(1)

De bhun Airteagal 11 de Rialachán (CE) Uimh. 549/2004, tá na Ballstáit le pleananna a tharraingt suas, ar an leibhéal náisiúnta nó ar leibhéal na mbloc feidhme aerspáis, lena n-áirítear spriocanna feidhmíochta, le haghaidh gach tréimhse tagartha den scéim feidhmíochta agus muirearaithe le haghaidh seirbhísí aerloingseoireachta agus feidhmeanna líonra. Áireofar sna pleananna sin spriocanna feidhmíochta áitiúla atá comhsheasmhach leis na spriocanna feidhmíochta uile-Aontais le haghaidh na tréimhse tagartha lena mbaineann.

(2)

Leagadh síos na spriocanna feidhmíochta uile-Aontais le haghaidh an cheathrú tréimhse thagartha (‘TT4’, 2025-2029) i gCinneadh Cur Chun Feidhme (AE) 2024/1688 ón gCoimisiún (4).

(3)

Tá dréachtphlean feidhmíochta tarraingthe suas ag gach Ballstát le haghaidh TT4, pleananna a cuireadh faoi bhráid an Choimisiúin lena measúnú faoin 1 Deireadh Fómhair 2024. Tar éis don Choimisiún a fhíorú gurbh iomlán do na dréachtphleananna feidhmíochta sin, d’iarr sé ar na Ballstáit dréachtphleananna feidhmíochta cothrom le dáta a chur isteach faoin 15 Samhain 2024.

(4)

An measúnú ón gCoimisiún a chuirtear i láthair sa Chinneadh seo, tá sé bunaithe ar an dréachtphlean feidhmíochta cothrom le dáta le haghaidh TT4 a chuir an Phortaingéil isteach (‘an dréachtphlean feidhmíochta’).

(5)

An Comhlacht Athbhreithnithe Feidhmíochta (‘CAF’), comhlacht a thugann cúnamh don Choimisiún chun an scéim feidhmíochta a chur chun feidhme, chuir sé tuarascáil faoi bhráid an Choimisiúin ina bhfuil comhairle uaidh faoin measúnú ar na dréachtphleananna feidhmíochta.

(6)

I gcomhréir le hAirteagal 14(1) de Rialachán Cur Chun Feidhme (AE) 2019/317, rinne an Coimisiún measúnú ar chomhsheasmhacht na spriocanna feidhmíochta áitiúla a chuimsítear sa dréachtphlean feidhmíochta ar bhonn na gcritéar a leagtar síos i bpointe 1 d’Iarscríbhinn IV a ghabhann leis an Rialachán Cur Chun Feidhme sin, agus imthosca áitiúla á gcur san áireamh i gcás inarb ábhartha.

(7)

Chomhlánaigh an Coimisiún a mheasúnú ar an dréachtphlean feidhmíochta le hathbhreithniú ar na heilimintí a leagtar amach i bpointe 2 d’Iarscríbhinn IV a ghabhann leis an Rialachán Cur Chun Feidhme sin. Maidir le pointe 2.1(d)(vii) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún dá aire nach ndearna sé, mar chuid den athbhreithniú sin, anailís mhionsonraithe ar an modheolaíocht a d’úsáid an Phortaingéil chun costais a leithdháileadh idir seirbhísí faoi bhealach agus seirbhísí críochfoirt le linn TT4. Dá bhrí sin, níor tháinig an Coimisiún ar aon chonclúid, ag an gcéim seo, maidir lena mhéid a chomhlíonann an mhodheolaíochtaí sin maidir le leithdháileadh costas pointí (e) agus (f) d’Airteagal 15(2) de Rialachán (CE) Uimh. 550/2004 ó Pharlaimint na hEorpa agus ón gComhairle (5) agus Airteagal 22(5) de Rialachán Cur Chun Feidhme (AE) 2019/317.

(8)

Maidir leis an réimse tábhachtach feidhmíochta a bhaineann leis an tsábháilteacht, rinneadh measúnú ar chomhsheasmhacht na spriocanna atá sa dréachtphlean feidhmíochta i gcomhréir le pointe 1.1 d’Iarscríbhinn IV a ghabhann le Rialachán Cur Chun Feidhme (AE) 2019/317.

