(1)

Ó thus na hidirthréimhse an 1 Deireadh Fómhair 2023 a leagtar síos i Rialachán (AE) 2023/956 ó Pharlaimint na hEorpa agus ón gComhairle (3), tá sonraí agus faisnéis á mbailiú ag an gCoimisiún maidir le cur chun feidhme an tsásra coigeartaithe carbóin ar theorainneacha (SCCT) dá bhforáiltear ann, lena n-áirítear tríd an anailís a dhéantar ar thuarascálacha ráithiúla arna dtíolacadh ag dearbhóirí tuairiscithe. Leis an bhfaisnéis a bailíodh agus sna malartuithe leis na geallsealbhóirí, lena n-áirítear malartuithe laistigh den ghrúpa saineolaithe maidir le SCCT, léiríodh réimsí chun SCCT a shimpliú agus a neartú i gcomhréir le tiomantas an Aontais cur chun feidhme rianúil SCCT a áirithiú a luaithe a bheidh deireadh leis an idirthréimhse an 1 Eanáir 2026.

(2)

Bunaithe ar an taithí a fuarthas agus na sonraí a bailíodh le linn na hidirthréimhse maidir le dáileadh allmhaireoirí earraí a liostaítear in Iarscríbhinn I de Rialachán (AE) 2023/956 isteach san Aontas, níl ach sciar beag de na hallmhaireoirí sin freagrach as formhór mór na n-astaíochtaí atá leabaithe in earraí allmhairithe. An maolú a chuirtear i bhfeidhm maidir le hallmhairiú earraí ar luach diomaibhseach, eadhon iad sin nach mó ná EUR 150 iad n aghaidh na coinsíneachta, dá dtagraítear in Airteagal 23 de Rialachán (CE) Uimh. 1186/2009 ón gComhairle (4), is cosúil nach leor é chun a áirithiú go mbeidh feidhm ag SCCT maidir le hallmhaireoirí i gcomhréir le tionchar na n-allmhaireoirí sin ar na hastaíochtaí a chumhdaítear le Rialachán (AE) 2023/956. I gcás allmhaireoirí a allmhairíonn cainníochtaí beaga earraí, d’fhéadfadh ualach míchuí a bheith ag baint le comhlíonadh na n-oibleagáidí tuairiscithe agus airgeadais a leagtar síos in Rialachán (AE) 2023/956. Ba cheart, dá bhrí sin, maolú nua a thabhairt isteach chun allmhaireoirí cainníochtaí beaga ó thaobh mais earraí de a liostaítear in Iarscríbhinn I den Rialachán sin a dhíolmhú ó oibleagáidí faoi Rialachán (AE) 2023/956, agus caomhnú á dhéanamh ag an am céanna ar chuspóir comhshaoil CBAM agus ar a acmhainneacht a chuspóir aeráide beartaithe a ghnóthú.

(3)

Ba cheart tairseach nua atá bunaithe ar ghlanmhais charnach na n-earraí allmhairithe i mbliain féilire ar leith (‘an tairseach mhais-bhunaithe aonair’) a thabhairt isteach in aghaidh an allmhaireora i Rialachán (AE) 2023/956, agus a shocrú ar dtús ar leibhéal 50 tona. Ba cheart feidhm charnach a bheith ag tairseach mhais-bhunaithe aonair maidir le gach earra in earnálacha an iarainn agus na cruach, an alúmanaim, na leasachán agus na stroighne. I gcás nach ndéanann glanmhais na n-earraí uile arna n-allmhairiú ag allmhaireoir i mbliain féilire ar leith an tairseach mhais-bhunaithe aonair a shárú go carnach, ba cheart allmhaireoir den sórt sin, lena n-áirítear aon allmhaireoir ag a bhfuil stádas dearbhóra SCCT údaraithe, a dhíolmhú, sa bhliain féilire ar leith, ó na hoibleagáidí faoi Rialachán (AE) 2023/956 (‘an díolúine de minimis’). I gcás ina sáraíonn allmhaireoir, le linn bliain féilire ábhartha, an tairseach mhais-bhunaithe aonair, ba cheart an t-allmhaireoir sin a bheith faoi réir oibleagáidí faoi Rialachán (AE) 2023/956 i leith na n-astaíochtaí uile atá leabaithe sna hearraí uile a allmhairítear le linn na bliana féilire ábhartha sin, lena n-áirítear, go háirithe, an oibleagáid stádas dearbhóra SCCT údaraithe a fháil, an oibleagáid dearbhú SCCT a thíolacadh i leith na n-astaíochtaí uile atá leabaithe sna hearraí uile a allmhairítear sa bhliain féilire ábhartha sin agus an oibleagáid deimhnithe SCCT a cheannach agus a ghéilleadh i leith na n-astaíochtaí sin go léir.

