(1)

Cuireadh meatafluitrin le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 18. Dá bhrí sin, de bhun Airteagal 86 de Rialachán (AE) Uimh. 528/2012, measadh é a bheith formheasta faoin Rialachán sin faoi réir na gcoinníollacha a leagtar amach in Iarscríbhinn I a ghabhann le Treoir 98/8/CE.

(2)

An 25 Deireadh Fómhair 2019 cuireadh iarratas isteach i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le meatafluitrin lena húsáid i dtáirgí bithicídeacha de chineál táirge 18 (‘an t-iarratas’). Is é údarás inniúil na hÉireann (‘an t-údarás inniúil meastóireachta’) a rinne meastóireacht ar an iarratas.

(3)

Le linn an scrúdaithe ar mheatafluitrin, d’athraigh an t-údarás inniúil meastóireachta agus an Ghníomhaireacht Eorpach Ceimiceán (‘an Ghníomhaireacht’) ainm na substainte gníomhaí sin go heipsealón-meatafluitrin.

(4)

An 7 Márta 2024, chuir an t-údarás inniúil meastóireachta moladh faoi bhráid na Gníomhaireachta Eorpaí Ceimiceán (‘an Ghníomhaireacht’) i ndáil leis an bhformheas ar eipsealón-meatafluitrin a athnuachan.

(5)

I gcomhréir le hAirteagal 75(1), an dara fomhír, pointe (a), de Rialachán (AE) Uimh. 528/2012, ullmhaíonn an Coiste um Tháirgí Bithicídeacha an tuairim ón nGníomhaireacht maidir leis na hiarratais ar athnuachan ar fhormheas substaintí gníomhacha. An 25 Samhain 2024 ghlac an Coiste um Tháirgí Bithicídeacha an tuairim ón nGníomhaireacht (3), ag féachaint do chonclúidí an údaráis inniúil meastóireachta.

(6)

Sa tuairim uaithi, ba é conclúid na Gníomhaireachta go bhféadfaí coinne a bheith leis go ndéanfaidh táirgí bithicídeacha de chineál táirge 18 ina bhfuil eipsealón-meatafluitrinna critéir a leagtar síos in Airteagal 19(1), pointe (b), de Rialachán (AE) Uimh. 528/2012 a chomhlíonadh go fóill, ar choinníoll go gcomhlíonfar coinníollacha áirithe a bhaineann lena n-úsáid. Dá bhrí sin, meastar na coinníollacha a leagtar amach in Airteagal 12(1), arna léamh i gcomhar le hAirteagal 4(1), de Rialachán (AE) Uimh. 528/2012 a bheith comhlíonta.

(7)

Dá bhrí sin, is iomchuí an formheas maidir le heipsealón-meatafluitrin lena húsáid i dtáirgí bithicídeacha de chineál táirge 18 a athnuachan faoi réir comhlíonadh coinníollacha áirithe, lena n-áirítear coinníoll maidir le hearraí cóireáilte a chóireáiltear le heipsealón-meatafluitrin nó ina n-ionchorpraítear eipsealón-meatafluitrin a chur ar an margadh. Ba cheart idirthréimhse a shocrú le haghaidh ceanglais nua a bhaineann le hearraí cóireáilte a chur ar an margadh, ar earraí iad a chóireáiltear le heipsealón-meatafluitrin nó ina n-ionchorpraítear eipsealón-meatafluitrin, chun am leordhóthanach a thabhairt d’oibreoirí eacnamaíocha oiriúnú a dhéanamh.

(8)

Sa tuairim uaithi, tháinig an Ghíomhaireacht ar an gconclúid freisin go gcomhlíonann eipsealón-meatafluitrin na critéir maidir le bheith ina shubstaint an-mharthanach thocsaineach i gcomhréir le hIarscríbhinn XIII a ghabhann le Rialachán (CE) Uimh. 1907/2006 ó Pharlaimint na hEorpa agus ón gComhairle (4). Dá bhrí sin, comhlíonann eipsealón-meatafluitrin an coinníoll a leagtar síos in Airteagal 10(1), pointe (d), de Rialachán (AE) Uimh. 528/2012 agus dá bhrí sin, ba cheart í a mheas mar shubstaint atá inbhreithnithe lena hionadú, chun críocha Airteagal 23(1) den Rialachán sin. Dá bhrí sin, níor cheart tréimhse na hathnuachana a bheith níos faide ná 7 mbliana, de bhun Airteagal 10(4) de Rialachán (AE) Uimh. 528/2012.

(9)

I gcomhréir le hAirteagal 23(1) de Rialachán (AE) Uimh. 528/2012, tá údaráis inniúla na mBallstát le measúnú comparáideach a dhéanamh mar chuid den mheastóireacht ar iarratas ar údarú nó iarratas ar athnuachan maidir le táirge bithicídeach ina bhfuil substaint ghníomhach atá inbhreithnithe lena hionadú.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Tháirgí Bithicídeacha,