(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide arb é atá inti 25-hiodrocsacolacailciféaról arna tháirgeadh le Saccharomyces cerevisiae CBS 146008. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas sin le húdarú ullmhóide arb é atá inti 25-hiodrocsacolacailciféaról arna tháirgeadh le Saccharomyces cerevisiae CBS 146008 mar bhreiseán beathaithe le haghaidh gach speicis ainmhíoch seachas éanlaith chlóis, muca agus athchogantaigh, agus iarrtar ann go n-aicmeofaí an breiseán sin sa chatagóir breiseán ‘breiseáin chothaitheacha’ agus san fheidhmghrúpa ‘vitimíní, próivitimíní agus substaintí atá dea-shainithe ó thaobh ceimiceán de, a bhfuil éifeacht chomhchosúil acu’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 20 Bealtaine 2025 (2), maidir leis an ullmhóid arb é atá inti 25-hiodrocsacolacailciféaról arna tháirgeadh le Saccharomyces cerevisiae CBS 146008, go bhfuil sí sábháilte do gach speiceas ainmhíoch seachas éanlaith chlóis, muca agus athchogantaigh, agus do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid nach greannaitheoir craicinn ná súl é an breiseán. Mar gheall ar na heaspa faisnéise, áfach, níorbh fhéidir teacht ar chonclúid maidir lena acmhainneacht a bheith ina íogróir craicinn ná maidir lena éifeachtaí ar an gcóras riospráide. Tháinig an tÚdarás ar an gconclúid thairis sin go bhfuil an breiseán éifeachtúil maidir le ceanglais chothaitheacha na spriocainmhithe a chumhdach. Ní mheasann sé go bhfuil gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas i measúnú roimhe seo i ndáil le hiarratas eile ar údarú an bhreiseáin chéanna, conclúidí agus moltaí a d’fhíoraigh an tÚdarás sa tuairim uaidh an 5 Iúil 2023 (3), mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (4), níl gá le tuarascáil mheastóireachta ón tSaotharlann Tagartha.

(6)

I bhfianaise an mhéid thuas, measann an Coimisiún go gcomhlíonann ullmhóid arb é atá inti 25-hiodrocsacolacailciféaróil arna tháirgeadh le Saccharomyces cerevisiae CBS 146008 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh gach speicis ainmhíoch, seachas éanlaith chlóis, muca agus athchogantaigh. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,