(4)

In earnálacha an leictreachais agus na hidrigine, tá difríocht shubstaintiúil idir príomhghnéithe, amhail cainníocht na n-allmhairí, patrúin trádála, faisnéis chustaim agus déine na n-astaíochtaí agus na príomhghnéithe sin in earnálacha an iarainn agus na cruach, an alúmanaim, na leasachán agus na stroighne. Tugann na difríochtaí sin le tuiscint go mbeadh gá le coigeartuithe casta a thabhairt isteach chun allmhairí leictreachais agus hidrigine a dhéanamh faoi réir tairseach mhais-bhunaithe aonair nach bhfágfadh go bhféadfaí costais riaracháin d’allmhaireoirí sna hearnálacha sin a laghdú go substaintiúil leo. Dá bhrí sin, níor cheart allmhairí leictreachais ná hidrigine a áireamh faoin díolúine de minimis.

(5)

Le bunú na tairsí mais-bhunaithe aonair a léiríonn meándéine astaíochtaí chainníocht na n-earraí allmhairithe, saothraítear an cuspóir maidir lena áirithiú go bhfanfaidh 99 % ar a laghad d’astaíochtaí atá leabaithe in earraí allmhairithe faoi raon feidhme SCCT agus go mbeidh feidhm ag an díolúine de minimis, dá bhrí sin, maidir le méid nach mó ná 1 % d’astaíochtaí atá leabaithe in earraí allmhairithe. Bheadh an díolúine de minimis ina cur chuige láidir spriocdhírithe toisc go léiríonn sé go cruinn cineál comhshaoil agus cuspóir aeráide SCCT agus an t-ualach riaracháin a bhaineann le SCCT á laghdú go substaintiúil d’allmhaireoirí, a ndéanfar formhór mór díobh a dhíolmhú ó na hoibleagáidí faoi Rialachán (AE) 2023/956. Ag an am céanna, leanann SCCT d’fheidhm a bheith aige maidir le 99 % ar a laghad d’astaíochtaí atá leabaithe sna hearraí allmhairithe. Le tairseach mhais-bhunaithe aonair den sórt sin cuirtear deireadh freisin leis an riosca imchéimniúcháin trí choinsíneachtaí a roinnt go saorga ag allmhaireoir aonair.

(6)

Ba cheart don Choimisiún measúnú a dhéanamh gach bliain, ar bhonn sonraí allmhairiúcháin don 12 mhí féilire roimhe sin, i dtaobh ar tharla athrú ábhartha ar mheándéiní astaíochta na n-earraí nó ar an bpatrún trádála in earraí, lena n-áirítear cleachtais imchéimniúcháin. Chun a áirithiú go bhfanfaidh 99 % ar a laghad d’astaíochtaí atá leabaithe sna hearraí allmhairithe faoi raon feidhme SCCT, ba cheart don Choimisiún gníomhartha tarmligthe a ghlacadh chun an tairseach mhais-bhunaithe aonair a leasú trí úsáid a bhaint as an modheolaíocht a leagtar amach i bpointe 2 d’Iarscríbhinn VII de Rialachán (AE) 2023/956. Chun éifeachtacht agus deimhneacht a áirithiú, níor cheart don Choimisiún na gníomhartha sin a ghlacadh ach amháin i gcás inar mó ná 15 thona an méid a dhiallann luach na tairsí a eascraíonn as sin ón tairseach is infheidhme. I gcás ina leasaítear an tairseach mhais-bhunaithe aonair, Ba cheart feidhm a bheith aici amhail ó thús na bliana féilire dár gcionn.

(7)

Chun a áirithiú go mbeidh an maolú spriocdhírithe go leordhóthanach, ba cheart feidhm a bheith ag an tairseach mhais-bhunaithe aonair maidir le gach allmhaireoir, lena n-áirítear na hallmhaireoirí sin a bhfuil stádas dearbhóra SCCT údaraithe acu. Chun na críche sin, ba cheart allmhairí allmhaireora a chur san áireamh gan beann ar cé acu a dhearbhaigh an t-allmhaireoir féin nó ionadaí indíreach custaim iad. Ba cheart a cheangal i gcónaí ar an ionadaí indíreach custaim, mar gheall ar chineál a ghníomhaíochta agus na hoibleagáidí gaolmhara faoi Rialachán (AE) 2023/956, stádas dearbhóra SCCT údaraithe a fháil sula ngníomhóidh sé thar ceann allmhaireoir i leith earraí a liostaítear in Iarscríbhinn I a ghabhann le Rialachán (AE) 2023/956. I gcás inar sháraigh allmhaireoir, a ndéanann ionadaí indíreach custaim amháin nó níos mó ionadaíocht air, an tairseach mhais-bhunaithe aonair, ba cheart do gach ionadaí indíreach custaim atá ag gníomhú mar dhearbhóir SCCT údaraithe dearbhú SCCT a chur isteach i leith na n-earraí a d’allmhairigh an t-ionadaí indíreach custaim sin isteach i gcríoch chustaim an Aontais, lena n-áirítear aon earraí atá faoi bhun na tairsí mais-bhunaithe aonair, i gcás na n-allmhaireoirí sin a ndéantar ionadaíocht orthu agus a sháraigh an tairseach mhais-bhunaithe aonair, agus ba cheart dóibh líon na ndeimhnithe SCCT a chomhfhreagraíonn d’astaíochtaí atá leabaithe sna hearraí sin a ghéilleadh.

