(1)

An 24 Iúil 2025, ghlac an Coimisiún Rialachán Cur Chun Feidhme (AE) 2025/1564 (2) lena ndéantar foráil maidir le cur i bhfeidhm dleachtanna custaim breise ar allmhairí táirgí sonraithe de thionscnamh Stáit Aontaithe Mheiriceá (‘na Stáit Aontaithe’) isteach san Aontas agus maidir le srianta a chur i bhfeidhm ar onnmhairiú táirgí áirithe de thionscnamh an Aontais chuig na Stáit Aontaithe (‘na bearta athchothromúcháin’).

(2)

Bhí sé d’aidhm ag na bearta a forchuireadh le Rialachán Cur Chun Feidhme (AE) 2025/1564 frithchothromú a dhéanamh ar na bearta coimirce i bhfoirm dleachtanna custaim breise a thug na Stáit Aontaithe isteach ar allmhairí táirgí áirithe cruach agus alúmanaim agus táirgí díorthacha cruach agus alúmanaim, feithiclí do phaisinéirí agus trucailí éadroma áirithe, páirteanna áirithe gluaisteán, cannaí beorach agus cannaí alúmanaim folmha áirithe, agus raon leathan táirgí talmhaíochta, iascaigh agus táirgí tionsclaíocha eile, de thionscnamh an Aontais, dá dtagraítear in aithrisí (1) go (7) de Rialachán Cur Chun Feidhme (AE) 2025/1564.

(3)

An 27 Iúil 2025, tháinig an tAontas agus na Stáit Aontaithe ar chomhaontú polaitiúil a mhéid a bhaineann lena gcaidreamh trádála, lena ndéantar foráil, inter alia, maidir le faoiseamh taraife láithreach i gcás allmhairí ón Aontas chuig na Stáit Aontaithe. Mar thoradh air sin, gheall na Stáit Aontaithe go bhfuil siad ar tí taraifí áirithe is infheidhme maidir le hallmhairí an Aontais a mhodhnú i gcomhréir leis an gcomhaontú polaitiúil sin, agus an ráta is infheidhme a laghdú go huasmhéid 15 % ad valorem.

(4)

I bhfianaise na bhforbairtí dá dtagraítear in aithris (3), agus chun cur chun feidhme éifeachtach an chomhaontaithe pholaitiúil a áirithiú, ba cheart cur i bhfeidhm bhearta athchothromúcháin an Aontais a chur ar fionraí. Dá réir sin, ní gá fógra i scríbhinn a chur chuig Comhairle na hEagraíochta Domhanda Trádála um Thrádáil Earraí faoi láthair a mhéid a bhaineann le cur i bhfeidhm na mbeart sin agus ba cheart an fógra sin a chur ar fionraí.

(5)

Ba cheart don Choimisiún athbhreithniú tráthrialta a dhéanamh ar an bhfionraíocht i bhfianaise tuilleadh forbairtí sa chaidreamh trádála leis na Stáit Aontaithe, agus féadfaidh sé gníomhaíochtaí breise a dhéanamh.

(6)

Tá an Rialachán seo gan dochar do sheasamh an Aontais toisc go bhfuil bearta coimirce na Stát Aontaithe fós ar neamhréir leis an gComhaontú lena mbunaítear an Eagraíocht Dhomhanda Trádála.

(7)

I bhfianaise mórchúiseanna práinne a bhfuil bonn cirt leo mar gheall ar an ngá atá ann le cur i bhfeidhm na mbeart athchothromúcháin, atá ar tí tarlú, a chur ar fionraí chun cur chun feidhme éifeachtach an chomhaontaithe pholaitiúil dá dtagraítear in aithris (3) a áirithiú, ba cheart feidhm a bheith ag forálacha an Rialacháin seo láithreach. Ar na cúiseanna céanna, ba cheart forálacha an Rialacháin seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh. De bhun Airteagal 8 de Rialachán (AE) Uimh. 182/2011 ó Pharlaimint na hEorpa agus ón gComhairle (3), fanfaidh an Rialachán seo i bhfeidhm go ceann 6 mhí.

(8)

I gcomhréir le hAirteagal 8 de Rialachán (AE) Uimh. 182/2011, 14 lá ar a dhéanaí tar éis a ghlactha, ba cheart don Choimisiún an Rialachán seo a chur faoi bhráid an Choiste um Bacainní Trádála chun a thuairim a fháil,