(1)

Na cuótaí iascaireachta le haghaidh 2023, leagtar síos iad le Rialacháin (AE) 2022/2090 (2), (AE) 2023/194 (3) agus (AE) 2023/195 (4) ón gComhairle.

(2)

Na cuótaí iascaireachta le haghaidh 2024, leagtar síos iad le Rialacháin (AE) 2023/2638 (5), (AE) 2024/257 (6) agus (AE) 2024/259 (7) ón gComhairle.

(3)

Na cuótaí iascaireachta le haghaidh 2025, leagtar síos iad le Rialacháin (AE) 2024/2903 (8), (AE) 2025/202 (9) agus (AE) 2025/219 (10) ón gComhairle.

(4)

De bhun Airteagal 105(1) de Rialachán (CE) Uimh. 1224/2009, i gcás inar shuigh an Coimisiún gur sháraigh Ballstát na cuótaí iascaireachta a cionroinneadh air, déanfaidh an Coimisiún asbhaintí ó chuótaí a chionroinnfear ar an mBallstát sin amach anseo.

(5)

Foráiltear le hAirteagal 105(2) agus (3) de Rialachán (CE) Uimh. 1224/2009 go bhfuil na hasbhaintí sin le hoibriú an bhliain dár gcionn nó sna blianta dár gcionn trí na fachtóirí iolraithe ábhartha a chur i bhfeidhm mar a leagtar amach ann.

(6)

Sháraigh Ballstáit áirithe a gcuótaí iascaireachta le haghaidh 2024. Dá bhrí sin, ba cheart asbhaintí a oibriú ó na cuótaí iascaireachta a chionroinntear orthu in 2025 agus, i gcás inarb ábhartha, sna blianta ina dhiaidh sin, maidir leis na stoic a ndearnadh ró-iascaireacht orthu.

(7)

Le Rialacháin Cur Chun Feidhme (AE) 2024/2407 (11) agus (AE) 2025/66 (12) ón gCoimisiún, leagadh amach asbhaintí ó chuótaí iascaireachta maidir le Ballstáit áirithe agus speicis áirithe le haghaidh 2024. I gcás Ballstáit áirithe, áfach, b’airde na hasbhaintí a bhí le cur i bhfeidhm maidir le roinnt speiceas ná na cuótaí ábhartha a bhain leis na speicis chéanna a bhí ar fáil in 2024 agus dá bhrí sin, ní fhéadfaí iad a oibriú ina n-iomláine sa bhliain sin. I gcomhréir le pointe 2 de Theachtaireacht 2022/C 369/03 ón gCoimisiún maidir le treoirlínte i ndáil le cuótaí a asbhaint faoi Airteagal 105(1), (2) agus (5) de Rialachán (CE) Uimh. 1224/2009 (13) (‘na Treoirlínte’) agus chun a áirithiú sna cásanna sin go n-asbhainfear an méid iomlán le haghaidh na stoc ábhartha, ba cheart na cainníochtaí atá fágtha a chur san áireamh agus asbhaintí á leagan síos le haghaidh 2025 agus, i gcás inarb iomchuí, ó chuótaí ina dhiaidh sin.

(8)

Dearbhaítear sna Treoirlínte go bhfuil an amlíne le haghaidh asbhaintí i gcás ró-iascaireacht cuóta maidir le stoic atá á mbainistiú ag eagraíochtaí réigiúnacha iascaigh le cur in oiriúint, i gcás inarb infheidhme, don amlíne le haghaidh asbhaintí atá socraithe ag na heagraíochtaí réigiúnacha iascaigh lena mbaineann maidir leis na stoic sin. Foráiltear le Moladh 19-05 ó ICCAT lena mbunaítear clár atógála le haghaidh mairlíní gorma (14) go ndéanfar aon bharrachas sna teorainneacha bliantúla maidir le gabhálacha a thabhairt i dtír arna socrú le haghaidh 2023 a asbhaint ó na teorainneacha maidir le gabhálacha a thabhairt i dtír le linn 2025. Dá bhrí sin, mar a bunaíodh le Rialachán Cur Chun Feidhme (AE) 2025/66, ba cheart an asbhaint de dheasca ró-iascaireacht arna déanamh ag an Spáinn in 2023 le haghaidh an stoic mairlíní gorma san Aigéan Atlantach (BUM/ATLANT) arna bhainistiú ag ICCAT a chur i bhfeidhm in 2025.

