aidhm borradh a chur, ar bhonn práinneach, faoi acmhainneachtaí monaraíochta an tionscail cosanta Eorpaigh, slabhraí soláthair a dhaingniú, nósanna imeachta soláthair éifeachtúla a éascú, aghaidh a thabhairt ar na heasnaimh in acmhainneachtaí táirgeachta agus infheistíochtaí a chur chun cinn. An 18 Deireadh Fómhair 2023, ghlac Parlaimint na hEorpa agus an Chomhairle Rialachán (AE) 2023/2418 (6), darb aidhm tacú leis an gcomhar idir na Ballstáit ag céim an tsoláthair chun na bearnaí is práinní agus is criticiúla a líonadh ar bhealach comhoibríoch, go háirithe na bearnaí sin a cruthaíodh leis an bhfreagairt ar chogadh foghach na Rúise ar an Úcráin.

(6)

Dearadh Rialacháin (AE) 2023/1525 agus (AE) 2023/2418 mar chláir phráinnfhreagartha agus ghearrthéarmacha, a rachadh in éag an 30 Meitheamh 2025 agus an 31 Nollaig 2025 faoi seach.

(7)

Leis an Rialachán seo, ba cheart cur le Rialacháin (AE) 2023/1525 agus (AE) 2023/2418 agus lena loighic a leathnú faoi pheirspictíocht níos fadtéarmaí agus níos struchtúrtha, trí thacaíocht airgeadais a sholáthar don tréimhse 2025-2027 chun iomaíochas, freagrúlacht agus cumas BTTCE a threisiú chun infhaighteacht agus soláthar táirgí cosanta a áirithiú ar bhealach intuartha leanúnach tráthúil. I bhfianaise na staide slándála atá ann faoi láthair, is cosúil gur gá an tacaíocht sin ón Aontas a leathnú chun comhar idir na Ballstáit a dhreasú maidir le raon feidhme níos leithne trealaimh cosanta a sholáthar.

(8)

An 23 Meitheamh 2022, chinn an Chomhairle Eorpach stádas tír is iarrthóir a dheonú don Úcráin, rud a léirigh toil láidir go ndéanfaí an atógáil a nascadh le hathchóirithe agus í ar a conair Eorpach. An 15 Nollaig 2023, chinn an Chomhairle Eorpach tús a chur le caibidlíocht aontachais leis an Úcráin agus dhearbhaigh sí go bhfuil an tAontas agus a Bhallstáit tiomanta i gcónaí rannchuidiú, san fhadtéarma agus i gcomhar lena gcomhpháirtithe, leis na gealltanas slándála a tugadh don Úcráin, rud a chuideoidh leis an Úcráin í féin a chosaint, cur in aghaidh na n-iarrachtaí díchobhsaithe agus bac a chur ar ghníomhartha foghacha amach anseo. Tá tacaíocht láidir don Úcráin ina príomhthosaíocht ag an Aontas agus is freagairt iomchuí í ar thiomantas láidir polaitiúil an Aontais tacú leis an Úcráin a fhad is gá.

(9)

Mar dheasca an damáiste a rinne cogadh foghach na Rúise do gheilleagar, sochaí agus bonneagar na hÚcráine, agus go háirithe an damáiste a rinneadh do Bhonn Teicneolaíoch agus Tionsclaíoch Cosanta na hÚcráine (‘BTTC na hÚcráine’), tá gá le tacaíocht chuimsitheach chun BTTC na hÚcráine a atógáil. Tá an tacaíocht sin ríthábhachtach chun go mbeidh sé d’acmhainn ag an Úcráin feidhmeanna bunriachtanacha stáit a choinneáil ar bun, rannchuidiú le téarnamh tapa, le hatógáil agus nuachóiriú na tíre, le comhtháthú BTTC na hÚcráine in BTTCE, agus BTTC na hÚcráine a oiriúnú chun caighdeáin Eagraíocht Chonradh an Atlantaigh Thuaidh (ECAT) agus caighdeáin ábhartha eile a chomhlíonadh. Tá sé ríthábhachtach go mbeadh BTTC láidir ag an Úcráin ar mhaithe lena slándáil fhadtéarmach agus ar mhaithe lena hatógáil.

(10)

Ba cheart don Aontas tacaíocht airgeadais a thabhairt do ghníomhaíochtaí lena dtacaítear le BTTC na hÚcráine a threisiú. Go háirithe, leis an Ionstraim Tacaíochta don Úcráin faoin Rialachán seo, ba cheart na Ballstáit a dhreasú chun dul i gcomhar leis an Úcráin agus le BTTC na hÚcráine d’fhonn acmhainneachtaí monaraíochta cosanta na hÚcráine a mhéadú agus soláthar comhoibríoch táirgí cosanta ó BTTC na hÚcráine a chothú. Tá an tacaíocht sin comhlántach leis an tacaíocht a sholáthraítear faoin tSaoráid don Úcráin a bunaíodh le Rialachán (AE) 2024/792 ó Pharlaimint na hEorpa agus ón gComhairle (7), agus leis an tacaíocht mhíleata a sholáthraítear don Úcráin faoin tSaoráid Eorpach Síochána a bunaíodh le Cinneadh (CBES) 2021/509 ón gComhairle (8) agus trí chúnamh déthaobhach arna thabhairt ag na Ballstáit. Tá sé comhsheasmhach freisin le tacaíocht leanúnach bhuanseasmhach an Aontais do neamhspleáchas, ceannasacht agus iomláine chríochach na hÚcráine laistigh dá teorainneacha a aithnítear go hidirnáisiúnta.

(11)

Ní mór an Rúis a thabhairt chun cuntais go hiomlán agus ní mór di íoc as an damáiste ollmhór a rinneadh de dheasca an chogaidh fhoghaigh atá á cur aici ar an Úcráin, ar sárú follasach é ar Chairt na Náisiún Aontaithe. Ba cheart don Aontas agus dá Bhallstáit, i ndlúthchomhar le comhpháirtithe idirnáisiúnta eile, leanúint de bheith ag obair chun an sprioc sin a bhaint amach, i gcomhréir le dlí an Aontais agus leis an dlí idirnáisiúnta, agus á chur san áireamh go bhfuil an toirmeasc ar úsáid fornirt a chumhdaítear in Airteagal 2(4) de Chairt na Náisiún Aontaithe agus prionsabal na freagrachta Stáit as gníomhartha éagóracha idirnáisiúnta, lena n-áirítear an oibleagáid an damáiste atá inmheasúnaithe ó thaobh airgeadais de a chúiteamh, sáraithe go tromchúiseach ag an Rúis. I gcomhar le comhpháirtithe idirnáisiúnta, rinneadh dul chun cinn maidir leis an gcaoi a bhféadfaí ioncam urghnách atá i seilbh eintitis phríobháideacha a eascraíonn go díreach as blocáil shócmhainní ceannasacha na Rúise a dhíriú ar thacaíocht a thabhairt don Úcráin, lena n-áirítear BTTC na hÚcráine, ar bhealach atá comhsheasmhach leis na hoibleagáidí conarthacha is infheidhme agus i gcomhréir le dlí an Aontais agus leis an dlí idirnáisiúnta. D’fhéadfaí tacaíocht bhreise a fháil trí úsáid a bhaint as iarmhéideanna urghnácha airgid thirim na dtaisclann lárnach urrús a thagann ón ioncam neamhthuartha urghnách arna eascairt as sócmhainní ceannasacha blocáilte na Rúise, nó as aon bheart sriantach ábhartha eile de chuid an Aontais, dá n-aistreofaí na hiarmhéideanna sin chuig an Aontas.

(12)

Tar éis do cheannairí G7 a dhearbhú go daingean go raibh siad tiomanta cabhrú leis an Úcráin a riachtanais phráinneacha mhaoinithe ghearrthéarmacha a chomhlíonadh agus tacú lena tosaíochtaí fadtéarmacha téarnaimh agus atógála, an 28 Deireadh Fómhair 2024, ghlac Parlaimint na hEorpa agus an Chomhairle Rialachán (AE) 2024/2773 (9) lenar bunaíodh an Sásra Comhair le haghaidh Iasachtaí don Úcráin agus lenar soláthraíodh cúnamh macrairgeadais eisceachtúil don Úcráin. Foráiltear le Rialachán (AE) 2024/2773 go n-áireofar, sa mheabhrán tuisceana maidir le coinníollacha beartais don chúnamh macrairgeadais sin, gealltanas chun comhar leis an Aontas a chur chun cinn maidir le téarnamh, atógáil agus nuachóiriú thionscal cosanta na hÚcráine, i gcomhréir le cuspóirí chláir an Aontais agus cláir ábhartha eile de chuid an Aontais darb aidhm BTTC na hÚcráine, a théarnamh, a atógáil agus a nuachóiriú.

(13)

Ba cheart comhaontú maoiniúcháin de réir bhrí Airteagal 114(2) de Rialachán (AE, Euratom) 2024/2509 ó Pharlaimint na hEorpa agus ón gComhairle (10) (‘an Rialachán Airgeadais’) a thabhairt i gcrích leis an Úcráin chun na gníomhaíochtaí a leagtar amach sa Rialachán seo a chur chun feidhme, ar gníomhaíochtaí iad a bhaineann leis an Úcráin nó le heintitis dhlítheanacha atá bunaithe san Úcráin a fhaigheann cistiú ón Aontas. Leis an gcomhaontú maoiniúcháin leis an Úcráin, mar aon leis na conarthaí agus na comhaontuithe a síníodh le heintitis dhlítheanacha atá bunaithe san Úcráin agus a fhaigheann cistiú ón Aontas, ba cheart comhlíonadh na n-oibleagáidí a leagtar amach in Airteagal 129 den Rialachán Airgeadais a áirithiú.

(14)

Chun cistiú a dhéanamh ar na gníomhaíochtaí darb aidhm iomaíochas agus ullmhacht BTTCE a neartú bunaithe ar Airteagal 173 den Chonradh ar Fheidhmiú an Aontais Eorpaigh (CFAE) agus ar na gníomhaíochtaí darb aidhm rannchuidiú le téarnamh, atógáil agus nuachóiriú BTTC na hÚcráine, agus é á chur san áireamh go bhféadfaí é a chomhtháthú amach anseo in BTTCE, faoi Airteagal 212 CFAE, ba cheart Clár um an Tionscal Cosanta Eorpach (an ‘Clár’) a bhunú leis an Rialachán seo ina leagfar amach na coinníollacha maidir le tacaíocht airgeadais a fháil ón Aontas faoi Airteagal 173 CFAE agus Ionstraim um Thacaíocht don Úcráin ina leagfar amach na coinníollacha sonracha maidir le tacaíocht airgeadais a fháil ón Aontas faoi Airteagal 212 CFAE.

(15)

Ba cheart an Clár a bheith comhsheasmhach leis na tosaíochtaí maidir le cumas cosanta arna gcomhaontú go comhchoiteann ag na Ballstáit faoi chuimsiú an chomhbheartais eachtraigh agus slándála (CBES), comhar na mBallstát faoi chuimsiú an bhuanchomhair struchtúrtha (PESCO) a bunaíodh le Cinneadh (CBES) 2017/2315 ón gComhairle (11), tionscnaimh agus tionscadail na Gníomhaireachta Eorpaí um Chosaint (GEC), agus chúnamh sibhialta agus míleata an Aontais don Úcráin. Ba cheart an aird chuí a thabhairt sa Chlár ar na gníomhaíochtaí ábhartha arna ndéanamh ag ECAT agus ag comhpháirtithe eile nuair a fhónann na gníomhaíochtaí sin do leasanna slándála agus cosanta an Aontais.

(16)

Leis an Rialachán seo, ba cheart imchlúdach airgeadais a leagan síos don tréimhse 2025 go 2027 arb éard a bheidh ann an príomh-mhéid tagartha, de réir bhrí pointe 18 de Chomhaontú Idirinstitiúideach an 16 Nollaig 2020 idir Parlaimint na hEorpa, Comhairle an Aontais Eorpaigh agus an Coimisiún Eorpach maidir leis an smacht buiséadach, le comhar in ábhair bhuiséadacha agus le bainistíocht fhónta airgeadais chomh maith le hacmhainní dílse nua, lena n-áirítear treochlár i dtreo acmhainní dílse nua a thabhairt isteach (12), do Pharlaimint na hEorpa agus don Chomhairle le linn an nós imeachta bhuiséadaigh bhliantúil. Is iomchuí cead a thabhairt acmhainní airgeadais breise a chur ar fáil don Chlár agus don Ionstraim um Thacaíocht don Úcráin, lena n-áirítear trí ranníocaíochtaí breise arna soláthar ag na Ballstáit.

(17)

Dúirt an Chomhairle Eorpach, sna conclúidí uaithi i mí Iúil 2020, gur cheart, de ghnáth, ré chláir earnála an Chreata Airgeadais Ilbhliantúil (CAI) a ailíniú le creat ama CAI 2021-2027. Nuair a rachaidh CAI 2021-2027 in éag, beidh cistiú ón Aontas do chláir earnála faoi réir thoradh na caibidlíochta maidir leis an gcéad CAI eile, is infheidhme ó 2028 ar aghaidh.

(18)

D’fhéadfaí na féidearthachtaí dá bhforáiltear in Airteagal 73(4) de Rialachán (AE) 2021/1060 ó Pharlaimint na hEorpa agus ón gComhairle (13) a chur i bhfeidhm ar choinníoll go gcomhlíonann an tionscadal na rialacha a leagtar amach sa Rialachán sin agus raon feidhme Chiste Forbraíochta Réigiúnaí na hEorpa agus Chiste Sóisialta na hEorpa Plus mar a leagtar amach é i Rialacháin (AE) 2021/1058 (14) agus (AE) 2021/1057 (15) ó Pharlaimint na hEorpa agus ón gComhairle, faoi seach. D’fhéadfadh sé sin a bheith amhlaidh go háirithe i gcás ina mbíonn clistí margaidh sonracha nó cásanna infheistíochta fo-optamacha roimh tháirgeadh táirgí cosanta ábhartha i gcríocha na mBallstát, go háirithe i limistéir leochaileacha agus iargúlta, agus i gcás ina rannchuidíonn na hacmhainní sin le cuspóirí an chláir óna n-aistrítear iad a bhaint amach. I gcomhréir le hAirteagal 24 de Rialachán (AE) 2021/1060, tá an Coimisiún le measúnú a dhéanamh ar na cláir leasaithe arna gcur isteach ag an mBallstát agus barúlacha a thabhairt laistigh de 2 mhí tar éis chur isteach an chláir leasaithe.

(19)

I bhfianaise an ghá atá le hinfheistíocht níos fearr a dhéanamh le chéile in iomaíochas, freagrúlacht agus cumas BTTCE chun infhaighteacht agus soláthar tráthúil táirgí cosanta a áirithiú agus i dtéarnamh, atógáil agus nuachóiriú BTTC na hÚcráine, ba cheart do na Ballstáit, d’institiúidí, comhlachtaí nó gníomhaireachtaí de chuid an Aontais, do thríú tíortha, d’eagraíochtaí idirnáisiúnta, d’institiúidí idirnáisiúnta airgeadais agus do thríú páirtithe eile a bheith in ann rannchuidiú le cur chun feidhme an Chláir agus na hIonstraime um Thacaíochta don Úcráin. Ba cheart ranníocaíochtaí den sórt sin a chur chun feidhme i gcomhréir leis na rialacha agus na coinníollacha céanna agus ba cheart iad a bheith ina n-ioncam sannta seachtrach de réir bhrí Airteagal 21(2), pointe (a), (d) nó (e), den Rialachán Airgeadais agus ba cheart iad a léiriú sa nós imeachta buiséadach bliantúil i gcomhréir leis an Rialachán Airgeadais. Ba cheart an tsolúbthacht a bheith ag na Ballstáit cinneadh a dhéanamh maidir le leithdháileadh na méideanna arna ranníoc leis an gClár nó leis an Ionstraim um Thacaíocht don Úcráin. Ba cheart do na Ballstáit a bheith in ann a roghnú go gcuirfí na cistí sin ar fáil do na heintitis uile atá incháilithe chun cistiú a fháil faoin Rialachán seo, nach gcuirfí ar fáil iad ach chun tairbhe na mBallstát lena mbaineann amháin, nó go gcuirfí ar fáil iad chun tairbhe Ballstát eile nó, i gcás inarb ábhartha, chun tairbhe na hÚcráine. Tá an tsolúbthacht sin fíor-riachtanach chun a áirithiú go mbainfear an úsáid is éifeachtúla as acmhainní agus gur féidir cistiú a leithdháileadh sna háiteanna is mó a bhfuil gá léi.

(20)

Ba cheart na Ballstáit a bheith in ann an tsolúbthacht a úsáid agus a gcuid leithdháiltí bainistíochta comhpháirtí á gcur chun feidhme, ar leithdháiltí iad a chuirtear ar fáil le Rialachán (AE) 2021/1060. Ba cheart a bheith in ann, mar sin, leibhéil áirithe chistithe a aistriú idir leithdháiltí bainistíochta comhpháirtí agus an Clár nó an Ionstraim um Thacaíocht don Úcráin, faoi réir na gcoinníollacha a leagtar amach i Rialachán (AE) 2021/1060. Ba cheart é a bheith indéanta acmhainní nár gealladh fós faoi dheireadh 2028 a aistriú ar ais chuig clár foinseach amháin nó níos mó faoi seach, arna iarraidh sin don Bhallstát lena mbaineann, i gcomhréir leis na coinníollacha a leagtar amach i Rialachán (AE) 2021/1060.

