(1)

De bhun Airteagal 27 den Chairt um Chearta Bunúsacha an Aontais Eorpaigh (‘an Chairt’), ní mór a ráthú, ar gach leibhéal iomchuí, go gcuirtear oibrithe nó dá gcuid ionadaithe ar an eolas agus go rachfaí i gcomhairle leo in am trátha, sna cásanna agus faoi na coinníollacha dá bhforáiltear le dlí an Aontais agus leis an dlí náisiúnta agus le cleachtais náisiúnta. Athdhearbhaítear le Prionsabal Uimh. 8 de Cholún Eorpach na gCeart Sóisialta go bhfuil an ceart ag oibrithe nó ag a n-ionadaithe go gcuirfí ar an eolas iad agus go rachfaí i gcomhairle leo in am trátha maidir le hábhair a bhaineann leo.

(2)

Maidir le cúrsaí trasnáisiúnta, féachann cuspóir Threoir 2009/38/CE ó Pharlaimint na hEorpa agus ón gComhairle (3) le héifeacht phraiticiúil a thabhairt do na bunphrionsabail sin trí íoscheanglais a leagan síos maidir le fostaithe i ngnóthais ar leibhéal an Chomhphobail agus i ngrúpaí gnóthas ar leibhéal an Chomhphobail a chur ar an eolas agus dul i gcomhairle leo.

(3)

Ina mheastóireacht ar Threoir 2009/38/CE an 15 Bealtaine 2018, dheimhnigh an Coimisiún breisluach agus ábharthacht na Treorach sin i bprionsabal. Mheas sé go bhfuil go leor d’fhorálacha na Treorach sách solúbtha chun freastal ar réaltachtaí teicneolaíocha agus eacnamaíocha atá ag athrú i rith an ama agus freastal freisin ar chineálacha éagsúla gnóthais nó grúpa. Mar shampla, tá feidhm aici maidir le gach grúpa gnóthas ar leibhéal an Chomhphobail, gan beann ar chineál na socruithe dlíthiúla lena gceadaítear feidhmiú an tionchair cheannasaigh idir na gnóthais rialaitheacha agus na gnóthais faoi rialú atá i ngrúpaí den sórt sin. Dá bhrí sin, is féidir le gnóthais atá nasctha, mar shampla, trí chomhaontuithe saincheadúnais nó trí chomhaontuithe ceadúnais, teacht faoi shainmhíniú an ghrúpa gnóthas ar leibhéal an Chomhphobail, ar choinníoll go mbunaítear an tionchar ceannasach.

(4)

Mar sin féin, shainaithin meastóireacht an Choimisiúin easnaimh freisin, mar shampla, maidir le héifeachtacht an phróisis comhairliúcháin, an rochtain ar cheartas, pionóis agus an léirmhíniú ar choincheapa áirithe.

(5)

An 2 Feabhra 2023, ghlac Parlaimint na hEorpa, de bhun Airteagal 225 den Chonradh ar Fheidhmiú an Aontais Eorpaigh (CFAE), rún reachtach féintionscnaimh ina bhfuil moltaí maidir le hathbhreithniú ar Threoir 2009/38/CE. Ina dhiaidh sin, rinne an Coimisiún comhairliúchán dhá chéim leis na comhpháirtithe sóisialta de bhun Airteagal 154 CFAE maidir leis an ngá atá le bearta agus ábhar féideartha beart chun aghaidh a thabhairt ar easnaimh Threoir 2009/38/CE. Bhailigh an Coimisiún fianaise freisin trí staidéar ina ndearnadh suirbhé spriocdhírithe ar líne, agallaimh le páirtithe leasmhara, ceardlanna agus anailís ar chásdlí náisiúnta agus forálacha ábhartha sa dlí náisiúnta.

(6)

Léirítear san fhianaise go raibh an éiginnteacht dhlíthiúil maidir leis an gcoincheap ‘gnóthaí trasnáisiúnta’ ina cúis le difríochtaí sa léirmhíniú agus le díospóidí. Chun an deimhneacht dhlíthiúil a áirithiú agus an baol go dtarlódh díospóidí mar sin a laghdú, ní mór an coincheap ‘gnóthaí trasnáisiúnta’ a shoiléiriú. Chuige sin, is iomchuí a shoiléiriú go gcumhdaítear le Treoir 2009/38/CE, ní hamháin cásanna inar féidir coinne a bheith leis go réasúnta go mbeadh tionchar ag bearta atá á mbeartú ag lucht bainistithe gnóthais nó grúpa gnóthas ar fhostaithe an ghnóthais nó an ghrúpa sin nó ar fhostaithe de chuid aon bhunaíochta de chuid an ghnóthais nó an ghrúpa sin, i níos mó ná Ballstát amháin, ach freisin cásanna inar féidir coinne a bheith leis go réasúnta nach mbeadh tionchar ag na bearta sin ach ar na fostaithe i mBallstát amháin, ach gur féidir coinne a bheith leis go réasúnta freisin go mbeadh tionchar ag iarmhairtí na mbeart sin ar na fostaithe i mBallstát amháin eile ar a laghad. Tá gá leis an soiléiriú sin i bhfianaise cásanna ina bhfuil sé ar intinn ag gnóthas bearta a dhéanamh, mar shampla dífhostú, iomarcaíochtaí, leithdháileadh gníomhaíochtaí táirgeachta nó seachfhoinsiú gníomhaíochtaí, ina bhfuiltear ag díriú go sainráite ar bhunaíochtaí i mBallstát amháin ach ar féidir coinne a bheith leis go réasúnta go mbeidh iarmhairtí acu a bheidh tionchar acu ar fhostaithe an ghnóthais, an ghrúpa sin nó ar fhostaithe de chuid aon bhunaíochta de chuid an ghnóthais nó an ghrúpa sin, i mBallstát eile, mar shampla de bharr athruithe sa slabhra soláthair trasteorann nó sna gníomhaíochtaí táirgeachta trasteorann. Cumhdaíonn coincheap na ngnóthaí trasnáisiúnta bearta a d’fhéadfadh tionchar a bheith acu ar fhostaithe ar bhealach substaintiúil, seachas ar bhealach neafaiseach, agus nach mbaineann ach amháin le fostaithe aonair nó le gnáthchinntí oibríochtúla. Chuige sin, ba cheart a shoiléiriú go bhfuil raon na n-éifeachtaí a d’fhéadfadh a bheith ag cúrsaí trasnáisiúnta ar an lucht saothair agus leibhéal an lucht bainistíochta lena mbaineann le cur san áireamh chun cinneadh a dhéanamh an dtagann ábhar faoi inniúlacht Comhairle Oibreacha Eorpaí.

