(1)

Déanfaidh an Eagraíocht Idirnáisiúnta um Fhíniúin agus um Fhíon (OIV) scrúdú ar rúin áirithe (‘na dréachtrúin ó OIV’) agus d’fhéadfadh sé go nglacfadh sí na rúin sin sa chéad Chomhthionól Ginearálta eile a bheidh aici an 20 Meitheamh 2025. Beidh éifeachtaí dlíthiúla ag na dréachtrúin ó OIV, dá nglacfaí iad, de réir bhrí Airteagal 218(9) den Chonradh.

(2)

Níl an tAontas ina chomhalta de OIV. Mar sin féin, an 20 Deireadh Fómhair 2017 dheonaigh OIV don Aontas an stádas ar leith dá bhforáiltear in Airteagal 4 de Rialacha Nós Imeachta OIV.

(3)

Tá 20 Ballstát an Aontais ina gcomhaltaí de OIV freisin. Beidh deis ag na Ballstáit sin leasuithe ar na dréachtrúin ó OIV a mholadh, agus iarrfar orthu na dréachtrúin ó OIV a ghlacadh ag an gcéad Chomhthionól Ginearálta eile de OIV.

(4)

Is iomchuí an seasamh atá le glacadh thar ceann an Aontais ag cruinnithe OIV i ndáil leis na dréachtrúin ó OIV a bhunú maidir le hábhair atá faoina inniúlacht. Ba cheart do na Ballstáit ar comhaltaí de OIV iad freisin an seasamh sin a chur in iúl ag cruinnithe OIV, ag gníomhú dóibh go comhpháirteach chun leas an Aontais.

(5)

De bhun Rialachán (AE) Uimh. 1308/2013 ó Pharlaimint na hEorpa agus ón gComhairle (1) agus Rialachán Tarmligthe (AE) 2019/934 ón gCoimisiún (2), beidh éifeachtaí dlíthiúla le rúin áirithe arna nglacadh agus arna bhfoilsiú ag OIV.

(6)

Foráiltear le hAirteagal 80(3), pointe (a), de Rialachán (AE) Uimh. 1308/2013 go mbeidh ar an gCoimisiún, agus cleachtais fhíoneolaíocha á n-údarú aige, na cleachtais fhíoneolaíocha agus na modhanna anailíse a mhol agus a d’fhoilsigh OIV a chur san áireamh.

(7)

Foráiltear le hAirteagal 80(5) de Rialachán (AE) Uimh. 1308/2013, agus modhanna anailíse á leagan síos ag an gCoimisiún lena gcinnfear comhdhéanamh tháirgí earnáil an fhíona, go mbunóidh sé na modhanna sin ar aon mhodh ábhartha arna mholadh agus arna fhoilsiú ag OIV mura rud é go mbeidís neamhéifeachtach nó neamhchuí i bhfianaise an chuspóra atá á shaothrú ag an Aontas.

(8)

Foráiltear le hAirteagal 90(2) de Rialachán (AE) Uimh. 1308/2013 i dtaca le táirgí earnáil an fhíona a allmhairítear isteach san Aontas, go dtáirgfear na táirgí sin i gcomhréir le cleachtais fhíoneolaíocha arna n-údarú ag an Aontas de bhun an Rialacháin sin nó, roimh an údarú sin, go dtáirgfear iad i gcomhréir le cleachtais fhíoneolaíocha arna moladh agus arna bhfoilsiú ag OIV.

(9)

Foráiltear le hAirteagal 9(1) de Rialachán Tarmligthe (AE) 2019/934, i gcás nach leagann an Coimisiún síos na sonraíochtaí íonachta agus na sonraíochtaí aitheantais, gurb iad sin na sonraíochtaí dá dtagraítear i gcolún 4 de Thábla 2 i gCuid A d’Iarscríbhinn I a ghabhann leis an Rialachán sin, a thagraíonn do mholtaí OIV.

