(1)

Tá dea-cháil na bainistíochta sinsearaí agus chomhaltaí bhord an athbhreithneora sheachtraigh ríthábhachtach chun a áirithiú go gcomhlíonfaidh an t-athbhreithneoir seachtrach a oibleagáidí rialála. Ba cheart measúnú ar dhea-cháil a bheith bunaithe ar fhaisnéis maidir le gníomhaíochtaí na ndaoine sin roimhe seo, lena n-áirítear faisnéis maidir le ciontuithe coiriúla ábhartha a d’fhéadfadh a bheith ann, mí-iompar roimhe seo, mórfhaillí, míbhainistiú coinbhleachtaí leasa nó laguithe ar neamhspleáchas agus oibiachtúlacht, agus faisnéis maidir lena macántacht, a n-ionracas agus a gcáil.

(2)

Ós rud é go bhfuil an bhainistíocht shinsearach agus comhaltaí an bhoird freagrach as gníomhaíochtaí an athbhreithneora sheachtraigh, ba cheart scileanna leordhóthanacha, cáilíochtaí gairmiúla leordhóthanacha agus taithí leordhóthanach a bheith acu. Ba cheart curriculum vitae chomhaltaí uile na bainistíochta sinsearaí agus an bhoird a chur san áireamh i measúnú i dtaobh cé acu an leor na scileanna, na cáilíochtaí gairmiúla agus an taithí sin, nó nach leor, lena n-áirítear faisnéis atá cothrom le dáta maidir le hoideachas, oiliúint agus stair fostaíochta. Ba cheart a chur san áireamh sa mheasúnú freisin comhdhéanamh foriomlán agus éagsúlacht fhoriomlán na bainistíochta sinsearaí agus an bhoird agus scileanna comhchoiteanna, cáilíochtaí gairmiúla agus taithí a gcomhaltaí, de réir mar is ábhartha do ghníomhaíochtaí an athbhreithneora sheachtraigh agus na rioscaí a bhfuil an t-athbhreithneoir seachtrach sin neamhchosanta orthu.

(3)

Chun leanúnachas agus rialtacht na n-athbhreithnithe seachtracha a choimirciú, ba cheart d’athbhreithneoir seachtrach líon iomchuí anailísithe, fostaithe agus daoine a bhfuil baint dhíreach acu le gníomhaíochtaí measúnaithe a fhostú. I ndáil leis sin, ba cheart faisnéis maidir le socruithe foirne athbhreithneora sheachtraigh le haghaidh anailísithe, fostaithe agus daoine a bhfuil baint dhíreach acu le gníomhaíochtaí measúnaithe a chur san áireamh. Ba cheart a áireamh san fhaisnéis sin líon na gconarthaí buana agus sealadacha, na gníomhaíochtaí measúnaithe is dócha a dhéanfar amach anseo, agus na cúiseanna a measann an t-athbhreithneoir seachtrach gur leor na hacmhainní anailíseacha.

(4)

Chun cáilíocht na n-athbhreithnithe seachtracha a áirithiú, ba cheart leibhéil leordhóthanacha eolais, taithí agus oiliúna a bheith ag anailísithe, fostaithe agus daoine eile a bhfuil baint dhíreach acu le gníomhaíochtaí measúnaithe. Ba cheart stair oideachais, oiliúna agus fostaíochta na ndaoine sin a chur san áireamh sa mheasúnú. Thairis sin, ba cheart d’athbhreithneoirí seachtracha pleananna oiliúna agus forbartha a chur i bhfeidhm do na fostaithe uile a bhfuil baint dhíreach acu le gníomhaíochtaí measúnaithe.

(5)

Chun a áirithiú go ndéanann struchtúir chinnteoireachta foráil maidir le bainistiú maith stuama an athbhreithneora sheachtraigh, ba cheart socruithe rialachais chorparáidigh a bheith ag athbhreithneoirí seachtracha lena sonraítear eagrú, raon feidhme, cuspóir agus feidhmiú a gcomhlachtaí rialachais, amhail an bord, an comhlacht maoirseachta agus na coistí ábhartha.