(21)

Féadfaidh na cuspóirí a shaothraítear faoin gClár chun iomaíochas agus ullmhacht BTTCE a mhéadú trí choigeartú an tionscail a thionscnamh agus trí dhlús a chur le coigeartú an tionscail d’athruithe struchtúracha arna bhforchur ag an timpeallacht slándála atá ag athrú, lena n-áirítear d’fhonn slándáil soláthair táirgí cosanta a áirithiú ar fud an Aontais, féadfaidh na cuspóirí sin rannchuidiú le comhtháthú eacnamaíoch, sóisialta agus críochach an Aontais a chur chun cinn mar a fhoráiltear faoi Rialachán (AE) 2021/241 ó Pharlaimint na hEorpa agus ón gComhairle (16). Dá bhrí sin, ba cheart foráil a dhéanamh chun go bhféadfar ranníocaíochtaí na mBallstát a fhaigheann tacaíocht ón tSaoráid Téarnaimh agus Athléimneachta a úsáid chun tacú le gníomhaíochtaí atreisithe thionsclaíoch faoin Rialachán seo. Ba cheart an fhéidearthacht sin a úsáid a mhéid a rannchuidíonn sí leis na cuspóirí a leagtar amach in Airteagal 4 de Rialachán (AE) 2021/241 a bhaint amach. Tá cur i bhfeidhm an phrionsabail ‘gan dochar suntasach a dhéanamh’ de réir bhrí Airteagal 17 de Rialachán (AE) 2020/852 ó Pharlaimint na hEorpa agus ón gComhairle (17) fíor-riachtanach chun a áirithiú go ndéanfar na hathchóirithe agus na hinfheistíochtaí a dhéantar faoin tSaoráid Téarnaimh agus Athléimneachta a chur chun feidhme ar bhealach inbhuanaithe. Tá gach beart a fhaigheann tacaíocht ón tSaoráid Téarnaimh agus Athléimneachta le déanamh i gcomhréir le acquis comhshaoil an Aontais is infheidhme agus le acquis comhshaoil náisiúnta is infheidhme, go háirithe maidir le measúnú ar an tionchar ar an gcomhshaol agus cosaint an dúlra. Ag an am céanna, de bharr a gcineáil féin, is dócha go ndéanfaidh roinnt táirgí deiridh cosanta dochar díreach nó indíreach don chomhshaol. Dá bhrí sin, d’fhéadfadh sé nach mbeadh sé indéanta an prionsabal ‘gan dochar suntasach a dhéanamh’ a chur i bhfeidhm maidir le rannchuidiú na mBallstát lena dtacaítear le gníomhaíochtaí treisithe tionsclaíocha a bhaineann leis na táirgí sin. Ina theannta sin, d’fhéadfadh sé a bheith iomchuí gan an prionsabal ‘gan dochar suntasach a dhéanamh’ a chur i bhfeidhm i gcás ina mbaineann an ghníomhaíocht atreisithe thionsclaíoch a dtacaítear léi le táirgí cosanta, nó le comhpháirteanna nó amhábhair chosanta atá beartaithe nó a úsáidtear go hiomlán chun táirgí cosanta a tháirgeadh. Go deimhin, tá an tAontas ag dul i ngleic le meath mór ar a chomhthéacs slándála, rud a mhéadaigh leibhéal na bagartha don Aontas. Chuige sin, tá gá le hinfheistíochtaí ollmhóra láithreacha in athléimneacht agus uas-scálú BTTCE agus tacaíocht a thabhairt dó chun a chumas ullmhú do ghéarchéimeanna soláthair amach anseo a neartú agus chun infhaighteacht agus soláthar tráthúil táirgí cosanta ar fud an Aontais a áirithiú. Is é atá sa mhéid sin, sa chás seo, cuspóir sáraitheach den tslándáil phoiblí a bhfuil tosaíocht aige ar chúinsí eile. Sa chomhthéacs sin, is gá aon suaitheadh feadh shlabhraí soláthair na cosanta a chosc, go háirithe trína cheadú tacaíocht a thabhairt do ghníomhaíochtaí treisithe tionsclaíocha a bhaineann le táirgí, comhpháirteanna agus amhábhair chosanta, i gcás inarb iomchuí, gan srianta a bhaineann le cur i bhfeidhm an phrionsabail ‘gan dochar suntasach a dhéanamh’. Dá bhrí sin, i gcás ina n-úsáideann na Ballstáit a rannchuidiú deonach le tacaíocht ón tSaoráid Téarnaimh agus Athléimneachta i bhfabhar gníomhaíochtaí treisithe tionsclaíocha faoin Rialachán seo, níor cheart na gníomhaíochtaí sin a bheith faoi réir chur i bhfeidhm an phrionsabail ‘gan dochar suntasach a dhéanamh’, ar choinníoll go dtugann an Ballstát lena mbaineann údar sa chomhaontú ranníocaíochta leis an gCoimisiún nach bhfuil sé indéanta ná iomchuí a áirithiú go gcomhlíonann na cineálacha gníomhaíochtaí a bheartaítear le tacaíocht a fháil faoin Rialachán seo an prionsabal ‘gan dochar suntasach a dhéanamh’.

(22)

Ba cheart do thríú tíortha ar comhaltaí iad den Limistéar Eorpach Eacnamaíoch a bheith in ann a bheith rannpháirteach sa chlár mar thíortha comhlachaithe faoi chuimsiú an chomhair arna bhunú faoin gComhaontú ar an Limistéar Eorpach Eacnamaíoch (18), lena bhforáiltear do chur chun feidhme na gclár ar bhonn cinneadh arna ghlacadh faoin gComhaontú sin.

(23)

Ós rud é gurb é is aidhm don Rialachán seo iomaíochas agus éifeachtúlacht thionscail cosanta an Aontais agus na hÚcráine a fheabhsú, agus chun a áirithiú go gcosnófar leasanna slándála agus cosanta bunriachtanacha an Aontais agus a Bhallstát, chun tairbhiú de thacaíocht airgeadais ón Aontas faoin gClár agus faoin Ionstraim um Thacaíocht don Úcráin, ba cheart faighteoirí na tacaíochta airgeadais sin a bheith ina n-eintitis dhlítheanacha atá bunaithe san Aontas, i dtíortha comhlachaithe nó san Úcráin agus a bhfuil a struchtúir bainistíochta feidhmiúcháin acu san Aontas, i dtíortha comhlachaithe nó san Úcráin agus a úsáideann, chun críocha na gníomhaíochta, bonneagar, saoráidí, sócmhainní agus acmhainní atá lonnaithe ar chríoch Ballstáit, críoch tíre comhlachaithe nó críoch na hÚcráine. Ina theannta sin, níor cheart faighteoirí tacaíochta airgeadais a bheith faoi réir rialú tríú tír neamhchomhlachaithe seachas an Úcráin ná faoi rialú eintiteas de chuid tríú tír eile. Ós amhlaidh atá, ba cheart rialú a thuiscint mar an cumas tionchar cinntitheach a fheidhmiú ar eintiteas dlítheanach go díreach nó go hindíreach trí eintiteas dlítheanach idirmheánach amháin nó níos mó. I gcás inar Ballstáit, tíortha comhlachaithe nó an Úcráin iad faighteoirí na tacaíochta airgeadais sin, chun críche soláthair chomhoibríoch, ba cheart feidhm a bheith ag critéir choibhéiseacha maidir leis na conraitheoirí agus na fochonraitheoirí le haghaidh na gconarthaí soláthair, d’fhonn a áirithiú go mbeidh feidhm ag na coinníollacha céanna maidir leo agus a léiriú ag an am céanna nach faighteoirí cistithe ón Aontas iad na conraitheoirí agus na fochonraitheoirí sin.

(24)

Leis na critéir incháilitheachta, ba cheart na slabhraí soláthair atá ann cheana agus an comhar tionsclaíoch le tríú tíortha neamhchomhlachaithe seachas an Úcráin a chur san áireamh agus ba cheart a bheith in ann na ceanglais cumais a chomhlíonadh. Dá bhrí sin, ba cheart soláthairtí comhoibríocha lena mbaineann fochonraitheoir amháin a leithdháiltear idir 15 % agus 35 % de luach an chonartha, agus nach bhfuil bunaithe nó nach bhfuil a struchtúir bainistíochta feidhmiúcháin san Aontas, i dtír chomhlachaithe nó, i gcás inarb ábhartha, san Úcráin, ba cheart na soláthairtí sin a bheith incháilithe chun cistiú a fháil faoin gClár agus faoin Ionstraim um Thacaíocht don Úcráin, faoi choinníoll áirithe.

(25)

In imthosca áirithe, ba cheart a bheith in ann maolú ón bprionsabal go n-úsáidfeadh eintitis dhlíthiúla atá páirteach i ngníomhaíocht a fhaigheann tacaíocht ón gClár, go n-úsáidfidís bonneagar, saoráidí, sócmhainní agus acmhainní atá suite ar chríoch Ballstáit nó tíre comhlachaithe, agus nach mbeidís faoi réir rialú ag tríú tíortha neamhchomhlachaithe nó ag eintitis de chuid tríú tíortha neamhchomhlachaithe. Sa chomhthéacs sin, ba cheart d’eintiteas dlítheanach atá bunaithe san Aontas nó i dtír chomhlachaithe a úsáideann bonneagar, saoráidí, sócmhainní nó acmhainní atá lonnaithe lasmuigh de chríoch Ballstáit nó críoch tíre comhlachaithe, nó atá á rialú ag tríú tír neamhchomhlachaithe nó ag eintiteas de chuid tríú tír neamhchomhlachaithe, ba cheart dó a bheith in ann a bheith rannpháirteach mar fhaighteoir má chomhlíontar coinníollacha dochta a bhaineann le leasanna slándála agus cosanta an Aontais agus a Bhallstát, lena n-áirítear prionsabal an dea-chaidrimh comharsanachta, mar a bhunaítear faoi chuimsiú CBES de bhun Theideal V den Chonradh ar an Aontas Eorpach (CAE), lena n-áirítear i ndáil le BTTCE a neartú. Ba cheart maoluithe comhchosúla a chur ar fáil le haghaidh gníomhaíochtaí a fhaigheann tacaíocht faoin Ionstraim um Thacaíocht don Úcráin, chun go bhféadfar úsáid a bhaint as bonneagar, saoráidí, sócmhainní nó acmhainní atá lonnaithe lasmuigh de chríoch Ballstáit nó na hÚcráine, agus go bhféadfaidh eintitis dhlítheanacha atá bunaithe san Aontas agus atá á rialú ag tríú tír seachas an Úcráin nó ag eintiteas eile de chuid tríú tír a bheith páirteach sna gníomhaíochtaí sin.

(26)

Ba cheart eintitis dhlítheanacha atá bunaithe san Aontas nó i dtír chomhlachaithe agus atá á rialú ag tríú tír neamhchomhlachaithe nó ag eintiteas de chuid tríú tír neamhchomhlachaithe a bheith incháilithe le bheith ina bhfaighteoir má chuirtear ráthaíochtaí ar fáil don Choimisiún, arna bhformheas i gcomhréir le nósanna imeachta náisiúnta an Bhallstáit nó na tíre comhlachaithe ina bhfuil siad bunaithe, agus má dhéantar measúnú orthu sula ndéanfar cinneadh cistiú ón Aontas a dhámhachtain. Níor cheart na ráthaíochtaí sin a eisiúint ach amháin ar choinníoll go gcomhlíonfar agus go gcoinneofar ar bun, le linn na gníomhaíochta, coinníollacha dochta a bhaineann le leasanna slándála agus cosanta an Aontais agus a Bhallstát, mar a bhunaítear faoi chuimsiú CBES de bhun Theideal V CAE. Ag teacht le chéile dóibh mar an Coiste, ba cheart don Choimisiún na Ballstáit a chur ar an eolas faoi eintitis dhlítheanacha a mheastar a bheith incháilithe tar éis an mheasúnaithe sin. Chun trédhearcacht a áirithiú maidir leis an bhfaireachán ar chomhlíonadh leanúnach na gcoinníollacha incháilitheachta, tuairisceofar freisin do na Ballstáit, ag teacht le chéile dóibh mar choiste, faisnéis a bhaineann le measúnú incháilitheachta a dhéantar ina dhiaidh sin, mar gheall—inter alia —ar athrú úinéireachta tuairiscithe le linn an chur chun feidhme. Níor cheart rannpháirtíocht eintiteas arna rialú ag tíortha neamhchomhlachaithe nó ag eintitis de chuid tríú tíortha neamhchomhlachaithe cuspóirí an Rialacháin seo a shárú. Chun críocha na hIonstraime um Thacaíocht don Úcráin, ba cheart feidhm a bheith ag rialacha den sórt sin maidir le hincháilitheacht céanna i gcás eintitis dhlítheanacha atá bunaithe san Aontas agus atá á rialú ag tríú tír neamhchomhlachaithe seachas an Úcráin nó ag eintiteas de chuid tríú tír eile.

(27)

Chun iomaíochas BTTCE a mhéadú, chun téarnamh, atógáil agus nuachóiriú BTTC na hÚcráine a chothú, agus chun infhaighteacht agus soláthar tráthúil táirgí cosanta ó na boinn theicneolaíocha agus thionsclaíocha chosanta sin a áirithiú, tá sé tábhachtach íoscheanglais a bhunú maidir leis an luach a ghintear laistigh den Aontas agus de thíortha comhlachaithe nó, i gcás inarb ábhartha, den Úcráin. Cuirfidh sin le héifeachtúlacht thacaíocht an Aontais faoin gClár agus faoin Ionstraim um Thacaíocht don Úcráin. Dá bhrí sin, i gcás gníomhaíochtaí a fhaigheann tacaíocht ó chistiú ón Aontas faoin gClár nó faoin Ionstraim um Thacaíocht don Úcráin, níor cheart costas na gcomhpháirteanna de thionscnamh lasmuigh den Aontas agus de thionscnamh tíortha comhlachaithe nó, i gcás inarb ábhartha, de thionscnamh na hÚcráine, a bheith níos mó ná 35 % de chostas measta chomhpháirteanna an táirge deiridh nó an táirge arb é a mhéadú acmhainneachta táirgeachta a fhaigheann tacaíocht ó chistiú ón Aontas. Is éifeachtaí ar fad a bhainfear amach na cuspóirí a shaothraítear faoin Rialachán seo más ísle ná an tairseach 35 % costas na gcomhpháirteanna sin. Iarrtar ar fhaighteoirí cistithe ón Aontas díriú ar an gcéatadán sin a ísliú de réir a chéile le haghaidh táirgí nua. Ní mheastar gur comhpháirteanna iad amhábhair.

(28)

Ós rud é nach mór cumas oibríochtúil fhórsaí armtha na mBallstát a chaomhnú agus nach mór a áirithiú gur féidir úsáid a bhaint as na táirgí cosanta a chumhdaítear le gníomhaíocht arna déanamh faoin gClár gan teorainneacha arna bhforchur ag tríú tíortha, tá sé den riachtanas ceanglais bhreise a bhunú a bhaineann leis an gcumas cinneadh ar shainiú, oiriúnú agus éabhlóid dhearadh na dtáirgí cosanta sin. Dá bhrí sin, níor cheart faighteoirí cistithe ón Aontas nó, i gcás inarb ábhartha, an conraitheoir nó an cuibhreannas conraitheoirí a bheith faoi réir teorainneacha dlíthiúla nó conarthacha arna bhforchur ag tríú tíortha neamhchomhlachaithe nó ag eintitis de chuid tríú tíortha neamhchomhlachaithe, ar teorainneacha iad a dhéanfadh difear dá gcumas cinneadh ar shainiú, oiriúnú agus éabhlóid dhearadh an táirge cosanta, lena n-áirítear maidir le hionadú nó baint na gcomhpháirteanna atá faoi réir srianta arna bhforchur ag tríú tíortha neamhchomhlachaithe nó ag eintitis de chuid tríú tíortha neamhchomhlachaithe. I bhfianaise na staide geopholaitiúla atá ann faoi láthair, ba cheart foráil a dhéanamh maidir le maolú sonrach spriocdhírithe ar an gceanglas sin go heisceachtúil agus go sealadach chun borradh a chur faoi acmhainneachtaí tionsclaíocha chun armlón agus diúracáin a tháirgeadh. Is é ba cheart a bheith sa mhaolú sin cead a thabhairt d’fhaighteoirí cistithe ón Aontas nó do na húdaráis rialtais ábhartha na mBallstát lena mbaineann gealltanas atá ceangailteach ó thaobh dlí a thabhairt don Choimisiún ón tríú tír neamhchomhlachaithe nó ón eintiteas de chuid an tríú tír neamhchomhlachaithe lena mbaineann go bhfaighidh na faighteoirí an cumas sin cinneadh a dhéanamh. Ba cheart do na faighteoirí gach beart a dhéanamh chun a áirithiú go gcuirfear an gealltanas sin chun feidhme. I gcás nach féidir leis na faighteoirí, d’ainneoin a n-iarrachtaí, an cumas sin a fháil chun cinneadh a dhéanamh, dhéanfaí bearta ceartaitheacha i gcomhréir leis an Rialachán Airgeadais, go háirithe Airteagal 132 de.

(29)

Chun a áirithiú, agus an Rialachán seo á chur chun feidhme, go n-urramófaí oibleagáidí idirnáisiúnta an Aontais agus a Bhallstát, níor cheart gníomhaíochtaí a bhaineann le táirgí nó teicneolaíochtaí a bhfuil toirmeasc ar a n-úsáid, a bhforbairt nó a dtáirgeadh faoin dlí idirnáisiúnta is infheidhme a bheith incháilithe chun cistiú a fháil faoin gClár ná faoin Ionstraim um Thacaíocht don Úcráin.

(30)

Ba cheart don Chlár agus don Ionstraim Tacaíochta don Úcráin tacaíocht airgeadais a sholáthar i gcomhréir leis an Rialachán Airgeadais, do ghníomhaíochtaí a rannchuidíonn le hiomaíochas, freagrúlacht agus cumas BTTCE a neartú nó le téarnamh, atógáil agus nuachóiriú BTTC na hÚcráine chun infhaighteacht agus soláthar tráthúil táirgí cosanta a áirithiú, cuir i gcás comhar le heintitis dhlítheanacha maidir le soláthar comhoibríoch táirgí cosanta agus gníomhaíochtaí atá dírithe ar dhlús a chur leis an gcoigeartú ar athruithe struchtúracha ar an acmhainneacht táirgeachta i gcás táirgí cosanta, comhpháirteanna cosanta agus amhábhair chomhfhreagracha. D’fhéadfaí a áireamh leis sin comhordú tionsclaíoch maidir le forchoimeád táirgí cosanta, rochtain ar mhaoiniú do ghnóthais a bhfuil baint acu le monarú táirgí cosanta, forchoimeád acmhainneachtaí monaraíochta (‘saoráidí ar tapa’) nó próisis thionsclaíocha athchóirithe táirgí atá imithe in éag, leathnú, barrfheabhsú, nuachóiriú, uasghrádú nó athrú cuspóra acmhainneachtaí táirgeachta atá ann cheana sa réimse sin. Thairis sin, d’fhéadfaí roinnt gníomhaíochtaí tacaíochta breise a chumhdach leis, i gcomhréir le cuspóirí an Rialacháin seo, mar atá oiliúint, athsciliú nó uas-sciliú pearsanra.

(31)

I bhfianaise an chomhthéacs gheopholaitiúil atá ann faoi láthair, agus go háirithe cogadh foghach na Rúise ar an Úcráin, ní mór, chun leasanna bunúsacha slándála an Aontais a chosaint, bearta sonracha a ghlacadh maidir le soláthar na dtáirgí cosanta darb aidhm iomaíochas BTTCE a chothú agus infhaighteacht agus soláthar tráthúil na dtáirgí cosanta arna soláthar ó BTTCE a áirithiú, ar fud an Aontais. Chun leasanna bunúsacha slándála an Aontais a chosaint, ní mór don Úcráin agus do thíortha atá ina mbaill den Limistéar Eorpach Eacnamaíoch a bheith rannpháirteach freisin sna bearta sin, ní hamháin mar gheall ar a suíomh geografach agus go bhfuil cogadh foghach leanúnach na Rúise ar siúl san Úcráin féin, ach i bhfianaise a ndlúth-chomhpháirtíochta soláthair leis an Aontas freisin, mar a léirítear go háirithe sa Chomhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach agus a mBallstáit, de pháirt, agus an Úcráin, den pháirt eile (19) agus sa Chomhaontú maidir leis an Limistéar Eorpach Eacnamaíoch.

(32)

Ós den tábhacht é aon saobhadh ar an margadh a mhaolú, ba cheart don Choimisiún a bheith in ann an brabús a ghintear trí aon ghníomhaíochtaí atreisithe thionsclaíoch rathúil a fhaigheann tacaíocht ó bhuiséad an Aontais a aisghabháil i gcomhréir le prionsabal na comhréireachta. De mhaolú ar Airteagal 195(2) den Rialachán Airgeadais, ba cheart an t-ioncam ar fad a ghintear a chur san áireamh go hiomlán le haisghabháil na mbrabús sin, lena n-áirítear ioncam ó thacaíocht na mBallstát, na hÚcráine agus tríú páirtí don ghníomhaíocht, sa bhreis ar an tacaíocht ón Aontas féin. Is chun tairbhe chuspóirí an Rialacháin seo ba cheart an brabús a aisghabhtar a athúsáid.