(7)

Áirítear ceanglais normatacha sna sainmhínithe ar ‘cur ar an eolas’ agus ‘dul i gcomhairle’ i dTreoir 2009/38/CE. Ar mhaithe le comhleanúnachas agus soiléireacht dhlíthiúil, is iomchuí na forálacha normatacha sin a aistriú chuig an airteagal maidir le hoibriú na Comhairle Oibreacha Eorpaí agus an nós imeachta chun oibrithe a chur ar an eolas agus chun dul i gcomhairle leo.

(8)

Is leis an dlí náisiúnta agus leis an gcleachtas náisiúnta a rialaítear toghadh agus ceapadh ionadaithe na bhfostaithe. Tá éagsúlacht sna córais náisiúnta ó Bhallstát go Ballstát ó thaobh ionadaithe na bhfostaithe a ainmniú agus a thoghadh. Is féidir le hionadaithe na bhfostaithe a bheith ina n-ionadaithe ceardchumainn, i gcás ina bhforáiltear amhlaidh i ndlí náisiúnta nó i gcleachtas náisiúnta an Bhallstáit.

(9)

D’fhonn comhaontú a thabhairt i gcrích chun Comhairle Oibreacha Eorpach a bhunú, ceanglaítear ar an lucht bainistíochta lárnach dul i mbun caibidlíochta le comhlacht speisialta caibidlíochta a dhéanann ionadaíocht ar fhostaithe. Chun an deimhneacht dhlíthiúil a mhéadú i ndáil leis sin, ba cheart a shoiléiriú go gceanglaítear ar an lucht bainistíochta lárnach líon leordhóthanach cruinnithe a thionól leis an gcomhlacht speisialta caibidlíochta lena mbeidh an dá pháirtí in ann teacht ar an gcomhaontú.

(10)

D’fhéadfadh sé go mbeadh comhairle dlí de dhíth ar chomhaltaí na gcomhlachtaí speisialta caibidlíochta chun na cúraimí atá orthu faoi Threoir 2009/38/CE a chur i gcrích. Mar sin féin, níl sé soiléir go leor go bhfuil siad i dteideal na táillí dlíthiúla gaolmhara a bheith cumhdaithe dóibh. Chuige sin, ba cheart a shoiléiriú go n-iompróidh an lucht bainistíochta lárnach na costais sin nuair a thabhaíonn comhaltaí de chomhlachtaí speisialta caibidlíochta iad. Ba cheart do chomhlachtaí speisialta caibidlíochta fógra a thabhairt roimh ré don lucht bainistíochta lárnach faoi na costais sin. I gcás nach eol méid beacht na gcostas roimh ré, ba cheart meastachán ar na costais, lena n-áirítear faisnéis faoi chineál an chostais, a chur in iúl don lucht bainistíochta lárnach. Is iomchuí dliteanas an lucht bainistíochta lárnaigh a theorannú do chostais dlí réasúnta chun a áirithiú nach mbeidh an lucht bainistíochta lárnach faoi dhliteanas costais ar léir iad a bheith díréireach, costais nach bhfuil nasc cuí acu le soláthar comhairle dlí ábhartha, nó costais arna nginiúint le héilimh ar follasach iad a bheith gan bhunús, suaibhreosach nó cráiteach. Thairis sin, le Treoir 2009/38/CE, tugtar lánrogha do na Ballstáit rialacha buiséadacha a leagan síos maidir le feidhmiú comhlachtaí speisialta caibidlíochta agus feidhmiú Comhairlí Oibreacha Eorpacha bunaithe ar cheanglais choimhdeacha, ag féachaint don phrionsabal nach mór don lucht bainistíochta lárnach na costais a bhaineann le stiúradh iomchuí fheidhmeanna an chomhlachta speisialta caibidlíochta a íoc. Dá bhrí sin, na forálacha i dTreoir 2009/38/CE lena dtagraítear do líon na saineolaithe atá le cistiú ag an lucht bainistíochta lárnach, tá siad iomarcach, agus ba cheart iad a scriosadh.

