TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1831/2003 ó Pharlaimint na hEorpa agus ón gComhairle an 22 Meán Fómhair 2003 maidir le breiseáin a bhfuiltear lena n-úsáid i gcothú ainmhithe (1), agus go háirithe Airteagal 9(2) de,

De bharr an mhéid seo a leanas:

(1)	Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003 cuireadh isteach iarratas maidir le húdarú arb é atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le hullmhóid arb é atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649 a údarú mar bhreiseán beathaithe le haghaidh sicíní lena ramhrú, éanlaith chlóis eile lena ramhrú agus éin ornáideacha, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘cobhsaitheoirí fhlóra na stéige’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 6 Bealtaine 2025 (2) go bhfuil an ullmhóid arb á atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649 sábháilte don spriocspeiceas, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin nach greannaitheoir craicinn ná súl í an ullmhóid arb é atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649, i bhfoirm thiubhaithe. I bhfianaise na cosúlachta ó thaobh comhdhéanaimh de, is féidir an chonclúid sin a leathnú chuig foirm chaolaithe ar choinníoll go bhfuil sí foirmlithe le carbónáit chailciam amháin. Meastar gur íogróirí craicinn agus riospráide iad an dá fhoirm den bhreiseán agus go bhfuil riosca ag gabháil le haon teagmháil tríd an gcraiceann agus an chonair riospráide. Tháinig an tÚdarás ar an gconclúid thairis sin go bhféadfadh an ullmhóid arb é atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649 a bheith éifeachtúil i sicíní lena ramhrú, éanlaith chlóis eile lena ramhrú agus éin ornáideacha ar íosleibhéal cuimsithe 3 × 107 iomlán CFU/kg d’ábhair bheatha iomlána atá beartaithe. Níor mheas sé go raibh gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann an ullmhóid arb é atá inti Bacillus velezensis NRRL B-67647, Bacillus pumilus NRRL B-67648 agus Bacillus licheniformis NRRL B-67649 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh gach speicis éanlaithe clóis lena ramhrú agus le haghaidh éin ornáideacha. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)	Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH: