(1)

Ba cheart an sainmhíniú ar ‘eilimint foirgnimh a oibrítear le mótar’ in Iarscríbhinn I a ghabhann le Rialachán (AE) 2023/826 ón gCoimisiún (2) a athrú chun soiléireacht dhlíthiúil a sholáthar agus chun ailíniú a sholáthar leis na táirgí a liostaítear in Iarscríbhinn II, pointe 6 mar eilimintí foirgnimh a oibrítear le mótar.

(2)

Ba cheart sainmhíniú ar an téarma ‘aonad rialaithe’ a chur le hIarscríbhinn I a ghabhann le Rialachán (AE) 2023/826, chun deimhneacht dhlíthiúil a sholáthar a mhéid a bhaineann le heilimintí foirgnimh a oibrítear le mótar agus a chumhdaítear leis an Rialachán sin.

(3)

In Iarscríbhinn II, pointe 1, a ghabhann le Rialachán (AE) 2023/826 tá liosta d’fhearais arna ndearadh, arna dtástáil agus arna margú lena n-úsáid sa teach agus a bhfuil feidhm ag na ceanglais éicidhearthóireachta ábhartha maidir leo. Chun deimhneacht dhlíthiúil a áirithiú, an cineál meilteoirí dá ndéantar tagairt, ba cheart iad a shonrú ann.

(4)

Ba cheart Iarscríbhinn IV a ghabhann le Rialachán (AE) 2023/826 lena socraítear na modhanna tomhais agus na ríomhanna a leasú ionas go mbeidh feidhm ag na coinníollacha tomhais a áirítear faoina phointe (d) maidir leis na cineálacha meaisíní caife tí uile a chumhdaítear leis an Rialachán sin, agus ní hamháin maidir leo siúd a mheastar a bheith ina dtrealamh líonraithe.

(5)

Raon feidhme an nós imeachta a dtugtar tuairisc air in Iarscríbhinn IV, pointe (c), a ghabhann le Rialachán (AE) 2023/826 maidir le modhanna tomhais agus ríomhanna, ba cheart é a shoiléiriú.

(6)

Is gá cosc a chur ar chleachtais lena n-athraítear feidhmíocht táirgí go neamhdhleathach chun toradh níos fabhraí a bhaint amach. Tá feidhm ag míreanna 1 go 4 d’Airteagal 40 de Rialachán (AE) 2024/1781 ó Pharlaimint na hEorpa agus ón gComhairle (3) lena n-áirithítear go dtéitear i ngleic ar bhealach cuimsitheach leis an gcosc ar imchéimniú, maidir le táirgí a chumhdaítear le Rialachán (AE) 2023/2533 (4) ón gCoimisiún. Dá bhrí sin, níl gá le hAirteagal 6 de Rialachán (AE) 2023/2533 agus ba cheart é a scriosadh.

(7)

Chun deimhneacht dhlíthiúil a áirithiú, ba cheart sainmhíniú ar ‘mheánchion taise deiridh’ a chur le hIarscríbhinn I a ghabhann le Rialachán (AE) 2023/2533, agus ba cheart na sainmhínithe a bhaineann le móid ísealchumhachta a ailíniú leo siúd atá i Rialachán (AE) 2023/826.

(8)

Leagtar amach in Iarscríbhinn II, pointe 5(1)(a), a ghabhann le Rialachán (AE) 2023/2533 liosta de pháirteanna spártha ba cheart, ar a laghad, a chur ar fáil do dheisitheoirí gairmiúla. Tá an liosta sin ina bhonn taca freisin le roghnú na bpáirteanna tosaíochta a áiríodh i ríomh an innéacs indeisitheachta a leagtar síos i Rialachán Tarmligthe (AE) 2023/2534 ón gCoimisiún (5). Ba cheart an liosta a leasú chun ailíniú a áirithiú idir na páirteanna spártha a rialaítear faoi Rialachán (AE) 2023/2533 agus na páirteanna tosaíochta a rialaítear faoi Rialachán Tarmligthe (AE) 2023/2534. Áirítear leis sin modhnú ar an ainm lena n-ainmnítear roinnt páirteanna spártha agus páirt spártha nua a chur leis atá ábhartha chun an t-innéacs indeisitheachta a ríomh.

