(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach dhá iarratas maidir le húdarú ullmhóide arb é atá inti Lactiplantibacillus plantarum NCIMB 41028 agus údarú ullmhóide arb é atá inti Lactiplantibacillus plantarum NCIMB 30148. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis na hiarratais.

(3)

Baineann na hiarratais le húdarú ullmhóide arb é atá inti Lactiplantibacillus plantarum NCIMB 41028 agus údarú ullmhóide arb é atá inti Lactiplantibacillus plantarum NCIMB 30148 mar bhreiseáin bheathaithe le haghaidh gach speicis ainmhíoch, agus iarrtar sna hiarratais sin go n-aicmeofaí na breiseáin sin i gcatagóir na mbreiseán ‘breiseáin theicneolaíocha’ agus san fheidhmghrúpa ‘breiseáin sadhlais’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 26 Samhain 2024 (2) maidir le húsáid na n-ullmhóidí arb é atá iontu Lactiplantibacillus plantarum NCIMB 41028 agus Lactiplantibacillus plantarum NCIMB 30148, go bhfuil siad sábháilte do gach speiceas ainmhíoch, do thomhaltóirí agus don chomhshaol. Tháinig sé ar an gconclúid freisin nach greannaitheoirí craicinn iad na breiseáin, gur cheart a mheas go bhféadfadh sé gur íogróirí craicinn agus riospráide iad, go bhfuil riosca ag gabháil le haon nochtadh tríd an gcraiceann agus an chonair riospráide don bhreiseáin sin agus nach bhféadfaí teacht ar chonclúid maidir leis an ngreannú súl a d’fhéadfadh siad a dhéanamh. Thairis sin, tháinig an tÚdarás ar an gconclúid go bhféadfaí feabhas a chur ar tháirgeadh sadhlais d’ábhar úr trí Lactiplantibacillus plantarum NCIMB 41028 agus Lactiplantibacillus plantarum NCIMB 30148 a chur leis ar íosleibhéal 1 × 109 ADC/kg (aonad déanta coilíneachta) d’ábhar plandaí úr.

(5)

I bhfianaise an mhéid thuas, measann an Coimisiún maidir leis na hullmhóidí arb é atá iontu Lactiplantibacillus plantarum NCIMB 41028 agus Lactiplantibacillus plantarum NCIMB 30148, go gcomhlíonann siad na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na n-ullmhóidí sin a údarú. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí na mbreiseán a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,