1.   CÚLRA AGUS RÉASÚNAÍOCHT

Is í an Eagraíocht um Thoirmeasc ar Airm Cheimiceacha (‘OPCW’) comhlacht cur chun feidhme an Choinbhinsiúin maidir le Toirmeasc ar Fhorbairt, Táirgeadh, Stoc-Charnadh agus Úsáid Arm Ceimiceach agus maidir lena nDíothú (‘CWC’). Tháinig CWC i bhfeidhm an 29 Aibreán 1997 agus tá 193 Stát is Páirtithe ann faoi láthair a léiríonn ballraíocht nach mór uilíoch.

Is é misean OPCW airm cheimiceacha a dhíothú ón saol trí stoc-chairn arm ceimiceach dearbhaithe a scriosadh agus trí chosc a chur ar theacht chun cinn agus ar úsáid arm ceimiceach an athuair. Ó 1997 i leith, d’fhíoraigh OPCW scriosadh na n-arm ceimiceach stoc-charntha uile atá dearbhaithe ag tíortha ar fud an domhain, arb é 72 304 thona méadrach a meáchain iomlán.

Tá tacaíocht leanúnach faighte ag OPCW ón Aontas Eorpach (AE) trí bhuiséad an Chomhbheartais Eachtraigh agus Slándála (CBES) ó 2004 i leith. Le Meabhrán Tuisceana AE-OPCW an 20 Feabhra 2024, treisíodh a thuilleadh an chomhpháirtíocht ríthábhachtach sin a bhí fíorthábhachtach chun príomhchuspóirí OPCW a chur chun cinn agus a chur chun feidhme, rud a chuireann leis an tsíocháin agus leis an tslándáil idirnáisiúnta. Is léir ón méid a tharla le déanaí, mar shampla titim réimeas Assad sa tSiria agus an cogadh leanúnach san Úcráin, a thábhachtaí atá sainorduithe agus misin OPCW.

Sa tSiria, tá an Rúnaíocht ag feidhmiú ó mhí Dheireadh Fómhair 2013, nuair a chuaigh an tSiria isteach sa Choinbhinsiún, trí mhisin thiomnaithe inter alia – an Fhoireann um Measúnú ar Dhearbhuithe (DAT), an Misean Aimsithe Fíoras sa tSiria (FFM), agus an Fhoireann um Imscrúdú agus Sainaithint (IIT) – i gcomhréir le sainorduithe a fuarthas faoin gCoinbhinsiún agus trí chinntí orgáin déanta beartas OPCW agus rúin ábhartha ó Chomhairle Slándála na Náisiún Aontaithe. Ó thit réimeas Assad an 8 Nollaig 2024 agus ó bhí rialtas eatramhach ann atá toilteanach páirt a ghlacadh i sainchomhad arm ceimiceach na Siria, murab ionann agus na húdaráis a bhí ann roimhe seo, is gá, agus is féidir, rochtain a fháil ar an bhfaisnéis uile nár dhearbhaigh na húdaráis roimhe sin a bhaineann lena gclár arm ceimiceach, láithreáin arm ceimiceach agus a n-inneachar a dhaingniú, agus a áirithiú go scriosfaidh an tSiria aon ghné ábhartha agus go ndéanfaidh Rúnaíocht OPCW an méid sin a fhíorú. Tá deis ann freisin leanúint d’imscrúduithe a bhaineann le húsáid arm ceimiceach sa tSiria, lena n-áirítear déantóirí cionta a shainaithint, mar a chuir Uachtarán Eatramhach na Siria in iúl le linn an chruinnithe a bhí aige sa Damaisc le hArd-Stiúrthóir OPCW an 8 Feabhra 2025.

San Úcráin, is ann go fóill don bhagairt maidir le húsáid arm ceimiceach agus is bunriachtanach iad gníomhaíochtaí OPCW, lena n-áirítear cúnamh teicniúil, arna iarraidh sin ag an Úcráin, idir threalamh cosanta agus braite a sholáthar agus oiliúint a chur ar na chéad fhreagróirí, agus meastóireacht a dhéanamh ar shamplaí a bhaineann le líomhaintí maidir le húsáid ceimiceán tocsaineach a fhaightear ar an láthair chatha san Úcráin.

