(1)

Le Treoir (AE) 2024/1275 tugtar de chumhacht don Choimisiún gníomhartha tarmligthe a ghlacadh chun creat modheolaíochta comparáideach a bhunú chun na leibhéil is fearr costas maidir le híoscheanglais feidhmíochta fuinnimh le haghaidh foirgneamh agus eilimintí foirgnimh a ríomh, agus chun athbhreithniú a dhéanamh ar na leibhéil is fearr costas.

(2)

Le Treoir (AE) 2024/1275, ceanglaítear ar na Ballstáit íoscheanglais feidhmíochta fuinnimh a leagan síos le haghaidh foirgneamh agus eilimintí foirgnimh, d’fhonn na leibhéil is fearr costas a bhaint amach ar a laghad. Áiritheoidh na Ballstáit freisin go sroichfidh na ceanglais a leagann siad síos maidir le córais theicniúla foirgneamh na leibhéil is fearr agus is déanaí costas ar a laghad. Is faoi na Ballstáit atá sé cinneadh a dhéanamh an ndéantar an tagarmharc náisiúnta a úsáidtear mar thoradh deiridh ar na ríomhanna maidir leis na leibhéil is fearr costas a ríomh ó thaobh na maicreacnamaíochta de (ag féachaint ar na costais agus ar na tairbhí a bhaineann le hinfheistíochtaí éifeachtúlachta fuinnimh don tsochaí ina hiomláine) nó ó dhearcadh airgeadais amháin (ag féachaint ar an infheistíocht féin amháin). Níl na híoscheanglais feidhmíochta fuinnimh náisiúnta le bheith níos mó ná 15 % níos boige ná toradh na dtorthaí maidir leis na leibhéil is fearr costas ar an ríomh a dhéantar mar thagarmharc náisiúnta. Tá an leibhéal is fearr costas le bheith laistigh de raon na leibhéal feidhmíochta nuair is dearfach an anailís costais is tairbhe le linn na saolré.

(3)

Le Treoir (AE) 2024/1275, cuirtear laghdú ar úsáid fuinnimh sa timpeallacht thógtha chun cinn ach cuirtear i dtábhacht inti freisin gur príomhfhoinse astaíochtaí gás ceaptha teasa í earnáil na tógála agus gurb í is cúis le thart ar leath d’astaíochtaí príomh-mhínábhar cáithníneach (PM 2,5) san Aontas, arb iad is cúis le bás anabaí agus le tinneas.

(4)

Tagann feidhmíocht na gcomhpháirteanna neamhspleácha faoi raon feidhme na rialachán táirgeshonrach. Le Rialachán (AE) 2024/1781 ó Pharlaimint na hEorpa agus ón gComhairle (2), bunaítear íoscheanglais feidhmíochta fuinnimh le haghaidh beagnach gach catagóir earraí fisiceacha, lena n-áirítear táirgí a bhaineann le fuinneamh. Agus ceanglais náisiúnta maidir le córais theicniúla foirgneamh á socrú ag na Ballstáit, ní mór dóibh na bearta cur chun feidhme a bhunaítear faoin Rialachán sin agus na bearta atá ann cheana arna nglacadh de bhun Threoir 2009/125/CE ó Pharlaimint na hEorpa agus ón gComhairle (3) a chur san áireamh. Ba cheart feidhmíocht táirgí foirgníochta atá le húsáid le haghaidh na ríomhanna faoin Rialachán seo a chinneadh i gcomhréir le forálacha Rialachán (AE) 2024/3110 ó Pharlaimint na hEorpa agus ón gComhairle (4), chomh maith leis na bearta atá ann cheana arna nglacadh de bhun Rialachán (AE) Uimh. 305/2011 ó Pharlaimint na hEorpa agus ón gComhairle (5).

(5)

D’fhéadfadh cuspóir na leibhéal is fearr costas maidir le feidhmíocht fuinnimh, in imthosca áirithe, údar a thabhairt do na Ballstáit na ceanglais is fearr costas a shocrú maidir le heilimintí foirgnimh a chuireann, sa chleachtas, bacainní roimh dhearadh foirgneamh ar leith nó roimh roinnt roghanna teicniúla chomh maith le húsáid táirgí a bhaineann le fuinneamh ag a bhfuil feidhmíocht fuinnimh níos fearr agus, i gcás inarb ábhartha, feidhmíocht astaíochtaí níos fearr a spreagadh. De bhun Airteagal 2, pointe 32 de Threoir (AE) 2024/1275, chun na leibhéil is fearr costas a chinneadh, tá na seachtrachtaí comhshaoil agus sláinte a bhaineann le húsáid fuinnimh le cur san áireamh, chomh maith le costas lamháltas gás ceaptha teasa mar chuid de na costais fuinnimh.

