(1).

Le hAirteagal 30j(1) de Threoir 2003/87/CE ó Pharlaimint na hEorpa agus ón gComhairle, tugtar an deis do na Ballstáit, ó 2027 ar aghaidh, leathnú a dhéanamh, go haontaobhach, ar chur i bhfeidhm an chórais trádála astaíochtaí laistigh den Aontas (‘CTA AE’) le haghaidh foirgneamh, iompar de bhóthar agus earnálacha breise chun earnálacha a chumhdach nach liostaítear in Iarscríbhinn III a ghabhann le Treoir 2003/87/CE.

(2).

Agus leas á bhaint ag na Ballstáit as an deis sin, cuirfidh siad san áireamh go háirithe na héifeachtaí ar an margadh inmheánach, saobhadh iomaíochta féideartha, sláine comhshaoil an chórais trádála astaíochtaí agus iontaofacht an chórais faireacháin agus tuairiscithe atá beartaithe.

(3).

An 19 Nollaig 2024, thug an Fhionlainn fógra faoi iarraidh ar chur i bhfeidhm an chórais trádála astaíochtaí le haghaidh foirgneamh, iompar de bhóthar agus earnálacha breise a leathnú chun liosta earnálacha a chumhdach nach gcumhdaítear go fóill le hIarscríbhinn III a ghabhann le Treoir 2003/87/CE ná le Caibidlí II agus III den Treoir sin.

(4).

Mhínigh údaráis na Fionlainne, le cuimsiú earnálacha breise, go laghdófaí an t-ualach riaracháin agus go n-éascófaí na próisis tuairiscithe agus faireacháin le haghaidh na n-eintiteas rialáilte agus an údaráis inniúil náisiúnta. Ina theannta sin, bheadh praghsáil níos aonfhoirmí ar dhé-ocsaíd charbóin i measc na n-earnálacha mar thoradh air.

(5).

I dtuairim an Choimisiúin, dá leathnófaí raon feidhme CTA AE thar an liosta gníomhaíochtaí a liostaítear faoi Iarscríbhinn III a ghabhann le Treoir 2003/87/CE, mar a d’iarr an Fhionlainn, bheadh tairbhí comhshaoil ann go deimhin, agus bheadh simpliú riaracháin i gceist do sholáthróirí breosla atá ag gníomhú mar eintitis rialáilte san Fhionlainn.

(6).

Ar bhonn na sonraí athbhreithnithe maidir le hastaíochtaí gás ceaptha teasa le haghaidh 2016, 2017 agus 2018 a rinneadh in 2020, i gcomhréir le hAirteagal 4(3) de Rialachán (AE) 2018/842 ó Pharlaimint na hEorpa agus ón gComhairle (2), is é 1 179 206 tCO2 meánmhéid iomlán na n-astaíochtaí a chomhfhreagraíonn do na hearnálacha ar thug an Fhionlainn fógra fúthu i gcomhthéacs na hiarrata sin ar leathnú aontaobhach. Úsáidfear an méid sin mar bhonn chun méid na lamháltas breise a bheidh le heisiúint amach anseo ó 2027 ar aghaidh a ríomh.

(7).

Rinne an Coimisiún measúnú ar na modheolaíochtaí tuairiscithe agus faireacháin atá beartaithe ag an bhFionlainn agus tháinig sé ar an gconclúid go bhfuil siad iontaofa agus i gcomhréir le ceanglais Airteagal 30j de Threoir 2003/87/CE.

(8).

Leis an gcóras dleachta máil atá i bhfeidhm san Fhionlainn, go háirithe na bonneagair dháileacháin, ní chuirtear é ar a gcumas go héifeachtach d’eintitis rialáilte úsáid deiridh breoslaí a idirdhealú idir earnálacha a chumhdaítear cheana féin le hIarscríbhinn III a ghabhann le Treoir 2003/87/CE ar thaobh amháin, agus na hearnálacha lena mbaineann an leathnú raoin feidhme seo ar an taobh eile. Chun faireachán, tuairisciú agus fíorú costéifeachtach ar astaíochtaí a éascú agus chun an t-ualach riaracháin a laghdú a bhaineann le tuairisciú atá bainteach leis an bhfachtóir raoin sna tuarascálacha astaíochtaí bliantúla agus sna pleananna faireacháin, níor cheart a cheangal ar eintitis rialáilte idirdhealú a dhéanamh idir tuairisciú astaíochtaí in earnálacha lena mbaineann leathnú an raoin feidhme agus astaíochtaí in earnálacha a chumhdaítear cheana féin le hIarscríbhinn III a ghabhann le Treoir 2003/87/CE.

(9).

Chun an timthriall bliantúil tráthrialta a chomhlíonadh maidir le faireachán, tuairisciú agus fíorú a dhéanamh ar astaíochtaí sa chóras trádála astaíochtaí nua le haghaidh foirgneamh, iompar de bhóthar agus earnálacha breise, is iomchuí go ndéanfadh eintitis rialáilte astaíochtaí fíoraithe don raon feidhme leathnaithe dar thús an 1 Eanáir 2025 a thuairisciú, i gcomhréir le hAirteagal 30f(2) de Threoir 2003/87/CE,