Ó 2021 i leith, tá tacaíocht luachmhar curtha ar fáil ag an Aontas do OPCW trí tháirgí agus seirbhísí SatCen a sholáthar. Ar mhaithe le héifeachtacht oibríochtúil OPCW, tá sé tábhachtach go leanfar de thacaíocht a thabhairt do tháirgí agus do sheirbhísí SatCen, a luaithe a rachaidh Cinneadh (CBES) 2021/2073 ón gComhairle an 25 Samhain 2021  (1) in éag.

Dá bhrí sin, measfar an togra seo i gcomhar le Cinneadh (CBES) 2023/1344 ón gComhairle an 26 Meitheamh 2023  (2) agus leis na gníomhaíochtaí faoi Aschur 3 (‘Freagairtí éifeachtacha a thabhairt ar líomhaintí maidir le húsáid arm ceimiceach’), agus i gcomhar le Cinneadh (CBES) 2024/1984 ón gComhairle an 15 Iúil 2024  (3). Baineann gníomhaíochtaí i gCinneadh (CBES) 2023/1344 ón gComhairle go príomha le hoibríochtaí OPCW laistigh den cheanncheathrú, agus díríonn an togra seo ar oibríochtaí OPCW lasmuigh den cheanncheathrú (imscarthaí, cuairteanna teicniúla, oiliúint agus trealamh a sholáthar d’údaráis ábhartha sa tSiria agus san Úcráin). Baineann na gníomhaíochtaí i gCinneadh (CBES) 2024/1984 ón gComhairle go príomha le próiseáil sonraí agus aistriú eolais laistigh den Eagraíocht, agus díríonn an togra seo ar mhisin a imscaradh agus ar threalamh a sholáthar don tSiria agus don Úcráin.

2.   AN CUSPÓIR FORIOMLÁN

Is é cuspóir foriomlán na gníomhaíochta seo rannchuidiú leis an tsíocháin agus leis an tslándáil idirnáisiúnta, leis an muinín agus leis an trédhearcacht, agus le cur chun feidhme straitéis an Aontais i gcoinne Leathadh Arm Ollscriosta trí thacú le gníomhaíochtaí misin a bhaineann leis an tSiria agus leis an Úcráin chun freagairtí éifeachtacha a áirithiú, trí OPCW, ar na rioscaí a bhaineann le leathadh agus úsáid arm ceimiceach, agus cumhacht á tabhairt freisin do na Stáit is Páirtithe an chuntasacht a áirithiú i gcásanna ina n-úsáidtear airm cheimiceacha, ar bhonn obair agus thuarascálacha arna ndéanamh ag OPCW. Trí tháirgí agus seirbhísí SatCen a sholáthar, feabhsaítear acmhainneachtaí na ngníomhaíochtaí sin arna sainordú ag OPCW chomh maith le cruinneas slándála agus fíoraithe.

3.   CUSPÓIRÍ SONRACHA

Seo a leanas cuspóirí sonracha na gníomhaíochta:

a.	páirt a ghlacadh i ndíothú iomlán chlár arm ceimiceach na Siria, atá fíoraithe go hidirnáisiúnta, agus na fíricí a shuí agus déantóirí cionta a bhaineann le húsáid arm ceimiceach a shainaithint, i gcomhréir leis na cinntí ábhartha arna ndéanamh ag orgáin déanta beartais OPCW;

b.

cúnamh a chur ar fáil atá comhsheasmhach le CWC chun a chur ar chumas na hÚcráine na cumais theicniúla shibhialta is gá a bheith aici chun a áirithiú gur féidir le muintir na hÚcráine freagairt go héifeachtach ar theagmhais a bhaineann le hoibreáin cogaíochta ceimicí agus ceimiceáin thionsclaíocha thocsaineacha, lena n-áirítear meastóireacht a dhéanamh ar shamplaí a bhaineann le líomhaintí maidir le húsáid ceimiceán tocsaineach a fhaightear ar an láthair chatha san Úcráin;

c.	acmhainneachtaí oibríochtúla OPCW a leathnú trí tháirgí agus seirbhísí SatCen a sholáthar, chun tacú le gníomhaíochtaí arna sainordú ag OPCW.

