(1)

An 12 Iúil 2004, ghlac an Chomhairle Gníomhaíocht Chomhpháirteach 2004/570/CBES, lena bhforáiltear d’oibríocht mhíleata de chuid an Aontais Eorpaigh sa Bhoisnia agus an Heirseagaivéin (Oibríocht ALTHEA).

(2)

De bhun Airteagal 6(1) de Ghníomhaíocht Chomhpháirteach 2004/570/CBES, d’údaraigh an Chomhairle don Choiste Polaitiúil agus Slándála cinntí ábhartha a dhéanamh maidir le Ceannasaí Oibríochta an Aontais Eorpaigh a cheapadh ar Oibríocht ALTHEA(‘Ceannasaí Oibríochta an Aontais Eorpaigh’).

(3)

An 8 Deireadh Fómhair 2018, chinn an Coiste Polaitiúil agus Slándála, i bprionsabal, tá Leas-Cheann Foirne Ard-Cheanncheathrú na gCumhachtaí Comhghuaillíocha san Eoraip le ceapadh mar Cheannasaí Oibríochta an Aontais Eorpaigh ón 29 Márta 2019, faoi réir dearbhú ó ECAT go mbeadh an duine sin ar fáil.

(4)

An 7 Nollaig 2018, dhearbhaigh Comhairle an Atlantaigh Thuaidh go mbeadh Leas-Cheann Foirne Ard-Cheanncheathrú na gCumhachtaí Comhghuaillíocha san Eoraip ar fáil chun ról Cheannasaí Oibríochta an Aontais Eorpaigh a ghlacadh faoi na socraíochtaí dá ngairtear ‘Beirlín Plus’, ón 29 Márta 2019.

(5)

An 13 Meán Fómhair 2022, ghlac an Coiste Polaitiúil agus Slándála Cinneadh (CBES) 2022/1611 (2) lena gceaptar an Leifteanant-Ghinearál Hubert COTTEREAU, Leas-Cheann Foirne Ard-Cheanncheathrú na gCumhachtaí Comhghuaillíocha san Eoraip, mar Cheannasaí Oibríochta an Aontais Eorpaigh.

(6)

An 16 Meitheamh 2025, chinn ECAT an Leifteanant-Ghinearál Ludovic PINON de QUINCY a cheapadh mar Leas-Cheann Foirne Ard-Cheanncheathrú na gCumhachtaí Comhghuaillíocha san Eoraip in ionad an Leifteanant-Ghinearál Hubert COTTEREAU ón 1 Lúnasa 2025. Ón dáta sin amach, ba cheart don Leifteanant-Ghinearál Ludovic PINON de QUINCY an Leifteanant-Ghinearál Hubert COTTEREAU, ina cháil mar Cheannasaí Oibríochta an Aontais Eorpaigh, a ionadú freisin.

(7)

An 24 Meitheamh 2025, chomhaontaigh Coiste Míleata an Aontais Eorpaigh a mholadh go n-ainmneofaí an Leifteanant-Ghinearál Ludovic PINON de QUINCY mar Cheannasaí Oibríochta an Aontais Eorpaigh ón 1 Lúnasa 2025.

(8)

Ba cheart, dá bhrí sin, Cinneadh (CBES) 2022/1611 a aisghairm.

(9)

An 12 agus an 13 Nollaig 2002, ghlac Comhairle Eorpach Chóbanhávan dearbhú lena ndearbhaítear nach mbeidh feidhm ag na socraíochtaí dá ngairtear ‘Beirlín Plus’ agus a gcur chun feidhme ach amháin maidir leis na Ballstáit sin den Aontas is comhaltaí freisin de ECAT nó páirtithe i ‘gComhpháirtíocht na Síochána’ iad, agus a bhfuil comhaontuithe déthaobhacha slándála tugtha i gcrích acu le ECAT,