(11)

Le Treoir 2009/38/CE, ceanglaítear ar na páirtithe i gcomhaontú maidir le Comhairle Oibreacha Eorpach ionad chruinnithe a chinneadh don Chomhairle Oibreacha Eorpach. Ba cheart do na páirtithe sin formáid na gcruinnithe sin a chinneadh freisin, is é sin le rá cibé le láithreacht phearsanta, ar líne nó hibrideach a bheidh siad, chun, inter alia, aon amhras a sheachaint maidir lena saoirse, ar thaobh amháin, cuid de na cruinnithe nó na cruinnithe uile a reáchtáil i dtimpeallacht fhíorúil, trí bhíthin uirlisí cruinnithe ar líne, rud a laghdódh lorg comhshaoil na gcruinnithe i gcomhréir le spriocanna laghdaithe astaíochtaí an Aontais, spriocanna laghdaithe astaíochtaí náisiúnta agus spriocanna laghdaithe astaíochtaí cuideachta, agus lena n-áiritheofaí go ndéanfaí fostaithe a chur ar an eolas agus dul i gcomhairle leo ar bhealach fóinteach éifeachtúil agus ar chostais níos ísle chomhshaoil agus airgeadais, agus ar an taobh eile, cruinnithe ar an láthair a reáchtáil lena bhféadfaí timpeallacht iontaofachta a chur ar fáil, muinín a chothú agus an deis a thabhairt go ndéanfaí cumarsáid ó dhuine go duine.

(12)

D’fhéadfadh éiginnteacht agus díospóidí a bheith ann freisin maidir le costais áirithe a chumhdach agus maidir le rochtain a fháil ar acmhainní áirithe le linn fheidhmiú na gComhairlí Oibreacha Eorpacha. I gcomhréir le prionsabal neamhspleáchas na bpáirtithe, is iomchuí a cheangal go ndéanfar cineálacha áirithe acmhainní airgeadais agus ábharacha a chinneadh go sonrach i gcomhaontuithe na Comhairle Oibreacha Eorpaí, is é sin le rá, mar shampla, an cúnamh a d’fhéadfaí a fháil ó shaineolaithe – ar nós ionadaithe d’eagraíochtaí aitheanta de cheardchumainn ar leibhéal an Aontais, saineolaithe teicniúla ábhair nó saineolaithe dlí – táillí saineolaithe a chumhdach agus go bhféadfaí saineolaithe a bheith páirteach i gcruinnithe. Ba cheart aghaidh a thabhairt sna comhaontuithe freisin ar oiliúint ábhartha a sholáthar do chomhaltaí na Comhairle Oibreacha Eorpaí, agus ar chostais ghaolmhara a chumhdach, gan dochar don cheanglas an oiliúint riachtanach a sholáthar de bhun Threoir 2009/38/CE.

(13)

Maidir leis an gceanglas i dTreoir 2009/38/CE go gcuirfí san áireamh, i gcás inar féidir, an gá atá le hionadaíocht chothrom fostaithe ó thaobh a n-inscne de agus comhdhéanamh na gComhairlí Oibreacha Eorpacha á chinneadh, is léir gur neamhleor é chun cothromaíocht inscne a chur chun cinn. Tá mná fós faoi ghannionadaíocht i bhformhór na gComhairlí Oibreacha Eorpacha. Dá bhrí sin, is gá cuspóirí níos éifeachtaí agus níos sonraí a leagan síos maidir le hionadaíocht atá cothrom ó thaobh inscne de, cuspóirí a bheidh le cur chun feidhme ag an mbainistíocht agus ag ionadaithe na bhfostaithe nuair a bhíonn a gcomhaontuithe á gcaibidil nó á n-athchaibidil acu. Chun na cuspóirí sin a bhaint amach, d’fhéadfadh sé go mbeadh gá i gcásanna áirithe le tosaíocht a thabhairt don inscne tearcionadaithe nuair a dhéantar Comhairlí Oibreacha Eorpacha nó a roghchoistí a chur le chéile. I gcomhréir le cásdlí Chúirt Bhreithiúnais an Aontais Eorpaigh (4), is féidir gníomhaíocht dhearfach den sórt sin a dhéanamh, i gcomhréir le prionsabal na córa comhionainne idir fir agus mná, ar choinníoll nach dtugtar tosaíocht go huathoibríoch agus gan choinníoll do dhaoine d’inscne áirithe trí na bearta a dhéantar chun cuspóir na cothromaíochta inscne a bhaint amach, ach gur féidir critéir eile a chur san áireamh, amhail tuillteanais agus cáilíochtaí agus an nós imeachta maidir le toghchán arna bhunú leis na dlíthe náisiúnta ábhartha. Dá bhrí sin, ba cheart an tsolúbthacht is gá a bheith ag na Páirtithe i gcomhaontuithe na Comhairle Oibreacha Eorpaí chun na srianta dlíthiúla agus fíorasacha ar an ngníomhaíocht dhearfach a urramú. Ar chúiseanna comhchosúla, is iomchuí freisin féachaint leis an gcothromaíocht inscne a bhaint amach i gcomhdhéanamh na gcomhlachtaí speisialta caibidlíochta, chun an chothromaíocht inscne a chur chun cinn le linn chéim na caibidlíochta cheana féin.

(14)

Léiríonn fianaise go gcuirtear moill uaireanta ar thionscnamh na caibidlíochta thar an tréimhse 6 mhí dá bhforáiltear i dTreoir 2009/38/CE. I gcásanna áirithe, ní ghníomhaíonn an bhainistíocht ná ní dhiúltaíonn sí go sainráite, ach oiread, tús a chur le caibidlíocht tar éis iarraidh a fháil go ndéanfar Comhairle Oibreacha Eorpach a bhunú. Dá bhrí sin, ba cheart a shonrú go mbeidh feidhm ag na ceanglais choimhdeacha a leagtar síos i dTreoir 2009/38/CE i gcás nach dtionóltar an chéad chruinniú den chomhlacht caibidlíochta speisialta laistigh de 6 mhí tar éis na hiarrata go mbunófaí Chomhairle Oibreacha Eorpach, gan beann ar cé acu a dhiúltaíonn nó nach ndiúltaíonn an lucht bainistíochta lárnach go sainráite tús a chur leis an gcaibidlíocht.