4.   GNÍOMHAÍOCHTAÍ AGUS ASCHUIR

a.

An tSiria: i. Gníomhaíocht: Imscaradh foirne teicniúla (mairfidh gach ceann díobh mí amháin) thar 2 bhliain chun cabhrú le húdaráis na Siria maidir leis an méid seo a leanas: — fardal mionsonraithe a chur ar fáil d’airm cheimiceacha, láithreáin arm ceimiceach (4), trealamh, muinisin agus comhpháirteanna eile de chlár arm ceimiceach na Siria. Meastar go mbeidh ar na foirne cuairt a thabhairt ar níos mó ná 100 láthair ar fud na Siria agus measúnú a dhéanamh orthu chun doiciméid a bhailiú, a aistriú, a fhíorú agus a anailísiú, agus chun agallamh a chur ar phearsanra ábhartha a raibh baint acu le clár arm ceimiceach iar-réimeas na Siria. Eiseoidh foireann theicniúil OPCW tuarascálacha de réir mar is gá chun bonn eolais a chur faoi chinnteoireacht chomhlachtaí ceaptha beartas OPCW; — pleananna, módúlachtaí agus fardal mionsonraithe a fhorbairt le haghaidh scriosadh fíoraithe na n-arm ceimiceach atá fágtha sa tSiria, lena n-áirítear trealamh agus saoráidí gaolmhara a shainaithint; — úsáid ceimiceán tocsaineach mar airm a chinneadh agus déantóirí na gceimiceán sin a shainaithint. Eiseoidh foireann theicniúil OPCW tuarascálacha chun bonn eolais a chur faoi chinnteoireacht agus faoi ghníomhaíochtaí comhlachtaí ceaptha beartas OPCW, údaráis na Siria, agus gníomhaithe idirnáisiúnta eile (mar shampla an Sásra Idirnáisiúnta, Neamhchlaonta agus Neamhspleách don tSiria). Aschuir: — Dearbhú iomlán maidir le clár arm ceimiceach na Siria de bhun na hoibleagáide a cuireadh ar údaráis idirthréimhsigh na Siria faoin CWC; — Pleananna infhorghníomhaithe maidir le hairm cheimiceacha a dhíothú le breithniú go foirmiúil ag Comhairle Feidhmiúcháin OPCW; — Bunú bunáiteanna fianaiseacha d’úsáid arm ceimiceach sa tSiria le go bhfaighidh íospartaigh ceartas agus dtabharfar déantóirí coire chun cuntais. Tugtar faoi deara: Beidh gá leis na saoráidí oibriúcháin riachtanacha (saoráidí oifigí slána, spás stórála, trealamh cumarsáide) a bhunú chun tacú le himscaradh sínithe, sábháilte, slán agus éifeachtach fhoirne teicniúla OPCW chomh maith le pearsanra tacaíochta atá fostaithe chun aschuir an tionscadail seo a bhaineann leis an tSiria a tháirgeadh chun a áirithiú go mbainfear amach go tráthúil agus go costéifeachtach na torthaí atá beartaithe. Soláthrófar leis an mbuiséad líon uasta laethanta saineolaithe, per diem agus costais iompair a bheidh le leithdháileadh ar na gníomhaíochtaí imscartha sin. Cumhdóidh cuid den bhuiséad freisin aon seirbhís agus trealamh is gá chun na gníomhaíochtaí sin a chur i gcrích, lena n-áirítear costais ábhartha oifige tionscadail.

b.