(6)

Leagtar amach na céimeanna atá sa chreat modheolaíochta comparáideach in Iarscríbhinn VII a ghabhann le Treoir (AE) 2024/1275 agus áirítear leo foirgnimh thagartha a bhunú, bearta fuinneamhéifeachtúla a shainiú agus bearta bunaithe ar fhoinsí in-athnuaite atá le cur i bhfeidhm maidir leis na foirgnimh thagartha sin, an measúnú ar an úsáid iomlán fuinnimh phríomhúil agus ar na hastaíochtaí a eascraíonn as sin tar éis na mbeart sin, agus ríomh a dhéanamh ar chostais na mbeart sin, is é sin le rá glanluach láithreach na mbeart sin.

(7)

An creat comhchoiteann chun an fheidhmíocht fuinnimh a ríomh mar a bhunaítear in Iarscríbhinn I a ghabhann le Treoir (AE) 2024/1275, tá feidhm aige freisin maidir le gach céim den mhodheolaíocht creata maidir leis na leibhéil is fearr costas, go háirithe maidir le feidhmíocht fuinnimh agus astaíochtaí foirgneamh agus eilimintí foirgnimh a ríomh. Tagann táirgeadh fuinnimh ar an láthair trí úsáid a bhaint as foinsí fuinnimh in-athnuaite atá ar fáil go háitiúil (e.g. teas comhthimpeallach, teas geoiteirmeach, grianfhuinneamh teirmeach, fuinneamh fótavoltach, etc.) in ionad fuinneamh a sheachadtar ón eangach agus laghdaíonn sé tionchar an fhoirgnimh ar an eangach fuinnimh. Chun na tairbhí sin a léiriú, ní chuirfear san áireamh in úsáid fuinnimh phríomhúil iomlán an tionchar a bhíonn ag féinúsáid fuinnimh in-athnuaite a tháirgtear ar an láthair. Tá solúbthacht ag na Ballstáit maidir leis an gcaoi a dtugann siad cuntas ar fhuinneamh in-athnuaite a tháirgtear ar an láthair agus a úsáidtear le haghaidh úsáidí nach úsáidí feidhmíochta fuinnimh foirgneamh iad nó a onnmhairítear chuig an eangach agus fuinneamh príomhúil foirgnimh á ríomh.

(8)

Chun críche an Rialacháin seo, tagraíonn an fheidhmíocht astaíochtaí do na hastaíochtaí oibríochtúla a tháirgtear ar an láthair (díreach) agus do na hastaíochtaí sin ó ghiniúint fuinnimh lasmuigh den láthair a úsáideann an foirgneamh (indíreach). Agus na leibhéil is fearr costas maidir le híoscheanglais feidhmíochta fuinnimh á ríomh, d’fhéadfadh na Ballstáit an poitéinseal téimh dhomhanda ar feadh saolré a chur san áireamh freisin.

(9)

Chun an creat modheolaíochta comparáideach a chur in oiriúint d’imthosca náisiúnta, ba cheart do na Ballstáit saolré eacnamaíoch mheasta foirgnimh agus/nó eiliminte foirgnimh a chinneadh; an costas iomchuí d’iompróirí fuinnimh, do tháirgí, do chórais, do chothabháil, do chostais oibríochtúla agus saothair; na fachtóirí coinbhéartachta fuinnimh phríomhúil in-athnuaite agus neamh-in-athnuaite nó na fachtóirí ualaithe in aghaidh an iompróra fuinnimh; na fachtóirí coinbhéartachta maidir le hastaíochtaí gás ceaptha teasa; na forbairtí ar phraghsanna fuinnimh atá le glacadh i gcás breoslaí a úsáidtear ina gcomhthéacs náisiúnta le haghaidh fuinneamh a úsáidtear i bhfoirgnimh, agus costas lamháltas gás ceaptha teasa á chur san áireamh i gcás inarb iomchuí; agus na forbairtí ar phraghsanna carbóin. A mhéid a bhaineann le forbairtí ar phraghsanna fuinnimh agus carbóin, ba cheart do na Ballstáit an fhaisnéis arna soláthar ag an gCoimisiún a chur san áireamh, chomh maith leis an gcóras nua trádála astaíochtaí le haghaidh astaíochtaí ó dhóchán breosla in earnáil na bhfoirgneamh, earnáil an iompair de bhóthar, agus earnálacha breise (6). Is féidir leis na Ballstáit luach airgid a chur freisin ar thairbhí iomadúla na mbeart éifeachtúlachta fuinnimh ina ríomhanna maidir leis na leibhéil is fearr costas, lena n-áirítear, mar shampla, le haghaidh sláinte phríobháideach agus phoiblí agus le haghaidh na holltáirgeacht intíre (OTI).

