(1)

Ba cheart tús a chur leis an gcaibidlíocht d’fhonn comhaontú um athligean isteach a thabhairt i gcrích le Poblacht na Casacstáine (‘an Comhaontú’).

(2)

Ba cheart don Choimisiún a áirithiú go mbeidh an Comhaontú ag teacht le dlí agus le beartais ábhartha an Aontais, lena n-áirítear na gealltanais atá tugtha ag an Aontas faoi chomhaontuithe ábhartha iltaobhacha eile.

(3)

Ba cheart an t-ullmhúchán don chaibidlíocht a dhéanamh i bhfad roimh ré. Chuige sin, ba cheart don Choimisiún an Chomhairle a chur ar an eolas, a luaithe is féidir, faoi sceideal measta na caibidlíochta agus faoi na saincheisteanna atá le caibidil, agus dul i gcomhairle leis an gComhairle i gcás inar gá. Ba cheart don Choimisiún toradh gach seisiúin chaibidlíochta a chur in iúl don Chomhairle chomh maith.

(4)

Chun freagairt ar leasanna bheartas um athligean isteach an Aontais ar an gcaoi is fearr, ba cheart don údarú chun caibidlíochta a bheith teoranta ó thaobh ama de, agus an deis a bheith ann síneadh a chur le tréimhse bhailíochta an Chinnidh seo. Sula rachaidh tréimhse bhailíochta an Chinnidh seo in éag, ba cheart don Chomhairle a mheas, ar bhonn moladh ón gCoimisiún, an chun leas an Aontais é leanúint den chaibidlíocht, agus an dul chun cinn atá déanta sa chaibidlíocht, chomh maith leis an gcaidreamh foriomlán idir an tAontas agus a Bhallstáit agus Poblacht na Casacstáine, á chur san áireamh. Is féidir síneadh a chur le tréimhse bhailíochta an Chinnidh seo faoin nós imeachta céanna. An t-údarú sin atá teoranta ó thaobh ama agus lena ngabhann an deis síneadh a chur leis, ní sé le srian a chur leis an gcumhacht atá ag idirbheartaí an Aontais ina chaibidlíocht le Poblacht na Casacstáine.

(5)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus Éireann i dtaca leis an Limistéar Saoirse, Slándála agus Ceartais, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, thug Éire fógra, le litir dar dáta an 16 Meitheamh 2025, gur mian léi bheith rannpháirteach i nglacadh agus i bhfeidhmiú an Chinnidh seo.

(6)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.