(6)

Cuid lárnach den bhainistiú maith stuama is ea struchtúr eagraíochtúil trédhearcach éifeachtach a choinneáil ar bun. Chun trédhearcacht agus éifeachtacht a struchtúir eagraíochtúil a áirithiú, ba cheart línte tuairiscithe, freagrachtaí agus bealaí cumarsáide soiléire a bheith ag athbhreithneoirí seachtracha lena spreagtar cuntasacht agus cinnteoireacht. Ar an gcúis chéanna, ba cheart d’athbhreithneoirí seachtracha beartais agus nósanna imeachta iomchuí a chur chun feidhme agus a dhoiciméadú i gceart maidir lena struchtúir rialachais, rialuithe inmheánacha, leanúnachas gnó, córais próiseála faisnéise, coimeád taifead, riarachán agus cuntasaíocht.

(7)

I bhfianaise a thábhachtaí atá na feidhmeanna rialaithe inmheánaigh do bhainistiú maith stuama athbhreithneora sheachtraigh, ba cheart d’athbhreithneoirí seachtracha creat um rialú inmheánach a chur i bhfeidhm lena n-áirithítear go gcumhachtaítear go hiomchuí na daoine atá freagrach as an bhfeidhm sin a dhéanamh agus go bhfuil deighilt shoiléir ann ó na línte gnó a bhfuil maoirseacht á déanamh acu orthu.

(8)

Chun bainistiú maith stuama ar chomhlíonadh a n-oibleagáidí faoi Rialachán (AE) 2023/2361 a áirithiú, ba cheart d’athbhreithneoirí seachtracha a áirithiú go bhformheasfaidh a mbord na beartais agus na nósanna imeachta is gá chun an Rialachán sin a chomhlíonadh.

(9)

Ba cheart beartas cuimsitheach coinbhleachtaí leasa arna fhormheas ag an mbord, agus fardal coinbhleachtaí leasa, a bheith i gcreat bainistíochta coinbhleachtaí leasa an athbhreithneora sheachtraigh. Ba cheart nósanna imeachta agus rialuithe bainistithe riosca a bheith sa bheartas coinbhleachtaí leasa chun coinbhleachtaí leasa atá ann nó a d’fhéadfadh a bheith ann a shainaithint, a dhíothú nó a bhainistiú agus a nochtadh ar bhealach trédhearcach. Ba cheart a shainaithint sa bheartas sin freisin cé na coinbhleachtaí leasa a mheasann an t-athbhreithneoir seachtrach atá le bainistiú nó le nochtadh ar bhealach trédhearcach agus cé na coinbhleachtaí leasa atá le díothú. Ina theannta sin, ba cheart foráil a dhéanamh sa bheartas sin maidir le maoirseacht agus bainistiú iomchuí a dhéanamh ar chásanna ina bhféadfaí dochar a dhéanamh do bhreithiúnas gairmiúil nó do chinnteoireacht ghairmiúil.

(10)

Ba cheart d’athbhreithneoirí seachtracha measúnú a dhéanamh ar cé acu atá sé d’acmhainn ag soláthraithe seirbhíse tríú páirtí gníomhaíochtaí measúnaithe a dhéanamh go hiontaofa agus go gairmiúil nó nach bhfuil. I ndáil leis sin, ba cheart d’athbhreithneoirí seachtracha a mheas cé acu atá saineolas agus infhaighteacht an tsoláthraí seirbhíse tríú páirtí iomchuí do na gníomhaíochtaí seachfhoinsithe nó nach bhfuil. Chun na críche sin, ba cheart d’athbhreithneoirí seachtracha príomheilimintí a bhaineann leis an soláthraí seirbhíse tríú páirtí agus leis an socrú seachfhoinsithe a chur san áireamh, ar nós a shamhla gnó, cáilíochtaí a fhoirne, an creat rialaithe, úsáid an uathoibrithe agus na teicneolaíochta sna gníomhaíochtaí measúnaithe seachfhoinsithe, agus a chomhlíonadh rialála.

