TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 2173/2005 ón gComhairle an 20 Nollaig 2005 maidir le scéim ceadúnúcháin FLEGT a bhunú i gcás allmhairí adhmaid isteach sa Chomhphobal Eorpach (1), agus go háirithe Airteagal 10(1) agus (3) de,

De bharr an mhéid seo a leanas:

(1)	Rinne na Páirtithe an Comhaontú Comhpháirtíochta Deonaí idir an Comhphobal Eorpach agus Poblacht Ghána i ndáil le forfheidhmiú an dlí agus rialachas i dtaca le foraoisí, agus trádáil táirgí adhmaid isteach sa Chomhphobal (2) (‘an Comhaontú’) a dhaingniú agus tháinig sé i bhfeidhm an 1 Nollaig 2009.

(2)

Le Rialachán Tarmligthe (AE) 2025/530 ón gCoimisiún (3), áirítear Poblacht Ghána agus Rannán Forbartha an Tionscail Adhmaid i nGána sa liosta in Iarscríbhinn I a ghabhann le Rialachán (CE) Uimh. 2173/2005, agus i liosta na dtáirgí a chumhdaítear le scéim ceadúnúcháin FLEGT in Iarscríbhinn III a ghabhann leis an Rialachán sin. Beidh feidhm ag Rialachán Tarmligthe (AE) 2025/530 ón 8 Iúil 2025.

(3)

Tosóidh Gána ag eisiúint ceadúnais FLEGT an 30 Meitheamh 2025 ar a luaithe. Ós rud é go mbíonn amlínte caighdeánacha loingseoireachta idir Gána agus an tAontas idir 2 agus 8 seachtaine ar an meán, tá riosca suntasach ann nach mbeidh lastais adhmaid a shroicheann an tAontas ón 8 Iúil 2025 cumhdaithe ag ceadúnas FLEGT toisc go bhféadfaí gur seoladh iad sular thosaigh Gána ag eisiúint ceadúnais FLEGT.

(4)

I bhfianaise Airteagal 12 den Chomhaontú agus Airteagal 4(1) de Rialachán (CE) Uimh. 2173/2005, tá dáta tosaigh scéim ceadúnúcháin FLEGT le leagan síos d’fhonn freastal ar na hamlínte loingseoireachta idir Gána agus an tAontas. Déanfar é sin chun a áirithiú go gcomhlíontar an Comhaontú agus Rialachán (CE) Uimh. 2173/2005 agus chun suaitheadh a sheachaint sna slabhraí soláthair adhmaid agus ar dhialltaí féideartha i dtrádáil adhmaid chuig margaí nach margaí de chuid an Aontais iad, rud a dhéanfadh dochar do sholáthar an Aontais. Ina theannta sin, dhéanfadh suaitheadh trádála dochar d’inchreidteacht an Chomhaontaithe mar ionstraim éascaithe trádála agus imreofaí drochthionchar ar oibreoirí eacnamaíocha i nGána agus san Aontas araon.

(5)	Dá bhrí sin, ba cheart dáta cur i bhfeidhm Rialachán Tarmligthe (AE) 2025/530 a oiriúnú, chun dóthain ama a thabhairt do lastais a fhágann Gána roimh an 30 Meitheamh an tAontas a shroicheadh gan an oibleagáid a bheith cumhdaithe le ceadúnas FLEGT.

(6)	Dá bhrí sin, ba cheart Rialachán Tarmligthe (AE) 2025/530 a leasú dá réir sin.

(7)	Chun srian a chur le suaitheadh trádála, ba cheart an Rialachán seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh. Ar an gcúis chéanna, ba cheart feidhm a bheith aige ón 8 Iúil 2025,

TAR ÉIS AN RIALACHÁN SEO A GHLACADH:

Airteagal 1

In Airteagal 3 de Rialachán Tarmligthe (AE) 2025/530, cuirtear an méid seo a leanas in ionad na dara míre:

‘Beidh feidhm aige ón 8 Deireadh Fómhair 2025.’

Airteagal 2

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ón 8 Iúil 2025.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Meitheamh 2025.

Thar ceann an Choimisiúin

An tUachtarán

Ursula VON DER LEYEN

(2) Comhaontú Comhpháirtíochta Deonaí idir an Comhphobal Eorpach agus Poblacht Ghána i ndáil le forfheidhmiú an dlí agus rialachas i dtaca le foraoisí, agus trádáil táirgí adhmaid isteach sa Chomhphobal (IO L 70, 19.3.2010, lch. 3).

(3) Rialachán Tarmligthe (AE) 2025/530 ón gCoimisiún an 30 Deireadh Fómhair 2024 lena leasaítear Iarscríbhinní I agus III a ghabhann le Rialachán (CE) Uimh. 2173/2005 ón gComhairle mar thoradh ar Chomhaontú Comhpháirtíochta Deonaí le Poblacht Ghána le haghaidh scéim ceadúnúcháin i ndáil le Forfheidhmiú an Dlí, Rialachas agus Trádáil i dtaca le Foraoisí (FLEGT) le haghaidh allmhairí adhmaid isteach san Aontas Eorpach (IO L, 2025/530, 20.3.2025, ELI: http://data.europa.eu/eli/reg_del/2025/530/oj).