(1)

Le hAirteagal 4(1) de Threoir 2011/65/AE, ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir le feidhmeanna díolmhaithe áirithe a liostaítear in Iarscríbhinn III a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint shrianta í luaidhe a liostaítear in Iarscríbhinn II a ghabhann le Treoir 2011/65/AE. Is é 0,1 % luaidhe de réir meáchain an t-uasluach tiúchana inghlactha in ábhair aonchineálacha.

(4)

Le Treoir Tharmligthe (AE) 2018/736 ón gCoimisiún (2) deonaíodh díolúine le haghaidh comhpháirteanna leictreacha agus leictreonacha ina bhfuil luaidhe i ngloine nó i gcomhdhúil mhaitríse ghloine nó cheirmeach, mar a leagtar amach in iontráil 7(c)-I d’Iarscríbhinn III a ghabhann le Treoir 2011/65/AE. Bhí an díolúine le dul in éag an 21 Iúil 2021, an 21 Iúil 2023 agus an 21 Iúil 2024, faoi seach le haghaidh gach ceann de na catagóirí ábhartha trealaimh leictrigh agus leictreonaigh.

(5)

Le Treoir Tharmligthe (AE) 2019/169 ón gCoimisiún (3) deonaíodh díolúine maidir le luaidhe i gceirmeach tréleictreach i dtoilleoirí le haghaidh voltas rátaithe 125 V AC nó 250 V DC nó níos airde, mar a leagtar amach in iontráil 7(c)-II d’Iarscríbhinn III a ghabhann le Treoir 2011/65/AE. Bhí an díolúine le dul in éag an 21 Iúil 2021, an 21 Iúil 2023 agus an 21 Iúil 2024, faoi seach le haghaidh gach ceann de na catagóirí ábhartha trealaimh leictrigh agus leictreonaigh.

(6)

Fuair an Coimisiún ocht n-iarraidh ar athnuachan san iomlán ar an díolúine dá dtagraítear in aithris 4, lena gcumhdaítear gach catagóir trealaimh leictrigh agus leictreonaigh. Maidir leis an díolúine dá dtagraítear in aithris 5, fuair an Coimisiún iarraidh amháin ar athnuachan. Fuarthas gach iarraidh laistigh den tréimhse ama le haghaidh athnuachan a leagtar síos in Airteagal 5(5) de Threoir 2011/65/AE. I gcomhréir le hAirteagal 5(5), an dara fomhír, de Threoir 2011/65/AE, leanfaidh an díolúine atá ann cheana de bheith bailí go dtí go ndéanfaidh an Coimisiún cinneadh maidir leis an iarratas ar athnuachan.

(7)

Chun meastóireacht a dhéanamh ar na hiarratais a fuarthas, rinneadh staidéar measúnaithe teicniúil agus eolaíoch agus tugadh chun críche é in 2022 (4). Rinneadh staidéar eile ina ndírítear ar na catagóirí trealaimh leictrigh agus leictreonaigh a iarradh lena n-athnuachan ag céim níos déanaí agus tugadh chun críche é in 2024 (5). Áiríodh comhairliúcháin le páirtithe leasmhara sa mheastóireacht freisin, i gcomhréir le hAirteagal 5(7) de Threoir 2011/65/AE.

(8)

Thángthas ar an gconclúid sa mheastóireacht ar an athnuachan díolúine a iarradh go soláthraíonn luaidhe, i gceirmigh, airíonna tréleictreacha, písileictreacha, pireaileictreacha, fearóileictreacha, leathsheoltóra, maighnéadacha ar leith thar raon leathan úsáide i dtéarmaí teochtaí, voltais nó minicíochtaí. I ngloine, soláthraíonn luaidhe airíonna ríthábhachtacha ar nós ísliú na bpointí leáite agus na mbogphointí, feabhas a chur ar inoibritheacht, inmheaisínitheacht, agus cobhsaíocht cheimiceach agus eile.