(8)

Chun críocha na deimhneachta dlíthiúla, i gcás ina ngníomhaíonn ionadaí indíreach custaim mar dhearbhóir SCCT údaraithe thar ceann an allmhaireora, is iomchuí a fhoráil go sainráite gur cheart an t-ionadaí indíreach custaim a bheith faoi réir na n-oibleagáidí is infheidhme maidir leis an allmhaireoir sin de bhun Rialachán (AE) 2023/956, go háirithe an oibleagáid dearbhú SCCT a chur isteach i leith na n-earraí arna n-allmhairiú ag an ionadaí indíreach custaim thar ceann an allmhaireora sin agus na deimhnithe SCCT a ghéilleadh i leith na n-astaíochtaí atá leabaithe sna hearraí sin. Mar thoradh air sin, i gcás neamhchomhlíontachta, ba cheart gurbh é an t-ionadaí indíreach custaim a bheadh faoi réir pionós faoi Rialachán (AE) 2023/956. Níor cheart an t-ionadaí indíreach custaim a bheith faoi réir pionós áfach, i gcás nár chomhaontaigh ionadaí indíreach custaim, a ghníomhaíonn thar ceann allmhaireoir atá bunaithe i mBallstát, gníomhú mar dhearbhóir SCCT údaraithe.

(9)

Bunaithe ar fhaisnéis chustaim, ba cheart don Choimisiún faireachán a dhéanamh ar chainníochtaí na n-earraí a allmhairítear chun measúnú a dhéanamh ar chomhlíonadh na tairsí mais-bhunaithe aonair. Ba cheart do na húdaráis inniúla a bheith in ann faireachán den sórt sin a dhéanamh freisin. Chun go mbeidh na húdaráis inniúla ábalta cinneadh feasach a dhéanamh, is gá socruithe iomchuí a leagan síos chun an fhaisnéis agus na sonraí is gá a chur ar fáil do na húdaráis inniúla. Ba cheart do gach údarás inniúil a bheith in ann an fhaisnéis agus an fhianaise is gá a iarraidh ar údaráis chustaim, lena n-áirítear ainm, seoladh agus faisnéis teagmhála allmhaireoirí, i gcás nach bhfuil an fhaisnéis sin ar fáil don údarás inniúil ar shlí eile. I gcás ina bhfaighidh na húdaráis chustaim amach gur sháraigh allmhaireoir an tairseach mhais-bhunaithe aonair, lena n-áirítear ar bhonn faisnéis ón údarás inniúil, níor cheart dóibh allmhairiú breise earraí ag an allmhaireoir sin go dtí deireadh na bliana féilire ábhartha a cheadú, nó go dtí go mbeidh stádas dearbhóra SCCT údaraithe faighte ag an allmhaireoir sin.

(10)

Maidir le hallmhaireoir a bhfuil coinne leis go sáróidh sé an tairseach mhais-bhunaithe aonair bhliantúil, ba cheart dó iarratas ar údarú a chur isteach. Ba cheart d’allmhaireoir den sórt sin stádas dearbhóra SCCT údaraithe a fháil sula sárófar an tairseach mhais-bhunaithe aonair. Maidir le hallmhaireoirí nár deonaíodh an t-údarú dóibh sular sháraigh siad an tairseach mhais-bhunaithe aonair, ba cheart iad a bheith faoi réir pionós.

(11)

D’fhéadfadh sé go gcuirfí isteach líon ard iarratas ag tús 2026 mar thoradh ar an oibleagáid stádas dearbhóra SCCT údaraithe a fháil sula sárófar an tairseach mhais-bhunaithe aonair. Chun cur i bhfeidhm Rialachán (AE) 2023/956 a éascú tar éis dul in éag forálacha idirthréimseacha, agus chun cur isteach féideartha ar allmhairí a sheachaint, is iomchuí cead a thabhairt d’allmhaireoirí agus d’ionadaithe indíreacha custaim a chuir iarratas ar údarú isteach go cuí i gcomhréir leis an Rialachán seo faoin 31 Márta 2026 leanúint de na hearraí a allmhairiú in 2026 fiú tar éis dóibh an tairseach mhais-bhunaithe aonair a shárú go dtí go ndéanfar an cinneadh maidir leis an údarú a dheonú. Chun imchéimniú Rialachán (AE) 2023/956 a sheachaint, i gcás ina ndiúltaítear an t-údarú a dheonú, ba cheart na hallmhaireoirí agus na hionadaithe indíreacha custaim a bheith faoi réir pionóis i gcomhréir le hAirteagal 26(2a) den Rialachán sin.