(33)

Ní leanann feidhmiú earnáil an tionscail cosanta na gnáthrialacha ná na gnáthmhúnlaí gnó lena rialaítear margaí níos traidisiúnta. Tagann an t-éileamh go heisiach ó stáit arb iad na stáit sin freisin a rialaíonn fáil iomlán na dtáirgí agus na dteicneolaíochtaí a bhaineann leis an gcosaint, lena n-áirítear onnmhairí. Dá bhrí sin, ní dhéanann tionscal na cosanta infheistíochtaí tionsclaíocha suntasacha féinmhaoinithe ach amháin mar thoradh ar orduithe daingne. Thairis sin, tá bacainní leanúnacha roimh BTTCE maidir le rochtain a fháil ar mhaoiniú, lena n-áirítear cómhaoiniú, go háirithe maoiniú príobháideach le haghaidh infheistíochtaí, mar gheall ar na rioscaí a thuigeann gníomhaithe margaidh a bheith ag baint le infheistíochtaí den sórt sin. Tá sé ríthábhachtach infheistíocht phoiblí a ghiaráil d’earnáil cosanta an Aontais i bhfianaise an mhórghá atá le borradh a chur faoin infheistíocht san earnáil sin. Baineann sé sin go háirithe le gníomhaíochtaí tacaíochta, a théann chun tairbhe BTTCE ar bhealach níos leithne, mar shampla trí ghníomhaíochtaí eile a leagtar amach sa Rialachán seo a chumasú agus a éascú, agus ar an gcaoi sin gníomhú mar iolraitheoirí a bhféadfadh éifeacht ghiarála ard a bheith acu. Ós rud é nach dtabharfaí faoi na gníomhaíochtaí tacaíocht ar aon slí eile, dealraíonn sé, de mhaolú ar Airteagal 193(1) den Rialachán Airgeadais, go bhfuil údar maith ann go gcumhdófaí 100 % de na costais incháilithe le haghaidh na ngníomhaíochtaí sin le tacaíocht airgeadais an Aontais faoin gClár.

(34)

Ós rud é go bhfuil na cineálacha éagsúla gníomhaíochtaí comhlántach agus riachtanach chun castacht an chomhair a fhritháireamh agus chun an riosca a bhaineann le hinfheistíochtaí tionsclaíocha a bhaint trí thacaíocht airgeadais ón Aontas lenar féidir tionscal na cosanta a oiriúnú níos tapúla d’athrú struchtúrach leanúnach sa mhargadh, is cosúil go bhfuil údar maith ann go bhforchoimeádfaí méid suntasach is é sin 15 % ar a laghad den imchlúdach airgeadais a leithdháilfear ar an gClár le haghaidh gníomhaíochtaí dá dtagraítear i ngníomhaíochtaí soláthair chomhoibríoch agus go bhforchoimeádtar 30 % ar a laghad den imchlúdach sin le haghaidh gníomhaíochtaí atreisithe thionsclaíoch. Ba cheart suas le 35 % de na costais incháilithe a chumhdach leis an tacaíocht ón Aontas le haghaidh gníomhaíochtaí atreisithe thionsclaíoch ionas go mbeidh faighteoirí in ann gníomhaíochtaí a chur chun feidhme a luaithe is féidir chun an riosca a bhaineann lena n-infheistíocht a laghdú agus, dá bhrí sin, dlús a chur le hinfhaighteacht na dtáirgí cosanta ábhartha.

(35)

Maidir le gníomhaíochtaí faoin Ionstraim um Thacaíocht don Úcráin, ba cheart tacaíocht ón Aontas le haghaidh atreisiú tionscail agus gníomhaíochtaí tacaíochta a mbíonn eintitis dhlítheanacha arna mbunú san Úcráin páirteach iontu a bheith in ann suas le 100 % de na costais incháilithe a chumhdach chun freastal ar chastacht mhéadaithe agus timpeallacht tionscal cosanta na hÚcráine, lena n-áirítear an gá atá le caighdeáin ábhartha ECAT a chomhlíonadh, agus caighdeáin ábhartha eile, chomh maith leis na rioscaí méadaithe a bhaineann le cogadh foghach na Rúise ar an Úcráin, agus é á chur san áireamh gur gá acmhainneachtaí tionsclaíocha a atógáil agus a nuachóiriú ar bhealach athléimneach.

(36)

Ba cheart gníomhaíochtaí soláthair chomhoibríoch a chistiú faoin Rialachán seo trí bhíthin deontais i bhfoirm maoiniú nach bhfuil nasctha le costas atá bunaithe ar thorthaí a bhaint amach faoi threoir pacáistí oibre, garspriocanna nó spriocanna a bhaineann leis an bpróiseas soláthair chomhoibríoch, chun an éifeacht dreasachta is gá a chruthú.

(37)

Níor cheart ranníocaíocht airgeadais an Aontais faoin gClár le haghaidh gníomhaíochtaí soláthair chomhoibríoch, atá beartaithe mar dhreasacht le haghaidh comhair, a bheith níos mó ná 15 % de luach measta an chonartha soláthair chomhoibríoch. I bhfianaise na castachta méadaithe a bhaineann le soláthar comhoibríoch leis an Úcráin, níor cheart ranníocaíocht airgeadais an Aontais faoin Ionstraim um Thacaíocht don Úcráin a bheith níos mó ná 25 % de luach measta an chonartha soláthair chomhoibríoch.

(38)

Ar chomhlíonadh coinníollacha sonracha a bhaineann le cuspóirí an Chláir, ba cheart an uasteorainn le haghaidh ranníocaíocht airgeadais an Aontais le gníomhaíochtaí soláthair chomhoibríoch a ardú go 25 % de luach measta an chonartha soláthair chomhoibríoch chun castachtaí áirithe a bhaineann le comhar trasteorann feabhsaithe laistigh den Aontas agus le comhar laistigh de chomhthéacs Struchtúr do Chláir Armála na hEorpa (SCAE) a chúiteamh. Ba cheart a chur san áireamh freisin an gá atá le spleáchais straitéiseacha a laghdú de réir a chéile, rud a thugann údar le ráta cistiúcháin a mhéadú i gcás ina dtacaíonn an ghníomhaíocht le soláthar comhoibríoch táirgí deiridh atá saor ó shrianta. Ina theannta sin, i bhfianaise staid slándála ar leith na hÚcráine agus na Moldóive i bhfianaise chogadh foghach na Rúise ar an Úcráin, is iomchuí freisin foráil a dhéanamh maidir leis an méadú sin ar an ráta cistiúcháin i gcásanna ina mbeidh soláthar comhoibríoch le haghaidh cainníochtaí breise táirgí cosanta don dá thír sin mar thoradh ar an ngníomhaíocht a dtacaítear léi. Ina theannta sin, de dheasca an chomhthéacs gheopholaitiúil, lena n-áirítear cogadh foghach na Rúise ar an Úcráin, tá an tAontas agus na Ballstáit neamhchosanta anois i gcás ina dtiocfaidh gnáthbhagairtí míleata chun cinn, rud a chruthaíonn gá le hinfheistíochtaí méadaithe cosanta. Dá bhrí sin, tá údar maith freisin le foráil a dhéanamh maidir le ráta cistiúcháin a ardú go dtí suas le 25 % le haghaidh gníomhaíochtaí soláthair chomhoibríoch i gcásanna inar mó caiteachas infheistíochta cosanta fhormhór na mBallstát atá rannpháirteach sa ghníomhaíocht lena mbaineann ná 30 % dá gcaiteachas cosanta faoi seach. I gcás gníomhaíochtaí atreisithe thionsclaíoch, ba cheart a bheith in ann an uasteorainn a ardú go dtí suas le 50 % de na costais incháilithe i gcás inar fiontair bheaga agus mheánmhéide (FBManna) nó cuideachtaí meánchaipitlithe (CMCanna) atá bunaithe i mBallstáit nó i dtíortha comhlachaithe iad formhór na dtairbhithe nó i gcás inar SCAE a dhéanann an ghníomhaíocht, agus i gcás ina léirítear leis an ngníomhaíocht go rannchuidíonn sé le comhar trasteorann nua a chruthú, amhail trí raon feidhme geografach na slabhraí soláthair atá ann cheana a leathnú nó trí mhéadú suntasach a dhéanamh ar an trádáil, ar an gcomhar nó ar na tionscadail chomhpháirteacha a dhéantar idir eintitis i mBallstáit éagsúla nó trí líonraí trasteorann atá ann cheana a leathnú ar bhealaí lena bhfeabhsaítear acmhainneacht fhoriomlán agus athléimneacht fhoriomlán BTTCE, i gcás ina mbaineann sé le bonneagar, saoráidí nó línte táirgthe nua a thógáil, nó i gcás ina rannchuidíonn sé le hacmhainneacht mhonaraíochta nua táirgí atá ábhartha i gcás géarchéime a bhunú, nó le borradh a chur faoi acmhainneachtaí monaraíochta atá ann cheana. Ina theannta sin, nuair a chinneann na Ballstáit go sonrach cistiú a leithdháileadh ar an gClár nach dtéann chun tairbhe ach do na Ballstáit lena mbaineann nó a théann chun tairbhe bhreise do Bhallstáit eile, ba cheart é a bheith indéanta, de mhaolú ar Airteagal 193(1) den Rialachán Airgeadais, solúbthacht a mhéadú agus foráil a dhéanamh maidir le ranníocaíocht airgeadais ón Aontas le gníomhaíochtaí atreisithe thionsclaíoch lena gcumhdaítear suas le 100 % de na costais incháilithe. Ba cheart feidhm a bheith ag an bhféidearthacht sin freisin maidir le cásanna ina n-úsáidtear ranníocaíochtaí de chuid na mBallstát, ar ranníocaíochtaí iad a fhaigheann tacaíocht ón tSaoráid Téarnaimh agus Athléimneachta, chun na gníomhaíochtaí sin a chistiú. Leis sin, déanfar tionchar agus éifeachtacht na gníomhaíochta a uasmhéadú.

(39)

I gcomhréir le hAirteagal 196(2) den Rialachán Airgeadais, féadfar deontas a dhámhachtain do ghníomhaíocht atá tosaithe cheana, ar choinníoll gur féidir leis an iarratasóir a thaispeáint gur gá tús a chur leis an ngníomhaíocht sula síneofar an comhaontú deontais. Mar sin féin, níl costais arna dtabhú roimh an dáta a chuirtear an t-iarratas ar dheontas isteach incháilithe, seachas sna cásanna dá bhforáiltear in Airteagal 196(2), an dara fomhír, den Rialachán Airgeadais. Chun go mbeidh leanúnachas ann maidir le peirspictíocht chistithe le haghaidh gníomhaíochtaí a d’fhéadfadh tacaíocht a fháil le cistiú 2024 faoi Rialacháin (AE) 2023/1525 nó (AE) 2023/2418 a atreisiú trí sholáthar comhoibríoch, sa chinneadh maidir le maoiniú, ba cheart, de mhaolú ar Airteagal 196(2), an dara fomhír, den Rialachán Airgeadais, a bheith in ann foráil a dhéanamh maidir le ranníocaíochtaí airgeadais faoin gClár i ndáil le gníomhaíochtaí lena gcumhdaítear tréimhse ón 5 Márta 2024 ar aghaidh agus nár tugadh chun críche iad sular síníodh an comhaontú deontais. I bhfianaise na nasc idir an Clár agus an Ionstraim um Thacaíocht don Úcráin, chomh maith leis an ngá atá le tacaíocht a thabhairt go práinneach d’atógáil, téarnamh agus nuachóiriú BTTC na hÚcráine, agus a chomhtháthú sin in BTTCE amach anseo á chur san áireamh, ba cheart feidhm a bheith ag an maolú céanna maidir le ranníocaíochtaí airgeadais faoin Ionstraim um Thacaíocht don Úcráin. Níor cheart na costais chéanna a mhaoiniú faoi dhó ó bhuiséad an Aontais i gcás ar bith.

(40)

Agus measúnú á dhéanamh ar thograí arna gcur isteach ag iarratasóirí, ba cheart don Choimisiún aird ar leith a thabhairt ar ranníocaíocht na tograí sin le cuspóirí an Rialacháin seo. Ba cheart measúnú a dhéanamh ar na tograí, go háirithe, i bhfianaise a mhéid a rannchuidíonn siad leis an méadú ar ullmhacht agus athléimneacht thionsclaíoch i réimse na cosanta agus i bhfianaise a mhéid a rannchuidíonn siad le comhar tionsclaíoch i réimse na cosanta trasteorann idir na Ballstáit, na tíortha comhlachaithe agus an Úcráin.

(41)

Tá sé ríthábhachtach acmhainneachtaí monaraíochta cosanta a fhorbairt ar fud an Aontais, agus na rioscaí a bhaineann leis an meath méadaithe ar chomhthéacs slándála an Aontais á gcur san áireamh, chun a áirithiú go rannchuideoidh na Ballstáit uile le BTTCE agus go mbainfidh siad tairbhe as. I gcás gníomhaíochtaí atreisithe thionsclaíoch, ba cheart aird ar leith a thabhairt ar rannchuidiú na gníomhaíochta leis an athléimneacht thionsclaíoch, go háirithe ar infhaighteacht agus slándáil an tsoláthair táirgí cosanta a áirithiú ar fud an Aontais mar fhreagairt ar rioscaí sainaitheanta, cuir i gcás neamhchosaint ar an riosca go dtiocfaidh gnáthbhagairtí míleata chun cinn.

(42)

I gcomhréir leis an Rialachán Airgeadais, Rialachán (AE, Euratom) Uimh. 883/2013 ó Pharlaimint na hEorpa agus ón gComhairle (20) agus Rialacháin (CE, Euratom) Uimh. 2988/95 (21), (Euratom, CE) Uimh. 2185/96 (22) agus (AE) 2017/1939 ón gComhairle (23), déanfar leasanna airgeadais an Aontais a chosaint trí bhíthin bearta comhréireacha, lena n-áirítear bearta a bhaineann le neamhrialtachtaí a chosc, a bhrath, a cheartú agus imscrúdú a dhéanamh orthu, lena n-áirítear calaois, agus a bhaineann freisin le haisghabháil cistí a cailleadh, a íocadh go mícheart nó a úsáideadh go mícheart agus, i gcás inarb iomchuí, le pionóis riaracháin a fhorchur. Go háirithe, i gcomhréir le Rialacháin (Euratom, CE) Uimh. 2185/96 agus (AE, Euratom) Uimh. 883/2013, tá sé de chumhacht ag an Oifig Eorpach Frith-Chalaoise (OLAF) imscrúduithe riaracháin a dhéanamh, lena n-áirítear seiceálacha agus cigireachtaí ar an láthair, d’fhonn a shuí ar tharla calaois, éilliú nó aon ghníomhaíocht neamhdhleathach eile a dhéanann difear do leasanna airgeadais an Aontais. Tugtar de chumhacht d’Oifig an Ionchúisitheora Phoiblí Eorpaigh (OIPE), i gcomhréir le Rialachán (AE) 2017/1939, imscrúdú a dhéanamh ar chionta coiriúla a dhéanann difear do leasanna airgeadais an Aontais agus iad a ionchúiseamh, dá bhforáiltear i dTreoir (AE) 2017/1371 ó Pharlaimint na hEorpa agus ón gComhairle (24). I gcomhréir leis an Rialachán Airgeadais, aon duine nó aon eintiteas a fhaigheann cistiú ón Aontas ní mór dó comhoibriú go hiomlán maidir le cosaint leasanna airgeadais an Aontais, na cearta agus an rochtain is gá a thabhairt don Choimisiún, do OLAF, do Chúirt Iniúchóirí na hEorpa agus, i leith na mBallstát sin atá rannpháirteach sa chomhar feabhsaithe de bhun Rialachán (AE) 2017/1939, do OIPE, agus chun a áirithiú go dtabharfaidh aon tríú páirtithe a bheidh páirteach i gcur chun feidhme cistithe ón Aontas cearta coibhéiseacha.

(43)

Ba cheart foráil ar leith a thabhairt isteach leis an Rialachán seo lena gceanglaítear ar na tíortha comhlachaithe atá rannpháirteach sa Chlár na cearta agus an rochtain is gá a thabhairt don oifigeach údarúcháin atá freagrach, do OLAF agus do Chúirt Iniúchóirí na hEorpa chun a n-inniúlachtaí faoi seach a fheidhmiú go cuimsitheach.

(44)

De bhun Airteagal 85 de Chinneadh (AE) 2021/1764 ón gComhairle (25), tá daoine nádúrtha agus comhlachtaí agus eintitis atá bunaithe i dtíortha agus i gcríocha thar lear (OCTanna) incháilithe chun cistiú a fháil faoi réir rialacha agus chuspóirí an Chláir agus faoi réir na socruithe féideartha is infheidhme maidir leis an mBallstát lena mbaineann an OCT ábhartha.

(45)

Ba cheart don Aontas Tionscadail Eorpacha Leasa Choitinn i réimse na Cosanta (TELCCanna) a shainaithint ar cheart iarrachtaí agus acmhainní a dhíriú orthu, ar cheart tionscadail thionsclaíocha chomhoibríocha a bheith iontu atá dírithe ar iomaíochas BTTCE a threisiú ar fud an Aontais agus, ag an am céanna, a rannchuidíonn le forbairt chumais mhíleata na mBallstát atá ríthábhachtach do leasanna slándála agus cosanta an Aontais, lena n-áirítear iad siúd a áirithíonn rochtain ar na réimsí oibríochtúla uile. I ngeall ar a íogaire atá an cinneadh TELCC a shainaithint i bhfianaise an tionchair a d’fhéadfadh a bheith aige ar leasanna slándála náisiúnta, agus a thábhachtaí atá sé rannchuidiú na dtionscadal sin le hullmhacht cosanta na mBallstát uile a áirithiú, ba cheart an chumhacht a thabhairt don Chomhairle gníomhartha cur chun feidhme a ghlacadh chun TELCCanna a shainaithint, ar thogra ón gCoimisiún. Sula molfadh sé gníomhartha cur chun feidhme mar sin, ba cheart don Choimisiún tuairimí na mBallstát uile, chomh maith leis na tograí tionscadail atá acu maidir le TELCCanna féideartha, a chur san áireamh. Agus na tograí tionscadail sin á n-ullmhú acu, ba cheart do na Ballstáit comhordú a dhéanamh ar bhealach cuimsitheach, agus úsáid á baint acu chun na críche sin as tacaíocht ó GEC nuair is gá. Sa chomhthéacs sin, féadfaidh na Ballstáit cumais dé-úsáide leasa choitinn a shainaithint. A mhéid a iompaíonn na tograí tionscadail sin ina TELCCanna, d’fhéadfaí na cumais dé-úsáide arna sainaithint ag na Ballstáit a fhorbairt don Aontas, dá institiúidí, dá chomhlachtaí agus dá ghníomhaireachtaí i gcomhthéacs na TELCCanna lena mbaineann. Chomh maith le bheith comhsheasmhach leis na tosaíochtaí cumais a sainaithníodh i gcomhthéacs CBES, lena n-áirítear an Plean Forbartha Cumais (PFC), cuspóirí an Chompáis Straitéisigh um Shlándáil agus Cosaint agus na deiseanna comhoibríocha a sainaithníodh i gcomhthéacs an Athbhreithnithe Chomhordaithe Bhliantúil ar Chosaint (CARD), ba cheart do TELCCanna na tionscadail a comhaontaíodh i gcomhthéacs PESCO, tionscnaimh GEC agus na gníomhaíochtaí ábhartha arna ndéanamh ag ECAT, amhail Próiseas Pleanála um Chosaint ECAT, a chur san áireamh. Sula dtíolacfaidh sé togra le haghaidh gníomh cur chun feidhme, ba cheart don Choimisiún a iarraidh ar an Ardionadaí agus ar GEC, de réir mar is gá, ionchur a sholáthar d’fhonn comhsheasmhacht leis na tosaíochtaí agus na cuspóirí sin a áirithiú. Comhlánóidh an t-ionchur sin an fhaisnéis a chuirfidh na Ballstáit ar fáil maidir le tograí tionscadail. Ba cheart don Chomhairle a bheith in ann tionscadail a chur leis nó a bhaint nó leasuithe eile a dhéanamh ar an togra ón gCoimisiún le haghaidh gníomh cur chun feidhme. Agus measúnú á dhéanamh ag an gComhairle ar thogra le haghaidh gníomh cur chun feidhme, Ba cheart di aibíocht an tionscadail, an rannchuidiú a bheartaítear a dhéanamh le hullmhacht cosanta agus líon na mBallstát atá rannpháirteach ann a chur san áireamh.

