(1)

Le Rialachán (CE) Uimh. 1272/2008 ó Pharlaimint na hEorpa agus ón gComhairle (2) déantar foráil maidir le haicmiú comhchuibhithe substaintí mar shubstaintí atá carcanaigineach, só-ghineach nó tocsaineach don atáirgeadh (CMR) bunaithe ar mheasúnú eolaíoch arna dhéanamh ag an gCoiste um Measúnú Riosca de chuid na Gníomhaireachta Eorpaí Ceimiceán. Déantar na substaintí a aicmiú mar shubstaintí CMR de chatagóir 1A, de chatagóir 1B nó de chatagóir 2 ag brath ar an leibhéal fianaise i dtaca lena n-airíonna CMR.

(2)

Le hAirteagal 15 de Rialachán (CE) Uimh. 1223/2009, foráiltear go gcuirfear toirmeasc ar shubstaintí atá aicmithe mar shubstaintí CMR de chatagóir 1A, 1B nó 2 faoi Chuid 3 d’Iarscríbhinn VI a ghabhann le Rialachán (CE) Uimh. 1272/2008 (substaintí CMR) a úsáid i dtáirgí cosmaideacha. Féadfar substaint CMR a úsáid i dtáirgí cosmaideacha, áfach, i gcás ina gcomhlíontar na coinníollacha a leagtar síos in Airteagal 15(1), an dara habairt, de Rialachán (CE) Uimh. 1223/2009 nó in Airteagal 15(2), an dara fomhír, den Rialachán sin.

(3)

Chun an toirmeasc ar shubstaintí CMR a chur chun feidhme go haonfhoirmeach laistigh den mhargadh inmheánach, chun deimhneacht dhlíthiúil a áirithiú, go háirithe le haghaidh oibreoirí eacnamaíocha agus údaráis inniúla náisiúnta, agus chun ardleibhéal cosanta do shláinte an duine a áirithiú, ba cheart gach substaint CMR a áireamh i liosta na substaintí a bhfuil toirmeasc orthu in Iarscríbhinn II a ghabhann le Rialachán (CE) Uimh. 1223/2009 agus, i gcás inarb ábhartha, é a scriosadh ó na liostaí de shubstaintí srianta nó ceadaithe in Iarscríbhinní III go VI a ghabhann leis an Rialachán sin. I gcás ina gcomhlíontar na coinníollacha a leagtar síos in Airteagal 15(1), an dara habairt, de Rialachán (CE) Uimh. 1223/2009 nó in Airteagal 15(2), an dara fomhír, den Rialachán sin, ba cheart na liostaí de shubstaintí srianta nó ceadaithe in Iarscríbhinní III go VI a ghabhann leis an Rialachán sin a leasú dá réir.

(4)

Cumhdaítear leis an Rialachán seo na substaintí a aicmítear mar shubstaintí CMR de réir Rialachán Tarmligthe (AE) 2024/197 ón gCoimisiún (3) (‘na substaintí ábhartha’). Beidh feidhm ag Rialachán Tarmligthe (AE) 2024/197 ón 1 Meán Fómhair 2025.

(5)

Níor cuireadh isteach aon iarraidh maidir le húsáid na substaintí ábhartha i dtáirgí cosmaideacha mar eisceacht air sin.

(6)

Maidir leis an tsubstaint ‘ocsaíd défheinil(2,4,6-trímheitilbeansóil)foisfín’ (Uimh. CAS 75980-60-8), lena ngabhann an t-ainm ‘Ocsaíd Défheiniolfoisfín Trímheitilbeansóile’ faoi Ainmníocht Idirnáisiúnta na gComhábhar Cosmaideach, liostaítear í in iontráil 311 d’Iarscríbhinn III a ghabhann le Rialachán (CE) Uimh. 1223/2009 agus, dá bhrí sin, ceadaítear í le haghaidh úsáid ghairmiúil i gcórais ingne saorga ag uastiúchan de 5 %.

(7)

I bhfianaise ‘Ocsaíd Défheiniolfoisfín Trímheitilbeansóile’ a aicmiú mar shubstaint CMR de chatagóir 1B (Tocsaineach don Atáirgeadh), níor cheart an tsubstaint sin a cheadú i dtáirgí cosmaideacha a thuilleadh. Dá bhrí sin, ba cheart iontráil 311 d’Iarscríbhinn III a ghabhann le Rialachán (CE) Uimh. 1223/2009 a scriosadh agus ba cheart an tsubstaint a áireamh ar liosta na substaintí toirmiscthe in Iarscríbhinn II a ghabhann leis an Rialachán sin.

(8)

Maidir leis an tsubstaint ‘2-ciana-N-[(eitiolaimínea)carbóinil]-2-(meiteocsaimínea)aicéataimíd’ (CAS 57966-95-7), lena ngabhann an t-ainm ISO ‘ciamocsainil’, a aicmíodh mar shubstaint atá Tocsaineach don Atáirgeadh de Chatagóir 2, liostaítear í in iontráil 1580 d’Iarscríbhinn II a ghabhann le Rialachán (CE) Uimh. 1223/2009 agus, dá bhrí sin, tá toirmeasc ar a húsáid i dtáirgí cosmaideacha. Mar sin féin, ní áirítear in iontráil 1580 an t-ainm ceimiceach breise ‘(2E)-2-ciana-N-[(eitiolaimínea)carbóinil]-2-(meatocsaimínea)aicéataimíd’ ná an uimhir CAS a bhaineann leis an ainm ceimiceach sin dá dtagraítear i Rialachán Tarmligthe (AE) 2024/197. Ar mhaithe le soiléireacht agus deimhneacht dhlíthiúil, ba cheart iontráil 1580 a oiriúnú ionas go mbeidh an t-ábhar céanna inti agus atá san iontráil chomhfhreagrach i Rialachán (CE) Uimh. 1272/2008.

(9)

Ní liostaítear aon cheann de na substaintí ábhartha eile faoi láthair i Rialachán (CE) Uimh. 1223/2009. Dá réir sin, ba cheart iad a chur le liosta na substaintí a bhfuil toirmeasc orthu i dtáirgí cosmaideacha in Iarscríbhinn II a ghabhann leis an Rialachán sin.

(10)

Dá bhrí sin, ba cheart Rialachán (CE) Uimh. 1223/2009 a leasú dá réir.

(11)

Tá na leasuithe ar Rialachán (CE) Uimh. 1223/2009 bunaithe ar aicmithe na substaintí ábhartha mar shubstaintí CMR agus dá bhrí sin ba cheart feidhm a bheith acu ón dáta céanna a bheidh feidhm ag na haicmithe sin.

(12)

Tá na bearta dá bhforáiltear sa Rialachán seo i gcomhréir le tuairim an Bhuanchoiste um Tháirgí Cosmaideacha,