(12)

Chun a áirithiú go gcumhdófar leis an sainmhíniú ar allmhaireoir na nósanna imeachta custaim ábhartha uile, is gá é a leasú chun cás an nós imeachta custaim shimplithe a chur san áireamh i gcás nach ndéantar ach bille urscaoilte a chur i láthair de bhun Airteagal 175(5) de Rialachán Tarmligthe (AE) 2015/2446 ón gCoimisiún (5).

(13)

Chun cothromaíocht a bhaint amach idir éifeachtacht an nós imeachta údarúcháin agus próifíl riosca na n-iarratasóirí, ba cheart an nós imeachta comhairliúcháin a bheith roghnach don údarás inniúil. Leis an nós imeachta comhairliúcháin, ba cheart an t-údarás inniúil a bheith in ann dul i gcomhairle le húdaráis inniúla eile agus leis an gCoimisiún nuair a mheastar gur gá sin ar bhonn na faisnéise arna cur isteach ag an iarratasóir agus ar bhonn na faisnéise custaim a chuirtear ar fáil i gclárlann SCCT.

(14)

Chun solúbthacht bhreise a sholáthar, ba cheart an dearbhóir SCCT údaraithe a bheith in ann cur isteach an dearbhaithe SCCT a tharmligean chuig tríú páirtí. Ba cheart an dearbhóir SCCT údaraithe a bheith freagrach i gcónaí as cur isteach an dearbhaithe SCCT. Chun a chur ar chumas an dearbhóra SCCT údaruithe an tarmligean agus an rochtain is gá a sholáthar do thríú páirtí, ba cheart don tríú páirtí sin dintiúir theicniúla áirithe a chomhlíonadh, lena n-áirítear Uimhir Chláraithe agus Aitheantais Oibreoirí Eacnamaíocha (EORI) a bheith aige agus é a bheith bunaithe i mBallstát.

(15)

Ba cheart do dhearbhóirí SCCT údaraithe a ndearbhú SCCT bliantúil a chur isteach agus an líon comhfhreagrach deimhnithe a ghéilleadh faoin 30 Meán Fómhair den bhliain tar éis an bhliain a allmhairítear na hearraí. Chun solúbthacht a thabhairt do dhearbhóirí SCCT údaraithe chun a n-oibleagáidí a chomhlíonadh, thabharfadh dáta níos déanaí chun an dearbhú a chur isteach níos mó ama do dhearbhóirí SCCT údaraithe an fhaisnéis is gá a bhailiú, a áirithiú go ndéanfaidh fíoraitheoir creidiúnaithe astaíochtaí leabaithe a fhíorú, agus an líon comhfhreagrach deimhnithe SCCT a cheannach. Ba cheart an dáta maidir le cealú deimhnithe SCCT a choigeartú dá réir.

(16)

Maidir le hastaíochtaí leabaithe roinnt earraí alúmanaim agus cruach a áirítear faoi raon feidhme Rialachán (AE) 2023/956 faoi láthair, cinntear iad go príomha le hastaíochtaí leabaithe na n-ábhar ionchuir (réamhtheachtaithe), agus is iondúil go mbíonn na hastaíochtaí a thagann chun cinn le linn chéimeanna táirgthe na n-earraí sin réasúnta íseal. Is é atá sna céimeanna táirgthe sin próisis bhailchríche a dhéantar le suiteálacha ar leithligh nach gcumhdaítear le córas trádála astaíochtaí an Aontais Eorpaigh (CTA AE) amhail dá bhforáiltear i dTreoir 2003/87/CE ó Pharlaimint na hEorpa agus ón gComhairle (6), cé is moite de chás saoráidí comhtháite. D’fhonn comhleanúnachas le rialacha CTA AE a áirithiú agus cur i bhfeidhm rialacha SCCT a shimpliú d’oibreoirí i dtríú tíortha, ba cheart astaíochtaí leabaithe na bpróiseas táirgthe sin a eisiamh ó theorainneacha córais ríomh le haghaidh na n-astaíochtaí, trí theorainneacha córais na bpróiseas táirgthe a ailíniú leo siúd a chumhdaítear le CTA AE.

