(1)

Leagtar síos le Rialachán (AE) 2019/1241 forálacha sonracha maidir le bearta teicniúla ar an leibhéal réigiúnach le haghaidh uiscí an Aontais in Uiscí an Iarthuaiscirt.

(2)

Leasaíodh an Rialachán sin le Rialachán Tarmligthe (AE) 2021/2324 ón gCoimisiún (2) a mhéid a bhaineann le bearta ceartaitheacha chun foghabhálacha trosc agus faoitíní a laghdú sa Mhuir Cheilteach agus bearta roghnaíochta breise a bhfuil sé d’aidhm acu foghabhálacha gadóideach a laghdú i Muir Éireann. Maidir leis na bearta lena mbaineann, arb é is aidhm dóibh cuidiú le baint amach chuspóirí na mbeart caomhnúcháin, na bpleananna ilbhliantúla agus an phlean maidir le haschur ábhair mhuirí in Uiscí an Iarthuaiscirt, tugadh cothrom le dáta iad agus cuireadh síneadh leo faoi thrí ina dhiaidh sin, le Rialacháin Tharmligthe (AE) 2022/2588 (3), (AE) 2024/492 (4) agus (AE) 2025/283 (5) ón gCoimisiún, faoi seach.

(3)

Na bearta sin, a tugadh isteach i Rialachán (AE) 2019/1241 le Rialachán Tarmligthe (AE) 2025/283, rachaidh siad in éag an 31 Nollaig 2025.

(4)

Le moladh comhpháirteach a cuireadh isteach an 2 Meitheamh 2025, iarrann Grúpa Réigiúnach Bhallstáit Uiscí an Iarthuaiscirt (an Bheilg, an Spáinn, an Fhrainc, Éire agus an Ísiltír) go gcuirfí síneadh leis na bearta sin go dtí an 31 Nollaig 2026.

(5)

Ós rud é go bhfuil gá fós leis na bearta ceartaitheacha le haghaidh stoic ag a bhfuil leibhéil bhithmhaise faoi bhun an Blim, mar a fhoráiltear in Airteagal 8 de Rialachán (AE) 2019/472, chun a áirithiú go rachaidh an stoc nó an t-aonad feidhmiúil lena mbaineann ar ais chuig leibhéil os cionn na leibhéal sin ar ar féidir an uastáirgeacht inbhuanaithe a bhaint amach, i bhfianaise staid na stoc éisc sa Mhuir Cheilteach agus i Muir Éireann, staid atá ina húdar imní, agus i bhfianaise an phlé atá ag dul ar aghaidh fós idir an tAontas agus an Ríocht Aontaithe maidir le bearta teicniúla i ndáil le stoic éisc a ghabhtar in iascach measctha sa Mhuir Cheilteach, ba cheart síneadh a chur leis na bearta ceartaitheacha sin go dtí an 31 Nollaig 2026, chun gur féidir leanúint de bharrfheabhsú na bpátrún saothraithe, cur le roghnaíocht trealaimh agus laghdú ar ghabhálacha de thaisme.

(6)

Chuathas i gcomhairle leis an nGrúpa Saineolaithe um Iascach agus Dobharshaothrú an 8 Iúil 2025.

(7)

Ós rud é go mbíonn tionchar díreach ag na bearta dá bhforáiltear sa Rialachán seo ar phleanáil an tséasúir iascaireachta le haghaidh soithí de chuid an Aontais agus ar na gníomhaíochtaí eacnamaíocha a bhaineann leo, ba cheart an Rialachán seo a theacht i bhfeidhm an lá tar éis lá a fhoilsithe. Ós rud é go rachaidh na bearta a bhfuil síneadh le cur leo in éag an 31 Nollaig 2025, ba cheart feidhm a bheith ag an Rialachán seo ón 1 Eanáir 2026 chun leanúnachas dlí a áirithiú.

(8)

Leis na bearta a tugadh isteach leis an Rialachán seo, mar atá, na bearta is infheidhme maidir le huiscí an Aontais, saothraítear na cuspóirí a leagtar amach in Airteagal 494(1) agus (2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (6), agus tugtar aird leo ar na prionsabail dá dtagraítear in Airteagal 494(3) den chomhaontú sin. Tá siad gan dochar d’aon bheart is infheidhme in uiscí Ríocht Aontaithe na Breataine Móire agus Thuaisceart Éireann.

(9)

Ba cheart, dá bhrí sin, Rialachán (AE) 2019/1241 a leasú dá réir sin,