(9)

Thairis sin, le Moladh 22-03 ó ICCAT maidir le caomhnú cholgáin an Atlantaigh Thuaidh (15), foráiltear go ndéanfar aon bharrachas sa chuóta coigeartaithe bliantúil in 2024 a asbhaint ón gcuóta/teorainn ghabhála ábhartha le haghaidh 2026. Ar an mbonn sin, asbhaintí de dheasca na ró-iascaireachta, lena n-áirítear na hasbhaintí sin a eascraíonn as na fachtóirí iolraithe is infheidhme, ag an bPortaingéil ar an stoc colgán san Aigéan Atlantach in 2024, lastuaidh de 5°T (SWO/AN05N), stoc a ndéanann ICCAT bainistíocht air, ba cheart na hasbhaintí sin a chur i bhfeidhm in 2026.

(10)

Ina theannta sin, le Moladh 22-04 ó ICCAT maidir le caomhnú cholgáin an Atlantaigh Theas (16), leagtar síos go bhfuil aon bharrachas sa chuóta/teorainn ghabhála bhliantúil in 2024 le hasbhaint ón gcuóta/teorainn ghabhála ábhartha in 2026. Dá bhrí sin, an asbhaint atá dlite mar gheall ar an ró-iascaireacht a rinne an Fhrainc in 2024, le haghaidh an stoic colgán san Aigéan Atlantach, laisteas de 5°T (SWO/AS05N), ba cheart í a oibriú in 2026.

(11)

Thairis sin, le Moladh 23-10 ó ICCAT maidir le bearta caomhnúcháin chun siorcanna gorma an Atlantaigh Thuaidh a chaomhnú (17), foráiltear go ndéanfar aon mhéid a ghabhtar de bhreis ar na teorainneacha gabhála bliantúla a bunaíodh le haghaidh 2024 a asbhaint ó na teorainneacha gabhála ábhartha in 2026. Dá bhrí sin, níor cheart asbhaintí de dheasca ró-iascaireacht arna déanamh ag an bPortaingéil in 2024 le haghaidh an stoic siorcanna gorma san Aigéan Atlantach lastuaidh de 5°T (BSH/AN05N) a oibriú ach amháin in 2026.

(12)

In 2023 rinne an Ghearmáin ró-iascaireacht 1,320 tona ar a cuóta le haghaidh speicis eile in uiscí na hIorua i limistéir 1 agus 2 (OTH/1N2AB.). Ina theannta sin, bhí asbhaint 19,997 dtona fós ann tar éis don Ghearmáin ró-iascaireacht a dhéanamh ar a cuóta le haghaidh OTH/1N2AB. in 2022, i gcomhréir le pointe 2 de na Treoirlínte. Le post leictreonach dar dáta an 1 Iúil 2024, d’iarr an Ghearmáin an asbhaint atá dlite, is é sin 21,317 dtona, a roinnt thar 3 bliana. Ós rud é, i gcomhréir le pointe 3(b) de na Treoirlínte, go bhfuil aisíoc níos moille incheadaithe go heisceachtúil i gcás ina ngabhtar an stoc lena mbaineann in iascach measctha agus ina gcuirfeadh caillteanas mór cuóta cosc ar shaothrú na speiceas gaolmhar i ngabháil an iascaigh mheasctha sin, glacadh leis an iarraidh sin. Oibríodh an chéad asbhaint 7,106 thona ar chuóta na Gearmáine le haghaidh OTH/1N2AB. in 2024. 7,106 thona in 2025 agus 7,105 thona in 2026 atá sna hasbhaintí bliantúla atá fágtha is infheidhme maidir le cuóta na Gearmáine le haghaidh OTH/1N2AB., gan dochar d’aon oiriúnú eile ar chuótaí.

(13)

Féadfar tuilleadh nuashonruithe nó ceartúchán a dhéanamh fós i ndiaidh earráidí, easnaimh nó míthuairisciú a bhrath, i gcás an chleachtaidh asbhainte reatha nó cleachtadh asbhainte roimhe seo, sna figiúirí gabhála arna ndearbhú ag na Ballstáit de bhun Airteagal 33 de Rialachán (CE) Uimh. 1224/2009.

(14)

Ós rud é go sloinntear cuótaí ina dtonaí, níor cheart ró-iascaireacht de chainníochtaí is lú ná aon tona amháin a chur san áireamh,