(17)

Meastar gur de thionscnamh an Bhallstáit sin nó an tríú tír sin, faoi seach, leictreachas a ghintear ar scairbh ilchríochach Ballstáit nó tríú tír nó i limistéar eacnamaíoch eisiach Ballstáit nó tríú tír, faoi seach. Maidir le hidrigin ar de thionscnamh scairbh ilchríochach nó limistéar eacnamaíoch eisiach Ballstáit nó tríú tír í, meastar gur de thionscnamh an Bhallstáit nó an tríú tír sin í.

(18)

I gcás ina raibh ábhair ionchuir (réamhtheachtaithe) faoi réir CTA AE cheana féin nó faoi réir córas praghsála carbóin atá nasctha go hiomlán le CTA AE, níor cheart astaíochtaí leabaithe na réamhtheachtaithe sin a chur san áireamh agus astaíochtaí leabaithe earraí coimpléascacha á ríomh.

(19)

Ceanglaítear ar dhearbhóirí SCCT údaraithe dearbhú SCCT bliantúil a chur isteach ina mbeidh ríomh na n-astaíochtaí leabaithe ar bhonn luachanna réamhshocraithe nó luachanna iarbhír arna bhfíorú ag fíoraitheoirí creidiúnaithe. Ba cheart don Choimisiún luachanna réamhshocraithe a ríomh agus a chur ar fáil. Níor cheart feidhm a bheith, dá bhrí sin, ag fíorú astaíochtaí leabaithe ach amháin maidir le luachanna iarbhír.

(20)

Léiríonn an fhaisnéis a bhailítear le linn na hidirthréimhse go mbíonn deacrachtaí ag dearbhóirí tuairiscithe an fhaisnéis is gá maidir le híocaíocht iarbhír phraghas an charbóin i dtríú tír a fháil. Chun asbhaint phraghas an charbóin a éascú, ba cheart don Choimisiún, i gcás inar féidir, meánphraghas carbóin bliantúil a bhunú arna shloinneadh in EUR/tona CO2e den phraghas carbóin a íocadh go hiarbhír, lena n-áirítear ar bhonn coimeádach, bunaithe ar na sonraí is fearr atá ar fáil ó fhaisnéis iontaofa atá ar fáil go poiblí agus ó fhaisnéis arna soláthar ag tríú tíortha don Choimisiún.

(21)

An fhianaise is gá chun íocaíocht iarbhír phraghas an charbóin a asbhaint, braitheann sí ar fhaisnéis atá ábhartha chun na hastaíochtaí leabaithe iarbhír a chinneadh agus a fhíorú. I gcás ina ndearbhaítear na hastaíochtaí leabaithe ar bhonn luachanna réamhshocraithe, níor cheart é a bheith indéanta asbhaint an phraghais carbóin a éileamh ach amháin trí thagairt a dhéanamh do phraghsanna carbóin réamhshocraithe bliantúla, i gcás ina bhfuil siad ar fáil. Thairis sin, ós rud é nár cheart astaíochtaí leabaithe réamhtheachtaithe a chur san áireamh i gcás ina raibh siad faoi réir CTA AE cheana, nó faoi réir córas praghsála carbóin atá nasctha go hiomlán le CTA AE, níl an praghas carbóin a bhaineann leis na hastaíochtaí leabaithe sin ábhartha don asbhaint.

(22)

Is féidir le dearbhóirí SCCT údaraithe laghdú a éileamh ar an líon deimhnithe SCCT atá le géilleadh a chomhfhreagraíonn d’íocaíocht iarbhír phraghas an charbóin sa tír thionscnaimh le haghaidh na n-astaíochtaí leabaithe dearbhaithe. Ós rud é gur féidir an praghas carbóin a íoc i dtríú tír seachas tír thionscnaimh na n-earraí allmhairithe, ba cheart praghas carbóin den sórt sin a bheith incháilithe lena asbhaint freisin.

(23)

Chun iontaofacht na sonraí maidir le hastaíochtaí leabaithe atá i gclárlann SCCT a fheabhsú agus chun tíolacadh sonraí a éascú, ba cheart d’fhíoraitheoirí creidiúnaithe rochtain a fháil, arna iarraidh sin d’oibreoir i dtríú tíortha, ar chlárlann SCCT chun na hastaíochtaí leabaithe a fhíorú. Ina theannta sin, ba cheart cead a bheith ag máthairchuideachtaí nó eintitis rialúcháin na n-oibreoirí sin rochtain a fháil ar chlárlann SCCT chun sonraí ábhartha a chlárú agus a chomhroinnt thar ceann na n-oibreoirí sin. Ba cheart ceangal a chur ar na hoibreoirí cláruimhir chorparáideach nó ghníomhaíochta a sholáthar chun a gcéannacht a áirithiú.

