CINNEADH TARMLIGTHE (AE) 2025/934 ÓN gCOIMISIÚN

an 5 Márta 2025

lena leasaítear Cinneadh 2000/532/CE a mhéid a bhaineann le nuashonrú ar an liosta dramhaíola i ndáil le dramhaíl a bhaineann le ceallraí

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 2008/98/CE ó Pharlaimint na hEorpa agus ón gComhairle an 19 Samhain 2008 maidir le dramhaíl agus lena n-aisghairtear Treoracha áirithe (1), agus go háirithe Airteagal 7(1) de,

De bharr an mhéid seo a leanas:

(1)	Bunaíodh liosta dramhaíola le Cinneadh 94/3/CE (2) ón gCoimisiún, agus ina dhiaidh sin bunaíodh liosta dramhaíola guaisí le Cinneadh 94/904/CE ón gComhairle. Cuireadh Cinneadh 2000/532/CE ón gCoimisiún (3) in ionad na gCinntí sin.

(2)

Maidir le ceimicí ceallraí nua, go háirithe a mhéid a bhaineann le ceimicí ceallraí litiambhunaithe, ceallraí sóidiambhunaithe agus ceallraí nicilbhunaithe, tá siad tagtha chun cinn le blianta beaga anuas agus tá próisis mhonaraíochta agus athchúrsála do cheallraí forbartha. Cuireadh an éabhlóid sin san áireamh i gcomhthéacs Rialachán (AE) 2023/1542 ó Pharlaimint na hEorpa agus ón gComhairle (4) agus ba cheart í a léiriú sa liosta dramhaíola.

(3)

Thairis sin, tugtar isteach le Rialachán (AE) 2023/1542 téarmaíocht nua agus mhodhnaithe, ar téarmaíocht í is infheidhme maidir le dramhaíl a bhaineann le ceallraí (is é sin, dramhaíl monaraíochta ceallraí, ceallraí dramhaíola agus codáin díobh), rud ba cheart a léiriú sa liosta dramhaíola freisin dá bharr.

(4)

Dá bhrí sin, is gá an liosta dramhaíola a leagtar amach i gCinneadh 2000/532/CE a thabhairt cothrom le dáta chun ceimicí ceallraí nua agus bainistiú dramhaíola a bhaineann le ceallraí, mar aon leis an margadh ceallraí atá ag athrú, a chur san áireamh agus chun feabhas a chur ar shainaithint agus aicmiú sruthanna dramhaíola ábhartha agus chun tacú le sórtáil, athchúrsáil agus tuairisciú feabhsaithe dramhaíola a bhaineann le ceallraí.

(5)

Tá sé fíor-riachtanach sruthanna sonracha dramhaíola a aicmiú mar dhramhaíl ghuaiseach, agus brath ar fhaisnéis atá cothrom le dáta agus bunaithe ar fhianaise maidir le comhdhéanamh agus aicmiú guaise substaintí comhábhair, chun a áirithiú go ndéanfar bainistiú dramhaíola gan sláinte an duine a chur i mbaol agus gan dochar a dhéanamh don chomhshaol. Ba cheart iontrálacha dramhaíola guaisí a áirítear sa liosta dramhaíola a aicmiú agus tionscnamh agus comhdhéanamh na dramhaíola á gcur san áireamh, chomh maith leis na teorainnluachanna tiúchana is infheidhme maidir le substaintí guaiseacha, mar a shainmhínítear go dlíthiúil in Iarscríbhinn III a ghabhann le Treoir 2008/98/CE, le haghaidh substaintí a aicmítear mar shubstaintí guaiseacha, de réir na gcritéar a shainmhínítear i Rialachán (CE) Uimh. 1272/2008 ó Pharlaimint na hEorpa agus ón gComhairle (5).

(6)	Ba cheart aicmiú ceallraí alcaileacha a oiriúnú don dul chun cinn teicniúil agus eolaíoch trí thiúchan na substaintí ábhartha i gceallraí agus aicmiú guaise na gceallraí sin a chur san áireamh i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle.