(46)

I gcomhthéacs chogadh foghach na Rúise ar an Úcráin, tá saineolas sonrach forbartha ag an Úcráin agus ag BTTC na hÚcráine maidir le tionscadail thionsclaíocha i réimse na cosanta, lena n-áirítear i gcomhar leis na Ballstáit agus le BTTCE. D’fhéadfadh an saineolas sin a bheith ríthábhachtach chun TELCCanna a fhorbairt agus a bhforbairt sin a éascú, agus ar an gcaoi sin rannchuidiú le hiomaíochas BTTCE a threisiú agus, ag an am céanna, rannchuidiú le forbairt chumais mhíleata na mBallstát atá ríthábhachtach do leasanna slándála agus cosanta an Aontais. Is iomchuí, dá bhrí sin, sna cásanna sin, rannpháirtíocht na hÚcráine in TELCCanna a cheadú. Ba cheart don Choimisiún a fhíorú gur cuireadh na Ballstáit uile, na tíortha comhlachaithe uile agus an Úcráin ar an eolas faoi theacht chun cinn tionscadail agus gur tugadh an deis dóibh a bheith rannpháirteach. Ós rud é go bhféadfadh saineolas iomchuí a bheith ag an gCoimisiún chun tacú le cur chun feidhme TELCCanna ar mhaithe le hiomaíochas BTTCE ar fud an Aontais, is iomchuí cead a thabhairt dó a bheith rannpháirteach in TELCCanna chun saineolas mar sin a roinnt, dá n-iarrfadh na Ballstáit rannpháirteacha amhlaidh.

(47)

I bhfianaise an tionchair shuntasaigh a d’fhéadfadh a bheith ag na TELCCanna ar iomaíochas agus ullmhacht thionsclaíoch BTTCE, ba cheart don Chlár tacú le cuibhreannais na mBallstát rannpháirteach agus na dtíortha comhlachaithe rannpháirteach agus iad á n-imscaradh acu. Ba cheart an tacaíocht airgeadais sin ón gClár a theorannú do ghníomhaíochtaí arna ndéanamh ag na cuibhreannais sin a bhaineann le soláthar comhoibríoch táirgí cosanta, dlús a chur leis an gcoigeartú d’athruithe struchtúracha ar acmhainneacht táirgeachta táirgí cosanta chomh maith le gníomhaíochtaí tacaíochta gaolmhara, forbairt thionsclaíoch táirgí cosanta nua nó uasghrádú táirgí cosanta atá ann cheana, agus forbairt agus soláthar an bhonneagair is gá. I bhfianaise scála ar leith na dtionscadal sin lena n-éilítear leibhéal dífhasaigh comhair agus comhordaithe idir na Ballstáit agus an tionscal, agus na rioscaí airgeadais do na Ballstáit rannpháirteacha agus do na tíortha comhlachaithe á gcur san áireamh, ba cheart a bheith in ann, trí mhaolú ar Airteagal 193(1) den Rialachán Airgeadais, suas le 100 % de na costais incháilithe a chumhdach le cistiú ón Aontas. Ní dochar an méid sin don fhéidearthacht go dtabharfaí tacaíocht airgeadais do ghníomhaíochtaí áirithe TELCC faoi ghníomhaíochtaí eile, ar choinníoll go gcomhlíonfaidís na coinníollacha a leagtar síos do na gníomhaíochtaí sin agus nach bhfuil cistiú faighte acu faoi chláir eile de chuid an Aontais, i gcomhréir leis an Rialachán Airgeadais. Ba cheart do na Ballstáit rannpháirteacha a áirithiú go gcomhlíonann gníomhaíochtaí TELCC cuspóirí an Chláir, lena n-áirítear nuair nach bhfuil aon tacaíocht airgeadais ón Aontas ann. Chun faireachán ar chomhlíonadh na gcuspóirí sin a éascú, ba cheart do na Ballstáit atá rannpháirteach in TELCC tuarascáil chomhpháirteach a tharchur chuig an gCoimisiún, ar bhonn bliantúil, maidir le cur chun feidhme ghníomhaíochtaí TELCC. Ba cheart don Chomhairle, ar thogra ón gCoimisiún, a bheith in ann leasú a dhéanamh ar na gníomhartha cur chun feidhme lena sainaithnítear TELCCanna, lena n-áirítear trí TELCCanna a bhaint den liosta. Beidh na Ballstáit atá rannpháirteach in TELCC in ann, chun na gníomhaíochtaí is gá lena chur chun feidhme a dhéanamh, brath ar shaineolas agus ar acmhainneacht riaracháin GEC nó eagraíochtaí idirnáisiúnta mar atá an Eagraíocht um Chomhchomhar Armála (OCCAR) agus Gníomhaireacht Tacaíochta agus Soláthair ECAT (NSPA).

(48)

Tá sé ríthábhachtach d'iomaíochas BTTCE go ndéanfaí infhaighteacht na dtáirgí cosanta a áirithiú ó thaobh ama agus méid de, go háirithe le linn tréimhsí ardteannais slándála. Le linn na dtréimhsí sin, d’fhéadfadh sé nach mbeadh an acmhainneacht táirgeachta ba ghá ag BTTCE chun freastal ar riachtanais phráinneacha na mBallstát agus d’fhéadfadh sé nach mbeadh a tháirgí chomh feiceálach céanna do na Ballstáit leis na táirgí a bheadh á dtairiscint ag eintitis tríú tíortha. Dá bhrí sin, ba cheart sásra díolacháin mhíleata Eorpach a sholáthar leis an Rialachán seo, lena n-áirítear bearta chun luas chun margaidh na dtáirgí cosanta ó BTTCE a mhéadú trí nósanna imeachta a éascú le haghaidh soláthar comhoibríoch na dtáirgí cosanta agus trí úsáid conarthaí arna ndámhachtain ag rialtas amháin ar rialtas eile a ghiaráil.

(49)

Ba cheart do na Ballstáit, tíortha comhlachaithe agus an Úcráin, nó SCAE, a bheith in ann comhthiomsuithe ullmhachta tionsclaíche i réimse na cosanta a bhunú, a bhainistiú agus a choinneáil ar bun ina mbeadh táirgí cosanta a d’fhéadfadh na Ballstáit, tíortha comhlachaithe agus an Úcráin a cheannach nó a úsáid go héasca, chun iomaíochas BTTCE agus atógáil, téarnamh agus nuachóiriú BTTC na hÚcráine a neartú. Is é a dhéanfadh na comhthiomsuithe sin, ina bhfuil stoic de tháirgí cosanta arna soláthar ó BTTCE nó ó BTTC na hÚcráine, éileamh a mhealladh agus intuarthacht a mhéadú don earnáil cosanta. Thabharfaidís comharthaí dearfacha don Aontas agus do thionscal na hÚcráine, agus dhreasófaí iad chun táirgí cosanta a tháirgeadh agus chun infheistíocht a dhéanamh lena neartófaí acmhainneachtaí tionsclaíocha san earnáil sin. Ina theannta sin, chuirfeadh na comhthiomsuithe ullmhachta tionsclaíche i réimse na cosanta feabhas freisin ar shlándáil soláthair na dtáirgí cosanta do na Ballstáit trí fheabhas a chur ar infhaighteacht táirgí agus trí agaí seachadta a laghdú, lena n-áirítear i gcás géarchéim soláthair. I gcás inar i gcomhthéacs SCAE a bhunaítear na comhthiomsuithe sin, ba cheart an Clár agus an Ionstraim um Thacaíocht don Úcráin a bheith in ann tacú le soláthar comhoibríoch cainníochtaí breise de tháirgí cosanta trí ghníomhaíochtaí soláthair chomhoibríoch arna ndéanamh ag SCAE, chomh maith le tacú le maidir le bunú agus feidhmiú an SCAE chun na comhthiomsuithe sin a bhainistiú agus a chothabháil.

(50)

Chun feabhas a chur ar fheasacht na mBallstát ar hinfhaighteacht táirgí BTTCE agus BTTC na hÚcráine, ba cheart don Chlár a bheith in ann tacú leis an gCoimisiún chun catalóg aonair, láraithe agus cothrom le dáta de tháirgí cosanta arna bhforbairt ag BTTCE agus BTTC na hÚcráine a bhunú, bunaithe ar ranníocaíochtaí deonacha arna ndéanamh ag na Ballstáit, an Úcráin agus oibreoirí eacnamaíocha (Catalóg Eorpach um Dhíolacháin Mhíleata). Chun na críche sin, ba cheart gur oibreoirí eacnamaíocha atá bunaithe agus a bhfuil a struchtúir bainistíochta feidhmiúcháin san Aontas, i dtír chomhlachaithe nó san Úcráin a dhéanfadh na táirgí atá sa chatalóg a mhonarú, agus ba cheart an bonneagar, na saoráidí, na sócmhainní agus na hacmhainní a úsáidtear chun na táirgí sin a mhonarú a bheith lonnaithe san Aontas, i dtír chomhlachaithe nó san Úcráin. Agus an chatalóg sin á leagan síos, ba cheart don Choimisiún dul i gcomhairle le GEC agus a shaineolas a chur san áireamh.

(51)

Agus an taithí a fuarthas inter alia nuair a bunaíodh an tSaoráid Cothromais Cosanta i gcomhthéacs an Chiste Eorpaigh Chosanta mar oibríocht mheasctha de chuid an chláir InvestEU á húsáid aige, ba cheart don Choimisiún a dhícheall a dhéanamh chun saoráid thiomnaithe a bhunú mar chuid den Chlár, saoráid ar a dtabharfar Ciste Chun Dlús a Chur le Claochlú Shlabhra Soláthair na Cosanta (FAST). Ba cheart FAST a chur chun feidhme faoi bhainistíocht indíreach. Na hinfheistíochtaí is gá chun acmhainneachtaí monaraíochta cosanta fiontar beag agus meánmhéide agus cuideachtaí meánchaipitlithe beaga atá bunaithe san Aontas a mhéadú, le FAST, déanfar na hinfheistíochtaí sin a ghiaráil, laghdófar an riosca a bhaineann leo agus cuirfear dlús leo i bhfoirm oibríocht mheasctha lena dtabharfar tacaíocht fiachas nó tacaíocht chothromais. Ós rud é go bhféadfar a áireamh san iarratas ar thacaíocht i bhfoirm fiachais faoi FAST faisnéis a bhaineann leis na bonneagair, na saoráidí, na sócmhainní nó na hacmhainní a úsáideann an FBM nó an chuideachta meánchaipitlithe bheag chun críche tionsclú nó monarú táirgí cosanta, is iomchuí an tacaíocht sin a chur faoi réir rialacha lena gceanglaítear go mbeidh na bonneagair, na saoráidí, na sócmhainní agus na hacmhainní sin lonnaithe ar chríoch Ballstáit nó ar chríoch tíre comhlachaithe, cé is moite de roinnt eisceachtaí spriocdhírithe. Ba cheart FAST a bhunú mar oibríocht mheasctha, lena n-áirítear faoin gclár InvestEU arna bhunú le Rialachán (AE) 2021/523 ó Pharlaimint na hEorpa agus ón gComhairle (26), i ndlúthchomhar lena chomhpháirtithe cur chun feidhme.

(52)

Le FAST, ba cheart éifeacht iolraitheora shásúil a bhaint amach i gcomhréir leis an meascán d’fhiach agus cothromas, agus ba cheart dó rannchuidiú le maoiniú ón earnáil phoiblí agus ón earnáil phríobháideach araon a mhealladh. Chun rannchuidiú leis an gcuspóir foriomlán iomaíochas BTTCE a fheabhsú, ba cheart do FAST tacaíocht a chur ar fáil freisin do FBManna, lena n-áirítear gnólachtaí nuathionscanta agus gnólachtaí atá i mbun fáis, agus do chuideachtaí meánchaipitlithe beaga ar fud an Aontais atá páirteach i slabhraí soláthair cosanta an Aontais nó a bhfuil pleananna acu a bheith páirteach iontu gan mhoill, le linn an tionsclaithe nó na monaraíochta a mhéid a bhaineann le táirgí cosanta nó a bhfuil pleananna acu é sin a dhéanamh gan mhoill, ach a bhfuil deacrachtaí acu rochtain a fháil ar mhaoiniú. Le FAST, ba cheart dlús a chur leis an infheistíocht i réimse monaraíochta na dteicneolaíochtaí agus na dtáirgí cosanta freisin, agus dá bhrí sin, slándáil an tsoláthair a neartú i slabhraí luacha thionscal cosanta an Aontais.

(53)

Ní mór líon agus méid na soláthairtí comhoibríocha táirgí cosanta ó BTTCE agus ó BTTC na hÚcráine a mhéadú má táthar le cuspóirí an Chláir agus na hIonstraime um Thacaíocht don Úcráin a bhaint amach. I gcomhréir le hAirteagal 168(2) agus (3) den Rialachán Airgeadais, féadfaidh na Ballstáit a iarraidh ar an gCoimisiún dul i mbun soláthar comhpháirteach leo, lena n-áirítear trí chomhaontuithe réamhcheannaigh, nó mar chomhlacht lárnach ceannaigh. Ba cheart do thíortha comhlachaithe a bheith in ann a iarraidh ar an gCoimisiún dul i mbun soláthar comhpháirteach, de mhaolú ar Airteagal 168(2), an dara fomhír, den Rialachán Airgeadais, toisc nach ndéantar foráil maidir leis an bhféidearthacht sin i gconradh déthaobhach nó iltaobhach leis na tíortha sin. In éineacht le Ballstát amháin ar a laghad, ba cheart do thíortha comhlachaithe a bheith in ann a iarraidh ar an gCoimisiún gníomhú mar chomhlacht lárnach ceannaigh, de mhaolú ar Airteagal 168(3) den Rialachán Airgeadais, toisc nach ndéantar foráil sa Rialachán Airgeadais maidir le rannpháirtíocht tríú tíortha i ngníomhaíocht den sórt sin. Ar an gcaoi chéanna, chun críocha na hIonstraime um Thacaíocht don Úcráin, ba cheart don Úcráin a bheith in ann a bheith rannpháirteach sna gníomhaíochtaí sin. In éineacht le Ballstát amháin ar a laghad, ba cheart don Úcráin a bheith in ann a iarraidh ar an gCoimisiún dul i mbun soláthar comhpháirteach, de mhaolú ar Airteagal 168(2), an dara fomhír, den Rialachán Airgeadais, ós rud é nach bhforáiltear don fhéidearthacht sin i gconradh déthaobhach nó iltaobhach leis an Úcráin. Ba cheart don Úcráin, in éineacht le Ballstát amháin ar a laghad, a bheith in ann a iarraidh ar an gCoimisiún gníomhú mar chomhlacht lárnach ceannaigh, de mhaolú ar Airteagal 168(3) den Rialachán Airgeadais, ar an gcúis chéanna a luaitear thuas. Chun comhiomlánú an éilimh a chothú i gcás soláthar comhpháirteach, ba cheart don Choimisiún a áirithiú go mbeidh an nós imeachta soláthair sin oscailt do na Ballstáit uile agus, i gcás inarb ábhartha, do thíortha comhlachaithe. D’fhonn borradh tionsclaíoch acmhainneachtaí monaraíochta BTTCE agus BTTC na hÚcráine a chothú, ba cheart don Choimisiún, thairis sin, tabhairt i gcrích comhaontuithe ceannaithe táirgí a éascú i gcomhréir le rialacha iomaíochais agus soláthair an Aontais. Chun críche soláthar comhpháirteach le tacaíocht ón gCoimisiún, beidh úsáid bhuiséad an Aontais i gcomhréir le cuspóirí agus critéir incháilitheachta infheidhme an Chláir nó na hIonstraime um Thacaíocht don Úcráin agus beidh sé d’aidhm aige tacú le hoiriúnú acmhainneacht mhonaraíochta shlabhraí soláthair tionsclaíocha na cosanta. D’fhéadfadh sé, go háirithe, an riosca a bhaint d’infheistíochtaí tionsclaíocha, amhail an méadú ar acmhainneachtaí monaraíochta nó fáil na meaisín-uirlisí riachtanacha chun a áirithiú go gcomhlíonfar conradh agus ba cheart, in aon chás, é a theorannú go docht chun na costais neamh-athfhillteacha arna dtabhú i gcomhthéacs táirgí cosanta a cheannach nó a chothabháil a chumhdach. Ba cheart é a áireamh i gCláir Oibre an Chláir agus san Ionstraim um Thacaíocht don Úcráin.

(54)

Sna cásanna a chumhdaítear leis an Rialachán seo, d’fhéadfadh údar cuí a bheith le conradh a dhámhachtain agus a chomhlíonadh láithreach sula síneofar é mar thoradh ar nósanna imeachta soláthair a dhéantar le tacaíocht ón gCoimisiún chun críocha an Rialacháin seo i bhfianaise na staide geopholaitiúla atá ann cheana, go háirithe i gcás ina n-éilíonn tromchúis na n-imthosca agus a n-impleachtaí do shlándáil shaoránaigh an Aontais go ndéanfaí seachadtaí an táirge cosanta lena mbaineann go héifeachtach gan aon mhoill. Chun na críche sonraí sin agus de mhaolú ar Airteagal 175(1) den Rialachán Airgeadais, ba cheart go bhféadfaí tosú ar chomhlíonadh an chonartha sula síneofar an conradh, i gcás ina ndéanfaidh an t-údarás conarthach an gá le beart den sórt sin a dhoiciméadú go cuí.

