(1)

An 26 Aibreán 2018, chuir an chuideachta European Registration Office B.V. (‘an t-iarratasóir’) iarratas faoi bhráid údaráis inniúla na Beilge, na Danmhairge, na hÉireann, na Fraince, na Gearmáine, na hIodáile, Lucsamburg, na Polainne agus na Spáinne ar údarú arna dheonú trí aitheantas frithpháirteach i gcomhréir le hAirteagal 34 de Rialachán (AE) Uimh. 528/2012 le haghaidh an táirge bhithicídigh ERO MP (‘an táirge’). Is táirge le haghaidh sláinteachas tréidliachta é an táirge, ar de chineál táirge 3 é, i gcomhréir le hIarscríbhinn V a ghabhann le Rialachán (AE) Uimh. 528/2012, tá 24 % w/w den tsubstaint ghníomhach clóraicréasól ann agus is díghalrán é le haghaidh úsáid ghairmiúil atá le cur i bhfeidhm trí spraeáil ísealbhrú, ar thiúchan caolaithe, ar dhromchlaí agus ábhair neamhphóiriúla (úsáid 1) agus ar urláir agus ballaí tithíochta ainmhithe (úsáid 2). Aicmítear an táirge agus a chaoluithe mar chreimneach don chraiceann (H314) i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (2). Is í an Ísiltír an Ballstát tagartha atá freagrach as an meastóireacht i gcomhréir le hAirteagal 34(1) de Rialachán (AE) Uimh. 528/2012.

(2)

An 4 Iúil 2023, tharchuir an Fhrainc agóidí chuig an ngrúpa comhordúcháin de bhun Airteagal 35(2) de Rialachán (AE) Uimh. 528/2012, ina léiríodh nach gcomhlíonann an táirge an coinníoll maidir le húdarú a leagtar síos in Airteagal 19(1), pointe (b)(iii), den Rialachán sin. De réir na Fraince, ba cheart measúnú nochta shistéamaigh agus riosca a dhéanamh i bhfianaise na leibhéal nochta inghlactha le haghaidh clóraicréasóil. Mheas an Fhrainc nach gcomhlíonann úsáid an táirge trí spraeáil na critéir chun teacht ar chonclúid cháilíochtúil maidir le hinghlacthacht i leith nochtadh gairmiúil a liostaítear i dtábla 27 de Roinn 4.3.2.5.iv den Treoraíocht i ndáil leis an Rialachán maidir le Táirgí Bithicídeacha, Imleabhar III Sláinte an duine - Measúnú agus Meastóireacht (Codanna B+C), leagan 2.0; Deireadh Fómhair 2015) (3) ós rud é nach leor na bearta maolaithe riosca agus an trealamh cosanta pearsanta atá beartaithe chun nochtadh diomaibhseach a bhaint amach. Mheas an Fhrainc freisin gur cheart measúnú riosca sistéamach comhcheangailte a dhéanamh i gcomhréir le Roinn 4.4.1 den Treoraíocht sin i ndáil leis an Rialachán maidir le Táirgí Bithicídeacha toisc go bhfuil substaint ghníomhach amháin (clóraicréasól) agus an tsubstaint ar údar imní í, própán-2-ól, sa táirge.

(3)

Ós rud é nár thángthas ar aon chomhaontú sa ghrúpa comhordúcháin i dtaobh cé an gcomhlíonann an táirge bithicídeach na coinníollacha maidir le húdarú, an 15 Iúil 2024 tharchuir an Ísiltír an agóid nach bhfuil réitithe chuig an gCoimisiún, agus chuir sí ráiteas mionsonraithe ar fáil don Choimisiún maidir leis an ábhar nach raibh na Ballstáit in ann teacht ar chomhaontú ina leith agus maidir leis na cúiseanna a bhí lena n-easaontas i gcomhréir le hAirteagal 36(1) de Rialachán (AE) Uimh. 528/2012. Cuireadh an ráiteas sin ar aghaidh chuig na Ballstáit lena mbaineann agus chuig an iarratasóir.

(4)

An 21 Eanáir 2025, d’iarr an Coimisiún ar an nGníomhaireacht Eorpach Ceimiceán (‘an Ghníomhaireacht’) tuairim a thabhairt maidir leis an easaontas i gcomhréir le hAirteagal 36(2) de Rialachán (AE) Uimh. 528/2012. Iarradh ar an nGníomhaireacht teacht ar chonclúid i dtaobh an bhfuil gá le measúnú nochta agus riosca shistéamaigh agus, más gá, toradh an mheasúnaithe riosca sin. Iarradh ar an nGníomhaireacht freisin teacht ar chonclúid i dtaobh an bhfuil an riosca áitiúil ó úsáid an táirge inghlactha i bhfianaise bearta maolaithe riosca iomchuí agus trí chaitheamh trealaimh cosanta pearsanta. Thairis sin, iarradh ar an nGníomhaireacht an gá measúnú comhcheangailte nochta agus riosca a dhéanamh ar chlóraicréasól agus ar an tsubstaint ar údar imní í, própán-2-ól, agus más gá, toradh an mheasúnaithe riosca sin. Ar deireadh, iarradh ar an nGníomhaireacht a shoiléiriú, bunaithe ar na freagraí ar na chéad cheisteanna, an gcomhlíontar an coinníoll in Airteagal 19(1), pointe (b)(iii), de Rialachán (AE) Uimh. 528/2012 i gcás an táirge.

(5)

An 16 Bealtaine 2025 ghlac Coiste na Gníomhaireachta um Tháirgí Bithicídeacha an tuairim uaidh (4). De réir na Gníomhaireachta, ba cheart measúnú nochta agus riosca shistéamaigh a dhéanamh ar an tsubstaint ghníomhach clóraicréasól agus measúnú comhcheangailte riosca a dhéanamh ar an tsubstaint ghníomhach agus ar an tsubstaint ar údar imní í. Tháinig an Ghníomhaireacht ar an gconclúid gur léirigh toradh an mheasúnaithe nochta agus riosca shistéamaigh, an mheasúnaithe riosca áitiúil agus an mheasúnaithe riosca comhcheangailte nár bhain aon riosca do-ghlactha le húsáid an táirge nuair a bhí bearta maolaithe riosca áirithe á gcur i bhfeidhm. Tháinig an Ghníomhaireacht ar an gconclúid go gcomhlíonann an táirge coinníollacha Airteagal 19(1), pointe (b)(iii), de Rialachán (AE) Uimh. 528/2012.

(6)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Tháirgí Bithicídeacha,