(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas ar údarú ullmhóide arb é atá inti eastóscán ar mhórán lúitéine de Tagetes erecta L. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide arb é atá inti eastóscán ar mhórán lúitéine de Tagetes erecta L. mar bhreiseán beathaithe lena húsáid i mbeatha le haghaidh turcaithe lena ramhrú, iarratas ina n-iarrtar an breiseán a aicmiú sa chatagóir ‘breiseáin chéadfacha’ agus san fheidhmghrúpa ‘datháin (ii), substaintí a chuireann dathanna ar bhia de bhunadh ainmhíoch nuair a úsáidtear in ábhar beatha d’ainmhithe iad’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 18 Meán Fómhair 2024 (2) go bhfuil an ullmhóid sábháilte don spriocspeiceas, do thomhaltóirí agus don chomhshaol, faoi na coinníollacha úsáide atá beartaithe. Maidir le sábháilteacht úsáideoirí, ba é conclúid an Údaráis go bhfuil eastóscán ar mhórán lúitéine de Tagetes erecta L. ina ghreannaitheoir craicinn agus súl agus meastar gur riosca é aon nochtadh. Thairis sin, tháinig an tÚdarás ar an gconclúid go bhféadfadh an tsubstaint dath a chur ar chraiceann turcaithe le ramhrú faoi na coinníollacha úsáide atá beartaithe.

(5)

Maidir leis na conclúidí agus na moltaí ar ar thángthas le linn an mheasúnaithe a rinneadh i ndáil leis na modhanna a úsáidtear chun anailís a dhéanamh ar eastóscán ar mhórán lúitéine de Tagetes erecta L. mar bhreiseán beathaithe i gcomhthéacs an údaraithe roimhe seo, ba é meas na Saotharlainne Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. Mar sin féin, an tuarascáil mheastóireachta a cuireadh isteach i gcomhthéacs an údaraithe roimhe sin, thug an tSaotharlann Tagartha cothrom le dáta ina dhiaidh sin í, chun forbairtí eolaíocha agus teicneolaíocha a chur san áireamh agus chun a áirithiú go mbeadh na modhanna anailíse níos oiriúnaí do rialuithe oifigiúla. D’fhíoraigh an tÚdarás an tuarascáil leasaithe maidir leis na modhanna a úsáidtear chun anailís a dhéanamh ar lúitéin mar bhreiseán beathaithe arna cur isteach ag an tSaotharlann Tagartha (3).

(6)

I bhfianaise an mhéid thuas, measann an Coimisiún go gcomhlíonann an ullmhóid arb é atá inti eastóscán ar mhórán lúitéine de Tagetes erecta L. na coinníollacha dá bhforáiltear in Airteagal 5 de Rialachán (CE) Uimh. 1831/2003. A mhéid a bhaineann le modhanna anailíse, ba cheart an tuarascáil mheastóireachta cothrom le dáta ón tSaotharlann Tagartha a chur san áireamh. Dá réir sin, ba cheart úsáid na substainte sin mar bhreiseán beathaithe a údarú. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,