(7)	Chun rannchuidiú le bainistiú sábháilte agus éifeachtach ceallraí litiambhunaithe dramhaíola de thionscnamh cathrach, ba cheart cód dramhaíola guaisí nua a thabhairt isteach le haghaidh ceallraí litiambhunaithe, lena gcumhdaítear codáin dramhaíola cathrach a bhailítear ar leithligh.

(8)	Dá bhrí sin, ba cheart Cinneadh 2000/532/CE a leasú dá réir.

(9)

Chun go mbeidh oibreoirí agus údaráis in ann na cóid dramhaíola nua agus mhodhnaithe a chur chun feidhme go leormhaith, go háirithe maidir le dramhaíl a aicmítear nó a athaicmítear mar dhramhaíl ghuaiseach, agus chun na hathruithe struchtúracha agus oibríochtúla is gá a dhéanamh ar shaoráidí ina mbainistítear dramhaíl a bhaineann le ceallraí, agus chun gur féidir ceadanna dramhaíola a oiriúnú, a chur isteach agus a phróiseáil, ba cheart cur i bhfeidhm an Chinnidh seo a chur siar,

TAR ÉIS AN CINNEADH SEO A GHLACADH:

Airteagal 1

Leasaítear an Iarscríbhinn a ghabhann le Cinneadh 2000/532/CE i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ón 9 Samhain 2026.

Arna dhéanamh sa Bhruiséil, an 5 Márta 2025.

Thar ceann an Choimisiúin

An tUachtarán

Ursula VON DER LEYEN

(1) IO L 312, 22.11.2008, lch. 3, ELI: http://data.europa.eu/eli/dir/2008/98/oj.

(2) IO L 5, 7.1.1994, p. 15, ELI: http://data.europa.eu/eli/dec/1994/3(1)/oj.

(3) Cinneadh 2000/532/CE ón gCoimisiún an 3 Bealtaine 2000 lena n-ionadaítear Cinneadh 94/3/CE lena mbunaítear liosta dramhaíola de bhun Airteagal 1(a) de Threoir 75/442/CEE ón gComhairle maidir le dramhaíl agus Treoir 94/904/CE ón gComhairle lena mbunaítear liosta de dhramhaíl ghuaiseach de bhun Airteagal 1(4) de Threoir 91/689/CEE ón gComhairle maidir le dramhaíl ghuaiseach (IO L 226, 6.9.2000, lch. 3, ELI: http://data.europa.eu/eli/dec/2000/532/oj).

(4) Rialachán (AE) 2023/1542 ó Pharlaimint na hEorpa agus ón gComhairle an 12 Iúil 2023 maidir le ceallraí agus ceallraí dramhaíola, lena leasaítear Treoir 2008/98/CE agus Rialachán (AE) 2019/1020 agus lena n-aisghairtear Treoir 2006/66/CE (IO L 191, 28.7.2023, lch. 1, ELI: http://data.europa.eu/eli/reg/2023/1542/oj).

(5) Rialachán (CE) Uimh. 1272/2008 ó Pharlaimint na hEorpa agus ón gComhairle an 16 Nollaig 2008 maidir le haicmiú, lipéadú agus pacáistiú substaintí agus meascán, agus lena leasaítear agus lena n-aisghairtear Treoir 67/548/CEE agus Treoir 1999/45/CE, agus lena leasaítear Rialachán (CE) Uimh. 1907/2006 (IO L 353, 31.12.2008, lch. 1, ELI: http://data.europa.eu/eli/reg/2008/1272/oj).

IARSCRÍBHINN

Leasaítear an Iarscríbhinn a ghabhann le Cinneadh 2000/532/CE ón gCoimisiún mar a leanas:

(1)

cuirtear an méid seo a leanas in ionad iontráil 09 01 11*:

‘09 01 11*

ceamaraí aon-úsáide ina bhfuil ceallraí a áirítear in 16 06 01 go 16 06 04, 16 06 07 go 16 06 11 nó 16 06 14‘;

(2)

cuirtear na hiontrálacha seo a leanas isteach i ndiaidh iontráil 10 08 20:

‘10 08 21*	slaigeanna ó athchúrsáil ceallraí litiambhunaithe dramhaíola a bhfuil substaintí guaiseacha iontu
10 08 22	slaigeanna ó athchúrsáil ceallraí litiambhunaithe dramhaíola seachas na cinn a luaitear in 10 08 21
10 08 23*	slaigeanna ó athchúrsáil ceallraí nicilbhunaithe dramhaíola a bhfuil substaintí guaiseacha iontu
10 08 24	slaigeanna ó athchúrsáil ceallraí nicilbhunaithe dramhaíola seachas na cinn a luaitear in 10 08 23
10 08 25*	slaigeanna ó athchursáil ceallraí dramhaíola eile ina bhfuil substaintí guaiseacha seachas 10 04 01, 10 08 21 agus 10 08 23
10 08 26	slaigeanna ó athchúrsáil ceallraí dramhaíola eile seachas na cinn a luaitear in 10 08 25‘;

(3)

cuirtear an méid seo a leanas in ionad Chaibidil 16 06:

‘16 06	Dramhaíl ó mhonarú, soláthar agus úsáid ceallraí
16 06 01*	ceallraí luaidhe-aigéadacha dramhaíola
16 06 02*	ceallraí caidmiam nicile dramhaíola
16 06 03*	ceallraí mearcair dramhaíola
16 06 04*	ceallraí alcaileacha dramhaíola (seachas na ceallraí a luaitear in 16 06 03)
16 06 06*	leictrilít a bhailítear ar leithligh ó cheallraí dramhaíola
16 06 07*	ceallraí litiambhunaithe dramhaíola
16 06 08*	Ceallraí nicilbhunaithe dramhaíola seachas na ceallraí a luaitear in 16 06 02 (mar shampla NiMH, Na-NiCl2)
16 06 09*	ceallraí sincbhunaithe dramhaíola, lena n-áirítear ceallraí ocsaíde airgid
16 06 10*	ceallraí sóidiambhunaithe dramhaíola ina bhfuil substaintí guaiseacha (seachas 16 06 11)
16 06 11*	ceallraí sulfair sóidiam dramhaíola
16 06 12	ceallraí sóidiambhunaithe dramhaíola eile (seachas 16 06 10 agus 16 06 11)
16 06 13*	ceallraí dramhaíola measctha
16 06 14*	ceallraí dramhaíola eile ina bhfuil substaintí guaiseacha
16 06 15	ceallraí dramhaíola nach sonraítear ar bhealach eile seachas na ceallraí a luaitear in 16 06 12 agus 16 06 14
16 06 22*	dramhaíl monaraíochta ceallraí luaidhe-aigéadacha a bhfuil substaintí guaiseacha iontu (mar shampla, taos luaidhe)
16 06 23	dramhaíl monaraíochta ceallraí luaidhe-aigéadacha seachas an dramhaíl a luaitear in 16 06 22
16 06 24*	dramhaíl monaraíochta ceallraí litiambhunaithe a bhfuil substaintí guaiseacha iontu (mar shampla, gearrthóga catóide, sciodar catóide, cealla ceallraí, modúil agus/nó pacáistí lasmuigh den tsonraíocht)
16 06 25	dramhaíl monaraíochta ceallraí litiambhunaithe seachas an dramhaíl a luaitear in 16 06 24 (mar shampla, gearrthóga anóide)
16 06 26*	dramhaíl monaraíochta ceallraí nicilbhunaithe a bhfuil substaintí guaiseacha iontu (mar shampla, ábhar catóideach i bhfoirm leachtach nó sholadach)
16 06 27	dramhaíl monaraíochta ceallraí nicilbhunaithe seachas an dramhaíl a luaitear in 16 06 26
16 06 28*	dramhaíl monaraíochta ceallraí alcaileacha a bhfuil substaintí guaiseacha iontu
16 06 29	dramhaíl monaraíochta ceallraí alcaileacha seachas an dramhaíl a luaitear in 16 06 28
16 06 30*	dramhaíl monaraíochta ceallraí sincbhunaithe a bhfuil substaintí guaiseacha iontu
16 06 31	dramhaíl monaraíochta ceallraí sincbhunaithe seachas an dramhaíl a luaitear in 16 06 30
16 06 32*	dramhaíl monaraíochta ceallraí sóidiambhunaithe a bhfuil substaintí guaiseacha iontu
16 06 33	dramhaíl monaraíochta ceallraí sóidiambhunaithe seachas an dramhaíl a luaitear in 16 06 32
16 06 34*	dramhaíl monaraíochta ceallraí ina bhfuil substaintí guaiseacha seachas an dramhaíl a luaitear in 16 06 22, 16 06 24, 16 06 26, 16 06 28, 16 06 30 agus 16 06 32
16 06 35	dramhaíl monaraíochta ceallraí seachas an dramhaíl a luaitear in 16 06 23, 16 06 25, 16 06 27, 16 06 29, 16 06 31 agus 16 06 33‘;

