(1)

Is galar víreasach tógálach é an galar crúb agus béil a bhíonn ar ainmhithe in ord mamach Artiodactyla agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráig den ghalar crúb agus béil in ainmhithe in ord mamach Artiodactyla, tá baol suntasach ann go leathfadh an galar sin go bunaíochtaí eile ina bhfuil ainmhithe soghabhálacha ar coimeád.

(3)

Le Rialachán Tarmligthe 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, foráiltear in Airteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar i gcatagóir A, lena n-áirítear an galar crúb agus béil, agus maidir le bearta áirithe a bheidh le cur i bhfeidhm ann. Ina theannta sin, déantar foráil le hAirteagal 21(1) den Rialachán Tarmligthe sin go gcuimseoidh an crios srianta crios cosanta, crios faireachais, agus, más gá, criosanna srianta breise timpeall na gcriosanna cosanta agus faireachais nó cóngarach dóibh.

(4)

Chuir an Ungáir an Coimisiún ar an eolas faoi staid reatha an ghalair crúb agus béil ar a críoch, tar éis ráig den ghalar sin i mbunaíocht ina gcoimeádtar bó-ainmhithe i gContae Győr-Moson-Sopron san Ungáir, ráig a deimhníodh an 6 Márta 2025, atá an-ghar don teorainn leis an tSlóvaic. I gcomhréir le Rialachán Tarmligthe (AE) 2020/687, bhunaigh an Ungáir crios srianta, ina gcuimsítear criosanna cosanta agus faireachais, ina gcuirtear i bhfeidhm na bearta rialaithe galar a leagtar síos sa Rialachán Tarmligthe sin, chun leathadh breise an ghalair sin a chosc. Tá an Coimisiún curtha ar an eolas ag an tSlóvaic freisin, tar éis na tuairisce ar ionfhabhtú galair crúb agus béil san Ungáir gar dá teorainn, go bhfuil crios faireachais bunaithe ar a críoch aici i gcomhar leis an Ungáir, i gcomhréir le Rialachán Tarmligthe (AE) 2020/687.

(5)

Chun aon suaitheadh nach bhfuil gá leis ar thrádáil laistigh den Aontas a chosc agus chun bacainní gan údar ar thrádáil ag tríú tíortha a sheachaint, is gá an crios srianta i dtaca leis an ngalar crúb agus béil, ina bhfuil na criosanna cosanta agus faireachais, a shainaithint go tapa ar leibhéal an Aontais san Ungáir agus sa chrios faireachais sa tSlóvaic, i gcomhar leis na Ballstáit sin.

(6)

Bunaíodh méid na gcriosanna cosanta agus faireachais agus fad na mbeart atá le cur i bhfeidhm sna criosanna sin ar na critéir a leagtar síos in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687, lena n-áirítear an staid eipidéimeolaíoch a mhéid a bhaineann leis an ngalar crúb agus béil sna limistéir atá buailte ag an ngalar sin, agus staid eipidéimeolaíoch fhoriomlán san Ungáir maidir leis an ngalar sin, mar aon leis an leibhéal riosca maidir le leathadh breise an ghalair.

(7)

Dá réir sin, ba cheart na limistéir a aithnítear mar chriosanna cosanta agus faireachais san Ungáir, agus an crios faireachais sa tSlóvaic, a leagan amach san Iarscríbhinn a ghabhann leis an gCinneadh seo agus ba cheart fad an réigiúnaithe sin a shocrú.

(8)

I bhfianaise a phráinní atá an staid eipidéimeolaíoch san Ungáir a mhéid a bhaineann le leathadh an ghalair crúb agus béil agus an ghá cosc a chur ar leathadh an ghalair sin ón mbunaíocht atá buailte san Ungáir go codanna eile den Bhallstát sin nó go Ballstáit eile nó go tríú tíortha, is iomchuí go mbeadh feidhm ag na bearta a leagtar síos sa Chinneadh Cur Chun Feidhme seo a luaithe is féidir.

(9)

Dá réir sin, go dtí go bhfaighfear tuairim ón mBuanchoiste um Plandaí, Ainmhithe, Bia agus Beatha, ba cheart na criosanna cosanta agus faireacháin agus na criosanna srianta san Ungáir, agus an crios faireachais sa tSlóvaic, a bhunú láithreach agus a liostú san Iarscríbhinn a ghabhann leis an gCinneadh seo, go dtí na dátaí a leagtar amach ann.

(10)

Tá an Cinneadh seo le hathbhreithniú ag an gcéad chruinniú eile den Bhuanchoiste um Plandaí, Ainmhithe, Bia agus Beatha,