(15)

Agus faisnéis íogair á comhroinnt le comhaltaí na gcomhlachtaí speisialta caibidlíochta, comhaltaí na gComhairlí Oibreacha Eorpacha, nó ionadaithe na bhfostaithe faoi chuimsiú nós imeachta chun fostaithe a chur ar an eolas agus chun dul i gcomhairle leo, féadfaidh an lucht bainistíochta lárnach a cheangal go ndéanfaí an fhaisnéis sin a chomhroinnt ar bhealach rúnda agus nach nochtfaí a thuilleadh ná sin í. Chun nach n-úsáidfear na srianta rúndachta sin ar bhealach iomarcach agus chun forálacha ábhartha Threoir 2009/38/CE a ailíniú leis na forálacha comhfhreagracha i dTreoir 2002/14/CE ó Pharlaimint na hEorpa agus ón gComhairle (5), ba cheart nach mbeifí in ann srianta rúndachta a úsáid ach amháin chun leas dlisteanach an ghnóthais lena mbaineann a chosaint. Ba cheart a mheasúnú cibé a bhfuil nó nach bhfuil leas dlisteanach den sórt sin ann ar bhonn critéir oibiachtúla atá le leagan síos sa dlí náisiúnta. Thairis sin, agus faisnéis á comhroinnt ar bhealach rúnda, ba cheart a cheangal ar an lucht bainistíochta lárnach cúiseanna na rúndachta a chur ar fáil. Níor cheart feidhm a bheith ag an srian rúndachta ach amháin chomh fada agus a mhaireann cúiseanna na rúndachta. Trí shocruithe leordhóthanacha a chur ar bun chun rúndacht faisnéise íogaire a chosaint, féadfar muinín a chothú agus comhroinnt na faisnéise sin a éascú, agus leasanna gnó agus oibrithe á gcosaint, lena n-áirítear rioscaí méadaitheacha, ar nós mar shampla na spiaireachta tionsclaíche, a sheachaint.

(16)

Maidir leis an lucht bainistíochta lárnach gan aon fhaisnéis a tharchur chuig comhaltaí na gcomhlachtaí speisialta caibidlíochta, chuig comhaltaí na gComhairlí Oibreacha Eorpacha, nó chuig ionadaithe na bhfostaithe faoi chuimsiú nós imeachta chun fostaithe a chur ar an eolas agus chun dul i gcomhairle leo, ba cheart é sin a theorannú do chásanna ina ndéanfadh an tarchur sin dochar tromchúiseach d’fheidhmiú na ngnóthas lena mbaineann. Ar chúiseanna trédhearcachta agus ar mhaithe le sásamh éifeachtach, ba cheart a cheangal ar an lucht bainistíochta lárnach freisin na cúiseanna is údar le neamh-tharchur na faisnéise a shonrú ar bhealach lena gceadaítear grinnscrúdú dlíthiúil leordhóthanach, agus gan aon fhaisnéis atá faoi chosaint a nochtadh ag an am céanna.

(17)

D’fhonn an tsoiléireacht dhlíthiúil a mhéadú, is iomchuí na forálacha a leagan síos maidir le tarchur faisnéise atá faoi rún agus maidir le neamh-tharchur na faisnéise in dhá airteagal ar leith. Thairis sin, an fhoráil lena gceadaítear do Bhallstáit rialacha ar leith a leagan síos do ghnóthais a bhfuil aidhm na treoraíochta idé-eolaíochta á saothrú acu, ba cheart í a aistriú chuig airteagal maidir leis an ngaol le forálacha náisiúnta eile, toisc go mbaineann sí le cur chun feidhme cheanglais Threoir 2009/38/CE ar bhonn níos leithne.

(18)

D’fhéadfadh cinntí i ndáil le gnóthaí trasnáisiúnta iarmhairtí forleathana a bheith acu d’fhostaithe, i gcás amhail iomarcaíochtaí a eascraíonn as pleananna gnó, pleananna sóisialta nó nuálaíochtaí i bpróisis. Chun dul i gcomhairle ar bhealach éifeachtach le fostaithe i ndáil le gnóthaí trasnáisiúnta, teastaíonn fíor-idirphlé idir an lucht bainistíochta lárnach agus na Comhairlí Oibreacha Eorpacha, nó ionadaithe na bhfostaithe faoi chuimsiú nós imeachta chun fostaithe a chur ar an eolas agus chun dul i gcomhairle leo. Tugann sé sin le tuiscint gur cheart fostaithe a chur ar an eolas agus dul i gcomhairle leo ar bhealach fóinteach tráthúil trínar féidir le hionadaithe na bhfostaithe a dtuairim a chur in iúl sula nglactar an cinneadh. Tugann sé le tuiscint freisin go bhfuil tuairimí a eisíonn Comhairlí Oibreacha Eorpacha nó ionadaithe na bhfostaithe le freagra réasúnaithe a fháil ón lucht bainistíochta lárnach nó ó aon leibhéal eile bainistíochta a bheadh níos iomchuí sula nglactar an cinneadh maidir leis an mbeart atá á bheartú. Ba cheart ceanglas sainráite chuige sin a leagan síos i dTreoir 2009/38/CE chun an deimhneacht dhlíthiúil a áirithiú.