(55)

Tá dúshláin mhóra roimh chomharchláir armála san Aontas ós rud é go mbunaítear iad ar bhonn ad hoc den chuid is mó, agus gur minic a bhíonn an chastacht, moilleanna agus an róchaiteachas ag siúl leo. Chun an scéal sin a leigheas, agus chun tiomantas leanúnach na mBallstát a áirithiú go deireadh shaolré na dtáirgí cosanta, ní mór cur chuige níos struchtúraithe a bheith ann ar leibhéal an Aontais. Chun an cur chuige sin a shaothrú, ba cheart tacú le hiarrachtaí na mBallstát trí chreat dlíthiúil nua a chur ar fáil, eadhon an SCAE, chun an comhar eatarthu a neartú agus bonn taca a chur faoi. Chun a chuspóir a bhaint amach iomaíochas a chothú in BTTCE agus, i gcás inarb ábhartha, in BTTC na hÚcráine, ba cheart do SCAEnna a bheith in ann forbairt, soláthar agus bainistiú saolré comhchoiteann nó bainistiú dinimiciúil infhaighteachta táirgí cosanta a stiúradh. Ba cheart SCAEnna a bheith in ann gníomhaíochtaí breise a dhéanamh atá riachtanach chun a gcuspóirí a bhaint amach, amhail gníomhaíochtaí a bhaineann le bonneagair ag a bhfuil nasc díreach le táirgí cosanta. Ba cheart na gníomhaíochtaí a dhéantar faoi chreat SCAE agus na gníomhaíochtaí a dhéantar faoi CBES a bheith ag treisiú a chéile, go háirithe i gcomhthéacs PFC. Níor cheart do na gníomhaíochtaí sin leasanna slándála agus cosanta an Aontais agus na mBallstát a shárú, lena n-áirítear an urraim do phrionsabal an dea-chaidrimh comharsanachta.

(56)

Laistigh de na SCAEnna, ba cheart do na Ballstáit tairbhe a bhaint as nósanna imeachta caighdeánaithe a d’fhéadfadh an Coimisiún a chur ar fáil chun cláir armála chomhoibríocha a thionscnamh agus a bhainistiú, lena n-áirítear treoirlínte maidir le bainistiú tionscadal, soláthar, bainistíocht airgeadais, agus tuairisciú. Leis an gcomhar faoi chreat SCAE, ba cheart foráil a dhéanamh freisin, faoi na coinníollacha a leagtar amach i dTreoracha 2006/112/CE (27) agus (AE) 2020/262 (28) ón gComhairle, maidir le díolúine ó CBL nó ó dhleacht mháil, i gcás inar leis an SCAE an trealamh arna sholáthar. Sa bhreis ar ranníocaíochtaí ón gClár agus ón Ionstraim um Thacaíocht don Úcráin, ba cheart SCAEnna a bheith in ann ranníocaíochtaí a fháil freisin ó chláir eile de chuid an Aontais, ar choinníoll nach gcumhdaíonn na ranníocaíochtaí an costas céanna. Ba cheart feidhm a bheith ag rialacha chlár ábhartha an Aontais maidir leis an ranníocaíocht chomhfhreagrach a dhéantar leis an ngníomhaíocht lena mbaineann.

(57)

Más mian le gach comhalta den SCAE é sin a dhéanamh, ba cheart SCAEnna a bheith in ann urrúis a eisiúint i gcomhréir le dlí an Bhallstáit ina bhfuil a n-oifig chláraithe chun plean maoinithe fadtéarmach na gclár armála agus comhlíonadh an chreata rialachais eacnamaíoch a áirithiú. Níor cheart an tAontas a bheith faoi dhliteanas maidir le hurrúis arna n-eisiúint ag SCAEnna. Le ranníocaíocht airgeadais ón Aontas, d’fhéadfadh sé go gcuirfí feabhas ar na dálaí faoina maoineofaí na Ballstáit na cláir armála.

(58)

Chun a chuspóirí a bhaint amach, ba cheart SCAE a bheith in ann ceann amháin nó níos mó dá chúraimí a chur de chúram, trí chomhaontú tarmligin, ar cheann amháin nó níos mó de na heintitis atá incháilithe chun cistiú a fháil faoi ghníomhaíochtaí soláthair chomhoibríoch faoin gClár. Go háirithe, tá, ag eagraíochtaí idirnáisiúnta mar OCCAR agus NSPA, chomh maith le GEC, acmhainní, inniúlachtaí agus scileanna acu maidir le bainistiú an chomhair cosanta a d’fhéadfadh breisluach a chur ar fáil do SCAEnna. I gcás ina gcuirfidh SCAE déanamh a chúraimí de chúram ar eintiteas eile, ba cheart dó leanúint de bheith freagrach as a oibleagáidí a chomhlíonadh faoi dhlí an Aontais agus faoin Rialachán seo go háirithe. Ba cheart dó a áirithiú, dá bhrí sin, go n-áireofar na hoibleagáidí sin sa chomhaontú um tharmligean agus ba cheart dó gach beart iomchuí a dhéanamh lena áirithiú go gcomhlíonfar iad.

(59)

Chun gur féidir nós imeachta éifeachtúil maidir le SCAE a bhunú, ní mór do na Ballstáit, do thíortha comhlachaithe nó don Úcráin, má tá siad toilteanach SCAE a bhunú, iarratas a chur faoi bhráid an Choimisiúin inar cheart measúnú a dhéanamh ar cé acu atá nó nach bhfuil reachtanna beartaithe an SAE i gcomhréir leis an Rialachán seo. Ba cheart dearbhú a bheith in iarratas mar sin ón mBallstát ina bhforáiltear oifig chláraithe a bheith ag an SCAE lena n-aithnítear an SCAE mar chomhlacht nó eagraíocht idirnáisiúnta chun críche chur i bhfeidhm Threoracha 2006/112/CE agus (AE) 2020/262 ón uair a bhunófar é. Ba cheart don Choimisiún measúnú a dhéanamh ar an iarratas gan moill mhíchuí, go hidéalach laistigh de dhá mhí ón iarratas iomlán a fháil. Ba cheart don Choimisiún, chun na críche sin, iarraidh ar GEC a shaineolas a chur ar fáil.

(60)

Ar chúiseanna trédhearcachta, na gníomhartha cur chun feidhme lena mbunaítear SCAEnna, agus na fógraí a bhaineann le SCAE a fhoirceannadh agus a dhúnadh, chomh maith le haon fhógraí i gcás nach mbeadh SCAE in ann a fhiacha a íoc, ba cheart iad a fhoilsiú in Iris Oifigiúil an Aontais Eorpaigh.

(61)

Chun a chuid cúraimí a chur i gcrích ar an mbealach is éifeachtúla, ba cheart pearsantacht dhlítheanach a bheith ag SCAE amhail ón lá a thagann an gníomh cur chun feidhme lena mbunaítear an SCAE i bhfeidhm agus ba cheart dó tairbhe a bhaint as an inniúlacht dhlítheanach is fairsinge i ngach Ballstát. Ba cheart do SCAE tairbhe a bhaint freisin as an inniúlacht dhlíthiúil is fairsinge i dtíortha comhlachaithe agus san Úcráin i gcásanna ina bhfuil siad ina gcomhaltaí den SCAE. Ba cheart oifig chláraithe a bheith aige laistigh de chríoch Ballstáit.

(62)

Féadfaidh Ballstáit, tíortha comhlachaithe agus an Úcráin a bheith ina gcomhaltaí de SCAE. Ba cheart trí chomhalta ar a laghad a bheith in SCAE agus gur Ballstáit iad dhá chomhalta ar a laghad acu sin.

(63)

Chun an SCAE a chur chun feidhme, ba cheart forálacha níos mionsonraithe a leagan síos ina reachtanna, ar ar a mbonn ba cheart don Choimisiún scrúdú a dhéanamh ar cé acu a chomhlíonann nó nach gcomhlíonann iarratas rialacha an Rialacháin seo. Tá sé tábhachtach go soiléireofaí leis na reachtanna cad iad na hacmhainneachtaí riaracháin atá beartaithe chun a áirithiú go gcomhlíonfaí rialacha an Aontais is infheidhme agus na rialacha náisiúnta is infheidhme maidir le láimhseáil táirgí cosanta. Gan dochar do rialacha an Aontais agus do rialacha náisiúnta atá ann cheana maidir le honnmhairiú táirgí cosanta, ba cheart do chomhaltaí SCAE a bheith in ann teacht ar chomhaontú d’aon toil maidir le cur chuige i leith na n-onnmhairí sin.

(64)

Ar thaobh amháin, is gá a áirithiú go bhfuil an tsolúbthacht is gá ag SCAE chun a reachtanna a leasú agus, ar an taobh eile, go gcaomhnaítear eilimintí fíor-riachtanacha áirithe, go háirithe na heilimintí sin a raibh gá leo chun stádas an SCAE a dheonú, trí rialú is gá ar leibhéal an Aontais. Má bhaineann leasú le gné bhunriachtanach de na reachtanna, ba cheart don Choimisiún an leasú sin a fhormheas, sula dtiocfadh sé i bhfeidhm agus, ba cheart fógra a thabhairt don Choimisiún faoi aon leasú eile. Cé is moite de leasuithe a bhaineann le cur chuige féideartha i leith táirgí cosanta a onnmhairiú, ba cheart deis a bheith ag an gCoimisiún agóid a dhéanamh i gcoinne leasuithe mar sin má mheasann sé go bhfuil siad contrártha don Rialachán seo.

(65)

Ba cheart do SCAE a bheith in ann táirgí cosanta a sholáthar thar a cheann féin nó in ainm a chomhaltaí nó thar ceann a chomhaltaí. Chun na gcríoch sin, ba cheart SCAEnna a mheas mar eagraíochtaí idirnáisiúnta de réir bhrí Airteagal 12, pointe (c), de Threoir 2009/81/CE ó Pharlaimint na hEorpa agus ón gComhairle (29). Dá bhrí sin, níor cheart feidhm a bheith ag Treoir 2009/81/CE maidir leis an soláthar sin. I gcás ina soláthraíonn SCAE thar ceann a chomhaltaí ar Ballstáit nó, i gcás inarb ábhartha, ar tíortha comhlachaithe iad, níor cheart feidhm a bheith ag Treoir 2009/81/CE sna cásanna sin nuair a chomhlíonann an nós imeachta soláthair na cuspóirí atá ag an SCAE i dtaca le hiomaíochas BTTCE agus, i gcás inarb ábhartha, iomaíochas BTTC na hÚcráine a chothú. Níor cheart feidhm a bheith ag Treoir 2009/81/CE ach oiread maidir leis na nósanna imeachta soláthair arna ndéanamh ag na Ballstáit agus soláthar á dhéanamh acu thar ceann SCAE nó ina ainm, ós rud é gur cheart na conarthaí sin a dhámhachtain i gcomhréir le rialacha soláthair an SCAE. I gcás ina gceannaíonn Ballstáit, nó, i gcás inarb infheidhme, tíortha comhlachaithe; táirgí cosanta ó SCAE, ba cheart a mheas gur conradh arna dhamhachtain ag rialtas amháin ar rialtas eile é an soláthar sin, dá dtagraítear in Airteagal 13, pointe (f) de Threoir 2009/81/CE. Ba cheart do SCAEnna a rialacha soláthair féin a shainiú, i gcomhréir le prionsabail dhlí príomha an Aontais is infheidhme maidir le soláthar, go háirithe na prionsabail sin a bhaineann le cóir chomhionann, trédhearcacht, neamh-idirdhealú agus comhréireacht agus leis na rialacha a leagtar amach sa Rialachán seo. I gcás ina gcuirfidh SCAE cúraimí soláthair de chúram ar eintiteas amháin nó níos mó, ba cheart dó a áirithiú go gcomhlíontar na prionsabail sin leis na rialacha soláthair atá le cur i bhfeidhm.

(66)

Ba cheart do na Ballstáit atá rannpháirteach in SCAE a áirithiú go gcomhlíonann beartas soláthair an SCAE na cuspóirí maidir le hiomaíochas BTTCE nó BTTC na hÚcráine a chothú, lena n-áirítear nuair nach bhfuil aon tacaíocht airgeadais ón Aontas ann. Tá an méid sin gan dochar do na coinníollacha sonracha a bhfuil feidhm acu i gcás ina bhfaigheann SCAE cistiú ón Aontas faoi chlár ábhartha.

(67)

Chun a chuid cúraimí a dhéanamh ar an mbealach is éifeachtúla, agus mar iarmhairt loighciúil ar a phearsantacht dhlítheanach, ba cheart SCAE a bheith faoi dhliteanas i leith a chuid fiach. Chun go mbeidh comhaltaí de SCAE in ann teacht ar réitigh iomchuí maidir lena ndliteanas, ba cheart an rogha a thabhairt dóibh foráil a dhéanamh sna reachtanna maidir le córais dliteanais éagsúla a théann os cionn an dliteanais atá teoranta do ranníocaíochtaí na gcomhaltaí.

(68)

Chun a áirithiú go ndéantar rialú leordhóthanach ar chomhlíonadh an Rialacháin seo, ba cheart do SCAE a thuarascáil bhliantúil a tharchur chuig an gCoimisiún, chomh maith le haon fhaisnéis maidir le tosca atá ina mbagairt ghéar do bhaint amach a chúraimí. I gcás ina léirítear don Choimisiún, sa tuarascáil bhliantúil nó in aon rud eile, go bhfuil an SCAE ag sárú an Rialacháin seo nó dlí eile is infheidhme ar bhonn tromchúiseach, ba cheart dó mínithe nó gníomhaíochtaí a iarraidh ar an SCAE nó ar a chomhaltaí. I gcásanna tromchúiseacha agus mura ndéantar aon ghníomhaíocht feabhais, ba cheart don Choimisiún a bheith in ann an gníomh cur chun feidhme lena mbunaítear an SCAE a aisghairm, rud a d’fhágfadh go ndéanfaí an SCAE a fhoirceannadh. Ba cheart don Choimisiún tuarascáil bhliantúil chomhiomlánaithe a chur ar fáil do Pharlaimint na hEorpa agus don Chomhairle maidir le gníomhaíochtaí gach SCAE gníomhach.

(69)

Tar éis chogadh foghach gan chúis gan údar na Rúise ar an Úcráin, tá slándáil an tsoláthair ina toisc atá ag éirí níos tábhachtaí i gcinntí soláthair na mBallstát maidir le táirgí cosanta. Mar thoradh air sin, is toisc chinntitheach in iomaíochas na mBallstát é a bheith de chumas ag slabhraí soláthair trasteorann an Aontais soláthar gan suaitheadh a áirithiú le haghaidh táirgí cosanta. D’fhéadfadh éifeachtaí dearfacha ar iomaíochas BTTCE teacht as dá bhrí sin dá dtabharfaí isteach córas slándála soláthair uile-Aontais.

(70)

Ar ghlacadh Rialachán (AE) 2023/1525, d’iarr Parlaimint na hEorpa agus an Chomhairle ar an gCoimisiún féachaint an bhféadfaí creat dlíthiúil a chur chun cinn darb aidhm slándáil an tsoláthair a áirithiú, ina ráiteas comhpháirteach an 11 Iúil 2023. Bhí an Ráiteas Comhpháirteach sin ag teacht leis na conclúidí ón gComhairle Eorpach i mí na Nollag 2013 inar iarradh go mbeadh córas cuimsitheach uile-Aontais ann maidir le slándáil an tsoláthair agus an moladh ó Pharlaimint na hEorpa an 8 Meitheamh 2022 inar tathantaíodh ar an gCoimisiún a leithéid de chóras a chur i láthair gan mhoill.

(71)

Le géarchéimeanna a tharla le déanaí, amhail paindéim COVID-19 agus an méadú géar ar an éileamh ar tháirgí cosanta áirithe, go háirithe armlón, nochtadh leochaileachtaí i slabhraí soláthair an Aontais. Léirigh na géarchéimeanna sin freisin an chaoi ar féidir le suaitheadh i soláthar na dtáirgí sin nó na gcomhpháirteanna nó na n-amhábhar atá ríthábhachtach dá dtáirgeadh bac a chur ar fheidhmiú an mhargaidh inmheánaigh. Leis na géarchéimeanna sin, léiríodh an riosca is dócha a bheidh ann go dtiocfaidh bearta éagsúla chun cinn ar an leibhéal náisiúnta, lena n-áirítear chun stoic a chaomhnú mar ábhar slándála náisiúnta agus chun táirgí cosanta a dheimhniú, agus an easpa comhordaithe ar leibhéal an Aontais chun aghaidh a thabhairt ar ghanntanais táirgí a bhfuil ríthábhacht leo chun freagairt do na géarchéimeanna atá ag teacht chun cinn, chomh maith le comhpháirteanna agus amhábhair atá fíor-riachtanach dá dtáirgeadh, rud a d'fhágfadh go mbeadh deacrachtaí ann maidir le rochtain a fháil ar na táirgí, na comhpháirteanna agus na hamhábhair is gá nó leis na táirgí, na comhpháirteanna agus na hamhábhair is gá a fháil chun na táirgí ábhartha a mhonarú nó a fháil, agus an riosca nithiúil ann go gcuirfí bac ar na slabhraí táirgthe ina n-iomláine ar an gcaoi sin. Tá sé ríthábhachtach cosc a chur ar theacht chun cinn bacainní ar thrádáil trasteorann idir na Ballstáit mar gheall ar éagsúlachtaí sa dlí náisiúnta, toisc go gcuirfí srian le héagsúlachtaí den sórt sin ar shaorghluaiseacht táirgí criticiúla agus na gcomhpháirteanna gaolmhara agus na n-amhábhar gaolmhar sa mhargadh inmheánach agus go gcuirfí isteach ar fheidhmiú a shlabhraí soláthair. Léirigh na deacrachtaí sin feadh na slabhraí soláthair freisin easpa uirlisí bainistithe géarchéime agus sásraí comhordúcháin, agus comhroinnt neamhleor faisnéise chomh maith le forléargas neamhleor ar na hacmhainneachtaí monaraíochta ar fud an Aontais, go háirithe le haghaidh táirgí cosanta.

(72)

De dheasca dhíghrádú leanúnach an chomhthéacs slándála, dar príomhthréith bagairtí fadtéarmacha atá ag dul i méid, an dlús le forbairt na teicneolaíochta cosanta agus na nuálaíochta, agus an méadú dóchúil ar an gcaiteachas cosanta, is dócha go spreagfar borradh san éileamh ar tháirgí cosanta agus go gcuirfidh sé le géarchéimeanna soláthair i leith na dtáirgí sin amach anseo. Is dócha go gcuireann éileamh méadaithe den sórt sin leis an mbrú ar shlabhraí soláthair an Aontais le haghaidh táirgí cosanta agus, mura nglacfar aon chreat ar leibhéal an Aontais, go dtiocfaidh chun cinn nó go gcuirfear ar ais bearta náisiúnta éagsúla chun dul i ngleic le ganntanais, agus ar an gcaoi sin tiocfaidh bacainní ar fheidhmiú cuí an mhargaidh inmheánaigh as agus bainfear an bonn de leasanna cosanta agus slándála an Aontais agus a Bhallstát.

