(1)

I gcomhréir le hAirteagal 5(1) agus (2) d’Ionstraim na Ginéive (2), féadfaidh Údaráis Inniúla gach Páirtí Chonarthaigh in Ionstraim na Ginéive iarratais a chomhdú chun ainmniúcháin tionscnaimh nó táisc gheografaigh a chlárú go hidirnáisiúnta le Biúró Idirnáisiúnta na hEagraíochta Domhanda um Maoin Intleachtúil, arb é a chláróidh sa Chlár Idirnáisiúnta é i gcomhréir le hAirteagal 6 d’Ionstraim na Ginéive. I gcomhréir le hAirteagal 9 d’Ionstraim na Ginéive, déanfaidh na Páirtithe Conarthacha eile ainmniúcháin tionscnaimh chláraithe agus tásca geografacha cláraithe a chosaint laistigh dá gcóras dlí féin faoi réir aon diúltú, aon tréigean, aon neamhbhailíochtú nó aon chealú.

(2)

I gcomhréir le hAirteagal 6(4) d’Ionstraim na Ginéive, an 7 Márta 2025, thug Biúró Idirnáisiúnta na hEagraíochta Domhanda um Maoin Intleachtúil fógra don Choimisiún faoin ainm ‘Vaj Ulliri Valmi Elbasan’, a ndearna an Albáin iarratas ina leith, is é sin go ndearnadh é a thaifeadadh ina Thásc Geografach sa Chlár Idirnáisiúnta um Ainmniúcháin Tionscnaimh agus um Thásca Geografacha faoi Ionstraim na Ginéive.

(3)

De bhun Airteagal 4 de Rialachán (AE) 2019/1753, foilsíodh clárú idirnáisiúnta an Táisc Gheografaigh ‘Vaj Ulliri Valmi Elbasan’ in Iris Oifigiúil an Aontais Eorpaigh (3) chun go bhféadfaí freasúraí a d’fhéadfadh a bheith ann a thaisceadh.

(4)

De bhun Airteagal 5 de Rialachán (AE) 2019/1753, rinne an Coimisiún measúnú ar chlárú idirnáisiúnta an Táisc Gheografaigh ‘Vaj Ulliri Valmi Elbasan’ de réir na gcoinníollacha a leagtar síos san Airteagal sin agus tháinig sé ar an gconclúid gur comhlíonadh iad.

(5)

Ós rud é nach bhfuair an Coimisiún aon fhreasúra faoi Airteagal 6 de Rialachán (AE) 2019/1753, ba cheart an t-ainm ‘Vaj Ulliri Valmi Elbasan’ a chosaint san Aontas, i gcomhréir le hIonstraim na Ginéive.

(6)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Beartas Cáilíochta maidir le táirgí talmhaíochta, fíon agus deochanna biotáilleacha faoi Rialachán (AE) 2024/1143 ó Pharlaimint na hEorpa agus ón gComhairle (4),