(24)

Chun comhsheasmhacht le Rialachán (CE) Uimh. 765/2008 ó Pharlaimint na hEorpa agus ón gComhairle (7), chomh maith le Rialachán Cur Chun Feidhme (AE) 2018/2067 ón gCoimisiún, a áirithiú (8), ba cheart fíoraitheoir a bheith ina dhuine dlítheanach atá creidiúnaithe chun críoch Rialachán (AE) 2023/956 le cinneadh ó chomhlacht náisiúnta creidiúnúcháin. Agus an cinneadh sin á dhéanamh, ba cheart don chomhlacht náisiúnta creidiúnúcháin na grúpaí ábhartha gníomhaíochtaí faoi Rialachán Cur Chun Feidhme (AE) 2018/2067 a chur san áireamh chun measúnú a dhéanamh ar cháilíochtaí an duine dhlítheanaigh.

(25)

Chun cur chun feidhme Rialachán (AE) 2023/956 ar an leibhéal náisiúnta a chothú, ba cheart do na Ballstáit a áirithiú go mbeidh na cumhachtaí uile is gá ag na húdaráis inniúla chun a bhfeidhmeanna agus a ndualgais a chomhlíonadh.

(26)

Ba cheart na costais arna dtabhú i dtaca le bunú, oibriú agus bainistiú an ardáin lárnaigh choitinn a mhaoiniú le táillí is iníoctha ag dearbhóirí SCCT údaraithe. Le linn fhad tréimhse an chéad chonartha soláthair phoiblí chomhpháirtigh chun an t-ardán lárnach coiteann a bhunú, a oibriú agus a bhainistiú, ba cheart na costais sin a íoc ar dtús as buiséad ginearálta an Aontais agus, chuige sin, ba cheart an t-ioncam a ghintear leis na táillí sin a shannadh do bhuiséad an Aontais chun na costais ábhartha a chumhdach. I bhfianaise chineál na n-ioncam, is iomchuí caitheamh leis na hioncaim mar ioncaim shannta inmheánacha. Aon ioncam a bheidh fágtha tar éis na costais sin a ghlanadh, ba cheart é a shannadh do bhuiséad an Aontais. Ba cheart an chumhacht a thabhairt don Choimisiún gníomhartha tarmligthe a ghlacadh lena gcinntear, struchtúr agus leibhéal na dtáillí, ionas go mbeidh eagrú agus úsáid an ardáin lárnaigh choitinn costéifeachtúil, go socrófar na táillí chun na costais ábhartha a chumhdach go docht agus go seachnófar costais riaracháin mhíchuí. Ba cheart don Choimisiún gníomhartha tarmligthe a ghlacadh freisin lena gcinntear ar feadh thréimhse na gconarthaí soláthair chomhpháirtigh ina dhiaidh sin gur cheart do na táillí na costais a bhaineann le hoibriú agus bainistiú an ardáin a mhaoiniú go díreach.

(27)

Chun a ndóthain ama a thabhairt do dhearbhóirí SCCT údaraithe ullmhú do chomhlíonadh na n-oibleagáidí leasaithe faoi Rialachán (AE) 2023/956, ba cheart do na Ballstáit tús a chur le deimhnithe SCCT a dhíol in 2027 le haghaidh astaíochtaí atá leabaithe in earraí a allmhairítear le linn na bliana 2026. Ba cheart go léireodh praghas na ndeimhnithe SCCT a cheannófar in 2027 agus a chomhfhreagraíonn d’astaíochtaí atá leabaithe in earraí a allmhairítear isteach san Aontas in 2026 praghsanna lamháltais CTA AE in 2026.

(28)

An oibleagáid atá ar na dearbhóirí SCCT údaraithe a áirithiú go gcomhfhreagraíonn an líon deimhnithe SCCT ar a gcuntas i gclárlann SCCT ag deireadh gach ráithe do 80 % ar a laghad de na hastaíochtaí leabaithe sna hearraí atá allmhairithe acu ó thús na bliana, is oibleagáid í nach bhfuil saincheaptha go leordhóthanach don choigeartú airgeadais a bhfuil coinne leis. Is gá, dá bhrí sin, an céatadán a laghdú ó 80 % go 50 % agus leithdháileadh saor in aisce lamháltais CTA AE a chomhtháthú. Thairis sin, ba cheart an dearbhóir SCCT údaraithe a bheith in ann brath ar an bhfaisnéis a cuireadh isteach sa dearbhú SCCT sa bhliain roimhe sin, le haghaidh na n-earraí céanna agus na dtríú tíortha céanna.

(29)

Ar an gcaoi chéanna, ba cheart an teorainn athcheannaigh a ailíniú ar bhealach níos cruinne leis an líon deimhnithe SCCT a cheanglaítear ar na dearbhóirí SCCT údaraithe a cheannach le linn bhliain na n-allmhairithe.

