(1)

Le Rialachán Cur Chun Feidhme (AE) 2018/2019 ón gCoimisiún (2), bunaítear, ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Tar éis réamh-mheasúnú a dhéanamh, liostaíodh 34 ghéineas agus aon speiceas amháin de phlandaí le haghaidh plandú de thionscnamh tríú tíortha i Rialachán Cur Chun Feidhme (AE) 2018/2019 go sealadach mar phlandaí a mbaineann ardriosca leo. Tá an géineas Salix L. ar an liosta sin.

(3)

An 7 Lúnasa 2023 chuir an Ríocht Aontaithe (3) dhá iarraidh faoi bhráid an Choimisiúin maidir leis na nithe seo a leanas a onnmhairiú chuig an Aontas: plandaí síolchillín Salix caprea agus Salix cinerea atá suas le 2 bhliain d’aois agus nach mó ná 1 cm an trastomhas acu, gearrthóga/beangán nódaithe Salix caprea agus Salix cinerea atá suas le 2 bhliain d’aois agus nach mó ná 12 mm an trastomhas acu, plandaí Salix caprea agus Salix cinerea le haghaidh plandú atá suas le 7 mbliana d’aois, iad fréamhlom, agus nach mó ná 40 mm an trastomhas acu ag bonn an ghais, agus plandaíSalix caprea agus Salix cinerea le haghaidh plandú i ndamhna fáis atá suas le 15 bliana d’aois agus nach mó ná 140 mm an trastomhas acu ag bonn an ghais (‘na plandaí ábhartha’). Cuireadh na sainchomhaid theicniúla ábhartha isteach leis na hiarrataí sin.

(4)

An 28 Márta 2025 ghlac an tÚdarás Eorpach um Shábháilteacht Bia (‘an tÚdarás’) tuairim eolaíoch maidir le measúnú riosca na bplandaí ábhartha (4). Shainaithin an tÚdarás Bemisia tabaci (daonraí Eorpacha), Entoleuca mammata agus Phytophthora ramorum (aonraígh nach aonraígh de chuid an Aontais iad) mar lotnaidí atá ábhartha do na plandaí sin, rinne sé meastóireacht ar na bearta maolaithe riosca a thuairiscítear sna sainchomhaid theicniúla agus rinne sé meastachán ar an dóchúlacht go mbeadh na plandaí ábhartha saor ó na lotnaidí sin.

(5)

Liostaítear Phytophthora ramorum (aonraígh nach aonraígh de chuid an Aontais iad) mar lotnaid choraintín de chuid an Aontais in Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (5), agus liostaítear Bemisia tabaci (daonraí Eorpacha) agusEntoleuca mammata mar lotnaidí coraintín de chuid criosanna cosanta in Iarscríbhinn III a ghabhann leis an Rialachán Cur Chun Feidhme sin.

(6)

Ar bhonn na tuairime ón Údarás, meastar go bhfuil an riosca fiteashláintíochta a eascraíonn ó na plandaí ábhartha a thabhairt isteach i gcríoch an Aontais laghdaithe go leibhéal inghlactha, ar choinníoll go gcomhlíontar na ceanglais allmhairiúcháin lena mbaineann arna leagan amach in Iarscríbhinn VII a ghabhann le Rialachán Cur Chun Feidhme (AE) 2019/2072.

(7)

Ós rud é go meastar go bhfuil an riosca fíteashláintíochta ó phlandaí móra Salix caprea agus Salix cinerea le haghaidh plandú i ndamhna fáis atá suas le 15 bliana d’aois a thabhairt isteach i gcríoch an Aontais laghdaithe go leibhéal inghlactha, tá údar maith ann, le teacht ar an gconclúid go bhfuil an riosca fíteashláintíochta ó gach planda Salix caprea agus Salix cinerea le haghaidh plandú a thabhairt isteach san Aontas laghdaithe go leibhéal inghlactha, gan beann ar a méid, a n-aois, iad a bheith fréamhlom nó i ndamhna fáis nó de thionscnamh na Ríochta Aontaithe.

(8)

Dá bhrí sin, níor cheart a mheas a thuilleadh gur plandaí a mbaineann ardriosca leo atá i bplandaí Salix caprea agus Salix cinerea le haghaidh plandú. Dá bhrí sin, ba cheart iad a bhaint den liosta plandaí, táirgí plandaí agus réad eile a mbaineann ardriosca leo a leagtar amach san Iarscríbhinn a ghabhann le Rialachán Cur Chun Feidhme (AE) 2018/2019.

(9)

Dá bhrí sin, ba cheart Rialachán Cur Chun Feidhme (AE) 2018/2019 a leasú dá réir sin.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,