(1)

Is galar tógálach veicteoir-iompartha é ionfhabhtú le víreas ghalar an chraicinn chnapánaigh a bhíonn ar bhó-ainmhithe. D’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach freisin ar ghluaiseacht choinsíneachtaí na n-ainmhithe sin agus ar tháirgí na n-ainmhithe sin laistigh den Aontas, agus ar onnmhairí go tríú tíortha.

(2)

I gcás ráig d’ionfhabhtú le víreas ghalar an chraicinn chnapánaigh i mbó-ainmhithe, tá riosca tromchúiseach ann go leathfadh an galar sin go bunaíochtaí eile bó-ainmhithe go háirithe mar gheall ar a mhodh tarchurtha trí veicteoirí.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le galair liostaithe áirithe a chosc agus a rialú dá dtagraítear in Airteagal 9(1), pointí (a), (b) agus (c), de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear ionfhabhtú le víreas ghalar an chraicinn chnapánaigh agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseoidh an crios srianta ar a laghad crios cosanta, crios faireachais, agus, más gá, criosanna srianta breise timpeall ar na criosanna cosanta agus faireachais nó cóngarach dóibh.

(4)

Chuir an Spáinn an Coimisiún ar an eolas faoin staid reatha, ina críoch, a mhéid a bhaineann le hionfhabhtú bó-ainmhithe le víreas ghalar an chraicinn chnapánaigh. Cuimsítear dhá ráig den ghalar sin i mbó-ainmhithe atá ar coimeád i mbardais Castelló d’Empuries agus Peralada, i réigiún Alt d’Ampordà de chúige Girona, ráigeanna a deimhníodh an 3 agus an 4 Deireadh Fómhair 2025. Tar éis na ráigeanna sin, tá crios srianta bunaithe ag an Spáinn, crios ina gcuimsítear criosanna cosanta agus faireachais, i gcás ina gcuirtear i bhfeidhm freisin na bearta rialaithe galar dá bhforáiltear i Rialachán Tarmligthe (AE) 2020/687.

(5)

Chun leathadh an ionfhabhtaithe le víreas ghalar an chraicinn chnapánaigh a rialú, agus aon suaitheadh nach bhfuil gá leis ar thrádáil laistigh den Aontas a chosc agus bacainní gan údar ar thrádáil ag tríú tíortha a sheachaint, is gá an crios srianta i dtaca le hionfhabhtú le víreas ghalar an chraicinn chnapánaigh sa Spáinn a chinneadh go tapa ar leibhéal an Aontais.

(6)

Méid na gcriosanna cosanta agus faireachais agus fad tréimhse na mbeart atá le cur i bhfeidhm laistigh de na criosanna sin, tá siad bunaithe ar na critéir a leagtar síos in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687 freisin. Ar na critéir a chuirtear i bhfeidhm maidir le rogha mhéid na gcriosanna cosanta agus faireachais, chomh maith le fad tréimhse na mbeart atá le cur i bhfeidhm laistigh de na criosanna sin, áirítear breithniú ar an staid eipidéimeolaíoch a mhéid a bhaineann le hionfhabhtú le víreas ghalar an chraicinn chnapánaigh sna limistéir atá buailte ag an ngalar sin, agus ní hamháin sin ach ar thosca eipidéimeolaíocha eile lena n-áirítear paraiméadair gheografacha agus an riosca atá ann maidir le leathadh breise an ghalair. Cuireadh san áireamh freisin caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe (4) agus fad tréimhse na mbeart dá bhforáiltear sa Chinneadh seo á chinneadh.

(7)

Ba cheart na limistéir a shainaithnítear mar chriosanna cosanta agus faireachais sa Spáinn a leagan amach san Iarscríbhinn a ghabhann leis an gCinneadh seo, agus ba cheart fad tréimhse an réigiúnaithe sin a shuí i ndlí an Aontais. Ina theannta sin, ós rud é gur féidir le hionfhabhtú le víreas ghalar an chraicinn chnapánaigh leathadh trí bhó-ainmhithe atá ionfhabhtaithe go fochliniciúil, is gá toirmeasc a chur ar ghluaiseachtaí bó-ainmhithe ó aon láthair sna criosanna cosanta agus faireachais chuig ceann scríbe atá suite lasmuigh de theorainn sheachtrach na gcriosanna sin.

(8)

I bhfianaise phráinn na staide eipidéimeolaíche san Aontas a mhéid a bhaineann le hionfhabhtú le víreas ghalar an chraicinn chnapánaigh, agus go háirithe tabhairt isteach an ghalair sin san Iodáil agus sa Fhrainc le déanaí i mí Iúil agus deimhniú an ghalair sa Spáinn, agus an ghá cosc a chur ar leathadh an ghalair sin ón mbunaíocht atá buailte sa Spáinn go codanna eile den Bhallstát sin nó go Ballstáit eile, ba cheart feidhm a bheith ag na bearta a leagtar síos sa Chinneadh Cur Chun Feidhme seo a luaithe is féidir.

(9)

Dá réir sin, go dtí go bhfaighfear tuairim ón mBuanchoiste um Plandaí, Ainmhithe, Bia agus Beatha, ba cheart an crios cosanta agus an crios faireachais sa Spáinn a bhunú láithreach agus a liostú san Iarscríbhinn a ghabhann leis an gCinneadh seo, agus ba cheart fad an chriosúcháin sin a shocrú.

(10)

Agus aird á tabhairt ar an staid eipidéimeolaíoch atá ann faoi láthair san Aontas a mhéid a bhaineann le hionfhabhtú le víreas ghalar an chraicinn chnapánaigh, ba cheart feidhm a bheith ag an gCinneadh seo go dtí an 26 Samhain 2025.

(11)

Tá an Cinneadh seo le hathbhreithniú ag an gcéad chruinniú eile den Bhuanchoiste um Plandaí, Ainmhithe, Bia agus Beatha.

(a)

go mbunóidh údaráis inniúla an Bhallstáit sin crios srianta ina bhfuil na criosanna cosanta agus faireachais i gcomhréir le hAirteagal 21 de Rialachán Tarmligthe (AE) 2020/687, agus faoi na coinníollacha a leagtar síos san Airteagal sin;

(b)

go gcuimseofar leis na criosanna cosanta agus faireachais dá dtagraítear i bpointe (a) ar a laghad na limistéir a liostaítear san Iarscríbhinn a ghabhann leis an gCinneadh seo;

(c)

maidir leis na bearta is gá a chur i bhfeidhm sna criosanna cosanta agus faireachais, go cuirfear i bhfeidhm iad ar a laghad go dtí na dátaí a liostaítear san Iarscríbhinn a ghabhann leis an gCinneadh seo.