(73)

Thairis sin, d’fhéadfadh an timpeallacht slándála atá ag athrú go tapa cur le géarchéimeanna eile de chineálacha éagsúla, amhail cibirionsaithe ar thionscail chosanta nó suaití mórscála ar bhonneagar criticiúil, lena n-éileofaí freagairtí comhordaithe tapa cinntitheacha chun suaitheadh tromchúiseach ar na slabhraí soláthair cosanta gaolmhara a chosc. In oirchill éileamh méadaithe ar tháirgí cosanta agus brú níos déine ar na slabhraí soláthair gaolmhara, tá feidhmiú iontaofa na slabhraí soláthair sin fíor-riachtanach, dá bhrí sin, chun feidhmiú cuí an mhargaidh inmheánaigh do tháirgí cosanta a áirithiú.

(74)

Mar a léirítear leis na ceachtanna a foghlaimíodh ó obair an Tascfhórsa um Sholáthar Comhpháirteach in Earnáil na Cosanta maidir le riachtanais soláthair cosanta an-ghearrthéarmach a chomhordú agus ó chur chun feidhme Rialachán (AE) 2023/1525, is minic a bhíonn gné thrasteorann ag slabhraí soláthair cosanta an Aontais, go háirithe ar leibhéil níos ísle. Tá sé ríthábhachtach nach mbeadh easpa infheictheachta maidir le hacmhainneachtaí táirgeachta foriomlána agus slabhraí soláthair BTTCE agus nach mbeadh na Ballstáit in ann cinntí eolasacha a dhéanamh mar thoradh ar chastacht mhéadaitheach na slabhraí soláthair uile-Aontais le haghaidh táirgí cosanta, go háirithe chun aghaidh a thabhairt ar ghanntanais nó chun riosca ina leith sin a mhaolú.

(75)

Tá riosca nithiúil ann nach leor na bearta maidir le slándáil an tsoláthair arna nglacadh ar an leibhéal náisiúnta chun dul i ngleic go héifeachtach amach anseo le dúshláin agus nach féidir leis na Ballstáit aonair na héifeachtaí trasteorann ar shlabhraí soláthair cosanta uile-Aontais a chur san áireamh go leordhóthanach ná aghaidh a thabhairt orthu go hiomchuí. Ina theannta sin, is féidir tionchar diúltach tromchúiseach a bheith ag cuir chuige neamhchomhordaithe ar an leibhéal náisiúnta, go háirithe maidir le deimhniú agus aistriú táirgí cosanta laistigh den Aontas agus tosaíocht a thabhairt d’orduithe a bhfuil cuspóir míleata acu, ar fheidhmiú an mhargaidh inmheánaigh do tháirgí cosanta, go háirithe trí bhacainní a chruthú ar thrádáil trasteorann, agus na ganntanais fhoriomlána agus an suaitheadh foriomlán sna slabhraí soláthair a ghéarú.

(76)

I bhfianaise na ndúshlán sin, is cosúil gur gá agus gurb iomchuí córas uile-Aontais maidir le slándáil an tsoláthair a bhunú darb aidhm slándáil an tsoláthair táirgí cosanta a mhéadú chun feidhmiú cuí an mhargaidh inmheánaigh a áirithiú agus chun é a dhéanamh athléimneach in aghaidh aon suaitheadh. Sa chomhthéacs sin, tá sé ríthábhachtach foráil a dhéanamh maidir le bearta comhordúcháin agus ullmhú agus freagairt do thionchar géarchéimeanna soláthair a bheidh ann amach anseo ar an margadh inmheánach do tháirgí cosanta; slándáil an tsoláthair a áirithiú do tháirgí cosanta, do chomhpháirteanna agus d’amhábhair na dtáirgí sin, agus d’aon táirgí agus seirbhísí atá ríthábhachtach dá dtáirgeadh, a bhfuil a n-infhaighteacht fíor-riachtanach chun feidhmiú cuí an mhargaidh inmheánaigh agus a shlabhraí soláthair a áirithiú agus nach mór iad a ráthú chun freagairt do ghéarchéim soláthair (‘táirgí atá ábhartha i gcás géarchéime’); agus chun feidhmiú cuí an mhargaidh inmheánaigh do tháirgí cosanta a áirithiú, lena n-áirítear trí chosc a chur ar theacht chun cinn bacainní air. Ba cheart na bearta sin a bheith bunaithe ar Airteagal 114 CFAE.

(77)

Baineann Treoir 2009/81/CE, i measc nithe eile, le creat reachtach iomchuí a bhunú, ar réamhriachtanas é chun margadh Eorpach um threalamh cosanta a chruthú, le comhordú nósanna imeachta soláthair chun conarthaí a dhámhachtain lena gcomhlíonfaí ceanglais slándála na mBallstát agus leis na hoibleagáidí a eascraíonn as CFAE. Chun an aidhm sin a bhaint amach, foráiltear le Treoir 2009/81/CE sin, go háirithe, do chásanna géarchéime, go sonrach trí fhorálacha sonracha a sholáthar a chuirfí i bhfeidhm i gcás práinne arna eascairt as géarchéim, amhail tréimhsí giorraithe chun tairiscintí a fháil agus an fhéidearthacht an nós imeachta caibidlithe a úsáid gan fógra conartha a fhoilsiú roimh ré. Mar sin féin, i gcásanna áirithe práinne, d’fhéadfadh sé nár leormhaith na rialacha sin, go háirithe i gcás nárbh fhéidir aghaidh a thabhairt ar an bpráinn arna heascairt as an ngéarchéim ach amháin trí dhá Bhallstát nó níos mó a bheith rannpháirteach i soláthar comhoibríoch. Sna cásanna sin, is minic gurb é an t-aon réiteach atá ann lena n-áiritheofaí leasanna slándála na mBallstát sin creat-chomhaontú atá ann cheana a oscailt d’údaráis chonarthacha na mBallstát nach raibh ina bpáirtithe ann ar dtús, fiú murar foráladh dá leithéid sa chreat-chomhaontú bunaidh. Ós rud é nach bhforáiltear do na féidearthachtaí sin i dTreoir 2009/81/CE tráth theacht i bhfeidhm an Rialacháin seo, foráiltear leis an Rialachán sin go bhféadfaí foráil na Treorach sin a chomhlánú nó maolú uirthi i gcásanna práinne arna eascairt as géarchéim, ar choinníoll go bhfaighfí comhaontú an ghnóthais a thug an creat-chomhaontú i gcrích.

(78)

I gcomhréir le cásdlí Chúirt Bhreithiúnais an Aontais Eorpaigh, tá modhnuithe ar chonradh poiblí le bheith teoranta go docht don mhéid atá fíor-riachtanach sna himthosca, agus prionsabail an neamh-idirdhealaithe, na trédhearcachta agus na comhréireachta á gcomhlíonadh a mhéid is féidir. I ndáil leis sin, ba cheart a bheith in ann maolú ar Threoir 2009/81/CE trí na cainníochtaí dá bhforáiltear i gcreat-chomhaontú a mhéadú suas le 100 % de luach an chreat-chomhaontaithe sin i gcás ina n-osclaítear é d’údaráis chonarthacha as Ballstáit eile, a mhéid a bhfuil fíorghá leis an méadú sin chun an creat-chomhaontú a oscailt do na húdaráis chonarthacha sin. A mhéid a bhaineann leis na cainníochtaí breise sin, ba cheart na coinníollacha céanna a bheith ag na húdaráis chonarthacha sin agus atá ag an údarás conarthach bunaidh a thug an creat-chomhaontú bunaidh i gcrích. Ina theannta sin, ba cheart bearta iomchuí trédhearcachta a dhéanamh chun a áirithiú go gcuirtear na páirtithe leasmhara féideartha uile ar an eolas.

(79)

Le blianta beaga anuas, tá na Ballstáit ag gabháil níos mó agus níos mó don chomhar cosanta, go háirithe d’fhonn a gcumais mhíleata a chóineasú. Is é is cuspóir go háirithe do phróisis eile de chuid an Aontais, amhail ACBC agus PESCO, tacú le cur chun feidhme na dtosaíochtaí ábhartha trí dheiseanna comhair fheabhsaithe a shainaithint agus a thapú d’fhonn leibhéal uaillmhéine an Aontais i réimse na slándála agus na cosanta a chomhlíonadh. Mar gheall ar an meath leanúnach atá ag teacht ar an timpeallacht gheopholaitiúil agus ar mhórluaineacht na timpeallachta idirnáisiúnta, is riachtanaí fós le comhar oibríochtúil a fhorbairt. Chun bheith éifeachtach, d’fhéadfadh sé go gciallódh comhar cosanta gur gá go n-úsáidfeadh fórsaí armtha na mBallstát agus iad ag obair i gcomhar le chéile an táirge cosanta ceannann céanna nó, ar a laghad, táirgí chomh gar sin go bhfuil siad inmhalartaithe. Sna cásanna sin, ba cheart cead a bheith ag Ballstát atá rannpháirteach i mbunú nó a ghlacann páirt i dtionscnamh comhair den sórt sin, ar mó ná soláthar comhoibríoch táirgí cosanta amháin atá i gceist leis, maolú ar phrionsabail na trédhearcachta agus na hiomaíochta agus conradh a dhámhachtain go díreach gan iomaíocht roimh ré ná fógra conartha a fhoilsiú roimh ré don ghnóthas ón BTTCE a tháirgeann an táirge sin, ar choinníoll go bhfuil gá leis sin chun an comhar cosanta lena mbaineann a chur chun feidhme.

(80)

I bhfianaise an chomhthéacs slándála agus an teannais agus na scrogall atá ann cheana agus atá intuartha sa mhargadh inmheánach do tháirgí cosanta agus a shlabhraí soláthair a eascraíonn go háirithe as an neamhréir idir acmhainneachtaí monaraíochta teoranta san Aontas agus an borradh ar an éileamh ó thús chogadh foghach na Rúise ar an Úcráin, ní mór foráil a dhéanamh maidir le sraith beart lena gcuirfear ar chumas an Aontais réamh-mheas a dhéanamh agus ullmhú do rioscaí go mbeadh suaitheadh tromchúiseach i soláthar na dtáirgí cosanta agus na rioscaí sin a mhaolú, ar rioscaí iad ar as a shiocair a ghlacfaí nó is dócha a ghlacfaí beart náisiúnta éagsúil as a n-eascródh tionchar diúltach tromchúiseach ar fheidhmiú cuí an mhargaidh inmheánaigh.

(81)

Maidir le cumas an Aontais géarchéimeanna i soláthar na dtáirgí cosanta a réamh-mheas agus aghaidh a thabhairt orthu, ar géarchéimeanna iad a dhéanann difear d’fheidhmiú cuí an mhargaidh inmheánaigh, bíonn an cumas sin ag brath ar an eolas a bhíonn ar fáil agus ar an bhfaireachas a dhéantar, ar leibhéal an Aontais, ar struchtúr, láidreachtaí agus laigí shlabhraí soláthair an Aontais le haghaidh na dtáirgí sin. I bhfianaise chastachtaí shlabhraí soláthair na cosanta agus an teannais agus an riosca ganntanas atá ann cheana feadh na slabhraí soláthair sin, is gá ionstraimí a sholáthar le haghaidh cur chuige comhordaithe leanúnach maidir le mapáil agus faireachán a dhéanamh ar shlabhraí soláthair an Aontais maidir le táirgí atá ábhartha i gcás géarchéime. Cuireann torthaí mapála den sórt sin faisnéis ábhartha ar fáil freisin chun bearta de chuid an Aontais a fhorbairt darb aidhm iomaíochas BTTCE a neartú agus chun measúnú a dhéanamh ar sheasamh an Aontais i slabhraí soláthair cosanta domhanda. Sa chomhthéacs sin, ba cheart mapáil agus faireachán a dhéanamh ar tháirgí ar as a shiocair, dá mbeadh suaitheadh tromchúiseach ina soláthar nó dá mba ann do gharbhaol an tsuaite sin, a ghlacfaí nó is dócha a ghlacfaí beart náisiúnta éagsúil as a n-eascródh iarmhairt dhiúltach ar fheidhmiú cuí an mhargaidh inmheánaigh, go háirithe bacainní ar thrádáil trasteorann.

(82)

Chun críocha na mapála, ba cheart don Choimisiún liosta táirgí atá ábhartha i gcás géarchéime a shainaithint agus a thabhairt cothrom le dáta go rialta, ag díriú ar shuaitheadh nó scrogaill a d’fhéadfadh difear a dhéanamh do shlándáil soláthair na dtáirgí sin. Ba cheart sainaithint na dtáirgí sin ag an gCoimisiún a bheith bunaithe ar shonraí arna soláthar ag na Ballstáit agus a eascraíonn as sainaithint na n-acmhainneachtaí monaraíochta agus na slabhraí soláthair ábhartha. Chun uileghabhálacht na sonraí comhiomlánaithe a áirithiú, ba cheart don Choimisiún na sonraí sin a chros-seiceáil, agus úsáid á baint, chun na críche sin, as na sonraí atá ar fáil agus, más gá, as sonraí a fhaightear trí iarrataí deonacha ar fhaisnéis ó ghnóthais.

(83)

Ba cheart don Choimisiún foráil a dhéanamh maidir le creat agus modheolaíocht chun táirgí atá ábhartha i gcás géarchéime a shainaithint. Chun éifeachtúlacht na mapála a áirithiú, ba cheart an creat sin agus an mhodheolaíocht sin a shainiú ar bhealach lena seachnófar ualach riaracháin nach bhfuil gá leis a chur ar na Ballstáit. Dá bhrí sin, ba cheart dóibh cur leis na creataí agus na modheolaíochtaí náisiúnta atá ann cheana agus a roinnfeadh na Ballstáit leis an gCoimisiún. Ba cheart an creat sin agus an mhodheolaíocht sin a dhíriú, ar an gcéad dul síos, ar scrogaill atá ann cheana feadh slabhraí soláthair cosanta agus ba cheart sainaithint acmhainneachtaí monaraíochta agus slabhraí soláthair na n-acmhainneachtaí sin a bheith mar thoradh air.

(84)

Mar chuid den mhapáil, ba cheart don Choimisiún freisin liosta táscairí luathrabhaidh a shainaithint agus a fhorbairt darb aidhm tosca a shainaithint a d’fhéadfadh soláthar na dtáirgí sin a shuaitheadh, é a chur i mbaol nó tionchar diúltach a imirt air. D’fhéadfaí a áireamh ar na táscairí sin: méaduithe neamhthipiciúla ar aga tionscanta; infhaighteacht amhábhar, táirgí idirmheánacha agus an chaipitil dhaonna is gá chun táirgí atá ábhartha i gcás géarchéime nó trealamh monaraíochta iomchuí a mhonarú; éileamh tuartha; borradh praghsanna atá níos mó ná an ghnáthluaineacht praghsanna, timpistí, ionsaithe, tubaistí nádúrtha nó teagmhais thromchúiseacha eile; éifeacht beartas trádála, taraifí, srianta ar onnmhairiú, bacainní trádála agus bearta eile a bhaineann le trádáil; agus an éifeacht a bhíonn ag gnólachtaí a bheith ag dúnadh, ag seachfhoinsiú nó ag éadálacha príomhsholáthróirí táirgí atá ábhartha i gcás géarchéime. Ba cheart na gníomhaíochtaí faireacháin a dhéanann an Coimisiún a dhíriú ar na táscairí luathrabhaidh sin, agus d’fhéadfadh iarrataí ar fhaisnéis dheonach chuig gníomhaithe ábhartha a bheith i gceist leis na gníomhaíochtaí sin más gá.

(85)

Chun an t-ualach ar ghnóthais a fhreagraíonn ar an bhfaireachán a íoslaghdú agus chun a áirithiú gur féidir an fhaisnéis a fhaightear a thiomsú ar bhealach fóinteach, ba cheart don Choimisiún foráil a dhéanamh maidir le modhanna caighdeánaithe slána le haghaidh aon bhailiú faisnéise. Ba cheart a áirithiú leis na modhanna sin go gcaithfear le haon fhaisnéis a bhailítear faoi rún, chun rúndacht ghnó agus cibearshlándáil a áirithiú. Ar an gcaoi chéanna, chun an t-ualach riaracháin ar riaracháin náisiúnta a theorannú, ba cheart cead a bheith ag na Ballstáit a iarraidh ar an gCoimisiún na cúraimí ar cuireadh de chúram orthu a dhéanamh chun slabhraí soláthair táirgí cosanta a mhapáil.

(86)

Ar bhonn liosta na dtáirgí a bhíonn ábhartha i gcás géarchéime arna sainaithint ag an gCoimisiún, ba cheart do na Ballstáit a aithint, ar a gcríoch féin, cé hiad príomhsholáthróirí na dtáirgí sin. Ba cheart liosta na soláthróirí sin a tharchur chuig an gCoimisiún chun cur chuige comhordaithe éifeachtúil a áirithiú ar leibhéal an Aontais. Chun a bheith in ann aon teagmhas a d’fhéadfadh a bheith ina chúis le hiarmhairtí diúltacha marthanacha d’infhaighteacht agus do sholáthar tráthúil na dtáirgí sin a aithint agus a thuairisciú, ba cheart do na Ballstáit faireachán a dhéanamh ar chumas na soláthróirí sin a ngníomhaíochtaí a chur i gcrích, i bhfianaise na dtáscairí luathrabhaidh a aithníonn an Coimisiún. Chun na críche céanna sin, ba cheart do na príomhsholáthróirí táirgí atá ábhartha i gcás géarchéime an Ballstát a bhfuil siad bunaithe ar a chríoch a chur ar an eolas freisin má bhraitheann siad suaitheadh soláthair a d’fhéadfadh difear suntasach a dhéanamh dá ngníomhaíochtaí a bhaineann le táirgeadh táirgí atá ábhartha i gcás géarchéime.

(87)

Mar chuid den chreat ullmhachta i gcomhair géarchéimeanna, ba cheart don Choimisiún tástálacha struis agus ionsamhlúcháin a dhéanamh agus a chomhordú, agus é ag tógáil go háirithe ar chomhairle an Bhoird um Shlándáil an tSoláthair i Réimse na Cosanta (an ‘Bord’) maidir le hábhair ríthábhachtacha le haghaidh slabhraí soláthair cosanta. Sa chomhthéacs sin, d’fhéadfadh an Choimisiún cásanna agus paraiméadair a fhorbairt lena léirítear na rioscaí ar leith a bhaineann le géarchéim i soláthar táirgí atá ábhartha i gcás géarchéime. Chun ullmhacht na ngníomhaithe ábhartha uile i gcomhair géarchéimeanna a áirithiú, ní mór a iarraidh ar na Ballstáit uile agus, i gcás inarb ábhartha, ar an Ardionadaí, GEC, agus ar ghníomhaithe ábhartha eile, páirt a ghlacadh ar bhonn deonach sna tástálacha struis sin. Sa chomhthéacs sin, d’fhéadfadh an Coimisiún forbairt straitéisí ullmhachta éigeandála a éascú agus a spreagadh, lena n-áirítear straitéisí le haghaidh cumarsáid i gcás géarchéime agus faisnéis a mhalartú faoi na srianta is infheidhme in imthosca dúshlánacha. I bhfianaise íogaireacht na faisnéise a bhaineann le scrogaill sna slabhraí soláthair do leasanna cosanta agus slándála an Aontais agus a Bhallstát, ba cheart torthaí na dtástálacha struis sin a bheith rúnaicmithe.