(4)

Scriostar iontráil 19 02 11*:

(5)

Cuirtear isteach na hiontrálacha seo a leanas:

‘19 02 12*	salainn sholadacha agus tuaslagáin ina bhfuil miotail throma ó athchúrsáil ceallraí
19 02 13*	dramhaíl eile ina bhfuil substaintí guaiseacha‘;

(6)

cuirtear na hiontrálacha seo a leanas isteach i ndiaidh iontráil 19 13 08:

‘19 14	codáin idirmheánacha ó chóireáil theirmeach agus/nó mheicniúil ceallraí dramhaíola agus dramhaíl monaraíochta ceallraí
19 14 01*	codán idirmheánach ó chóireáil theirmeach agus/nó mheicniúil ceallraí luaidhe-aigéadacha dramhaíola agus dramhaíl monaraíochta ceallraí luaidhe-aigéadacha a bhfuil meascán d’ábhair leictreoide iontu
19 14 02*	codán idirmheánach ó chóireáil theirmeach agus/nó mheicniúil ceallraí litiambhunaithe dramhaíola agus dramhaíl monaraíochta ceallraí litiambhunaithe a bhfuil meascán d’ábhair leictreoide iontu
19 14 03*	codán idirmheánach ó chóireáil theirmeach agus/nó mheicniúil ceallraí nicilbhunaithe dramhaíola agus dramhaíl monaraíochta ceallraí nicilbhunaithe a bhfuil meascán d’ábhair leictreoide iontu
19 14 04*	codán idirmheánach ó chóireáil theirmeach agus/nó mheicniúil ceallraí alcaileacha dramhaíola agus dramhaíl monaraíochta ceallraí alcaileacha a bhfuil meascán d’ábhair leictreoide iontu
19 14 05*	codán idirmheánach ó chóireáil theirmeach agus/nó mheicniúil ceallraí sincbhunaithe dramhaíola agus dramhaíl monaraíochta ceallraí sincbhunaithe a bhfuil meascán d’ábhair leictreoide iontu
19 14 06*	codán idirmheánach ó chóireáil theirmeach agus/nó mheicniúil ceallraí sóidiambhunaithe dramhaíola agus dramhaíl monaraíochta ceallraí sóidiambhunaithe a bhfuil meascán d’ábhair leictreoide iontu
19 14 07*	codán idirmheánach ó chóireáil theirmeach agus/nó mheicniúil ceallraí dramhaíola agus dramhaíl monaraíochta ceallraí a bhfuil meascán d’ábhair leictreoide iontu, nach sonraítear ar bhealach eile in 19 14 01 go 19 14 06
19 14 08	Cóimhiotail ó athchúrsáil ceallraí dramhaíola (i bhfoirm théagartha)‘;

(7)	scriostar iontrálacha 20 01 33* agus 20 01 34;

(8)

cuirtear na hiontrálacha seo a leanas isteach i ndiaidh iontráil 20 01 41:

‘20 01 42*	ceallraí dramhaíola a áirítear in 16 06 01 go 16 06 04, 16 06 08 go 16 06 11 nó 16 06 14 agus ceallraí dramhaíola measctha ina bhfuil na ceallraí dramhaíola sin lena n-áirítear 16 06 07 freisin
20 01 43*	ceallraí litiambhunaithe dramhaíola a áirítear in 16 06 07.
20 01 44	ceallraí dramhaíola seachas na ceallraí a luaitear in 20 01 42 agus 20 01 43‘.