(9)

Is iad seo a leanas na spriocanna feidhmíochta a mholann an Phortaingéil sa réimse tábhachtach feidhmíochta a bhaineann leis an tsábháilteacht i leith éifeachtacht na bainistíochta sábháilteachta, arna miondealú de réir an chuspóra bainistíochta sábháilteachta agus arna léiriú mar leibhéal cur chun feidhme:

(10)

Fuair an Coimisiún gurb ionann na spriocanna feidhmíochta sábháilteachta a mholann an Phortaingéil le haghaidh an tsoláthraí seirbhísí aerloingseoireachta ‘NAV Portugal’ agus na spriocanna sábháilteachta uile-Aontais i leith gach bliana féilire ó 2025 go 2029, cé is moite den chuspóir ‘bainistiú riosca sábháilteachta’ a bhfuil sé beartaithe leibhéal na sprice uile-Aontais a bhaint amach ina leith sa bhliain 2029.

(11)

Tugann an Coimisiún dá aire go leagtar amach sa dréachtphlean feidhmíochta bearta le haghaidh NAV Portugal chun na spriocanna sábháilteachta áitiúla a bhaint amach, cuir i gcás ról agus foireann na n-aonad inmheánach atá ábhartha don tsábháilteacht a neartú, agus uirlisí agus modheolaíochtaí tuarthacha a thabhairt isteach i ngníomhaíochtaí bainistíochta sábháilteachta.

(12)

Ar bhonn na dtorthaí a leagtar amach in aithrisí (9), (10) agus (11), agus de bhrí nach mór na spriocanna feidhmíochta sábháilteachta uile-Aontais a leagtar amach i gCinneadh Cur Chun Feidhme (AE) 2024/1688 a bhaint amach faoi bhliain dheireanach TT4, is é sin 2029, ba cheart a mheas, maidir leis na spriocanna feidhmíochta sábháilteachta áitiúla a chuimsítear sa dréachtphlean feidhmíochta, go bhfuil siad comhsheasmhach leis na spriocanna feidhmíochta uile-Aontais.

(13)

Maidir leis an réimse tábhachtach feidhmíochta a bhaineann leis an gcomhshaol, rinneadh measúnú ar chomhsheasmhacht na spriocanna atá sa dréachtphlean feidhmíochta maidir le meánéifeachtúlacht chothrománach eitilte faoi bhealach an ruthaig eitilte iarbhír, ar bhonn an chritéir a leagtar síos i bpointe 1.2 d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh spriocanna comhshaoil na Portaingéile i gcomparáid leis na luachanna tagartha ábhartha le haghaidh éifeachtúlacht chothrománach na heitilte faoi bhealach a leagtar amach i bPlean Feabhsúcháin Líonra Aerbhealaí na hEorpa, arna tharraingt suas i gcomhréir le hIarscríbhinn I a ghabhann le Rialachán Cur Chun Feidhme (AE) 2019/123 ón gCoimisiún (6) agus a bhí ar fáil tráth a glacadh na spriocanna feidhmíochta uile-Aontais le haghaidh TT4, is é sin an 2 Iúil 2024.

(14)

Is iad seo a leanas na spriocanna feidhmíochta comhshaoil a mholann an Phortaingéil le haghaidh TT4 mar aon leis na luachanna tagartha náisiúnta comhfhreagracha ó Phlean Feabhsúcháin Líonra Aerbhealaí na hEorpa, arna léiriú mar mheánéifeachtúlacht chothrománach eitilte faoi bhealach an ruthaig eitilte iarbhír:

(15)

Tugann an Coimisiún faoi deara gurb ionann na spriocanna comhshaoil a mholann an Phortaingéil agus na luachanna tagartha náisiúnta comhfhreagracha i gcás gach bliana féilire in TT4.

(16)

Tugann an Coimisiún dá aire go bhfuil bearta curtha i láthair ag an bPortaingéil, sa dréachtphlean feidhmíochta, chun na spriocanna comhshaoil áitiúla a bhaint amach, lena n-áirítear aerspás saorbhealaigh trasteorann agus athstruchtúrú ar an aerspás i gcomhar leis an mBainisteoir Líonra.