(10)

Moltar i nDréachtrúin OENO-MICRO 22-713A agus OENO-MICRO 22-713B ó OIV modh nua chun cill giosta a chomhaireamh in úrfhíonta, i bhfíonta, agus i saothráin giosta. Le Dréachtrún OENO-MICRO 23-739 ó OIV déantar prótacal caighdeánach a bhailíochtú chun meastóireacht a dhéanamh ar airíonna coipthe Saccaromicys cerevisiae. I gcomhréir le hAirteagal 80(3), pointe (a), de Rialachán (AE) Uimh. 1308/2013, beidh éifeachtaí dlíthiúla leis na rúin sin, dá nglacfaí iad.

(11)

Le Dréachtrún OENO-TECHNO 14-540B ó OIV, bunaítear cleachtais fhíoneolaíocha shonracha le haghaidh fíonta páirt-dhí-alcólaithe. Le Dréachtrún OENO-TECHNO 23-730, tugtar isteach uasteorainn inghlactha de thiúchan aigéid shorbaigh i bhfíon. Le Dréachtrún OENO-TECHNO 23-738 ó OIV, tugtar isteach cleachtas fíoneolaíoch nua maidir le húsáid aigéid fhúmaraigh chun an coipeadh malalachtach in úrfhíonta a rialú. I gcomhréir le hAirteagal 80(3), pointe (a), agus Airteagal 90(2) de Rialachán (AE) Uimh. 1308/2013, beidh éifeachtaí dlíthiúla leis na rúin sin, dá nglacfaí iad.

(12)

Baineann Dréachtrúin OENO-SPECIF 21-691 agus OENO-SPECIF 23-728 ó OIV le modhanna chun cóimheasa iseatópacha d’aigéad tartarach agus ciotósán a chinneadh, faoi seach. I gcomhréir le hAirteagal 80(3)(a), pointe (a) de Rialachán (AE) Uimh. 1308/2013, agus le hAirteagal 9 de Rialachán Tarmligthe (AE) 2019/934, is rúin iad sin a mbeidh éifeachtaí dlíthiúla leo, dá nglacfaí iad.

(13)

Maidir leis na dréachtrúin ó OIV, a phlé saineolaithe eolaíocha agus teicniúla earnáil an fhíona go fairsing, ba cheart dóibh cur le comhchuibhiú idirnáisiúnta na gcaighdeán fíona agus leagfar amach leo creat lena n-áiritheofar iomaíocht chóir i dtrádáil tháirgí earnáil an fhíona. Dá bhrí sin, ba cheart tacú leo.

(14)

Dréachtrún eile ó OIV a mbíonn, dá nglacfaí é, éifeachtaí dlíthiúla aige ar dhlí an Aontais agus a cuireadh faoi bhráid an Chomhthionóil Ghinearálta lena ghlacadh ná Dréachtrún OENO-TECHNO 14-540A ó OIV, lena mbunaítear cleachtais fhíoneolaíocha shonracha le haghaidh fíon dí-alcólaithe, lena n-áirítear gliocról (E 422) a chur leo ar uastiúchan 50 g/L. Moladh an t-uasleibhéal ceadaithe bunaithe ar fhianaise eolaíoch neamhleor maidir leis na héifeachtaí ar an táirge agus ar shláinte tomhaltóirí. Níor cheart, dá bhrí sin, tacú leis an dréachtrún sin ó OIV go dtí go ndéanfar measúnú cuí, go háirithe maidir le huasleibhéil shábháilte ghliocról (E 422) don chatagóir táirge d’fhíon dí-alcólaithe. Ina theannta sin, ba cheart an roinn maidir le ‘Milsiú’, go háirithe an sainmhíniú ‘Milseoirí a chur le fíon dí-alcólaithe’, a léirmhíniú mar ní atá teoranta do na táirgí a liostaítear in ‘Oideasú’; ba cheart an rud céanna a thabhairt faoi deara i ndáil le Dréachtrún OENO-TECHNO 14-540B ó OIV.

(15)

Chun go mbeidh an tsolúbthacht is gá ann le linn na caibidlíochta roimh an chéad Chomhthionól Ginearálta eile de OIV a thionólfar an 20 Meitheamh 2025, ba cheart údarú a thabhairt do na Ballstáit ar comhaltaí de OIV iad freisin aontú le hathruithe teicniúla ar na dréachtrúin ó OIV ar choinníoll nach n-athraítear a substaint leis na hathruithe sin,