(30)

Ós rud é go gcuirtear deimhnithe SCCT ar ceal gan aon chúiteamh, níl aon ghá le malartú faisnéise ón ardán lárnach coiteann chuig clárlann SCCT ag deireadh an lae oibre.

(31)

I gcás ina mainníonn dearbhóir SCCT údaraithe an líon ceart deimhnithe SCCT a ghéilleadh mar thoradh ar fhaisnéis mhícheart arna soláthar ag tríú páirtí, eadhon oibreoir, fíoraitheoir nó duine neamhspleách a dheimhníonn doiciméadacht an phraghais carbóin, ba cheart do na húdaráis inniúla, agus pionóis á gcur i bhfeidhm acu, a bheith in ann na himthosca sonracha lena mbaineann a chur san áireamh amhail fad tréimhse, tromchúis, raon feidhme, cineál d’aon ghnó nó faillíoch nó athdhéanamh an neamhchomhlíonta nó leibhéal comhair an dearbhóra SCCT údaraithe. D’fhágfadh sé sin go bhféadfaí méid an phionóis a laghdú i gcás ina ndéanfaí mionearráidí nó earráidí neamhbheartaithe.

(32)

Ba cheart allmhaireoirí seachas dearbhóirí SCCT údaraithe a sháraigh an tairseach mhais-bhunaithe aonair a bheith faoi réir pionós dá bhforáiltear in Airteagal 26(2a). Chun na críche sin, ba cheart iomlán na n-astaíochtaí atá leabaithe sna hearraí arna n-allmhairiú ag allmhaireoir den sórt sin gan údarú sa bhliain féilire ábhartha a chur san áireamh. Is iomchuí foráil a dhéanamh go scaoilfidh íocaíocht an phionóis an t-allmhaireoir ón oibleagáid dearbhú SCCT a chur isteach agus deimhnithe SCCT a ghéilleadh i leith na n-allmhairí sin. Chun mionsárú nó cineál neamhbheartaithe mionsáraithe a chur san áireamh, ba cheart do na húdaráis inniúla a bheith in ann pionós níos ísle a fhorchur i gcás nár sáraíodh an tairseach mhais-bhunaithe aonair le níos mó ná 10 % den tairseach sin nó i gcás inar lean an t-allmhaireoir go sealadach de bheith ag allmhairiú earraí agus i gcás inar diúltaíodh dá iarratas ar stádas dearbhóra SCCT údaraithe.

(33)

Tá feidhm ag Rialachán (AE) 2023/956 maidir le hearraí áirithe atá dian ar charbón agus a allmhairítear isteach san Aontas. Áirítear ‘créanna caoilíneacha eile’ ar na hearraí a liostaítear in Iarscríbhinn I a ghabhann le Rialachán (AE) 2023/956 sa liosta d’earraí stroighne. Cé gur táirgí atá dian ar charbón iad créanna caoilíneacha cailcínithe, ní hamhlaidh atá i gcás créanna caoilíneacha neamhchailcínithe. Dá bhrí sin, ba cheart créanna caoilíneacha neamhchailcínithe a eisiamh ó raon feidhme Rialachán (AE) 2023/956.

(34)

Liostaítear in Iarscríbhinn II a ghabhann le Rialachán (AE) 2023/956 na hearraí nár cheart ach astaíochtaí díreacha a chur san áireamh ina leith agus astaíochtaí leabaithe á ríomh. I gcás na n-earraí nach liostaítear san Iarscríbhinn sin, ba cheart idir astaíochtaí díreacha agus astaíochtaí indíreacha a chur san áireamh. Ós rud é nach bhfuil astaíochtaí indíreacha ábhartha i gcás giniúint leictreachais, ba cheart leictreachas a chur le liosta na n-earraí san Iarscríbhinn sin.

(35)

Is gá simpliú a dhéanamh ar na modhanna chun luachanna réamhshocraithe a chinneadh nuair nach mbeadh sonraí iontaofa maidir leis an tír is onnmhaireoir ar fáil le haghaidh cineál áirithe earraí. Sna cásanna sin, chun sceitheadh carbóin a chosc, ba cheart an luach réamhshocraithe a shocrú ar leibhéal mheándéine astaíochtaí na 10 dtír onnmhairiúcháin a bhfuil an déine astaíochtaí is airde acu agus a bhfuil sonraí iontaofa ar fáil ina leith, ar meán iomchuí é chun cuspóir comhshaoil SCCT a áirithiú. Tá an méid sin gan dochar don fhéidearthacht na luachanna réamhshocraithe sin a oiriúnú bunaithe ar ghnéithe réigiún-sonracha de bhun phointe 7 d’Iarscríbhinn IV a ghabhann le Rialachán (AE) 2023/956.

