(1)

Is galar tógálach veicteoir-iompartha é ionfhabhtú le víreas ghalar an chraicinn chnapánaigh a bhíonn ar bhó-ainmhithe. D’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach freisin ar ghluaiseachtaí na n-ainmhithe sin agus a dtáirgí laistigh den Aontas, agus ar onnmhairí go tríú tíortha.

(2)

I gcás ráig d’ionfhabhtú le víreas ghalar an chraicinn chnapánaigh i mbó-ainmhithe, tá riosca tromchúiseach ann go leathfadh an galar sin go bunaíochtaí eile bó-ainmhithe go háirithe mar gheall ar a phríomh-mhodh tarchurtha trí veicteoirí.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le galair liostaithe áirithe a rialú dá dtagraítear in Airteagal 9(1), pointí (a), (b) agus (c), de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear ionfhabhtú le víreas ghalar an chraicinn chnapánaigh agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseoidh an crios srianta ar a laghad crios cosanta, crios faireachais, agus, más gá, criosanna srianta breise timpeall ar na criosanna cosanta agus faireachais nó cóngarach dóibh.

(4)

Glacadh Cinneadh Cur Chun Feidhme (AE) 2025/1318 ón gCoimisiún (4) ar bhonn Rialachán (AE) 2016/429 agus leagtar síos leis bearta éigeandála eatramhacha áirithe a bhaineann le hionfhabhtú le víreas ghalar an chraicinn chnapánaigh san Iodáil.

(5)

Go háirithe, ceanglaítear le Cinneadh Cur Chun Feidhme (AE) 2025/1318 criosanna srianta a bhunú de réir bhrí Rialachán Tarmligthe (AE) 2020/687 sa Bhallstát sin, agus cinntear leis na limistéir a liostaítear ina nIarscríbhinní faoi seach mar chriosanna den sórt sin.

(6)

Ó glacadh Cinneadh Cur Chun Feidhme (AE) 2025/1318, thug an Iodáil fógra don Choimisiún faoi 25 ráig bhreise d’ionfhabhtú le víreas ghalar an chraicinn chnapánaigh i mbunaíochtaí ina gcoimeádtar bó-ainmhithe i gcúigí Nuoro agus Sassari, i réigiún na Sairdíne, chomh maith le ráig bhreise amháin i réigiún na Lombairde, ráigeanna a tuairiscíodh idir an 25 Meitheamh agus an 17 Iúil 2025. Mar fhreagairt ar na ráigeanna sin, bhunaigh an Iodáil criosanna srianta agus criosanna faireachais, chomh maith le criosanna srianta breise, i gcúigí Nuoro agus Sassari, i réigiún na Sairdíne, chomh maith le criosanna cosanta agus faireachais i réigiún na Lombairde, criosanna ina gcuirtear i bhfeidhm na bearta rialaithe galar a leagtar síos i Rialachán Tarmligthe (AE) 2020/687. Ina theannta sin, tá crios faireachais bunaithe ag an Iodáil i limistéar a bhfuil teorainn aige leis an bhFrainc, mar fhreagairt ar an ráig a dheimhnigh an Fhrainc an 12 Iúil 2025 i réigiúin gar do theorainn na hIodáile.

(7)

Méid na limistéar a shonraítear mar chriosanna cosanta agus na criosanna faireachais, chomh maith leis an crios srianta breise san Iarscríbhinn a ghabhann leis an gCinneadh seo, agus fad tréimhse na mbeart atá le cur i bhfeidhm laistigh de na criosanna sin, tá siad bunaithe ar na critéir a leagtar síos in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687 freisin. Ar na critéir a chuirtear i bhfeidhm maidir le rogha mhéid an chreasa cosanta agus an chreasa faireachais, chomh maith le fad tréimhse na mbeart atá le cur i bhfeidhm laistigh de na criosanna sin, áirítear breithniú ar an staid eipidéimeolaíoch a mhéid a bhaineann le hionfhabhtú le víreas ghalar an chraicinn chnapánaigh sna limistéir atá buailte ag an ngalar sin, agus ní hamháin sin ach ar thosca eipidéimeolaíocha eile lena n-áirítear paraiméadair gheografacha agus an riosca atá ann maidir le leathadh breise an ghalair i bhfianaise láithreacht veicteoirfheithidí. Cuireadh san áireamh freisin caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe (5) agus fad tréimhse na mbeart dá bhforáiltear sa Chinneadh seo á chinneadh.