(19)

I gcomhthéacs fostaithe a chur ar an eolas agus dul i gcomhairle leo i ndáil le gnóthaí trasnáisiúnta, tá sé tábhachtach a áirithiú gur féidir le gnóthais ar leibhéal an Chomhphobail nó grúpaí gnóthas ar leibhéal an Chomhphobail cinntí a dhéanamh ar bhealach éifeachtach agus nach gcuireann na nósanna imeachta sin chun fostaithe a chur ar an eolas agus chun dul i gcomhairle leo moill mhíchuí ar an bpróiseas cinnteoireachta. Tá sé ríthábhachtach freisin go dtabharfaí a ndóthain ama d’ionadaithe na bhfostaithe chun a dtuairimí a mhúnlú, a chomhordú agus a chur in iúl i ndáil le gnóthaí trasnáisiúnta ar casta iad uaireanta, agus aon socruithe arna gcomhaontú á gcur san áireamh chun nasc a bhunú idir an nós imeachta chun an Chomhairle Oibreacha Eorpach a chur ar an eolas agus chun dul i gcomhairle léi agus comhlachtaí náisiúnta ionadaíochta na bhfostaithe. Chun é a chur ar a gcumas do pháirtithe na cúinsí sin a réiteach sa chleachtas, ba cheart do na híoscheanglais don phróiseas comhairliúcháin leanúint de bheith sách solúbtha le go bhféadfaidís an próiseas a sceidealú de réir mar is iomchuí i bhfianaise chúinsí agus ábhar faoi seach an chomhairliúcháin. Seachas fráma docht ama a leagan síos ina bhféadfaí ionadaithe na bhfostaithe a dtuairim a eisiúint agus an lucht bainistíochta freagra réasúnaithe a thabhairt, is iomchuí a fhoráil don phrionsabal go bhfuil an comhairliúchán le déanamh laistigh de thréimhse réasúnach ama, agus leibhéal práinne an ábhair á chur san áireamh. Leis an bprionsabal sin, cuirtear ar chumas na bpáirtithe dlús a chur leis an bpróiseas comhairliúcháin i gcásanna práinneacha. Ba cheart a shoiléiriú freisin, i ndáil leis an gceanglas atá ar an mbainistíocht freagra réasúnaithe a thabhairt sula nglactar cinneadh, go bhfuil feidhm ag an gceanglas sin i gcás inar chuir ionadaithe na bhfostaithe a dtuairim in iúl laistigh de thréimhse réasúnach ama, agus na himthosca ábhartha uile á gcur san áireamh, ar nós chastacht nó tábhacht an ábhair, nó gur chun leas na bainistíochta é cinneadh a dhéanamh go pras.

(20)

Ba cheart forálacha Threoir 2009/38/CE maidir le ról agus cosaint ionadaithe na bhfostaithe a leasú chun an tsoiléireacht agus an cruinneas a mhéadú, go háirithe maidir le comhaltaí na gcomhlachtaí speisialta caibidlíochta agus comhaltaí na gComhairlí Oibreacha Eorpacha a chosaint ar fhrithbhearta nó ar dhífhostú a bhaineann le feidhmiú a bhfeidhmeanna. Agus a bhfeidhmeanna á bhfeidhmiú ag comhaltaí na gcomhlachtaí speisialta caibidlíochta, comhaltaí na gComhairlí Oibreacha Eorpacha, agus ionadaithe na bhfostaithe faoi chuimsiú nós imeachta chun fostaithe a chur ar an eolas agus chun dul i gcomhairle leo, ba cheart cosaint agus ráthaíochtaí a bheith acu atá coibhéiseach leis an gcosaint agus na ráthaíochtaí a thugtar d’ionadaithe na bhfostaithe leis an dlí náisiúnta nó sa chleachtas náisiúnta ina dtír fostaíochta.

(21)

Chun díospóidí a sheachaint, ba cheart a shonrú freisin go n-íocfaidh an lucht bainistíochta lárnach as na costais réasúnta a bhaineann le hoiliúint agus costais ghaolmhara chomhaltaí an chomhlachta speisialta caibidlíochta agus chomhaltaí na Comhairle Oibreacha Eorpaí atá riachtanach chun a ndualgais a fheidhmiú, i gcás ina gcuirtear an lucht bainistíochta lárnach ar an eolas faoi na costais sin roimh ré.

(22)