(36)

Chun gnéithe áirithe neamhriachtanacha de Rialachán (AE) 2023/956 a fhorlíonadh agus a leasú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i leith leasú a dhéanamh ar an tairseach mhais-bhunaithe aonair in Iarscríbhinn VII a ghabhann leis an Rialachán sin, i gcás inar gá, de réir mar a chinntear i gcomhréir le hAirteagal 2(3a) den Rialachán sin, agus i leith an Rialacháin sin a fhorlíonadh chun a chinneadh go maoinítear leis na táillí is iníoctha ag dearbhóirí CCCT údaraithe go díreach na costais a bhaineann le hoibriú agus bainistiú an ardáin lárnaigh choitinn. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (9). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(37)

Ós rud é nach féidir leis na Ballstáit cuspóirí an Rialacháin seo, eadhon oibleagáidí áirithe a shimpliú agus an sásra atá glactha ag an Aontas a neartú chun an riosca sceite carbóin a chosc agus, dá bhrí sin, astaíochtaí carbóin domhanda a laghdú, a ghnóthú go leordhóthanach, agus de bharr fhairsinge nó éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(38)

Ionas gur féidir gníomhartha tarmligthe agus cur chun feidhme faoi Rialachán (AE) 2023/956 a ghlacadh go tráthúil, ba cheart don Rialachán seo teacht i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

(39)

Ba cheart, dá bhrí sin, Rialachán (AE) 2023/956 a leasú dá réir,

(1)

leasaítear Airteagal 2 mar a leanas:

(2)

cuirtear isteach an t-airteagal seo a leanas:

(3)

leasaítear Airteagal 3 mar a leanas:

(4)

leasaítear Airteagal 5 mar a leanas:

(5)

leasaítear Airteagal 6 mar a leanas:

(6)

leasaítear Airteagal 7 mar a leanas:

(7)

in Airteagal 8, cuirtear an méid seo a leanas in ionad mhír 1:

(8)

cuirtear an méid seo a leanas in ionad Airteagal 9:

(9)

cuirtear an méid seo a leanas in ionad Airteagal 10:

(10)

cuirtear an t-airteagal seo a leanas isteach:

(11)

leasaítear Airteagal 11 mar a leanas:

(12)

leasaítear Airteagal 14 mar a leanas:

(13)

leasaítear Airteagal 17 mar a leanas:

(14)

leasaítear Airteagal 18 mar a leanas:

(15)

in Airteagal 19(3), cuirtear an méid seo a leanas in ionad an dara fomhír:

‘Éascóidh an Coimisiún freisin an malartú faisnéise leis na húdaráis inniúla maidir le gníomhaíochtaí calaoiseacha, na conclúidí ar thángthas orthu de bhun Airteagal 25a agus na pionóis arna bhforchur i gcomhréir le hAirteagal 26.’

(16)

leasaítear Airteagal 20 mar a leanas:

(17)

leasaítear Airteagal 21 mar a leanas:

(18)

leasaítear Airteagal 22 mar a leanas:

(19)

leasaítear Airteagal 23 mar a leanas:

(20)

cuirtear an méid seo a leanas in ionad Airteagal 24:

(21)

in Airteagal 25, cuirtear an méid seo a leanas in ionad mhíreanna 1 go 4:

(22)

cuirtear an t-airteagal seo a leanas isteach:

(23)

leasaítear Airteagal 26 mar a leanas:

(24)

in Airteagal 27(2), cuirtear an méid seo a leanas in ionad phointe (b):

;

(25)

leasaítear Airteagal 28 mar a leanas:

(26)

leasaítear Airteagal 30(6), an dara fomhír, pointe (b), mar a leanas:

(27)

leasaítear Airteagal 36(2) mar a leanas:

(28)

in Iarscríbhinn I, cuirtear ‘ex 2507 00 80  – Créanna caoilíneacha eile seachas créanna caoilíneacha neamhchailcínithe’ in ionad an chóid AC ‘2507 00 80  – Créanna caoilíneacha eile’;

(29)

in Iarscríbhinn II, cuirtear an tábla seo a leanas leis:

‘Leictreachas

(30)

leasaítear Iarscríbhinn IV i gcomhréir le hIarscríbhinn I a ghabhann leis an Rialachán seo;

(31)

i bpointe 2 d’Iarscríbhinn V, cuirtear an pointe seo a leanas leis:

;

(32)

i bpointe 2, pointe (k), d’Iarscríbhinn VI, cuirtear an méid seo a leanas in ionad phointe (iii):

;

(33)

cuirtear leis Iarscríbhinn VII nua mar a leagtar amach in Iarscríbhinn II a ghabhann leis an Rialachán seo.