(8)

Le Rialachán (AE) 2016/429, go háirithe Airteagal 69 de, foráiltear go bhféadfaidh údarás inniúil Ballstáit úsáid a bhaint as vacsaíniú próifiolacsach éigeandála i gcás inar gá le haghaidh rialú éifeachtach galair liostaithe in ainmhithe ar coimeád. Chuige sin, tá an t-údarás inniúil le criosanna vacsaínithe a bhunú agus plean oifigiúil vacsaínithe a chur chun feidhme a chomhlíonann ceanglais shonracha. Le Rialachán Tarmligthe (AE) 2023/361 ón gCoimisiún (6), lena bhforlíontar Rialachán (AE) 2016/429, leagtar síos, inter alia, na rialacha sonracha atá le cur chun feidhme ag na Ballstáit agus vacsaíniú próifiolacsach éigeandála á úsáid acu i mbó-ainmhithe chun galar liostaithe a chosc nó a rialú. Sa Rialachán Tarmligthe sin, tá na coinníollacha faoina bhféadfar gluaiseacht ainmhithe vacsaínithe agus a dtáirgí a cheadú, freisin. In Iarscríbhinn IX a ghabhann leis an Rialachán Tarmligthe sin, leagtar síos coinníollacha sonracha maidir le vacsaíniú próifiolacsach éigeandála in aghaidh ionfhabhtú le galar an chraicinn chnapánaigh.

(9)

Le Rialachán Cur Chun Feidhme (AE) 2022/140 ón gCoimisiún (7) leagtar síos rialacha maidir le cur i bhfeidhm Rialachán (AE) 2016/429 a mhéid a bhaineann le bainc antaiginí, vacsaíní agus imoibrithe diagnóiseacha an Aontais. Go háirithe, leagtar amach ann na ceanglais nós imeachta agus theicniúla faoi Airteagal 8 chun go ndéanfaidh na Ballstáit rochtain éigeandála a iarraidh ar vacsaíní, lena n-áirítear vacsaíní le haghaidh ghalar an chraicinn chnapánaigh, ó bhainc vacsaíní.

(10)

An 1 Iúil 2025 rinne an Iodáil a phlean oifigiúil um vacsaíniú próifiolacsach éigeandála in aghaidh ionfhabhtú ghalar an chraicinn chnapánaigh a chur faoi bhráid an Choimisiúin. Cuimsítear sa phlean faisnéis maidir le raon feidhme geografach agus riaracháin na gcriosanna vacsaínithe, an líon bunaíochtaí agus an líon ainmhithe atá le vacsaíniú, agus fad tréimhse an vacsaínithe, mar a cheanglaítear le hAirteagal 6(4), pointe (a), de Rialachán Tarmligthe (AE) 2023/361. D’iarr an Iodáil dáileoga vacsaíne leordhóthanacha ar bhanc vacsaíní an Aontais freisin, i gcomhréir le hAirteagal 8 de Rialachán Cur Chun Feidhme (AE) 2022/140 chun tús a chur le vacsaíniú próifiolacsach éigeandála i gcríoch iomlán réigiún na Sairdíne.

(11)

Na coinníollacha faoina bhfuil an Iodáil chun vacsaíniú próifiolacsach éigeandála in aghaidh ionfhabhtú le víreas ghalar an chraicinn chnapánaigh a chur i bhfeidhm, chomh maith leis na bearta maolaithe riosca a dhéanfar maidir le gluaiseacht ainmhithe vacsaínithe agus a dtáirgí, leagtar siad na coinníollacha sin in Iarscríbhinn IX a ghabhann le Rialachán Tarmligthe (AE) 2023/361. I gcomhréir leis na coinníollacha sin, féadfar vacsaíniú a chur chun feidhme i gcriosanna vacsaínithe I nó II, de réir dheimhniú an ionfhabhtaithe le víreas ghalar an chraicinn chnapánaigh.

(12)

D’fhéadfadh sé gur ghá cineál, méid agus fad tréimhse chriosanna vacsaínithe I agus II a choigeartú i bhfianaise na staide eipidéimeolaíche atá ag teacht chun cinn agus i bhfianaise dhul chun cinn na bhfeachtas vacsaínithe, agus go háirithe leibhéal athraitheach an chumhdaigh vacsaíne a bhaintear amach á chur san áireamh. I gcás inarb iomchuí nó i gcas inar gá, d’fhéadfadh sé gur ghá crios vacsaínithe I a dhéanamh de chrios vacsaínithe II nó cuid de, nó a mhalairt, i gcomhréir leis na critéir a leagtar amach i Rialachán Tarmligthe (AE) 2023/361 agus bunaithe ar an bhfaisnéis arna cur ar fáil ag údaráis inniúla na mBallstát atá buailte. Dá réir sin, is gá na dátaí a athraítear ó chineál amháin creasa vacsaínithe go cineál eile creasa vacsaínithe a léiriú san Iarscríbhinn a ghabhann leis an gCinneadh seo.