I mBallstáit áirithe, bíonn deacrachtaí ag sealbhóirí ceart faoi Threoir 2009/38/CE caingne dlí a thionscnamh chun a gcearta a fhorfheidhmiú. Dá bhrí sin, is gá oibleagáidí na mBallstát a neartú maidir le leigheasanna éifeachtacha agus rochtain éifeachtach ar cheartas a áirithiú agus is gá an mhaoirseacht a neartú freisin a dhéanann an Coimisiún ar na hoibleagáidí sin a bheith á gcomhlíonadh ag na Ballstáit. Maidir le sealbhóirí ceart faoin Treoir sin, lena n-áirítear comhlachtaí speisialta caibidlíochta agus Comhairlí Oibreacha Eorpacha, ba cheart do na Ballstáit, i gcomhréir leis an dlí náisiúnta maidir le seasamh dlíthiúil nó maidir le foirm na hionadaíochta dlíthiúla, rochtain ar imeachtaí breithiúnacha a ráthú agus, i gcás inarb ábhartha, rochtain ar imeachtaí riaracháin a ráthú, chun na cearta faoi Threoir 2009/38/CE a fhorfheidhmiú. Thairis sin, ba cheart a shoiléiriú nach mór do na himeachtaí ábhartha forfheidhmiú tráthúil éifeachtach a chumasú. I gcás ina bhforchuireann na Ballstáit nósanna imeachta sainordaitheacha réamhbhreithiúnacha um réiteach lasmuigh den chúirt, tá sé tábhachtach a áirithiú nach gcuirfidh na ceanglais sin cosc ar pháirtithe a gceart rochtana ar an gcóras breithiúnach a fheidhmiú go hiomlán ná nach mbeidh sé dodhéanta nó ródheacair dóibh sa chleachtas a gcearta a fheidhmiú faoi dhlí an Aontais, i ndáil le haon mhoill, aon éifeachtaí ar theorainneacha ama, costais agus bacainní eile a d’fhéadfadh a bheith ann (6). Ba cheart a shoiléiriú, dá réir sin, i dTreoir 2009/38/CE, i gcás ina bhfuil coinníoll leagtha síos ag na Ballstáit nach féidir rochtain a fháil ar imeachtaí breithiúnacha mura cuireadh nós imeachta malartach réitithe díospóide chun feidhme roimh ré, nach dochar an nós imeachta sin don cheart atá ag na páirtithe lena mbaineann imeachtaí dlíthiúla a thionscnamh. Thairis sin, chun críocha na maoirseachta atá le déanamh ag an gCoimisiún, ba cheart a cheangal ar na Ballstáit fógra a thabhairt don Choimisiún faoin mbealach agus faoi na himthosca inar féidir le sealbhóirí ceart faoi Threoir 2009/38/CE imeachtaí breithiúnacha agus, i gcás inarb ábhartha, imeachtaí riaracháin a thionscnamh, i ndáil lena gcearta faoin Treoir sin.

(23)

Léiríodh sa mheastóireacht a rinne an Coimisiún in 2018 ar Threoir 2009/38/CE, i ndáil leis na pionóis is infheidhme i gcás neamhchomhlíonadh na gceanglas maidir le fostaithe a chur ar an eolas agus chun dul i gcomhairle leo i ndáil le gnóthaí trasnáisiúnta, gur minic nach mbíonn na pionóis sin sách éifeachtach, sách athchomhairleach nó sách comhréireach. Dá bhrí sin, is iomchuí oibleagáid a leagan síos do na Ballstáit go bhforálfaidís do phionóis éifeachtacha athchomhairleacha chomhréireacha. Ba cheart a fhoráil do phionóis airgid i gcás nach gcomhlíontar na nósanna imeachta chun fostaithe a chur ar an eolas agus chun dul i gcomhairle leo a leagtar amach i dTreoir 2009/38/CE. D’fhéadfaí a fhoráil do chineálacha eile pionós freisin. Chun go mbeidh siad éifeachtach, athchomhairleach agus comhréireach, ba cheart pionóis a chinneadh agus tromchúis, fad agus iarmhairtí an neamhchomhlíonta á gcur san áireamh agus dá mba d’aon ghnó nó trí fhaillí a tharla an neamhchomhlíonadh sin. Chun go mbeidh na pionóis athchomhairleach, ba cheart láimhdeachas an ghnóthais nó an ghrúpa lena mbaineann a chur san áireamh nó ba cheart gur den chineál athchomhairleach céanna a bheadh na pionóis is infheidhme.

(24)

Ba cheart na hacmhainní riachtanacha a bheith ag comhlachtaí speisialta caibidlíochta, ag na Comhairlí Oibreacha Eorpacha, agus, thar a gceann, a gcomhaltaí,, chun costais na hionadaíochta dlíthiúla agus na rannpháirtíochta in imeachtaí breithiúnacha nó, i gcás inarb ábhartha, in imeachtaí riaracháin a chumhdach. D’fhéadfadh na costais sin na costais taistil agus chothaithe a chumhdach a bhaineann le rannpháirtíocht na gcomhaltaí sna himeachtaí sin agus iad ag gníomhú thar ceann an chomhlachta lena mbaineann. Ba cheart do na Ballstáit a fhoráil go n-íocfadh an lucht bainistíochta lárnach costais réasúnta na hionadaíochta dlíthiúla agus na rannpháirtíochta in imeachtaí breithiúnacha agus, i gcás inarb ábhartha, in imeachtaí riaracháin, sin nó ba cheart dóibh bearta coibhéiseacha eile a dhéanamh chun a áirithiú nach gcuirfí cosc de facto, mar gheall ar easpa acmhainní airgeadais, ar chomhlachtaí speisialta caibidlíochta agus ar Chomhairlí Oibreacha Eorpacha páirt a ghlacadh in imeachtaí breithiúnacha agus, i gcás inarb ábhartha, in imeachtaí riaracháin. D’fhéadfaí é sin a bhaint amach, mar shampla, trína cheangal go leithdháilfí buiséad oibríochtúil iomchuí ar Chomhairlí Oibreacha Eorpacha, trí chistí dlúthpháirtíochta a chur ar bun ar an leibhéal náisiúnta, trí árachais a sholáthar lena gcumhdaítear costais dlí, trí rochtain ar chúnamh dlíthiúil a dheonú in imthosca áirithe nó trí fhorálacha eile i gcomhréir leis an dlí agus an cleachtas náisiúnta.