(88)

Mar thoradh ar an easpa trédhearcachta maidir le céannacht na n-údarás deimhniúcháin agus nósanna imeachta deimhnithe táirgí cosanta laistigh den Aontas, is teoranta an trasdeimhniú a dhéantar ar tháirgí cosanta, agus ar an gcaoi sin déantar an margadh inmheánach do tháirgí cosanta a ilroinnt a thuilleadh, go háirithe le linn géarchéimeanna soláthair, mar a léiríodh le linn na géarchéime soláthair armlóin in 2023. Mar chuid den chreat ullmhachta, is gá, dá bhrí sin, trédhearcacht a mhéadú maidir le próisis deimhniúcháin náisiúnta agus comhroinnt faisnéise idir údaráis deimhniúcháin a éascú, d’fhonn trasdeimhniú táirgí cosanta a éascú agus gluaiseacht an dtáirgí sin sa mhargadh inmheánach a chothú. Chun na críche sin, ba cheart don Choimisiún liosta de na húdaráis deimhniúcháin náisiúnta a tharraingt suas agus a choinneáil cothrom le dáta.

(89)

Chun an riosca a laghdú, go mbeadh ganntanais táirgí atá ábhartha i gcás géarchéime is gá dlús a chur le borradh na saoráidí táirgthe a bhaineann le táirgeadh na dtáirgí sin, go háirithe trína áirithiú go gcaithfear go héifeachtúil agus go tráthúil le haon iarratas a bhaineann le pleanáil, tógáil agus oibriú na saoráidí sin. Ar an gcúis sin, ba cheart do na húdaráis náisiúnta a áirithiú go gcaithfear leis na hiarratais sin chomh mear agus is féidir de réir dlí.

(90)

Chun a chur ar a chumas don Aontas a bheith in ann an riosca a mhaolú go dtosódh géarchéim soláthair, ba cheart do na húdaráis inniúla náisiúnta an Bord a chur ar an eolas i gcás ina dtiocfaidh siad ar an eolas faoi riosca go mbeidh suaitheadh tromchúiseach i soláthar táirgí atá ábhartha i gcás géarchéime, nó ina mbeidh faisnéis nithiúil iontaofa acu faoi aon toisc nó teagmhas riosca ábhartha eile a thiocfaidh chun cinn. Chun cur chuige comhordaithe a áirithiú agus an riosca sin a mhaolú, ba cheart don Choimisiún, nuair a bheidh sé ar an eolas faoin riosca sin, gníomhaíochtaí coisctheacha a dhéanamh, amhail cruinniú urghnách den Bhord a thionól chun déine an tsuaite a d’fhéadfadh a bheith ann a phlé chomh maith le freagairtí féideartha agus, i gcás inarb ábhartha, dul i gcomhairle le tríú tíortha ábhartha agus le heagraíochtaí idirnáisiúnta d’fhonn réitigh chomhoibríocha a lorg chun suaitheadh sna slabhraí soláthair a sheachaint nó chun aghaidh a thabhairt orthu, i gcomhréir le hoibleagáidí idirnáisiúnta.

(91)

Ba cheart foráil a dhéanamh sa Rialachán seo freisin maidir le hionstraimí chun aghaidh a thabhairt, ar bhealach éifeachtúil comhordaithe, ar ghéarchéim soláthair atá ar tí tarlú nó atá tagtha chun cinn. Mar gheall ar an ngá atá le foráil a dhéanamh maidir le bearta spriocdhírithe agus sin ag brath ar cé acu a bhaineann nó nach mbaineann tionchar diúltach tromchúiseach ar fheidhmiú an mhargaidh inmheánaigh, nó gar-riosca ina leith, le táirgí atá ábhartha i gcás géarchéime nach táirgí cosanta ná táirgí cosanta atá ábhartha i gcás géarchéime iad, ba cheart foráil a dhéanamh leis an Rialachán seo maidir le dhá staid géarchéime soláthair éagsúla dá bhrí sin.

(92)

Ba cheart an staid géarchéime soláthair a ghníomhachtú ar bhonn fianaise nithiúil iontaofa, i gcás ina bhfuil suaitheadh tromchúiseach nó a gharbhaol sin i soláthar táirgí atá ábhartha i gcás géarchéime, agus i gcás inar as siocair an tsuaite sin nó a gharbhaol a ghlacfaí nó is dócha a ghlacfaí bearta náisiúnta éagsúla a bhainfeadh le soláthar táirgí atá ábhartha i gcás géarchéime nach táirgí cosanta iad, as a n-eascródh tionchar diúltach tromchúiseach ar fheidhmiú cuí an mhargaidh inmheánaigh, go háirithe bacainní ar thrádáil trasteorann táirgí den sórt sin atá ábhartha i gcás géarchéime.

(93)

Ba cheart an staid géarchéime soláthair a bhaineann leis an tslándáil a ghníomhachtú i gcás ina bhfuil suaitheadh tromchúiseach nó garbhaol go dtarlóidh a leithéid i soláthar táirgí cosanta, agus i gcás inar as siocair an tsuaite sin nó an gharbhaoil go dtarlódh sé a ghlacfaí nó is dócha a ghlacfaí bearta náisiúnta éagsúla a bhainfeadh le táirgí cosanta atá ábhartha i gcás géarchéime, as a n-eascródh tionchar diúltach tromchúiseach ar fheidhmiú cuí an mhargaidh inmheánaigh, go háirithe bacainní ar thrádáil trasteorann táirgí cosanta mar sin atá ábhartha i gcás géarchéime. Agus measúnú á dhéanamh ag an gCoimisiún ar chomhlíonadh na coinníollacha chun an staid géarchéime soláthair a bhaineann leis an tslándáil a ghníomhachtú, ba cheart dó a chur san áireamh ar sainaithníodh géarchéim a dhéanann difear do leasanna slándála agus cosanta an Aontais agus a Bhallstát laistigh de réimse CBES, amhail ar ghníomhachtaigh Ballstát an clásal um chúnamh frithpháirteach de bhun Airteagal 42(7) CAE. Sa chomhthéacs sin, d’fhéadfadh an Coimisiún a chur san áireamh ar sainaithníodh géarchéim mar sin in ECAT freisin.

(94)

Mar gheall ar a íogaire atá an cinneadh an staid géarchéime soláthair nó an staid géarchéime soláthair a bhaineann leis an tslándáil a ghníomhachtú, ar íogaire é a eascraíonn go háirithe as iarmhairtí féideartha na mbeart a d’fhéadfaí a dhéanamh mar fhreagairt ar an staid sin, lena n-áirítear an tionchar suntasach a d’fhéadfadh a bheith ag na bearta sin ar ghnóthais phríobháideacha san Aontas, ba cheart an chumhacht a thabhairt don Chomhairle gníomh cur chun feidhme a ghlacadh a mhéid a bhaineann leis na staideanna géarchéime soláthair sin a ghníomhachtú, a fhadú agus a fhoirceannadh. Chun a áirithiú go gcuirfear an fhreagairt ar leibhéal an Aontais in oiriúint do chineál na géarchéime soláthair, ba cheart don Chomhairle a chinneadh freisin cé acu de na bearta dá bhforáiltear leis an Rialachán seo ba cheart a ghníomhachtú chun aghaidh a thabhairt ar an ngéarchéim soláthair leanúnach, agus ba cheart di a bheith in ann a shainaithint cé na táirgí atá ábhartha i gcás géarchéime ar cheart na bearta sin a ghníomhachtú ina leith.

(95)

Chun gur féidir measúnuithe beachta agus neas-fhíorama a chumasú lena ndéanamh ar chineál agus ar dhéine na géarchéime soláthair agus ar cé acu an bhfuil gá le bearta tosaíochta a imscaradh, ba cheart don Choimisiún, i gcás ina bhforáiltear amhlaidh sa ghníomh cur chun feidhme ón gComhairle faoin staid géarchéime soláthair nó faoin staid géarchéime soláthair a bhaineann leis an tslándáil, a bheith in ann iarrataí ar fhaisnéis a chur chuig oibreoirí eacnamaíocha a rannchuidíonn le táirgeadh na dtáirgí lena mbaineann atá ábhartha i gcás géarchéime. Níor cheart iarrataí den sórt sin ar fhaisnéis a chur ach amháin i gcás nach leor an fhaisnéis atá ar fáil agus ba cheart iad a theorannú d’fhaisnéis maidir le cumais táirgeachta, acmhainneachtaí táirgeachta nó aon suaitheadh príomha a d’fhéadfadh tarlú. I bhfianaise íogaireacht na faisnéise a d’fhéadfaí a iarraidh, ba cheart don Choimisiún comhaontú a fháil roimh ré ón mBallstát ina bhfuil láithreán táirgthe an oibreora eacnamaíoch ábhartha lonnaithe, agus ba cheart an fhaisnéis iarrtha a sheoladh tríd an mBallstát sin. I gcás ina n-aontaíonn an Ballstát lena mbaineann iarraidh den sórt sin ar fhaisnéis a sheoladh, ba cheart dó a bheith in ann cinneadh a dhéanamh an iarraidh sin a dhíriú go díreach chuig an oibreoir eacnamaíoch ábhartha agus an Coimisiún a chur ar an eolas faoi sin. Tá sé tábhachtach freisin go mbeadh an Coimisiún ar an eolas faoi iarrataí ar fhaisnéis ó thríú tíortha a bhaineann le gníomhaíochtaí oibreoirí eacnamaíocha atá bunaithe san Aontas maidir le soláthar táirgí atá ábhartha i gcás géarchéime toisc go bhféadfadh bearta tosaíochta ó na tríú tíortha sin a bhféadfadh tionchar suntasach a bheith acu ar sholáthar na dtáirgí sin san Aontas agus ar fheidhmiú cuí an mhargaidh inmheánaigh a bheith mar thoradh ar iarrataí ar fhaisnéis mar sin. Dá bhrí sin, ba cheart don oibreoir eacnamaíoch lena mbaineann an Ballstát a bhfuil a láithreán táirgthe lonnaithe ar a chríoch a chur ar an eolas in am trátha agus ba cheart don Bhallstát sin, ar a uain, an Coimisiún a chur ar an eolas, ionas go mbeidh an Ballstát lena mbaineann agus an Coimisiún in ann a iarraidh ar an oibreoir eacnamaíoch lena mbaineann faisnéis atá cosúil leis an bhfaisnéis arna hiarraidh ag an tríú tír a chur ar fáil.

(96)

I gcásanna ina bhfuil ganntanais thromchúiseacha leanúnacha táirgí atá ábhartha i gcás géarchéime ann nó i gcás éileamh thar a bheith ard ar tháirgí atá ábhartha i gcás géarchéime as a n-eascródh tionchar diúltach tromchúiseach ar fheidhmiú cuí an mhargaidh inmheánaigh nó lena mbaineann garbhaol go dtarlódh a leithéid, d’fhéadfadh bearta tosaíochta ar leibhéal an Aontais darb aidhm infhaighteacht táirgí atá ábhartha i gcás géarchéime a áirithiú a bheith fíor-riachtanach chun feidhmiú cuí an mhargaidh inmheánaigh do tháirgí cosanta agus a shlabhraí soláthair a áirithiú. I ndáil leis sin, ba cheart don Choimisiún a bheith in ann, arna iarraidh sin do Bhallstát, iarrataí a bhfuil rátáil tosaíochta ag baint leo a úsáid chun soláthar táirgí cosanta atá ábhartha i gcás géarchéime agus táirgí atá ábhartha i gcás géarchéime nach táirgí cosanta iad araon a éascú, agus orduithe a bhfuil rátáil tosaíochta ag baint leo chun soláthar táirgí atá ábhartha i gcas géarchéime nach táirgí cosanta iad a áirithiú. Ba cheart don Chomhairle na bearta tosaíochta sin a ghníomhachtú.

(97)

Ba cheart iarrataí ón gCoimisiún a bheith i gceist le hiarrataí a bhfuil rátáil tosaíochta ag baint leo, ar thionscnamh Ballstáit, ar oibreoirí eacnamaíocha ábhartha atá bunaithe san Aontas chun glacadh le horduithe táirgí atá ábhartha i gcás géarchéime nó chun tosaíocht a thabhairt dóibh. Mar ionstraim na rogha deiridh chun a áirithiú gur féidir le slabhraí soláthair cosanta leanúint de bheith ag oibriú le linn géarchéim soláthair, agus nuair is gá agus nuair is comhréireach iad a úsáid chun na críche sin amháin, ba cheart na hiarrataí tosaíochta sin a dhíriú ar thacaíocht a thabhairt do Bhallstát a bhfuil deacrachtaí tromchúiseacha aige ordú a dhéanamh nó conradh a fhorghníomhú chun táirgí atá ábhartha i gcás géarchéime a sholáthar. Ba cheart an deis a bheith ag oibreoirí eacnamaíocha diúltú a bheith faoi réir iarraidh a bhfuil rátáil tosaíochta ag baint léi. Agus iarraidh a bhfuil rátáil tosaíochta ag baint léi á heisiúint aige, ba cheart don Choimisiún an tionchar diúltach a d’fhéadfadh a bheith aici ar an iomaíocht sa mhargadh inmheánach a chur san áireamh, chomh maith leis an mbaol go ngéarófaí saobhadh an mhargaidh léi. Ina theannta sin, agus faighteoirí agus tairbhithe na n-iarrataí a bhfuil rátáil tosaíochta ag baint leo á roghnú, níor cheart a bheith idirdhealaitheach.

(98)

I bhfianaise an mheatha mhéadaithe ar chomhthéacs slándála an Aontais, rud atá nasctha le bagairt leanúnach threisithe na Rúise i gcomhthéacs a cogaidh fhoghaigh ar an Úcráin, tá sé ríthábhachtach aghaidh a thabhairt ar na deacrachtaí a d’fhéadfadh a bheith ag na Ballstáit maidir le hordú a dhéanamh nó conradh a fhorghníomhú a bhaineann le soláthar táirgí cosanta, go háirithe i gcás ina n-eascraíonn na deacrachtaí sin as suaitheadh i soláthar táirgí atá ábhartha i gcás géarchéime ach nach táirgí cosanta iad. Go deimhin, i gcás inar táirgí dé-úsáide nó sibhialta iad na táirgí atá ábhartha i gcás géarchéime, is féidir le slabhraí soláthair cosanta, agus iad ag iarraidh rochtain a fháil ar na táirgí sin atá ábhartha i gcás géarchéime, a bheith san iomaíocht le slabhraí soláthair nach mbaineann leis an gcosaint, agus a bhfuil cumhacht ceannaitheora i bhfad níos láidre acu. Is gá, dá bhrí sin, foráil a dhéanamh maidir le hionstraim bhreise na rogha deiridh, i gcásanna nach bhfuil táirgeadh nó soláthar na dtáirgí sin atá ábhartha i gcás géarchéime nach táirgí cosanta iad a bhaint amach le haon bheart eile, lena n-áirítear iarraidh tosaíochta. Dá bhrí sin, le horduithe a bhfuil rátáil tosaíochta ag baint leo, ba cheart é a chur ar a chumas don Choimisiún oibleagáid a chur ar oibreoirí eacnamaíocha atá bunaithe san Aontas táirgí atá ábhartha i gcás géarchéime nach táirgí cosanta iad a tháirgeadh nó a sholáthar tar éis comhaontú roimh ré a fháil ón mBallstát a bhfuil láithreán táirgthe an oibreora eacnamaíoch lena mbaineann lonnaithe ar a chríoch agus ón mBallstát a bhfuil struchtúr bainistíochta feidhmiúcháin an oibreora eacnamaíoch lonnaithe ar a chríoch. Níor cheart don Choimisiún orduithe a bhfuil rátáil tosaíochta ag baint leo a eisiúint i gcás nach bhfuil an t-oibreoir eacnamaíoch in ann an t-ordú a chomhlíonadh fiú má thugtar tosaíocht dó, bíodh sin mar gheall ar chumas táirgeachta nó acmhainneacht táirgeachta neamhleor nó ar fhorais theicniúla, nó toisc go gcuirfeadh sé sin ualach eacnamaíoch míréasúnta ar an oibreoir eacnamaíoch agus go mbeadh agus cruatan ar leith i gceist leis dó, lena n-áirítear riosca substaintiúil a bhainfeadh le leanúnachas gnó. I gcás ina dtagann cúiseanna mar sin chun cinn tar éis don Choimisiún gníomh cur chun feidhme a ghlacadh lena gcuirtear oibreoir eacnamaíoch faoi réir aon ordú nó iarraidh a bhfuil rátáil tosaíochta ag baint leis, ba cheart an t-oibreoir eacnamaíoch sin a bheith in ann a iarraidh ar an gCoimisiún an gníomh cur chun feidhme lena mbaineann a mhodhnú.

(99)

Maidir le hordú nó iarraidh a bhfuil rátáil tosaíochta ag baint leis ba cheart é a ghlacadh ar bhonn sonraí oibiachtúla fíorasacha intomhaiste cuí-réasúnaithe. Leis an iarraidh sin, ba cheart aird a thabhairt ar leasanna dlisteanacha na ngnóthas, chomh maith leis an gcostas agus leis an iarracht is gá maidir le haon athrú ar sheicheamh na táirgeachta. Nuair a ghlacfar í nó nuair a fhorchuirfear í, ba cheart tosaíocht a bheith ag an oibleagáid an iarraidh a bhfuil rátáil tosaíochta ag baint léi nó an t-ordú a bhfuil tosaíocht ag baint leis a chomhlíonadh thar aon oibleagáidí feidhmíochta faoin dlí príobháideach nó faoin dlí poiblí. I gcás ina mbaineann cuspóir iarrata tosaíochta le táirge cosanta, ba cheart a shonrú san iarraidh raon feidhme na n-oibleagáidí conarthacha ar cheart tosaíocht a bheith aige ina leith. Gach iarraidh nó ordú tosaíochta a bhfuil rátáil tosaíochta ag baint leis nó léi, ba cheart í a chur isteach ar phraghas cóir réasúnta. Ba cheart bheith in ann praghas mar sin a ríomh ar bhonn na bpraghsanna is infheidhme le blianta beaga anuas, faoi réir cúiseanna a thabhairt maidir le haon mhéadú nó laghdú, mar shampla, boilsciú nó costais ionchuir a chur san áireamh. I bhfianaise a thábhachtaí atá sé soláthar táirgí atá ábhartha i gcás géarchéime a áirithiú, ar táirgí iad atá fíor-riachtanach d’fheidhmiú iomchuí an mhargaidh inmheánaigh agus dá shlabhraí soláthair, níor cheart go bhfágfadh comhlíonadh na hoibleagáide maidir le hiarraidh nó ordú a chomhlíonadh a bhfuil rátáil tosaíochta ag baint léi nó leis go mbeadh tríú páirtithe faoi dhliteanas i leith damáistí a d’fhéadfadh eascairt as aon sárú i leith oibleagáidí conarthacha arna rialú le dlí Ballstáit, a mhéid ba ghá na hoibleagáidí sin a shárú chun an tosaíocht shainordaithe a chomhlíonadh. Ba cheart cead a bheith ag oibreoirí eacnamaíocha a d’fhéadfadh a bheith laistigh de raon feidhme iarrata tosaíochta foráil a dhéanamh, faoi choinníollacha a gconarthaí tráchtála, d’iarmhairtí a d’fhéadfadh a bheith ag iarraidh tosaíochta.