(17)

Ar bhonn na dtorthaí a leagtar amach in aithrisí (14), (15) agus (16), ba cheart a mheas go bhfuil na spriocanna i dtaca leis an réimse tábhachtach feidhmíochta a bhaineann leis an gcomhshaol atá sa dréachtphlean feidhmíochta comhsheasmhach leis na spriocanna feidhmíochta uile-Aontais le haghaidh TT4.

(18)

Maidir leis an réimse tábhachtach feidhmíochta a bhaineann le hacmhainneacht, rinneadh measúnú ar chomhsheasmhacht na spriocanna atá sa dréachtphlean feidhmíochta maidir leis an meánmhoill bainistíochta sreibhe aerthráchta (‘BSAT’) faoi bhealach in aghaidh na heitilte, ar bhonn an chritéir a leagtar síos i bpointe 1.3. d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh na spriocanna acmhainneachta faoi bhealach a mholann an Phortaingéil i gcomparáid leis na luachanna tagartha ábhartha a leagtar amach sa Phlean Oibríochtaí Líonra, arna tharraingt suas i gcomhréir le hAirteagal 9 de Rialachán Cur Chun Feidhme (AE) 2019/123 ón gCoimisiún agus a bhí ar fáil tráth a glacadh na spriocanna feidhmíochta uile-Aontais le haghaidh TT4, is é sin an 2 Iúil 2024.

(19)

Is iad seo a leanas na spriocanna acmhainneachta faoi bhealach a mholann an Phortaingéil le haghaidh TT4, arna léiriú i nóiméid moille BSAT in aghaidh na heitilte, mar aon leis na luachanna tagartha comhfhreagracha ón bPlean Oibríochtaí Líonra:

(20)

Tugann an Coimisiún faoi deara gurb ionann na spriocanna acmhainneachta faoi bhealach a mholann an Phortaingéil agus na luachanna tagartha náisiúnta comhfhreagracha i gcás gach bliana féilire in TT4.

(21)

Tugann an Coimisiún dá aire gur chuir an Phortaingéil i láthair sa dréachtphlean feidhmíochta bearta chun a spriocanna acmhainneachta faoi bhealach a bhaint amach. Áirítear ar na bearta sin méadú suntasach ar líon na rialtóirí aerthráchta in oibríochtaí ag an lárionad rialaithe limistéir, agus athstruchtúrú aerspáis chun an acmhainneacht atá ar fáil a fheabhsú agus na scrogaill acmhainne atá ann faoi láthair a mhaolú. Ag féachaint do thorthaí CAF, measann an Coimisiún gur cheart don Phortaingéil gealltanas a thabhairt go gcuirfí chun feidhme na bearta oibríochtúla ar fad a leagtar amach sa Phlean Oibríochtaí Líonra an 2 Iúil 2024 chun tacú le baint amach a spriocanna feidhmíochta acmhainneachta le haghaidh TT4.

(22)

Ar bhonn na dtorthaí a leagtar amach in aithrisí (19), (20) agus (21), ba cheart a mheas go bhfuil na spriocanna i dtaca leis an réimse tábhachtach feidhmíochta a bhaineann le hacmhainneacht atá sa dréachtphlean feidhmíochta comhsheasmhach leis na spriocanna feidhmíochta uile-Aontais le haghaidh TT4.

(23)

I gcomhréir le pointe 2.1(b) d’Iarscríbhinn IV a ghabhann le Rialachán Cur Chun Feidhme (AE) 2019/317, chomhlánaigh an Coimisiún a mheasúnú ar an dréachtphlean feidhmíochta trí athbhreithniú a dhéanamh ar na spriocanna feidhmíochta acmhainneachta le haghaidh seirbhísí aerloingseoireachta críochfoirt a leagtar amach i leith na n-aerfort dá dtagraítear in Airteagal 1(3) agus (4) den Rialachán Cur Chun Feidhme sin. Fuarthas amach nach bhfuil na spriocanna sin ina gcúis imní.