(25)

Maidir le gnóthais a bhfuil comhaontú acu i ndáil le fostaithe a chur ar an eolas agus dul i gcomhairle leo maidir le gnóthaí trasnáisiúnta a tugadh i gcrích roimh an 23 Meán Fómhair 1996, is é sin le rá roimh dháta chur i bhfeidhm Threoir 94/45/CE ón gComhairle (7), tá na gnóthais sin díolmhaithe ó chur i bhfeidhm na n-oibleagáidí a eascraíonn as Treoir 2009/38/CE. Maidir leis na comhlachtaí chun fostaithe a chur ar an eolas agus chun dul i gcomhairle leo a bunaíodh faoi na comhaontaithe sin, tugadh i gcrích iad agus leanann siad de bheith ag oibriú lasmuigh de raon feidhme dhlí an Aontais. Ní fhoráiltear le Treoir 2009/38/CE gur féidir le fostaithe sna gnóthais dhíolmhaithe a iarraidh go mbunófaí Comhairle Oibreacha Eorpach faoin Treoir sin. Mar sin féin, ar chúiseanna na soiléireachta dlíthiúla, na córa comhionainne agus na héifeachtachta, ba cheart, i bprionsabal, é a bheith de cheart ag fostaithe agus ag a gcuid ionadaithe i ngach gnóthas ar leibhéal an Chomhphobail, nó i ngach grúpa gnóthas ar leibhéal an Chomhphobail, a iarraidh go mbunófaí Comhairle Oibreacha Eorpach. Anois, beagnach 30 bliain ó bunaíodh an creat reachtach lenar leagadh síos íoscheanglais ar leibhéal an Aontais maidir le fostaithe a chur ar an eolas agus dul i gcomhairle leo i ndáil le gnóthaí trasnáisiúnta, tá forlámhas ag na cúiseanna sin thar fhorais i ndáil le leanúnachas do chomhaontuithe a bhí ann cheana, arbh iadsan ba chúis i gcéaduair leis an díolúine. Ba cheart, dá bhrí sin, an díolúine sin a scriosadh, gan dochar do stádas dlíthiúil na gcomhaontuithe sin, a leanann de bheith faoi rialú na rialacha náisiúnta is infheidhme. I ngnóthais a bhfuil na comhaontuithe sin acu, an chaibidlíocht chun Comhairlí Oibreacha Eorpacha a bhunú, ba cheart í a thionscnamh agus a sheoladh faoi réir an nós imeachta dá bhforáiltear i dTreoir 2009/38/CE, agus ba cheart an tréimhse a dtagann na cheanglais choimhdeacha i bhfeidhm ina diaidh a laghdú ó 3 bliana go 2 bhliain, i gcomhréir leis an tréimhse is infheidhme maidir le comhaontuithe na gComhairlí Oibreacha Eorpacha atá ann cheana a oiriúnú.

(26)

Thairis sin, ar na cúiseanna céanna, ba cheart feidhm a bheith ag na híoscheanglais chéanna maidir le gach gnóthas ar leibhéal an Chomhphobail a bhfuil Comhairlí Oibreacha Eorpacha aige a oibríonn faoi Threoir 2009/38/CE agus maidir leis na gnóthais sin inar síníodh nó inar athbhreithníodh comhaontú um Chomhairle Oibreacha Eorpach idir an 5 Meitheamh 2009 agus an 5 Meitheamh 2011. Dá bhrí sin, ba cheart díolúine na ngnóthas sin ó chur i bhfeidhm Threoir 2009/38/CE a scriosadh freisin.

(27)

Na Comhairlí Oibreacha Eorpacha a oibríonn ar bhonn na gceanglas coimhdeach a leagtar amach in Iarscríbhinn I a ghabhann le Treoir 2009/38/CE, tá sé de cheart acu cruinniú a bheith acu leis an lucht bainistíocha lárnach uair sa bhliain, go gcuirfear ar an eolas iad agus go rachfar i gcomhairle leo maidir le dul chun cinn ghnó an ghnóthais ábhartha ar leibhéal an Chomhphobail, nó an ghrúpa gnóthas ar leibhéal an Chomhphobail, agus maidir lena bhfuil i ndán don ghnóthas. Le gur láidre na nósanna imeachta chun na Comhairlí Oibreacha Eorpacha sin a chur ar an eolas agus chun dul i gcomhairle leo i ndáil le gnóthaí trasnáisiúnta, is iomchuí líon na ngnáthchruinnithe sin sna ceanglais choimhdeacha a mhéadú go dhá chruinniú a mbeadh láithreacht phearsanta i gceist leo.

(28)

Ina theannta sin, ba cheart athruithe teicniúla áirithe a dhéanamh ar na ceanglais choimhdeacha a leagtar amach in Iarscríbhinn I a ghabhann le Treoir 2009/38/CE chun comhsheasmhacht a áirithiú leis na téarmaí achtacháin.

(29)

Dá bhrí sin, is iomchuí Treoir 2009/38/CE a leasú chun gach gnóthas incháilithe a thabhairt faoina raon feidhme, chun roinnt de phríomhchoincheapa na Treorach sin a shoiléiriú, chun feabhas a chur ar an bpróiseas chun fostaithe a chur ar an eolas agus chun dul i gcomhairle leo i ndáil le gnóthaí trasnáisiúnta, agus chun sásamh éifeachtach agus forfheidhmiú éifeachtach a áirithiú.