(11)

Ba cheart d’athbhreithneoirí seachtracha a áirithiú nach gcuireann seachfhoinsiú gníomhaíochtaí measúnaithe isteach go hábhartha ar cháilíocht a rialaithe inmheánaigh. I ndáil leis sin, ba cheart d’athbhreithneoirí seachtracha meastóireacht a dhéanamh ar a mhéid atá siad ag brath ar an soláthraí seirbhíse tríú páirtí agus ba cheart dóibh faireachán agus rialú a dhéanamh ar ghníomhaíochtaí lena dtugtar aghaidh ar na rioscaí a eascraíonn as an seachfhoinsiú, go háirithe maidir le tríú tíortha. Ba cheart d’athbhreithneoirí seachtracha rialuithe inmheánacha a chur i bhfeidhm chun a áirithiú go bhfuil socruithe leordhóthanacha i bhfeidhm i ndáil le cáilíocht na seirbhíse a sholáthraíonn an soláthraí seirbhíse tríú páirtí. Ba cheart d’athbhreithneoirí seachtracha cleachtais leordhóthanacha a chur i bhfeidhm i ndáil le doiciméadacht agus coimeád taifead ag soláthraithe seirbhíse tríú páirtí. Ba cheart a áirithiú leis sin go mbeidh rochtain ag athbhreithneoir seachtrach agus ag an Údarás Eorpach um Urrúis agus Margaí (ESMA) ar an bhfaisnéis uile is gá agus nach gcuirfidh seachfhoinsiú gníomhaíochtaí measúnaithe isteach ar chumas ESMA maoirseacht a dhéanamh ar chomhlíonadh Rialachán (AE) 2023/2631 ag an athbhreithneoir seachtrach.

(12)

Chun leibhéal leordhóthanach formhaoirseachta ar ghníomhaíochtaí seachfhoinsithe a áirithiú, ba cheart d’athbhreithneoirí seachtracha measúnuithe tráthrialta a dhéanamh.

(13)

Ba cheart na caighdeáin theicniúla rialála atá le glacadh ar bhonn na gcumhachtaí a leagtar síos in Airteagal 23(6), an tríú fomhír, Airteagal 27(2), an tríú fomhír, Airteagal 28(3), an tríú fomhír agus Airteagal 33(7), an tríú fomhír de Rialachán (AE) 2023/2631 a chuachadh in aon Rialachán Tarmligthe amháin ón gCoimisiún chun a áirithiú go ndéanfar na forálacha uile lena sonraítear clárú athbhreithneoirí seachtracha a chomhdhlúthú in aon Rialachán amháin.

(14)

Maidir leis an bhfaisnéis a chuirfear faoi bhráid ESMA, d’fhéadfadh faisnéis a bheith inti faoi chéannacht na bainistíochta sinsearaí agus faoi chéannacht chomhaltaí bhord an athbhreithneora sheachtraigh is iarratasóir, chomh maith le hanailísithe, fostaithe agus daoine eile a bhfuil baint dhíreach acu le gníomhaíochtaí measúnaithe maidir lena n-oiriúnacht. Áirítear sonraí pearsanta i bhfaisnéis den sórt sin. I gcomhréir le prionsabal an íoslaghdaithe sonraí a chumhdaítear in Airteagal 4(1), pointe (c), de Rialachán (AE) 2018/1725 ó Pharlaimint na hEorpa agus ón gComhairle (2) , níor cheart a iarraidh ach sonraí pearsanta is gá chun ESMA a chumasú measúnú a dhéanamh ar chumas na bainistíochta sinsearaí, chomhaltaí bhord athbhreithneora sheachtraigh is iarratasóir, chomh maith le hanailísithe, fostaithe agus daoine eile a bhfuil baint dhíreach acu le gníomhaíochtaí measúnaithe, na ceanglais a leagtar síos i Rialachán (AE) 2023/2631 a chomhlíonadh.

(15)

Leis an Rialachán seo, urramaítear na cearta bunúsacha agus comhlíontar na prionsabail a aithnítear i gCairt um Chearta Bunúsacha an Aontais Eorpaigh, go háirithe an ceart go ndéanfar sonraí pearsanta a chosaint. Ba cheart próiseáil sonraí pearsanta chun críocha an Rialacháin seo a dhéanamh i gcomhréir leis an gcuid sin de dhlí an Aontais maidir le cosaint sonraí pearsanta. I ndáil leis sin, aon phróiseáil sonraí pearsanta a dhéanann ESMA agus an Rialachán seo á chur i bhfeidhm, ba cheart í a dhéanamh i gcomhréir le Rialachán (AE) 2018/1725. Aon phróiseáil sonraí pearsanta a dhéanann eintitis a dhéanann iarratas ar athbhreithneoir seachtrach laistigh de chur i bhfeidhm an Rialacháin seo, ba cheart í a dhéanamh i gcomhréir le Rialachán (AE) 2016/679 ó Pharlaimint na hEorpa agus ón gComhairle (3) agus le ceanglais náisiúnta maidir le daoine nádúrtha a chosaint maidir le próiseáil sonraí pearsanta.