An Úcráin: i. Gníomhaíocht 1: Oiliúint theicniúil shaincheaptha agus trealamh gaolmhar cosanta agus anailíseach a sholáthar san Úcráin agus lasmuigh den Úcráin ag saoráidí speisialaithe (mar shampla Lárionad Ceimice agus Teicneolaíochta OPCW) do chéadfhreagróirí, imscrúdaitheoirí agus saineolaithe ábhartha eile na hÚcráine i réimsí a bhaineann le freagairt ar theagmhais, bailiú fianaise, agus anailís: — Oiliúint: tá ceithre sheisiún oiliúna beartaithe do 20 rannpháirtí ón Úcráin le linn thréimhse gníomhaíochta an Aontais. Cumhdófar leis an oiliúint saineolas maidir le hairm cheimiceacha agus oibreáin cheimiceacha a bhrath, cosaint orthu, dí-éilliú, agus sampláil agus anailísiú. — Cineálacha trealaimh: soláthrófar an trealamh chun an oiliúint a chomhlánú, mar shampla ‘FirstDefender’ agus ábhair/feistí braite arm ceimiceach gaolmhara, cultacha cosanta, maisc chosanta, fearais chun oiriúint masc a thástáil, fearais dí-éillithe, fearais samplála agus anailíse, fearais chúnta d’uirlisí oibre allamuigh (e.g. GPS). Aschur: Tá céadfhreagróirí, imscrúdaitheoirí agus saineolaithe ábhartha Úcránacha in ann, trí shaineolas agus ullmhacht fheabhsaithe, déileáil ar bhealach níos éifeachtaí le cásanna agus líomhaintí maidir le húsáid ceimiceán tocsaineach, bás agus gortú a chosc agus trédhearcacht agus cuntasacht a chur chun cinn. ii. Gníomhaíocht 2: Cuairteanna cúnaimh theicniúil (TAV) a sholáthar má iarrann agus nuair a iarrann an Úcráin iad chun samplaí a fháil agus a anailísiú, trí líonra de Shaotharlanna Ainmnithe OPCW atá neamhspleách agus deimhnithe go hidirnáisiúnta, arna mbailiú ag imscrúdaitheoirí na hÚcráine agus a bhaineann le líomhaintí maidir le ceimiceáin thocsaineacha a úsáid mar airm, lena n-áirítear i ndáil le líomhaintí maidir le húsáid oibreán smachtaithe círéibe ar an túslíne. Aschuir: Tuarascálacha a chur ar fáil d’údaráis na hÚcráine le go mbeidh an Úcráin in ann cinneadh breise a dhéanamh maidir le conas na tuarascálacha sin a úsáid ina n-imscrúduithe náisiúnta ar úsáid ceimiceán tocsaineach mar airm, lena n-áirítear meastóireacht a dhéanamh ar shamplaí a bhaineann le líomhaintí maidir le húsáid ceimiceán tocsaineach a fhaightear ar láthair chatha na hÚcráine, agus don chomhphobal idirnáisiúnta, agus iad ag tacú le cosaint CWC; agus le hiarrachtaí i ndáil le cuntasacht.

c.

SatCen (5): i. Gníomhaíocht: Táirgí agus seirbhísí SatCen (6) a sholáthar chun tacú le pleanáil oibríochtúil shábháilte agus éifeachtach fhoirne teicniúla OPCW atá ag ullmhú lena n-imscaradh chuig aon oibríochtaí teagmhasacha, chun imscrúduithe, oiliúint nó gníomhaíochtaí eile a dhéanamh mar atá sainordaithe faoin gCoinbhinsiún ag comhlachtaí ceaptha beartas OPCW nó arna iarraidh sin ag na Stáit is Páirtithe. Aschur: Déantar foirne teicniúla OPCW a imscaradh leis an éifeachtúlacht, an tsábháilteacht agus an tslándáil is fearr is féidir; agus soláthraíonn táirgí agus seirbhísí tásca úsáideacha maidir le bunús a thabhairt le torthaí fianaiseacha arna dtuairisciú ag foirne teicniúla OPCW.

5.   NA TAIRBHITHE DEIRIDH

a.	Stáit is Páirtithe sa CWC;

b.	Oifigigh rialtais agus saineolaithe sa tSiria agus san Úcráin;

c.	Íospartaigh arm ceimiceach a úsáideadh sa tSiria agus san Úcráin;

d.	Pearsanra OPCW a imscartar ar mhisin teagmhais.

6.   FAD AMA

Meastar go mairfidh an ghníomhaíocht 24 mhí ar an iomlán.