(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide de na baictéarafagaigh PCM F/00069, PCM F/00070, PCM F/00071 agus PCM F/00097 mar bhreiseán beathaithe lena húsáid i mbeatha chomhlántach agus in uisce óil. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide de na baictéarafagaigh PCM F/00069, PCM F/00070, PCM F/00071 agus PCM F/0009 mar bhreiseán beathaithe le haghaidh gach speicis éanúil, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘breiseáin zóiteicniúla eile’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 17 Márta 2021 (2), an 31 Eanáir 2023 (3) agus an 26 Samhain 2024 (4) go bhfuil an ullmhóid de na baictéarafagaigh PCM F/00069, PCM F/00070, PCM F/00071 agus PCM F/00097 (‘an ullmhóid’) sábháilte do gach speiceas éanúil, do thomhaltóirí agus don chomhshaol faoi na coinníollacha úsáide atá beartaithe. Tháinig sé ar an gconclúid freisin nach greannaitheoir craicinn ná súl í an ullmhóid ach gur cheart a mheas gur íogróir craicinn agus riospráide féideartha í, agus go meastar gur riosca é í a ionanálú agus nochtadh deirmeach dó. Tháinig an tÚdarás ar an gconclúid thairis sin go bhféadfadh an ullmhóid an t-éilliú comhshaoil le Salmonella Enteritidis a laghdú nuair a úsáidtear í in uisce óil nó i mbeatha chomhlántach leachtach le haghaidh gach speicis éanlaithe clóis. Mheas sé go bhfuil gá le ceanglais shonracha maidir le faireachán iarmhargaidh chun aghaidh a thabhairt ar roghnú agus leathadh féideartha athraitheach frithsheasmhach de Salmonella chuig an ullmhóid. D’fhíoraigh an tÚdarás freisin an tuarascáil ar na modhanna a úsáidtear chun anailís a dhéanamh ar na breiseáin bheathaithe, arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

An 7 Feabhra 2025, tharraing an t-iarratasóir siar an t-iarratas ar údarú na hullmhóide de na baictéarafagach PCM F/00069, PCM F/00070, PCM F/00071 agus PCM F/00097 le haghaidh éin ornáideacha. Ina theannta sin, an 14 Aibreán 2025 tharraing an t-iarratasóir siar an t-iarratas ar údarú na hullmhóide sin lena húsáid i mbeatha chomhlántach.

(6)

I bhfianaise an mhéid thuas, measann an Coimisiún go gcomhlíonann an ullmhóid na coinníollacha dá bhforáiltear in Airteagal 5 de Rialachán (CE) Uimh. 1831/2003, nuair a úsáidtear í in uisce óil le haghaidh gach speicis éanlaithe clóis. Dá réir sin, ba cheart úsáid na hullmhóide sin a údarú. Is iomchuí foráil a dhéanamh maidir le faireachán iarmhargaidh chun aghaidh a thabhairt ar roghnú agus leathadh féideartha athraitheach frithsheasmhach de Salmonella chuig an ullmhóid. Ina theannta sin, measann an Coimisiún gur cheart a léiriú ar lipéad an bhreiseáin nach féidir a mheas gur ionadaí é an breiseán ar na gnáthdhálaí sláinteachais feirmeoireachta. Faoi dheireadh, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,