(100)

I gcás inar ghlac an t-oibreoir eacnamaíoch go sainráite le hiarraidh a bhfuil rátáil tosaíochta ag baint léi agus ina bhfuil gníomh cur chun feidhme glactha ag an gCoimisiún tar éis an ghlactha sin, nó i gcás inar forchuireadh ordú a bhfuil rátáil tosaíochta ag baint leis ar an oibreoir eacnamaíoch le gníomh cur chun feidhme arna ghlacadh ag an gCoimisiún, ba cheart don oibreoir eacnamaíoch coinníollacha uile an ghnímh cur chun feidhme sin a chomhlíonadh. Mura gcomhlíonann an t-oibreoir eacnamaíoch na coinníollacha a leagtar síos sa ghníomh cur chun feidhme, ba cheart an tairbhe a bhaineann le tarscaoileadh dliteanais chonarthaigh a chailleadh mar gheall air sin. Nuair a dhéantar an neamhchomhlíonadh d’aon ghnó nó nuair is mórfhaillí is cúis leis, ba cheart an Coimisiún a bheith in ann fíneáil nó íocaíocht phionósach thréimhsiúil a fhorchur ar an oibreoir eacnamaíoch, faoi réir phrionsabal na comhréireachta. Ba cheart don Choimisiún aon chúis cuí-mhínithe arna cur in iúl ag an oibreoir eacnamaíoch a chur san áireamh chun a chinneadh cé acu atá nó nach bhfuil sé riachtanach agus comhréireach fíneálacha nó íocaíochtaí pionósacha tréimhsiúla a fhorchur.

(101)

Sa chás eisceachtúil go bhfuil oibreoir eacnamaíoch atá bunaithe san Aontas faoi réir beart lena mbaineann ordú a bhfuil rátáil tosaíochta ag baint leis nó iarraidh tosaíochta ar tháirge atá ábhartha i gcás géarchéime ó thríú tír, ba cheart dó fógra a thabhairt don Choimisiún, chun bonn eolais a chur faoi mheasúnú i dtaobh an mbeidh tionchar suntasach ag an mbeart sin ar shlándáil an tsoláthair táirgí atá ábhartha i gcás géarchéime agus ar fheidhmiú cuí an mhargaidh inmheánaigh, chomh maith le haon bheart iomchuí a bhféadfadh gá a bheith léi mar fhreagairt ar an mbeart sin.

(102)

Leis an iarraidh nó an oibleagáid maidir le tosaíocht a thabhairt do tháirgeadh nó do sholáthar táirgí áirithe, ní bhíonn éifeacht dhíréireach aici sin ar an tsaoirse chun gnó a sheoladh agus ar an tsaoirse conartha a chosnaítear le hAirteagal 16 den Chairt um Chearta Bunúsacha an Aontais Eorpaigh (‘an Chairt’), ná ar an gceart chun maoine a leagtar síos in Airteagal 17 di. I gcomhréir le hAirteagal 52(1) den Chairt, ní mór foráil a dhéanamh le dlí d’aon teorannú ar fheidhmiú na gceart agus na saoirsí sin agus ní mór inneachar sár-riachtanach na gceart agus na saoirsí sin a urramú, agus ní mór é a bheith faoi réir phrionsabal na comhréireachta.

(103)

I gcás ina ngníomhachtófar an staid géarchéime soláthair a bhaineann leis an tslándáil ba cheart na bearta atá ar fáil faoin staid géarchéime soláthair a bheith ar fáil freisin má mheasann an Chomhairle gurb iomchuí sin agus má shonraítear iad sa ghníomh cur chun feidhme lena ngníomhachtaítear an staid géarchéime soláthair a bhaineann leis an tslándáil.

(104)

Rialaítear aistrithe táirgí cosanta laistigh den Aontas le Treoir 2009/43/CE ó Pharlaimint na hEorpa agus ón gComhairle (30), darb aidhm na haistrithe sin a shimpliú chun dea-fheidhmiú an mhargaidh inmheánaigh do tháirgí cosanta a áirithiú. Mar a doiciméadaíodh i meastóireachtaí a rinneadh ar an Treoir sin roimhe seo, is gnách i gcónaí ceadúnais aistrithe a priori, idir aonair agus domhanda, a dheonú maidir le gluaiseacht táirgí cosanta laistigh den mhargadh inmheánach agus bíonn éagsúlachtaí ann, ar éagsúlachtaí suntasacha iad uaireanta, ó Bhallstát amháin go Ballstát eile maidir leis an meán-am chun iarratais a phróiseáil. Le linn géarchéim soláthair a bhaineann leis an tslándáil, agus i gcás ina measann an Chomhairle go bhfuil gá leis, ba cheart don Chomhairle gníomh cur chun feidhme a ghlacadh lena ngníomhachtaítear an staid géarchéime soláthair a bhaineann leis an tslándáil a bheith in ann tréimhse ama a chinneadh, nár cheart a bheith níos faide ná 2 sheachtain, inar cheart do na húdaráis náisiúnta lena mbaineann déileáil leis na hiarratais a luaithe a gheofar ina n-iomláine iad chun gluaiseacht na dtáirgí sin sa mhargadh inmheánach a éascú a thuilleadh. Ina theannta sin, is é is aidhm don Rialachán seo aistrithe táirgí atá ábhartha i gcás géarchéime laistigh den Aontas a éascú i gcomhthéacs géarchéim soláthair. Dá bhrí sin, ba cheart a shoiléiriú, maidir le Ballstát a fhorchuireann teorainneacha le honnmhairiú comhpháirteanna ar táirgí iad atá ábhartha i gcás géarchéime agus a mheasann sé a bheith íogair de réir bhrí Threoir 2009/43/CE, nár cheart dó údaruithe breise a éileamh chun na comhpháirteanna lena mbaineann a aistriú laistigh den Aontas i gcás ina soláthraíonn an faighteoir dearbhú úsáide ina ndearbhaíonn sé go bhfuil na comhpháirteanna atá faoi réir an cheadúnais aistrithe sin comhtháite nó go bhfuil siad le comhtháthú i dtáirge cosanta agus nach féidir iad a aistriú ná a onnmhairiú ar an ábhar sin. Níor cheart do na bearta sin difear a dhéanamh do rialacha an Aontais ná do rialacha náisiúnta atá ann cheana lena rialaítear aistriú agus onnmhairiú táirgí cosanta.

(105)

Ós rud é go bhfuil sé ríthábhachtach go mbeadh deimhnithe ag táirgí cosanta chun feidhmiú cuí an mhargaidh inmheánaigh do tháirgí cosanta a áirithiú, go háirithe le linn géarchéim soláthair a bhaineann leis an tslándáil, ba cheart a chumasú leis an Rialachán seo, sa bhreis ar dhlús a chur leis na próisis náisiúnta atá ann cheana, aitheantas frithpháirteach éigeantach a thabhairt do tháirge cosanta atá ábhartha i gcás géarchéime agus atá deimhnithe go dleathach i mBallstát.

(106)

I dteannta na mbeart eile dá bhforáiltear sa Rialachán seo chun aghaidh a thabhairt ar an staid géarchéime soláthair a bhaineann leis an tslándáil, ba cheart do na Ballstáit, i gcás ina ngníomhachtóidh an Chomhairle na bearta sin, breithniú a dhéanamh, de réir an cháis, ar úsáid a bhaint as díolúintí nó maoluithe a bhaineann leis an tslándáil faoin dlí náisiúnta agus faoi dhlí an Aontais is infheidhme, chun ceadúnais a dheonú a bhaineann le saoráidí táirgthe táirgí cosanta a bhaineann leis an tslándáil a phleanáil, a thógáil agus a oibriú nó d’fhonn leanúnachas táirgthe na dtáirgí sin a áirithiú, má mheasann siad go n-éascódh úsáid na ndíolúintí nó na maoluithe sin slándáil soláthair táirgí cosanta atá ábhartha i gcás géarchéime. D’fhéadfadh feidhm a bheith aige sin go háirithe maidir le dlí an Aontais a bhaineann le saincheisteanna comhshaoil, sláinte agus sábháilteachta, rud atá fíor-riachtanach chun cosaint shláinte an duine agus an chomhshaoil a fheabhsú, chomh maith le forbairt inbhuanaithe agus shábháilte a bhaint amach. Ós rud é go bhfuil bacainní ar ghluaiseacht táirgí cosanta atá ábhartha i gcás géarchéime ar an margadh inmheánach mar shaintréith de ghéarchéim soláthair a bhaineann leis an tslándáil, is iomchuí, sna himthosca sin, tacaíocht airgeadais a cheadú faoin gClár de ghníomhaíochtaí nuálaíochta, rud a fhágann gur féidir táirgí cosanta a bheith ar fáil go han-tapa ar an margadh. Go deimhin, rannchuideodh tacaíocht do ghníomhaíochtaí den sórt sin le haghaidh a thabhairt ar na bacainní lena mbaineann, go háirithe trí ghiorrú suntasach ar aga seachadta táirgí cosanta nó olltáirgeadh táirgí den sórt sin a chumasú. Dá bhrí sin, ba cheart don Chomhairle a bheith in ann, nuair a ghníomhachtóidh sí staid na géarchéime soláthair a bhaineann leis an tslándáil, na gníomhaíochtaí nuálaíochta sin a dhéanamh incháilithe faoin gClár.

(107)

Ba cheart comhlíonadh na n-oibleagáidí a fhorchuirtear faoin Rialachán seo a bheith infhorfheidhmithe trí bhíthin fíneálacha agus íocaíochtaí tréimhsiúla pionóis. Chuige sin, ba cheart leibhéil iomchuí fíneálacha a leagan síos i leith neamhchomhlíonadh iarrataí ar fhaisnéis, neamhchomhlíonadh oibleagáidí a eascraíonn as iarraidh a bhfuil rátáil tosaíochta ag baint léi n agus neamhchomhlíonadh oibleagáid fógra a thabhairt a bhfuil feidhm aici i gcás ina bhfuil oibreoir eacnamaíoch atá bunaithe san Aontas faoi réir beart tosaíochta tríú tír, agus leibhéil éagsúla tromchúise an neamhchomhlíonta idir an dá oibleagáid, agus uasteorainneacha éagsúla do FBManna á gcur san áireamh. Thairis sin, ba cheart íocaíochtaí pionósacha tréimhsiúla a leagan síos i gcás neamhchomhlíonadh na hoibleagáide maidir le horduithe a bhfuil rátáil tosaíochta ag baint leo a ghlacadh agus a chomhlíonadh, ar cheart dóibh a bheith comhréireach, agus uasteorainneacha éagsúla acu i gcás FBManna. Ba cheart feidhm a bheith ag tréimhsí teorann maidir le fíneálacha agus íocaíochtaí tréimhsiúla pionóis a fhorchur, sa bhreis ar na tréimhsí teorann chun pionóis a fhorfheidhmiú. Ina theannta sin, ba cheart don Choimisiún ceart éisteachta a thabhairt do na hoibreoirí eacnamaíocha lena mbaineann.

(108)

Bhí sé ar cheann de na dúshláin a sainaithníodh le linn ghéarchéim COVID-19 nárbh ann do líonra chun ullmhacht a áirithiú, agus nár leor an chomhroinnt faisnéise ná an comhordú le haghaidh bearta freagartha idir na Ballstáit, ar thaobh amháin, agus idir na Ballstáit agus an Coimisiún, ar an taobh eile. Dá bhrí sin, ba cheart sásra rialachais a bheith ann chun tacú le gnóthú an chuspóra a shaothraítear leis an Rialachán seo maidir le hullmhú do thionchar na ngéarchéimeanna soláthair a bheidh ann amach anseo ar an margadh inmheánach do tháirgí cosanta agus freagairt ar an tionchar sin. Leis an Rialachán seo, ba cheart Bord a bhunú, chun comhar, malartú faisnéise agus cur chun feidhme rianúil, éifeachtach agus comhchuibhithe na mbeart dá bhforáiltear sa Rialachán seo a éascú, darb aidhm slándáil an tsoláthair táirgí cosanta a áirithiú. Ba cheart ionadaithe ó na Ballstáit agus ón gCoimisiún a bheith ar an mBord. Is iomchuí go ndéanfadh an Coimisiún agus an Ballstát ag a bhfuil uachtaránacht rothlach na Comhairle comhchathaoirleacht ar an mBord ós rud é nach mór, chun feidhmiú cuí an mhargaidh inmheánaigh do tháirgí cosanta tráth géarchéime soláthair, nó ullmhú do na géarchéimeanna soláthair sin, go gcuirfí san áireamh cumas na mBallstát a gcumais chosanta a fhorbairt, a fháil agus a bhainistiú agus a n-ullmhacht cosanta a fheabhsú. Ina theannta sin, i bhfianaise a mhéid a rannchuidíonn an córas slándála soláthair le cumas an Aontais a leasanna slándála agus cosanta a chosaint, ba cheart an tArdionadaí agus an Ghníomhaireacht Eorpach um Chosaint (GEC) a bheith ina gcomhaltaí den Bhord freisin. Go háirithe, d’fhéadfadh snáitheanna oibre leanúnacha GEC maidir le slándáil an tsoláthair táirgí cosanta a úsáid chun an Rialachán seo a chur chun feidhme. Éascaíonn GEC comhroinnt dea-chleachtas agus treisíonn sé comhar idir na Ballstáit maidir le slándáil an tsoláthair i réimse na cosanta. Gineann sé léargais freisin ar scrogaill a dhéanann difear do shlabhraí soláthair táirgí cosanta. Dá bhrí sin, ba cheart GEC a bheith in ann a thuairimí agus a shaineolas a roinnt, inter alia, ar an mBord, a rannchuideoidh le hullmhú do thionchar géarchéimeanna soláthair ar an margadh inmheánach do tháirgí cosanta agus freagairt ar an tionchar sin. Ba cheart é a bheith de cheart ag tíortha comhlachaithe a bheith ina gcomhaltaí, gan cearta vótála, den Bhord i gcomhréir leis na coinníollacha a leagtar amach faoin gComhaontú maidir leis an Limistéar Eorpach Eacnamaíoch. Ba cheart cuireadh a thabhairt d’ionadaithe ó Pharlaimint na hEorpa chuig cruinnithe an Bhoird mar bhreathnóirí. Ba cheart don Bhord comhordú idir na Ballstáit a éascú agus moltaí a sholáthar don Choimisiún agus cúnamh a thabhairt don Choimisiún maidir le cur chun feidhme na sásraí a bhunaítear leis an Rialachán seo darb aidhm slándáil an tsoláthair a áirithiú, go háirithe trí ghéarchéimeanna i soláthar táirgí atá ábhartha i gcás géarchéime a réamh-mheas, a ullmhú, a chosc agus aghaidh a thabhairt orthu.

(109)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil le cláir oibre a ghlacadh chun na tosaíochtaí cistiúcháin agus na coinníollacha cistiúcháin is infheidhme a leagan amach, cistiú a dhámhachtain le haghaidh gníomhaíochtaí sonracha, SCAEnna a bhunú, táirgí atá ábhartha i gcás géarchéime a shainaithint agus a thabhairt cothrom le dáta, liosta d’údaráis náisiúnta deimhniúcháin a bhunú agus a choinneáil ar bun, bearta tosaíochta, agus pionóis a fhorchur. Ba cheart sainiúlachtaí na hearnála cosanta a chur san áireamh, go háirithe freagracht na mBallstát, na dtíortha comhlachaithe nó na hÚcráine maidir leis an bpróiseas pleanála agus fála. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (31).

(110)

Ba cheart é a bheith indéanta cuireadh a thabhairt d’ionadaithe na hÚcráine chuig cruinnithe an choiste i gcás inar gá a n-ionchur i ndáil le bearta cur chun feidhme a bhaineann leis an Úcráin, amhail na gníomhartha cur chun feidhme a bhaineann leis an Ionstraim um Thacaíocht don Úcráin. Chuirfeadh sé sin ar chumas ionadaithe den sórt sin a dtuairimí a roinnt agus freagra a thabhairt ar cheisteanna ó na Ballstáit. Mar sin féin, níor cheart cead a bheith acu a bheith i láthair le linn an phlé, ná páirt a ghlacadh i vótáil an choiste.

(111)

Ba cheart feidhm a bheith ag an Rialachán seo gan dochar do rialacha iomaíochta an Aontais, go háirithe Airteagail 101 go 109 CFAE agus do na gníomhartha dlí a thugann éifeacht do na hAirteagail sin.

(112)

Níor cheart ach na costais is gá chun cuspóirí an Chláir agus na hIonstraime um Thacaíocht don Úcráin a shaothrú a chumhdach le cistiú ón Aontas faoin Rialachán seo agus ní féidir na costais a eascraíonn as CES a chumhdach leis. Mar thoradh air sin, níor cheart, le cistiú ón Aontas faoin gClár agus leis an Ionstraim um Thacaíocht don Úcráin, na costais a chumhdach a bhaineann le táirgí cosanta a cheannach ná a chothabháil chun críoch míleata nó cosanta, lena n-áirítear i gcomhthéacs comhthiomsú ullmhachta tionsclaíche i réimse na cosanta a bhunú, a bhainistiú agus a chothabháil. Ba cheart, áfach, a bheith in ann cistiú ón Aontas faoin gClár agus faoin Ionstraim um Thacaíocht don Úcráin na costais a thabhaítear i gcomhthéacs cheannach nó chothabháil na dtáirgí sin a chumhdach i gcás ina bhfuil na costais sin riachtanach chun iomaíochas BTTCE a neartú nó chun BTTC na hÚcráine a théarnamh, a atógáil agus a nuachóiriú, go háirithe costais neamh-athfhillteacha.

(113)

I gcomhréir le hAirteagal 241 CFAE, is féidir leis an gComhairle a iarraidh ar an gCoimisiún dul i mbun aon staidéir a mheasann an Chomhairle a bheith fóinteach chun na cuspóirí coiteanna a ghnóthú, agus aon tograí iomchuí a chur faoina bráid. Déanfaidh an Coimisiún breithniú pras mionsonraithe ar aon iarraidh den chineál sin ar thograí.

(114)

Ba cheart feidhm a bheith ag an Rialachán seo gan dochar do cháilíocht shonrach beartais slándála agus cosanta Ballstát áirithe.

(115)

Tá an Rialachán seo gan dochar do rialacha an Aontais agus rialacha náisiúnta atá ann faoi láthair maidir le honnmhairiú táirgí cosanta agus do na hoibleagáidí dá bhforáiltear le Treoir 2009/43/CE.

(116)

Ós rud é nach féidir leis na Ballstáit cuspóirí an Rialacháin seo, eadhon ceannaireacht theicniúil, nuálaíocht, ullmhacht, iomaíochas fadtéarmach, athléimneacht, comhtháthú agus ullmhacht BTTCE a fheabhsú, rud lena n-áiritheofar go mbeidh táirgí cosanta ar fáil agus á soláthar go tráthúil, agus lena rannchuideofar le téarnamh, atógáil agus nuachóiriú BTTC na hÚcráine, a ghnóthú go leordhóthanach agus, de bharr gur fearr fairsinge nó éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(117)

Chun go bhféadfar tús a chur le cur chun feidhme an Rialacháin seo a luaithe is féidir d’fhonn a chuspóirí a bhaint amach, ba cheart dó teacht i bhfeidhm mar ábhar práinne,