(9)

Níl ionadaigh le haghaidh ceirmigh agus gloiní ina bhfuil luaidhe indéanta go teicniúil le haghaidh gach feidhme nó níl ionadaigh iontaofa go leor le haghaidh feidhmeanna sonracha. Dá bhrí sin, comhlíonann an athnuachan a iarradh na critéir a leagtar amach in Airteagal 5(1), pointe (a), an chéad fhleasc agus an dara fleasc, de Threoir 2011/65/AE, is é sin, go bhfuil sé dofheidhmithe go heolaíoch nó go teicniúil díothú nó ionadú a dhéanamh trí na hathruithe ar an dearadh nó trí na hábhair agus na comhpháirteanna nach n-éilíonn aon cheann de na hábhair nó na substaintí a liostaítear in Iarscríbhinn II agus nach n-áirithítear iontaofacht na n-ionadach.

(10)

Chun measúnú teicniúil níos dírithe a cheadú amach anseo, ba cheart an díolúine atá ann faoi láthair a leagtar amach in iontráil 7(c)-I d’Iarscríbhinn III a ghabhann le Treoir 2011/65/AE a roinnt ina dá phointe, is é sin, 7(c)-V le haghaidh luaidhe i bhfeidhmeanna gloine agus 7(c)VI le haghaidh luaidhe i bhfeidhmeanna ceirmeacha. Is iomchuí na hiarratais theicniúla sna hiontrálacha sin a shonrú.

(11)

Thángthas ar an gconclúid sa mheastóireacht dá dtagraítear in aithris 7 cé gur féidir go heolaíoch luaidhe i dtréleictreach ceirmeach a ionadú le toilleoirí ardvoltais le haghaidh roinnt feidhmeanna faoin díolúine a leagtar amach i bpointe 7(c)-II d’Iarscríbhinn III a ghabhann le Treoir 2011/65/AE, nach bhfuil sé indéanta go teicniúil le haghaidh fhormhór na bhfeidhmeanna. Ina theannta sin, níl an iontaofacht leordhóthanach i gcleachtas ag toilleoirí saor ó luaidhe den sórt sin. Dá bhrí sin, comhlíonann an athnuachan a iarradh na critéir a leagtar amach in Airteagal 5(1), pointe (a), an chéad fhleasc agus an dara fleasc, de Threoir 2011/65/AE.

(12)

Ba cheart na díolúintí athnuaite a dheonú le tréimhsí bailíochta lena gcuirtear san áireamh conclúidí teicniúla na meastóireachta dá dtagraítear in aithris 7. Ba cheart an díolúine a leagtar amach i bpointe 7(c)-I d’Iarscríbhinn III a ghabhann le Treoir 2011/65/AE a athnuachan ar feadh tréimhse bhailíochta ghearrthéarmach i gcomhréir le hAirteagal 5(2), an chéad fhomhír, de Threoir 2011/65/AE. Ba cheart a chur san áireamh i ndátaí éaga na díolúine a leagtar amach i bpointí 7(c)-II agus sna díolúintí atá le leagan amach i bpointí 7(c)-V agus 7(c)-VI d’Iarscríbhinn III a ghabhann leis an Treoir sin an íostréimhse 18 mí roimh an dáta éaga, inar gá iarrataí ar athnuachan a chur isteach i gcomhréir le hAirteagal 5(5), an chéad fhomhír, de Threoir 2011/65/AE.

(13)

Mar gheall ar an athnuachan gearrthéarmach atá fágtha ar an díolúine a leagtar amach i bpointe 7(c)-I d’Iarscríbhinn III a ghabhann le Treoir 2011/65/AE, is iomchuí dáta éaga amháin a shocrú le haghaidh gach catagóire de threalamh leictreach agus leictreonach a leagtar amach in Iarscríbhinn I a ghabhann le Treoir 2011/65/AE.

(14)

Ní lagaíonn athnuachan na ndíolúintí an chosaint don chomhshaol agus don tsláinte a thugtar le Rialachán (CE) Uimh. 1907/2006 ó Pharlaimint na hEorpa agus ón gComhairle (6).

(15)

Ba cheart, dá bhrí sin, Treoir 2011/65/AE a leasú dá réir sin,