(30)

De bhun Airteagal 27 de Choinbhinsiún na Náisiún Aontaithe ar Chearta Daoine faoi Mhíchumas, tá daoine faoi mhíchumas le bheith in ann a gcearta saothair agus ceardchumainn a fheidhmiú ar bhonn comhionann le daoine eile. Ós rud é go bhfuil an tAontas agus na Ballstáit ina bpáirtithe sa Choinbhinsiún sin, tá Treoir 2009/38/CE agus an reachtaíocht náisiúnta ábhartha le léirmhíniú i gcomhréir leis an bprionsabal sin, mar shampla maidir le hinrochtaineacht agus cóiríocht réasúnta do chomhaltaí comhlachtaí speisialta caibidlíochta, comhaltaí na gComhairlí Oibreacha Eorpacha, agus ionadaithe na bhfostaithe faoi chuimsiú nós imeachta chun fostaithe a chur ar an eolas agus chun dul i gcomhairle leo i ndáil le gnóthaí trasnáisiúnta, agus maidir leis an lucht bainistíochta lárnach na costais ghaolmhara a íoc.

(31)

De bhun Threoracha 2014/23/AE (8), 2014/24/AE (9) agus 2014/25/AE ó Pharlaimint na hEorpa agus ón gComhairle (10), tá na Ballstáit le bearta iomchuí a dhéanamh chun a áirithiú go gcomhlíonfaidh oibreoirí eacnamaíocha, tráth a bhíonn conarthaí poiblí á bhfeidhmiú acu, na hoibleagáidí is infheidhme i réimsí an dlí shóisialta agus saothair arna mbunú le dlí an Aontais. Trí chritéir inbhuanaitheachta sóisialta a chomhtháthú, de réir mar is iomchuí, sna critéir dhámhachtana arna gceapadh ag eintitis chonarthacha chun na tairiscintí is buntáistí ó thaobh airgid de a shainaithint, is féidir rannchuidiú le cur chun feidhme éifeachtach na gceanglas faoin Treoir seo. Mar sin féin, ní chruthaítear aon oibleagáid bhreise leis an Treoir seo i ndáil leis na Treoracha sin.

(32)

Agus dlí an Aontais á chur chun feidhme acu, tá na Ballstáit leis na cearta a leagtar amach sa Chairt a urramú agus a gcur i bhfeidhm a chur chun cinn i gcomhréir le hAirteagal 51 den Chairt, lena n-áirítear an ceart chun saoirse comhlachais ar gach leibhéal, go háirithe in ábhair pholaitiúla, cheardchumannachais agus shibhialta, rud a thugann le tuiscint go bhfuil an ceart ag gach duine ceardchumainn a bhunú agus a bheith ina gcomhalta de cheardchumainn chun a leasanna a chosaint.

(33)

Chun a ndóthain ama a thabhairt d’ionadaithe na bhfostaithe agus don lucht bainistíochta lárnach i ngnóthais ar leibhéal an Chomhphobail, nó i ngrúpaí gnóthas ar leibhéal an Chomhphobail, chun na híoscheanglais athbhreithnithe a mheas agus chun ullmhú dá gcur i bhfeidhm, tá sé iomchuí cur i bhfeidhm na bhforálacha arna nglacadh ag na Ballstáit chun an Treoir seo a chomhlíonadh a chur siar 1 bhliain.

(34)

D’fhéadfadh sé, i gcomhaontuithe um Chomhairlí Oibreacha Eorpacha a tugadh i gcrích faoi Threoir 94/45/CE nó 2009/38/CE roimh thrasuí na Treorach seo, nach gcumhdaítear na ceanglais le haghaidh ábhar na gcomhaontuithe sin mar a leasaítear leis an Treoir seo iad. Is iomchuí, dá bhrí sin, a fhoráil do shocruithe idirthréimhseacha lena gcuirfear ar chumas na bpáirtithe sna comhaontuithe sin a gcomhaontuithe a leasú.

(35)

Ós rud é nach féidir leis na Ballstáit cuspóirí na Treorach seo a áirithiú, eadhon éifeachtacht cheanglais Threoir 2009/38/CE maidir le fostaithe de chuid gnóthas ar leibhéal an Chomhphobail agus de chuid grúpaí gnóthas ar leibhéal an Chomhphobail a chur ar an eolas agus dul i gcomhairle leo, a ghnóthú go leordhóthanach agus, de bharr chineál agus leibhéal trasnáisiúnta intreach na gceanglas sin, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach é in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú,

(1)

leasaítear Airteagal 1 mar a leanas:

(2)

in Airteagal 2(1), cuirtear an méid seo a leanas in ionad phointí (f) agus (g):

;

(3)

in Airteagal 3, cuirtear an méid seo a leanas in ionad mhír 1:

(4)

leasaítear Airteagal 5 mar a leanas:

(5)

leasaítear Airteagal 6 mar a leanas:

(6)

in Airteagal 7(1), cuirtear an méid seo a leanas in ionad an dara fleasc:

;

(7)

cuirtear an méid seo a leanas in ionad Airteagal 8:

(8)

cuirtear an t-airteagal seo a leanas isteach:

(9)

cuirtear an méid seo a leanas in ionad Airteagail 9 agus 10:

(10)

leasaítear Airteagal 11 mar a leanas:

(11)

leasaítear Airteagal 12 mar a leanas:

(12)

scriostar Airteagal 14;

(13)

cuirtear na hairteagail seo a leanas isteach:

(14)

leasaítear Iarscríbhinn I i gcomhréir leis an Iarscríbhinn a ghabhann leis an Treoir seo.