(13)

I bhfianaise na staide eipidéimeolaíche atá ann faoi láthair agus an riosca gur féidir le hionfhabhtú le víreas ghalar an chraicinn chnapánaigh leathadh trí bhó-ainmhithe atá ionfhabhtaithe go fochliniciúil, is gá toirmeasc a chur ar ghluaiseachtaí na mbó-ainmhithe sin ó aon láthair laistigh de chrios cosanta, crios faireachais nó crios srianta breise chuig ceann scríbe atá suite lasmuigh d’imlínte seachtracha na gcriosanna srianta breise san Iodáil nó lasmuigh den Bhallstát sin. Chuige sin, b’éigean limistéir shonracha i gcríocha na hIodáile a shainaithint inar cheart bearta feabhsaithe a chur i bhfeidhm, amhail na bearta is infheidhme i gcriosanna srianta breise, dá bhforáiltear i Rialachán Tarmligthe (AE) 2020/687, ar críocha iad óna mbeidh toirmeasc freisin ar ghluaiseachtaí bó-ainmhithe lasmuigh d’imlínte seachtracha na limistéar sin nó níos faide go dtí dáta áirithe.

(14)

Chun aon suaitheadh nach bhfuil gá leis ar thrádáil laistigh den Aontas a chosc agus chun nach bhforchuirfidh tríú tíortha bacainní gan údar ar thrádáil, na limistéir a shainaithnítear mar chriosanna cosanta, criosanna faireachais agus criosanna srianta breise, chomh maith le criosanna vacsaínithe, ba cheart na limistéir sin a leagan amach san Iarscríbhinn a ghabhann leis an gCinneadh seo, agus ba cheart fad tréimhse na mbeart sin a shocrú, i gcomhar leis na Ballstáit sin.

(15)

Ar mhaithe le soiléireacht dhlíthiúil a áirithiú, ba cheart na criosanna srianta agus na criosanna vacsaínithe a shainiú go beacht i dtéarmaí a raoin feidhme gheografaigh agus a bhfad tréimhse chun leathadh breise an ghalair san Iodáil nó chuig na Ballstáit eile nó chuig tríú tíortha a chosc. I bhfianaise na staide eipidéimeolaíche, ba cheart feidhm a bheith ag forálacha an Chinnidh seo a luaithe is féidir.

(16)

Dá bhrí sin, ba cheart Cinneadh Cur Chun Feidhme (AE) 2025/1318 a aisghairm agus an Cinneadh seo a chur ina ionad.

(17)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(a)

bunóidh údaráis inniúla na mBallstát sin láithreach criosanna srianta, lena gcuimseofar na criosanna cosanta, na criosanna faireachais agus na criosanna srianta breise, i gcomhréir le hAirteagal 21 de Rialachán Tarmligthe (AE) 2020/687, agus faoi na coinníollacha a leagtar síos san Airteagal sin;

(b)

bunóidh údarás inniúil na mBallstáit sin láithreach criosanna vacsaínithe i gcomhréir le Cuid 1 d’Iarscríbhinn IX a ghabhann le Rialachán Tarmligthe (AE) 2023/361, agus faoi na coinníollacha a leagtar síos san Iarscríbhinn sin;

(c)

cuimseoidh na criosanna cosanta, na criosanna faireachais agus na criosanna srianta breise dá dtagraítear i bpointe (a), chomh maith leis na criosanna vacsaínithe dá dtagraítear i bpointe (b) ar a laghad na limistéir a liostaítear in Iarscríbhinní I agus III a ghabhann leis an gCinneadh seo;

(d)

maidir leis na bearta is gá a chur i bhfeidhm sna criosanna cosanta, na criosanna faireachais agus na criosanna srianta breise, chomh maith leis na criosanna vacsaínithe, go cuirfear i bhfeidhm iad ar a laghad go dtí na dátaí a liostaítear sna hIarscríbhinní a ghabhann leis an gCinneadh seo.