(24)

Maidir leis an réimse tábhachtach feidhmíochta a bhaineann le costéifeachtúlacht, rinneadh measúnú ar chomhsheasmhacht na spriocanna atá sa dréachtphlean feidhmíochta maidir leis an gcostas aonaid arna shuí (‘CAAS’) le haghaidh seirbhísí aerloingseoireachta eitiltí faoi bhealach, ar bhonn na gcritéar a leagtar síos i bpointí 1.4(a), (b) agus (c) d’Iarscríbhinn IV a ghabhann le Rialachán Cur Chun Feidhme (AE) 2019/317. Is iad na critéir sin an treocht CAAS le linn TT4, an treocht fhadtéarmach CAAS le linn an tríú tréimhse thagartha (‘TT3’) agus TT4 (2020-2029), agus an luach bonnlíne CAAS ar leibhéal an limistéir muirearaithe i gcomparáid le meánluach na limistéar muirearaithe a bhfuil timpeallacht oibríochtúil agus eacnamaíoch chomhchosúil ag soláthraithe seirbhísí aerloingseoireachta iontu.

(25)

Is iad seo a leanas na spriocanna costéifeachtúlachta faoi bhealach a mholann an Phortaingéil le haghaidh TT4, mar aon leis na luachanna bonnlíne gaolmhara:

(26)

Maidir leis an gcritéar measúnaithe a leagtar amach i bpointe 1.4(a) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go sáraíonn treocht CAAS na Portaingéile ar leibhéal an limistéir muirearaithe le linn TT4, mar atá -2,1 %, an treocht uile-Aontais le linn na tréimhse céanna, mar atá -1,2 %.

(27)

Maidir leis an gcritéar measúnaithe a leagtar amach i bpointe 1.4(b) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go sáraíonn treocht fhadtéarmach CAAS na Portaingéile ar leibhéal an limistéir muirearaithe le linn TT3 agus TT4, mar atá -1,4 %, an treocht fhadtéarmach uile-Aontais le linn na tréimhse céanna, mar atá -1,0 %.

(28)

Maidir leis an gcritéar measúnaithe a leagtar amach i bpointe 1.4(c) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go bhfuil luach bonnlíne na Portaingéile le haghaidh CAAS, mar atá EUR 37.42 i dtéarmaí réadacha ag praghsanna 2022 (‘EUR2022’), +49.3 % níos airde ná meánluach bonnlíne an ghrúpa comparáide ábhartha a leagtar amach in Airteagal 7 de Chinneadh Cur Chun Feidhme (AE) 2024/1688, is é sin EUR 25.06 in EUR2022.

(29)

Mar a shonraítear in aithrisí (26) agus(27), is léir go sáraíonn an Phortaingéil an CAAS uile-Aontais le haghaidh TT4 le corrlach suntasach agus gur fearr í ná an treocht fhadtéarmach CAAS uile-Aontais freisin. Dá bhrí sin, léiríonn an Phortaingéil go mbaintear gnóthachain chostéifeachtúlachta éifeachtacha amach sa mheántéarma agus san fhadtéarma araon. Dá bhrí sin, measann an Coimisiún nach bac é an diall idir luach bonnlíne na Portaingéile agus an ghrúpa comparáide ábhartha dá dtagraítear in aithris (28) ar an bPortaingéil a bheith comhsheasmhach leis na spriocanna feidhmíochta costéifeachtúlachta uile-Aontais.

(30)

Ar bhonn na dtorthaí a leagtar amach in aithrisí (25) go (29), ba cheart a mheas go bhfuil na spriocanna i dtaca leis an réimse tábhachtach feidhmíochta a bhaineann le costéifeachtúlacht atá sa dréachtphlean feidhmíochta comhsheasmhach leis na spriocanna feidhmíochta uile-Aontais le haghaidh TT4.

(31)

I gcomhréir le pointe 2.1(c) d’Iarscríbhinn IV a ghabhann le Rialachán Cur Chun Feidhme (AE) 2019/317, chomhlánaigh an Coimisiún a mheasúnú ar an dréachtphlean feidhmíochta trí athbhreithniú a dhéanamh ar na spriocanna feidhmíochta costéifeachtúlachta le haghaidh seirbhísí aerloingseoireachta críochfoirt a leagtar amach i leith na n-aerfort dá dtagraítear in Airteagal 1(3) agus (4) den Rialachán Cur Chun Feidhme sin sin. Fuarthas amach nach bhfuil na spriocanna sin ina gcúis imní.

(32)

I bhfianaise an mhéid thuas, ba cheart a mheas go bhfuil na spriocanna feidhmíochta atá i ndréachtphlean feidhmíochta na Portaingéile comhsheasmhach leis na spriocanna feidhmíochta uile-Aontais le haghaidh TT4,