(9)

Ba cheart Iarscríbhinn II, pointe 5(1)(b), a ghabhann le Rialachán (AE) 2023/2533 a leasú ionas nach mbeidh faisnéis faoi dheisiú a bhaineann le páirteanna spártha a bhfuil a n-infhaighteacht teoranta do dheisitheoirí gairmiúla ar fáil don phobal i gcoitinne trí shuíomh gréasáin saor-rochtana.

(10)

Ceanglaítear le hIarscríbhinn II, pointe 5(1)(e), a ghabhann le Rialachán (AE) 2023/2533, go bhféadfar páirteanna spártha a athsholáthar le huirlisí atá ar fáil go coitianta. Tá an téarma ‘uirlisí atá ar fáil go coitianta’ débhríoch agus ní thugann sé léargas beacht ar na huirlisí lena mbaineann. Ina theannta sin, an fhoirmle chun an t-innéacs indeisitheachta a ríomh a leagtar síos i Rialachán Tarmligthe (AE) 2023/2534 áirítear ann critéar scóir a bhaineann leis na cineálacha uirlisí a úsáidtear chun páirt tosaíochta shonrach a dhíchóimeáil, an scór ag brath ar cé acu is uirlisí bunúsacha, uirlisí a sholáthraítear leis na páirteanna spártha nó uirlisí atá ar fáil ar bhonn tráchtála iad na huirlisí. Ar mhaithe le comhsheasmhacht idir an dá rialachán, ba cheart an téarma ‘uirlisí atá ar fáil go coitianta’ i Rialachán (AE) 2023/2533 a ionadú agus a ailíniú leis an téarmaíocht a úsáidtear i Rialachán Tarmligthe (AE) 2023/2534 i gcás inarb ábhartha. Dá réir sin, ba cheart sainmhínithe ar ‘uirlisí atá ar fáil ar bhonn tráchtála’, ar ‘uirlisí bunúsacha’ agus ar ‘uirlisí dílsithe’ a thabhairt isteach.

(11)

Ba cheart Iarscríbhinn II, pointe 6(2), a ghabhann le Rialachán (AE) 2023/2533 a leasú chun soiléiriú a dhéanamh ar na luachanna ba cheart do mhonaróirí, d’allmhaireoirí nó d’ionadaithe údaraithe a sholáthar le haghaidh na bparaiméadar éagsúil le haghaidh an éiceachláir agus le haghaidh cláir eile, nuair a bheidh siad ar fáil.

(12)

Le hIarscríbhinn III, pointe 1(f), a ghabhann le Rialachán (AE) 2023/2533, forchuirtear oibleagáid ar mhonaróirí agus ar allmhaireoirí an meánchion taise deiridh le haghaidh an éiceachláir a dhearbhú. Dá ndéanfaí cion taise deiridh 0 % den ualach a dhearbhú sa doiciméadacht theicniúil, arb é an luach a iarrtar sa Rialachán sin é, d’fhéadfadh triomú an níocháin os cionn a chion uisce nádúrtha a bheith i gceist, rud a d’fhágfadh go mbeadh éifeachtaí neamh-inmhianaithe ann amhail úsáid iomarcach fuinnimh agus damáiste a d’fhéadfadh a bheith ann do na teicstílí. Dá bhrí sin, is gá an meánchion taise deiridh a scriosadh ó na ceanglais faisnéise in Iarscríbhinn II agus ó na modhanna ríofa agus tomhais in Iarscríbhinn III. Ina ionad sin, ba cheart na modhanna tomhais agus na modhanna ríofa a áirítear sna caighdeáin chomhchuibhithe, lena ndéantar foráil maidir le lamháltais iomchuí, a úsáid chun an paraiméadar sin a ríomh.

(13)

Ba cheart inneachar Thábla 1 in Iarscríbhinn IV a roinnt ina dhá thábla éagsúla chun soiléireacht a áirithiú.

(14)

Tá na bearta dá bhforáiltear sa Rialachán seo i gcomhréir leis an tuairim ón gCoiste a bunaíodh le hAirteagal 19 de Threoir 2009/125/CE,

(15)

Ba cheart, dá bhrí sin, Rialacháin (AE) 2023/826 agus (AE) 2023/2533 a leasú dá réir sin,

(1)

Scriostar Airteagal 6;

(2)

Cuirtear an méid seo a leanas in ionad Airteagal 13 maidir le teacht i bhfeidhm agus cur i bhfeidhm:

‘Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ón 1 Iúil 2025.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.’;

(3)

Leasaítear Iarscríbhinní I, II, III agus IV mar a leagtar amach san Iarscríbhinn a ghabhann leis an Rialachán seo.