(10)

Léiríonn an ráta lascaine go pointe áirithe ní hamháin tosaíochtaí beartais (le haghaidh ríomhanna maicreacnamaíocha), ach timpeallachtaí maoiniúcháin éagsúla agus dálaí morgáiste freisin. D’fhéadfadh tionchar mór a bheith ag rogha an ráta lascaine ar thoradh ríomhanna an chreata modheolaíochta chomparáidigh agus ní mór do na Ballstáit an ráta lascaine is iomchuí a chinneadh le haghaidh gach ríomha a luaithe a dhéanfar an measúnú íogaireachta. Dá bhrí sin, ba cheart do na Ballstáit an ráta lascaine atá le húsáid i ríomhanna maicreacnamaíocha agus airgeadais araon a bhunú freisin tar éis dóibh anailís íogaireachta a dhéanamh ar dhá ráta lascaine ar a laghad le haghaidh gach ríomha.

(11)

I gcomhréir leis na gealltanais maidir le hastaíochtaí náisiúnta truailleán a laghdú a leagtar síos le haghaidh príomhthruailleáin aeir de bhun Threoir (AE) 2016/2284 ó Pharlaimint na hEorpa agus ón gComhairle (7) agus leis na caighdeáin níos déine maidir le haercháilíocht a leagtar síos i dTreoir (AE) 2024/2881 ó Pharlaimint na hEorpa agus ón gComhairle (8), tugtar astaíochtaí truailleán aeir isteach sa ríomh maicreacnamaíoch. Leis an bpeirspictíocht níos leithne a sholáthraítear leis an ríomh maicreacnamaíoch a cheanglaítear leis an Rialachán seo, lena n-áirítear luach airgid a chur ar na tionchair ar an tsláinte agus ar an gcomhshaol a bhaineann le hastaíochtaí PM2,5 agus NOx chomh maith leis na costais a bhaineann le hastaíochtaí gás ceaptha teasa (GCT), soláthraítear faisnéis a d’fhéadfadh a bheith úsáideach, lasmuigh den ríomh maidir leis na leibhéil is fearr costas freisin, mar shampla chun ceanglais bhreise a bhunú, lena n-áirítear é sin a dhéanamh i dtéarmaí feidhmíochta astaíochtaí, agus cuspóirí beartais aeráide, comhshaoil agus sláinte poiblí níos leithne.

(12)

Chun cur chuige comhchoiteann a áirithiú maidir le cur i bhfeidhm an chreata modheolaíochta chomparáidigh ag na Ballstáit, ba cheart don Choimisiún na príomh-chreatchoinníollacha is gá a bhunú chun glanluachanna láithreacha a ríomh, amhail an bhliain tosaigh le haghaidh ríomhanna, na catagóirí costais atá le breithniú agus an tréimhse ríomha atá le húsáid. Ba cheart an Rialachán seo a chur in ionad an chreata modheolaíochta chomparáidigh atá ann cheana a leagtar amach i Rialachán Tarmligthe (AE) Uimh. 244/2012 ón gCoimisiún (9).

(13)

Ní thagann bunú tréimhse choiteann ríomha salach ar cheart na mBallstát saolré eacnamaíoch mheasta foirgneamh nó eilimintí foirgnimh a shocrú, ós rud é go bhféadfadh an tsaolré sin a bheith níos faide nó níos giorra ná an tréimhse ríomha a shocraítear. Ní bhíonn ach tionchar teoranta ag saolré eacnamaíoch mheasta foirgnimh nó eiliminte foirgnimh ar an tréimhse ríomha, ós rud é go gcinntear an tréimhse ríomha ina ionad sin ar bhonn timthriall athchóirithe foirgnimh, arb é sin an tréimhse ama a ndéantar athchóiriú mór ar fhoirgneamh ina diaidh.

(14)

Is iondúil go mbíonn anailís íogaireachta ag gabháil le ríomhanna costais agus réamh-mheastacháin lena ngabhann go leor toimhdí agus neamhchinnteachtaí, lena n-áirítear, mar shampla, forbairtí ar phraghsanna fuinnimh le himeacht ama, chun meastóireacht a dhéanamh ar stóinseacht na bpríomhpharaiméadar ionchuir. Chun críche na ríomhanna is fearr costas, ba cheart leis an anailís íogaireachta aghaidh a thabhairt ar na forbairtí ar phraghsanna fuinnimh agus ar an ráta lascaine ar a laghad.

(15)

Le fachtóirí fuinnimh phríomhúil réamhbhreathnaitheacha nó fachtóirí ualaithe réamhbhreathnaitheacha agus fachtóirí astaíochtaí gás ceaptha teasa, arna gcur san áireamh go hiomchuí le linn na tréimhse ríomha, féadfar dícharbónú forásach na heangaí leictreachais agus líonraí téimh ceantair éifeachtúla a chur san áireamh sa ríomh, i gcomhréir le spriocanna laghdaithe astaíochtaí agus aeráidneodrachta 2030 a leagtar amach sna pleananna náisiúnta fuinnimh agus aeráide arna gcur faoi bhráid an Choimisiúin de bhun Airteagal 14 de Rialachán (AE) 2018/1999 ó Pharlaimint na hEorpa agus ón gComhairle (10). Ba cheart fachtóirí den sórt sin a shonrú go hiomchuí, mar shampla tríd an staid i mbliain tosaigh an ríofa agus an dul chun cinn a bhfuil coinne leis le linn shaolré an fhoirgnimh a chur san áireamh. Ba cheart athbhreithniú a dhéanamh ar na fachtóirí sin agus, i gcás inar gá, iad a thabhairt cothrom le dáta gach uair a dhéantar na leibhéil is fearr costas a ríomh. Is féidir leo a bheith i gcomhthráth leis na fachtóirí a leagtar síos chun feidhmíocht fuinnimh foirgneamh a ríomh, a shocraítear i gcomhréir le hIarscríbhinn I a ghabhann le Treoir (AE) 2024/1275. Ba cheart fachtóirí réamhbhreathnaitheacha fuinnimh phríomhúil nó ualaithe a úsáid sa ríomh, ach moltar astaíochtaí gás ceaptha teasa réamhbhreathnaitheacha.

(16)

Leis an gcreat modheolaíochta comparáideach, ba cheart é a chur ar a gcumas do na Ballstáit torthaí na ríomhanna is fearr costas a chur i gcomparáid leis na híoscheanglais feidhmíochta fuinnimh atá i bhfeidhm agus toradh na comparáide a úsáid chun a áirithiú go socrófar íoscheanglais feidhmíochta fuinnimh d’fhonn ar a laghad na leibhéil is fearr costas a bhaint amach agus, i gcás inarb ábhartha, luachanna tagartha níos déine a bhaint amach, mar shampla ceanglais maidir le foirgnimh atá nach mór neodrach ó thaobh fuinnimh de agus ceanglais maidir le foirgnimh astaíochtaí nialasacha. Ba cheart na leibhéil sin a ailíniú leis na conairí náisiúnta a leagtar amach sna pleananna náisiúnta fuinnimh agus aeráide (PNFA) arna gcur faoi bhráid an Choimisiúin de bhun Airteagal 14 de Rialachán (AE) 2018/1999. Ina theannta sin, ba cheart do na Ballstáit a bheith in ann breithniú a dhéanamh ar íoscheanglais feidhmíochta fuinnimh a shocrú ar an leibhéal is fearr costas le haghaidh na gcatagóirí foirgneamh sin i gcás nach raibh aon íoscheanglas feidhmíochta fuinnimh ann go dtí seo.

(17)

Tá an mhodheolaíocht is fearr costas neodrach ó thaobh na teicneolaíochta de agus níl sí i bhfabhar réiteach teicneolaíoch amháin thar réiteach teicneolaíoch eile. Áirithítear leis iomaíocht i dtaca le bearta, pacáistí, nó athraithigh ar feadh saolré mheasta foirgnimh nó eiliminte foirgnimh.

(18)

Chun ualach riaracháin na mBallstát a íoslaghdú, ba cheart do na Ballstáit a bheith in ann líon na ríomhanna a laghdú trí fhoirgnimh thagartha a bhunú atá ionadaíoch maidir le níos mó ná catagóir foirgnimh amháin, gan difear a dhéanamh dá n-oibleagáidí de bhun Threoir (AE) 2024/1275 íoscheanglais feidhmíochta fuinnimh a leagan síos do chatagóirí áirithe foirgneamh.

(19)

Tá na leibhéil is fearr costas ábhartha freisin don chaighdeán nua ‘foirgneamh astaíochtaí nialasacha’, a shainmhínítear in Airteagal 2(2) de Threoir (AE) 2024/1275, ós rud é go bhfuil na huastairseacha d’úsáid fuinnimh phríomhúil le socrú d’fhonn ar a laghad na leibhéil is fearr costas a bhaint amach agus tá siad le hathbhreithniú gach uair a dhéanfar athbhreithniú ar na leibhéil is fearr costas. I gcomhréir leis an sainmhíniú ar fhoirgneamh astaíochtaí nialasacha, ní féidir bearta lena dtáirgtear astaíochtaí carbóin ar an láthair ó bhreoslaí iontaise a mheas sna ríomhanna is fearr costas le haghaidh foirgnimh astaíochtaí nialasacha.

(20)

Ba cheart, dá bhrí sin, Rialachán Tarmligthe (AE) Uimh. 244/2012 a aisghairm.

(21)

Chuathas i gcomhairle leis na saineolaithe arna n-ainmniú ag gach Ballstát i gcomhréir le hAirteagal 32(4) de Threoir (AE) 2024/1275,

(1)

ciallaíonn ‘costas domhanda’ suim luachanna láithreacha na gcostas infheistíochta tosaigh, na gcostas reatha, na gcostas athsholáthair (le tagairt don bhliain tosaigh), na gcostas bainistíochta dramhaíola, más infheidhme agus, chun críocha an ríomha ar an leibhéal maicreacnamaíoch, áirítear leis costais astaíochtaí gás ceaptha teasa chomh maith le seachtrachtaí sláinte agus comhshaoil a bhaineann le húsáid fuinnimh;

(2)

ciallaíonn ‘costas infheistíochta tosaigh’ na costais uile a thabhaítear suas go dtí an pointe nuair a sheachadtar an foirgneamh nó an eilimint foirgnimh don chustaiméir, réidh le húsáid. Áirítear ar na costais sin dearadh, ceannach eilimintí foirgnimh, nascadh le soláthróirí, próisis suiteála agus choimisiúnaithe;

(3)

ciallaíonn ‘costas fuinnimh’ na costais fuinnimh bhliantúla, lena n-áirítear praghas fuinnimh, taraifí acmhainneachta agus taraifí eangaí, agus cánacha náisiúnta, agus costas lamháltas gás ceaptha teasa á chur san áireamh.

(4)

ciallaíonn ‘costas oibriúcháin’ na costais uile atá nasctha le hoibriú an fhoirgnimh, lena n-áirítear costais bhliantúla le haghaidh árachais, muirir fóntais agus muirir sheasta agus cánacha eile;

(5)

ciallaíonn ‘costas cothabhála’ na costais bhliantúla a bhaineann le bearta chun cáilíocht inmhianaithe an fhoirgnimh nó na heiliminte foirgnimh a chaomhnú agus a athchóiriú, lena n-áirítear costais bhliantúla a bhaineann le hiniúchadh, glanadh, coigeartuithe, deisiú agus nithe inchaite;

(6)

ciallaíonn ‘costas reatha’ na costais bhliantúla chothabhála, oibriúcháin agus fuinnimh;

(7)

ciallaíonn ‘costas bainistíochta dramhaíola’ an costas a bhaineann le foirgneamh nó eilimint foirgnimh ag deireadh a shaolré, lena n-áirítear díchóimeáil, eilimintí foirgnimh nár tháinig go deireadh a saolré go fóill a bhaint, iompar, diúscairt agus athchúrsáil;

(8)

ciallaíonn ‘costas athsholáthair’ infheistíocht ionadach le haghaidh eilimint foirgnimh, i gcomhréir leis an tsaolré eacnamaíoch mheasta le linn na tréimhse ríomha;

(9)

ciallaíonn ‘costas bliantúil’ suim na gcostas reatha agus na gcostas athsholáthair a íoctar in aghaidh na bliana;

(10)

ciallaíonn ‘costas astaíochtaí gás ceaptha teasa’ luach airgeadúil an damáiste don chomhshaol arb iad astaíochtaí CO2 a bhaineann le tomhaltas fuinnimh i bhfoirgnimh is cúis leis;

(11)

gan bheith teoranta dó, ciallaíonn ‘seachtrachtaí comhshaoil agus sláinte a bhaineann le húsáid fuinnimh’ luach airgeadúil an damáiste don tsláinte agus don chomhshaol arb iad astaíochtaí PM2,5 agus NOx, a bhaineann le tomhaltas fuinnimh i bhfoirgnimh, is cúis leo;

(12)

ciallaíonn ‘foirgneamh tagartha’ foirgneamh hipitéiseach nó fíorfhoirgneamh a léiríonn an gheoiméadracht agus na gnáthchórais foirgnimh, an ghnáthfheidhmíocht fuinnimh d’imchlúdach foirgnimh agus do chórais araon, an ghnáthfheidhmiúlacht agus an gnáthstruchtúr costais sa Bhallstát, agus atá ionadaíoch maidir le dálaí aeráide agus suíomh geografach;

(13)

ciallaíonn ‘ráta lascaine’ luach sonrach chun comparáid a dhéanamh idir luach airgid ag amanna éagsúla arna shloinneadh i dtéarmaí réadacha;

(14)

ciallaíonn ‘fachtóir lascaine’ uimhir iolraithe a úsáidtear chun sreabhadh airgid a tharlaíonn ag pointe áirithe a thiontú go dtí a luach coibhéiseach ag an túsphointe, a dhíorthaítear ón ráta lascaine;

(15)

ciallaíonn ‘bliain tosaigh’ an bhliain óna gcinntear an tréimhse ríomha;

(16)

ciallaíonn ‘tréimhse ríomha’ an tréimhse ama a bhreithnítear don ríomh, arna sloinneadh ina blianta de ghnáth;

(17)

ciallaíonn ‘luach iarmharach foirgnimh’ suim luachanna iarmharacha na n-eilimintí foirgnimh ag deireadh na tréimhse ríomha;

(18)

ciallaíonn ‘forbairt ar phraghsanna’ forbairt le himeacht ama ar phraghsanna ar fhuinneamh, ar tháirgí, ar chórais foirgneamh, ar sheirbhísí, ar shaothar, ar chothabháil agus ar chostais eile a d’fhéadfadh a bheith éagsúil leis an ráta boilscithe;

(19)

ciallaíonn ‘beart éifeachtúlachta fuinnimh’ athrú ar fhoirgneamh nó eilimint foirgnimh as a dtagann laghdú ar úsáid fuinnimh deiridh an fhoirgnimh;

(20)

ciallaíonn ‘pacáiste’ sraith beart éifeachtúlachta fuinnimh nó beart atá bunaithe ar fhoinsí in-athnuaite fuinnimh a chuirtear i bhfeidhm maidir le foirgneamh tagartha, nó an dá rud;

(21)

ciallaíonn ‘athraitheach’ toradh foriomlán na sraithe iomláine beart nó pacáistí, agus tuairisc uirthi, ar sraith í a chuirtear i bhfeidhm ar fhoirgneamh ar féidir a bheith comhdhéanta de theaglaim de bhearta maidir leis an imchlúdach foirgnimh, teicnící éighníomhacha, bearta maidir le córais foirgneamh nó bearta atá bunaithe ar fhoinsí fuinnimh in-athnuaite, nó teaglaim de na bearta sin;

(22)

ciallaíonn ‘fochatagóirí foirgneamh’ catagóirí de chineálacha foirgneamh atá níos imdhealaithe de réir méide, aoise, ábhair foirgníochta, patrúin úsáide, crios aeráide nó de réir critéir seachas na critéir sin a bhunaítear i bpointe 6 d’Iarscríbhinn I a ghabhann le Treoir (AE) 2024/1275, a mbunaítear foirgnimh thagartha ina leith i gcoitinne;