(16)

Chun ESMA a chumasú an measúnú a dhéanamh chun críocha an chlárúcháin agus na maoirseachta leanúnaí, agus coimircí iomchuí á n-áirithiú an tráth céanna, ba cheart d’athbhreithneoirí seachtracha agus do ESMA sonraí pearsanta a bhaineann le dea-cháil na bainistíochta sinsearaí agus chomhaltaí bhord athbhreithneora sheachtraigh a choinneáil ar feadh tréimhse nach faide ná 5 bliana tar éis don chomhalta sin scor dá fheidhm a chomhlíonadh nó, i gcás tharraingt siar chlárú an athbhreithneora sheachtraigh lena mbaineann.

(17)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug an Maoirseoir tuairim an 7 Iúil 2025.

(18)

Is ar na dréachtchaighdeáin theicniúla rialála a chuir ESMA faoi bhráid an Choimisiúin atá an Rialachán seo bunaithe.

(19)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála a bhfuil an Rialachán seo bunaithe orthu, rinne sé anailís ar na costais agus ar na tairbhí gaolmhara a d’fhéadfadh a bheith ann agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (4),

(a)

nach n-eascraíonn róspleáchas ar an soláthraí seirbhíse tríú páirtí as líon agus cineál na ngníomhaíochtaí measúnaithe a bhfuiltear ag súil lena seachfhoinsiú;

(b)

go bhfuil coimircí i bhfeidhm chun na rioscaí a bhaineann leis an seachfhoinsiú a bhainistiú, lena n-áirítear rioscaí spleáchais maidir le soláthar na ngníomhaíochtaí measúnaithe seachfhoinsithe;

(c)

go bhfuil socruithe i bhfeidhm maidir le leanúnachas seirbhíse, lena n-áirítear pleananna teagmhasacha agus tástáil thréimhsiúil ar shaoráidí cúltaca;

(d)

go bhfuil socruithe i bhfeidhm maidir le slándáil sonraí agus córas, lena n-áirítear aon úsáid a bhaintear as néalteicneolaíocht;

(e)

go bhfuil coimircí i bhfeidhm chun a áirithiú go mbeidh an t-athbhreithneoir seachtrach in ann faireachán agus maoirseacht a dhéanamh ar na gníomhaíochtaí measúnaithe seachfhoinsithe;

(f)

i gcás ina bhfuil cead conarthach ag an soláthraí seirbhíse tríú páirtí feidhmiú na ngníomhaíochtaí measúnaithe a sheachfhoinsiú tuilleadh, go gcomhlíonann na gníomhaíochtaí sin na critéir a leagtar amach i bpointí (a) go (e).

(a)

go gcoinnítear leibhéal iomchuí doiciméadachta agus taifead ar ainmneacha agus ar phoist uile na ndaoine atá freagrach as an seachfhoinsiú a cheadú agus faireachán a dhéanamh air;

(b)

go bhfuil an soláthraí seirbhíse tríú páirtí in ann an fhaisnéis uile is gá a sholáthar don athbhreithneoir seachtrach maidir le gníomhaíochtaí measúnaithe seachfhoinsithe a éilíonn an t-athbhreithneoir seachtrach chun a léiriú go bhfuil Rialachán (AE) 2023/2631 á chomhlíonadh ag an athbhreithneoir seachtrach;

(c)

i gcás ina ndéantar gníomhaíochtaí measúnaithe a sheachfhoinsiú chuig soláthraí seirbhíse tríú páirtí tríú tír, go bhfuil nósanna imeachta i bhfeidhm ag an athbhreithneoir seachtrach agus ag an soláthraí seirbhíse tríú páirtí lena n-áirithítear bainistiú rioscaí a eascraíonn as an méid seo a leanas: